Territorial Men 1: Colton Altaraza (Published under LIB Bare)

9 ~ Bikini

Chapter Nine

TUNAY nga talagang may mga bagay na gustuhin man natin ay hindi mapapasatin, lalo pa't matagal ng nakalaan iyon sa iba. Kung dati-rati ay ninanais niyang manatili sa Villa Altaraza ng mas matagal pa, ngayon na sinang-ayunan na ni Colton ang hinuha niyang nalalapit nitong pagpapakasal, parang sinasakal siya ng sarili niyang kagagawan.

But who's to blame? Nagmahal lang naman ang puso niya... 'yon nga lang, do'n pa sa taong hindi na dapat pang mahalin.

"Miss Karen, baka gusto mong sumama sa amin mamaya?" Untag sa kanya ni Esmeralda.

Nagdidilig ito sa malawak na hardin ng mansion, kung saan ilang metro lang ang layo sa fountain. Araw ng Linggo ngayon, ang rest day na ibinigay sa kanya ni Colton.

"Saan naman?" Tanong niya, nakamasid dito.

"Sa Resort. Mag night swimming tayo." Lumingon ito sa kanya, nakangisi. "Sama ka ha."

"S-sige, wala din naman akong gagawin. Anong oras ba?"

"Bago mananghalian ay tutulak na tayo do'n. Kami na ang bahala sa pagkain natin." Tumango-tango siya. "Free entrance din naman tayo do'n kaya wala na masyadong iisipin."

"Sinu-sino ba tayo?"

"Ako, ikaw, si Manong Alfred at ang asawa niyang cook dito. Si Ricky at sasama din si Wenna." Tukoy nito sa isa pang kasambahay na nakatoka naman sa paglalaba. Muli ay nilingon siya ni Esmeralda. "At ang alam ko ay makikisali din sa atin si Sir Jonas," Hindi maalis ang ngisi sa labi nito.

"Si Jonas? 'Yung Therapist ni Colton?"

Mabilis itong tumango. "Oo, Miss Karen.  Mabait ang batang 'yon, nakikihalubilo. At isa pa ay gwapo!"

K chuckled. "Tama lang ang ginagawa niya para hindi siya mainip dito."

Sa Resort tumutuloy si Jonas, iyon ang alam niya. Mananatili ito do'n hanggat hindi pa natatapos ang session ni Colton. Siya kaya? Hanggang kailan mananatili? Gayong nakikita niya na ang mabilis na improvement sa paglalakad ni Colton. Hindi na siya magtataka kung isang araw ay aalis na siya sa mansion.

"Balita ko nga at marami ang nagkakagusto do'n. Mga waitress at receptionist ng Resort."

"Tiyak na hindi nga siya maiinip kung gano'n." Sabay silang nagtawanan ni Esmeralda at natigil iyon ng marinig ang pamilyar na boses sa likod nila.

"Oras ng trabaho at bakit kayo nagtsitsismisan riyan?" Patuya na sabi sa kanila ni Gail.

Umikot ang mata niya sa iritasyon. "Makaalis na nga." Mahinang paalam niya kay Esmeralda na ngayon ay seryoso na sa pagdidilig.

"Basta, mamaya Miss Karen ha." Bulong nito. Tango lang ang naisagot niya at tinalikuran na. Ayaw niyang pati ito ay madamay.

Sa entrada ay nakita niyang nakapameywang sa kanila si Gail. Suot ang white short shorts at asul na pang-itaas na litaw ang cleavage, nakita ang ganda ng hubog ng katawan nito. Lalo lang tuloy siyang sinampal ng katotohanan na kung sa pisikal na anyo ang pag-uusapan, Colton won the jackpot. Aware naman kaya ang lalaki sa kagaspangan ng ugali ng fiance?

Malapit na siya sa entrada at nanatili itong nakatayo do'n. Mas mataas lang ito ng kaunti sa kanya, gayon pa man ay hindi naman siya ginagapangan ng takot kung sakaling magpang-abot na naman sila.

"Excuse me." Casual na sabi niya ngunit hindi man lang ito gumalaw.

Nang tignan niya ito ay nakaarko ang isang kilay nito, nanghahamon. Malalim siyang bumuntong hininga. Paano nga ba siya iiwas sa away kung ang away mismo ang lumalapit sa kanya?