" သူချောတာ နင်က ဘယ်လိုသိလဲ။ "
" Instagramမှာ ပုံတစ်ပုံ တင်ဖူးတယ်။ အဲနေ့မှာပဲ တော်တော်လေး နာမည်ကြီးသွားလို့ မှတ်မိနေတာ။ နောက်တော့ အနုပညာကို လူကြောင့် အားပေးတာမျိုး မလိုချင်လို့ထင်တယ်။ ဖျက်သွားတာ။ အဲဒီပုံ ငါ့ထဲမှာရှိတယ် ပြမယ်။ ပြီးခဲ့တဲ့ တစ်နှစ်ကျော်လောက်ကပုံ။ "
မွန်မွန်ကျော်က ဘေးက သူ့ရည်းစားမြတ်သူမှ အားမနာဘဲ မဟော်၏ ချောကြောင်းကို ချီးကျူးနေကာ ဖုန်းထဲမှ ရှာပြီး သောကိုပြသည်။ဆံပင် အလယ်ခွဲနဲ့ မဟော်က နက်စွေးနေတာတွေချည်း ဝတ်ထားကာ Long Coatထပ်ဝတ်ထားသည့်ပုံဖြစ်သည်။
" မြင်လား ... နင်ကြိုက်တဲ့ပုံစံမျိုး။ ကြိုက်လား။ "
သောက ပုံကိုသေချာကြည့်ပြီးမှ ပြုံးကာ ပြောလိုက်သည်။
" ကြိုက်တာပေါ့။ ငါ့ရဲ့ ယောကျ်ားပဲဟာ။ "
" ဘာကြီး "
" အင်း ... ငါနဲ့လက်ထပ်ထားတယ်ဆိုတာသူ။ နယ်ဝေးမလို့ နင်တို့ကို အားနာလို့ မဖိတ်ဖြစ်တာ။ "
" မဟုတ်ဘဲနဲ့။ "
မွန်မွန်ကျော်က မယုံသင်္ကာဖြင့် သော၏ မျက်နှာကို သေချာလိုက်ကြည့်နေသည်။မြတ်သူကပါ အသွင်တူစွာ သောကို ကြည့်နေပြန်သည်။ သောက ရုပ်တည်ကြီးနဲ့ နောက်တတ်လို့ မယုံကြပေ။
" တကယ်ပြောတာ ... အပြန်ကျရင်လာကြိုမှာ။ အဲဒီကျမှ ကြည့်။ "
" ဒီလောက်လန်းတဲ့သူက နင့်လို အပေအတေ အရိုင်းအစိုင်းကို ဘယ်ကဘယ်လိုများ ... "
" ဒါတော့ နင်တို့ အမြင်လေ။ သူ့အမြင်ကျတော့ ငါက နုနုဥဥ အဖိုးတန် ရွှေကြုပ်လေးလို ဖြစ်နေတော့ သည်းသည်းကို လှုပ်လို့။ "
သော၏ စကားကို သူငယ်ချင်း နှစ်ယောက်လုံးက အော့အန်ပြကြသည်။ သောက သွားကိုက်နေသည့်ဘက်က ပါးလေးကို ကိုင်ထားရင်းမှ ပြန်ပြောဖို့ပေမယ့် ဆရာမ လာနေပြီမို့ ပါးစပ်ကလေး ပြန်ပိတ်သွားသည်။
........................
တစ်နာရီ နားချိန်ရောက်တော့ သောက အနားမှ ဆိုင်က ချောကလတ်ချောင်းနှင့်အသားညှပ်ပေါင်မုန့်သာ ဝယ်စားလိုက်သည်။ သောက အပြင်ထွက်မစားတော့ သူငယ်ချင်းတွေလည်း သောနှင့်အတူသာ ပုံစံတူ ဝယ်စားဖြစ်သည်။
