Special Episode
သိမ်မွေ့ထည်အတွက် ဝယ်ပေးထားတဲ့ သိုးမွှေးခြေအိတ်အဖြူရောင်လေးကို ကိုင်ပြီး သက်လွှာ တစ်ဖက်အခန်းသို့ ကူးလာမိသည်။ တကယ်တော့ ညစာအတူဆင်းစားဖို့ လာခေါ်ခြင်းဖြစ်၏။ ဒါပေမဲ့ ခုတင်ပေါ်မှာ ဘေးတစောင်းလေး လှဲအိပ်နေတဲ့ သိမ်မွေ့ထည်ကိုမြင်ပြီး သက်လွှာ စိတ်ပူသွားသည်။
အခန်းထဲဝင်လာတဲ့ သက်လွှာရဲ့ ခြေသံကိုကြားတော့ သိမ်မွေ့ထည် မျက်လုံးလေးကို ဖွင့်ကြည့်၏။
" သက်လွှာ .. "
တိုးဖျော့ဖျော့လေသံလေးနဲ့ သိမ်မွေ့ထည် ခေါ်လိုက်တော့ သက်လွှာ စိုးရိမ်တကြီးနဲ့ အနားကို ခပ်သွက်သွက်လျှောက်သွားမိရင်း
" တီလေး နေမကောင်းဘူးလားဟင် "
" အင်း .. နည်းနည်း .. နေလို့မကောင်းဘူး သက်လွှာရယ် "
" ဘယ်လိုနေလို့ မကောင်းတာလဲဟင်။ ဖျားချင်နေတာလား "
မေးလည်းမေး ခုတင်စောင်းမှာ ဝင်ထိုင်လိုက်ရင်း သူ့တီလေးရဲ့ နဖူးကို သက်လွှာ လက်ဖဝါးလေးဖြင့် အုပ်၍ စမ်းကြည့်နေလေသည်။ သိမ်မွေ့ထည်ကတော့ သူ့ကလေးရဲ့ မျက်နှာကို အရောင်ဖျော့တော့နေတဲ့ မျက်ဝန်းလေးတွေနဲ့ ကြည့်နေရှာသည်။
" တော်သေးတယ် ကိုယ်တော့ မပူဘူးပဲ "
" ဒီတိုင်း ခြေတွေလက်တွေ ကိုက်ခဲနေရုံတင်ပါ။ စိတ်မပူနဲ့နော် "
" မနက်က လေ့ကျင့်ခန်းလုပ်ထားရလို့ဖြစ်မယ်။ တီလေးက နည်းနည်းလေးတောင် မနားပဲ ဆက်တိုက်လျှောက်တာကိုး။ တကယ်ဆိုရင် ခဏထိုင်လိုက် ဆက်လျှောက်လိုက် လုပ်ရမှာ "
" အင်းပါ။ နောက်တစ်ခါဆိုရင် တီလေးနားနားပြီး လေ့ကျင့်မယ်နော် "
ပြုံးပြုံးလေးနဲ့ မော့ကြည့်ပြီးပြောနေတဲ့ သိမ်မွေ့ထည်ကို သက်လွှာ မျက်စောင်းလေးတစ်ချက်ထိုးလိုက်ပြီး
" အခု ညစာ ဆင်းစားကြပြီး အကိုက်ခဲပျောက်ဆေးလေးတစ်လုံးလောက် သောက်ထားလိုက်ရင် ကောင်းမယ်ထင်တယ် တီလေး "
" ဆေးက ညနေကတည်းက သောက်ထားပြီးသား သက်လွှာ "
" ဟင် အဲ့ဒါတောင် မသက်သာသေးတာလား "
YOU ARE READING
Elegant
Romanceလှပကြော့ရှင်းသော ချစ်ခြင်းမေတ္တာသည် အမုန်းတရားမှ စတင်ပေါက်ဖွားလာခြင်းဖြစ်၏။ Own Creation by Moe(JE Rain)
