ابتسمت بدون قصد، فقد عادت الفتاة القوية التي كان أخي قد وقع في غرامها، ولو كانت تصب جام غضبها علي. ولكنني لم أكن أفهم لم لا تريد (نقش) أن نشارك أفكارنا في الثورة ل(أثر). كنت أثق بهذا الشاب لدرجة عمياء، وكل ظني أن شعور (نقش) كان مشابهاً لشعوري تجاهه.
- برأيك ما كان لازم قلو؟
- طبعاً لا (حثيث)! ما منعرف بمين فينا نوثق هلأ.
- بس بنفس الوقت ما فينا نعمل ثورة لحالنا.
- بعرف، بس مو لازم نخطط شوي قبل ما نبلش نخبر العالم؟
- عيّني مرت أخي.
أحمرّت وجنتا (نقش) عند قولي هذه الجملة، فابتسمت لها، وأكملت كلامي.
- أول شي أنا ما خبرت حدا، بس (أثر). تاني شي معك حق. لازم نتناقش بالموضوع بأقرب فرصة. بحكي مع (عاجل) اليوم المسا وبخليه يوصللك شو تناقشنا، وبكرا منخبر (أثر) ومنقرر بمين بدنا نوثق.
نظرت (نقش) إلي بنظرة غريبة مليئة بالنيران التي اشتعلت داخلها.
- طيب. بس ما بدنا نطول لنبلش، ماشي؟
قالت جملتها ومشت مبتعدة عني. ابتسمت مجدداً، فقد عادت الفتاة القوية.
