Kabiguan Ng Manunulat

Damong Ligaw

Sa maling desisyon, isang dalaga'y sumakay

Sasakyang sira, paurong ang andar

Sugat ng maging padalos-dalos

Di maaruk sa lalim, pako'y tagos sa kaluluwa.

Saya'y akala'y dali-daling maaangkin

Hinawakang pangako'y bitag 

Paraisong gawa sa hangin

Kaya't nalugmok ang pangarap sa putik.

Damong ligaw binansag ng kanyang pamilya

Sa malahardeng tahana'y dungis

Sagitsit sa kawali, araw-araw ginigisa

Awa sa sarili at higit sa buhay ng nasa sinapupunan n'ya.

Maging mga peste ay nagdiwang sa harden

Isang kamatis na bulok, paghawa'y kanilang idinidiin

Ano nga ba't tao'y nagmamalinis

Tulungan sana ang nadapa'y lalong sinubsob.

Damong ligaw, damong ligaw

Salitang inulit-ulit

Dapat bunutin, dapat lasunin

Limot nilang itong damo'y salamin ang damdamin

Ngunit tumayo ang damong ligaw imbes na yumuko

Damdaming salami'y 'di hinayaang mabasag

Kinamangha ng lahat, namulaklak itong damo 

Samyo't ganda'y 'di maitutulad sa anumang bulaklak...