Bloody Moon - Taekook Nonfic

Chapter 1

"ග්‍රෙගෝ, හැකි ඉක්මණින් කුමරු රැගෙන ආරක්ෂිත තැනකට පිටව යන්න..ඔවුන් දැනටමත් අපගේ සීමාව ආක්‍රමණය කොට අවසන්.. අප හැකිතරම් වේලාවක් ඔවුන් නවතාගන්නම්.. කරුණාකර මගේ පුත් කුමරා තනිනොකර නියමිත කාලය එළඹෙන තෙක් ඔහුට ආරක්ෂාව සපයන්න.. මේ මොහොතේ මට විශ්වාස කළ හැකි එකම පුද්ගලයා නුඹයි..මා දන්නවා  ඔබ ඒ විශ්වාසය රකින බව..දැන් ඉක්මණින් මෙතැනින් පිටව යන්න ග්‍රෙගෝ..."

"රැජිණියනි, මා ඔබතුමියට පොරොන්දු වෙනවා මගේදිවි ඇති තුරා කුමරුව රැකබලාගන්නා බවට..පරිස්සම් වන්න රැජිණියනි.."

තම රැජිණියට හිසනමා ආචාර කරමින් එසේ කියූ ග්‍රෙගෝ නම් තරුණ ඇල්ෆා රැජිනගේ තුරුලේ සනීපයට ගුලිවෙලා නිදන් හිටිය පුංචි කුමාරයාව තම දෝතට ගනිමින් එතැනින් පිටව ගියේ වෘක රාජධානියේ අනාගතය පිළිබඳ තිගැස්මක් හිත තුළ සඟවගෙනයි...

වේදනාත්මක කෙඳිරිලි, කෑගැසීම් අතරේ රෞද්‍ර ගෙරවුම් හඬවල් තම තියුණු දෙසවන් හරහා ගමන් කරද්දි තදඅළු පැහැ හැඩිදැඩි,ශක්තිමත් වෘකයෙක් හීයක වේගයෙන් ඉදිරියට ඇදුණේ තම පිට මත ඇති ලොම් අතර ගුලි වී සැපට නිදන් ඉන්න පුංචි ගැලවුම්කාරයා ආරක්ශා කිරීමේ අරමුණෙන්.

ඝන අන්ධකාරය මුළු පරිසරයම වෙලා ගත් මොහොතක, සඳ එළියේ ආධාරයෙන් විශාල වනයක් මැදින් වේගයෙන් ඉදිරියට ඇදෙන වෘකයාගේ ඉව රෞද්‍ර වෘකයන්ට නොදැනුනේ සඳ දෙව්දුව ඊට අකැමැති නිසා කියලා අනුමාන කරන්න පුලුවන්. වේගයෙන් ඉදිරියට ඇදී ආ වෘකයා වනයේන් පිටතට පැමිණ මිනිස් ලෝකයට පා තබා යළිත් තම මිනිස් ස්වරූපයට පැමිණෙමින් කුමරුව තම දෝතට ගෙන කුමරු දෙස බලාසිටියේ මහත් වූ අනුකම්පාවකින්.

වනයෙන් පිටතට පැමිණි තරුණයා ඉක්මන් අඩි තියමින් ඉදිරියට ගියේ ජනාකීර්ණ නගරයක් තුළටයි.දරුවෙකු තුරුල් කරගෙන මධ්‍යම රාත්‍රියේ සක්මනේ යෙදෙන තරුණයාට ඇතැමුන්ගේ අවධානය යොමු වුනත්, ඒකිසිදු බැල්මක් තම ගමනට බාධාවක් කර නොගත් ග්‍රෙගෝ, කුලී රථයක ආධාරයෙන් ඇතුලු පාරක කෙළවරට වී පිහිටා තිබෙන ගොඩනැගිල්ලක් අසලට පැමිණ කුලී රථ හිමියාට මුදල් ගෙවා ගොඩනැගිල්ලේ ගේට්ටුව විවෘත කරගනිමින් ඒ තුළට ගමන් කළා...