" ခင်ဗျားက ဘာလာလုပ်တာလဲ။ "
သောက စိတ်မကြည်သည့် မျက်နှာထားနဲ့ ပြောချလိုက်တော့ မဟော်က နှုတ်ခမ်းတွန့်ရုံသာ ပြုံးသည်။ ကားတံခါးကို ပိတ်လိုက်ပြီးမှ သော အနားသွားကာ လက်ထဲမှာ ကိုင်ထားသည့် စက္ကူအိတ်ကို သောကို ထိုးပေးသည်။
" ရော့ ... အမေက လမ်းကြုံပေးခိုင်းလိုက်တာ။ ဆိတ်သားခြောက်ကြော်နဲ့ ပြည်ကြီးငါးခြောက်ကြော်။ "
သောက ကျောပိုးအိတ်လေးကို ပခုံးပေါ် ဆွဲတင်ရင်းမှ မဟော့်လက်ထဲက စက္ကူလက်ဆွဲအိတ်ကို အားဖြင့်ဆွဲယူလိုက်သည်။အတွင်းထဲမှာ ဖန်ပုလင်းနှစ်လုံးဖြင့် သော ကြိုက်သည့်ဟင်းကို ထည့်ထားပေးသည်။
" ကျေးဇူးပဲ ... အန်တီခင်သန်းနွယ်ကို ပြောတာ။ "
လာပို့ပေးသည့် မဟော့်ကို ကျေးဇူးမတင်ဘူးဆိုတဲ့ မျက်နှာပေးဖြင့် ပြောနေတာမို့ တကယ်ရိုက်ချင်စရာ ကောင်းသည်။ သောက သင်တန်းထဲ ဝင်ဖို့ ခြေလှမ်းကို ဦးတည်လိုက်တော့ မဟော်က သော၏ ကျောပိုးအိတ်ကို ဆွဲထားသည်။
" မင်းတို့ မန္တလေးက လူတွေက ဧည့်သည်ကို ဒီလိုပဲ ဧည့်ခံတာလား။ "
" လမ်းကြုံဝင်လာတာဆို ...ဧည့်ခံဖို့ မလိုဘူးလေ။ "
သောက ရုပ်တည်ကြီးဖြင့် အတည်ကြီး မဟော်ကို နှင်ထုတ်နေသည်။ မဟော်က သော၏ နှာခေါင်းလုံးလုံးလေးကို လက်နဲ့တစ်ချက်တောက်လိုက်ပြီး ပြောသည်။
" ငါတို့ဒေသကို လာတုန်းက ကိုယ့်အိမ်ကိုယ့်ယာလို စားသောက်သွားတာကို မေ့နေတာလား။ "
" ကျစ် ... အအေးလိုက်တိုက်မယ်။ "
သောက ရှေ့ကထွက်သွားသည်။ အဖြူရောင်ရှပ်အင်္ကျီအပေါ်မှာ အကွက်လက်ရှည်လေး ထပ်ဝတ်ထားပြီး ခြေမျက်စိအထက်သာ အရှည်ရှိသော ဂျင်းဘောင်းဘီ ဝတ်ထားသည့် သောက တကယ် ချစ်ဖို့ကောင်းသည်။သင်တန်းနားက ရေခဲမုန့်နှင့် အအေးဆိုင်မှာပဲ ဝင်ထိုင်လိုက်ကြသည်။
" Recommendပေးမလား။ "
မဟော်က ပြောလိုက်တော့ သောက Menuကဒ်ကို ဆွဲယူလိုက်သည်။မဟော် အချိုမကြိုက်တာ မှတ်မိတာမို့ နို့အရသာနှင့် ရေခဲမုန့် နှစ်ခွက် အရင် မှာလိုက်သည်။
