Kabiguan Ng Manunulat

Paalam Daddy

Paalam daddy

Sadyang ikaw saki'y natatangi

Patawad sa gabuhangin kong mga pagkakamali

Sa lahat ng kahihiyang ako ang sanhi

Daddy naalala ko pa ang kwento

Sobrang saya mo raw noong unang nabanggit ko'y pangalan mo

Noong ako'y bata pa ikaw lagi ang kasama

Katabi sa pagtulog, kalaro sa umaga

Ngunit dumating ang panahong lumago aking bigote

Kasabay tumubo aking sungay noong mapadpad ako sa kalye

Natuto sa mga bagay na mali

Inom, sugal, usok at babae

Paalam daddy

Sadyang ika'y napakabuti

Pilit mong tinutuwid aking pagkakamali

Ngunit bato sa tigas ang utak kong di mawari

Ang di makapagpaalam sa iyo'y sadyang anong saklap

Napakasama ko sa pinakahuli nating pag-uusap

Nagmura ako't alam kong nasaktan kita ng labis

Namasid ko sa iyong mata ang nagbabadyang tangis

Daddy naririnig mo pa ba ako

Ang aking pagsisisi umiikot ng walang hinto

Ngunit huli na ang lahat alam ko

Di ko na maibabalik ang natapus na yugto

Paalam daddy

Ang oras ay sadyang nagmamadali

Narito na ang aking sundo upang walang hanggang managhoy

Dahil alam kong sa ginawa ko'y dadalhin n'ya na ako sa dagatang apoy

Written: July 1, 2015 @ 10:20 pm

Totoo kaya na ang nagpapakamatay ay napupunta sa impyerno...

Mysterious Aries