" သူက ဘယ်လိုလုပ်ပြီး ဒီရောက်နေတာလဲ။ "
မဟော်မေးတဲ့ပုံစံက အလည်အပတ်ရောက်နေတဲ့ ဧည့်သည်အဖို့ နင်သွားလောက်ပါသည်။ သောက မကျေနပ်ကြောင်း ပြသသည့်အနေအဖြင့် မျက်ခုံးလေးတွေကို တွန့်ချိုးထားလိုက်သည်။
" သြော် ... သားရယ် ...ဘယ်လိုကြီး ပြောလိုက်တာလဲ။ "
ဒေါ်ခင်သန်းနွယ်က သော၏ အရှေ့က ခုံပေါ်မှာ ရေဆေးလာတဲ့ ချယ်ရီသီး ပန်းကန်ကို ချရင်းမှ ပြောသည်။အိမ်ကြီးအတွင်းက ဧည့်ခန်းကျယ်ကြီးမှာ သောက နွယ်လေးနှင့်အတူ ထိုင်နေသည်။ ၂၁လက်မလောက်ရှိလောက်မည့် တီဗွီမှာ EVDစက်ဖြင့် နွယ်လေး ပြတဲ့ ထိုင်းသရဲကား အတူလိုက်ကြည့်နေသည်။
" သောလေး ပျင်းနေမှာစိုးလို့ မအိပ်ခင်လေး ဒီဘက်ခေါ်ထားတာ။ မင်းဒေါ်ဒေါ်က သူ့အမေ တော်တော်ကြီး နေမကောင်းလို့ ရိပ်သာ လိုက်သွားတယ်။ ညတွင်းချင်းတော့ ပြန်လာနိုင်မှာ မဟုတ်ဘူး။ "
မဟော်က ခေါင်းငြိမ့်လိုက်ပြီး ချယ်ရီသီးတစ်လုံးကို ယူစားရင်း ဇာတ်လမ်း လိုက်ကြည့်နေလိုက်သည်။ နွယ်လေးက သောဘက်ကပ်ကာ အလယ်မှာ ထိုင်နေကာ မဟော်က အခြားဘက်မှာ ဖြစ်သည်။
" အဘွားက အသက်ကြီးနေပြီဆိုတော့ လူကြီးရောဂါနေမှာ။ "
ဒေါ်မြတ်နန်းနွယ်၏ အမေဖြစ်သူက ရိပ်သာမှာပဲ ယောဂီအနေဖြင့် နေပြီး တရားအလုပ်လုပ်နေတာ နှစ်,နှစ်ဆယ် နီးပါးပင် ရှိနေခဲ့ပြီ။
" သော ... ကြက်ချိုချဥ်ကြော် စားမလား။ နွယ်လေး အတွက် လုပ်ရင်း အန်တီ လုပ်ခဲ့ပေးမယ်။ "
သောက မဟော့်ကို တစ်ချက်ခိုးကြည့်သည်။ မဟော်က ' ဘာလဲဆိုတဲ့သဘော' ပြန်ကြည့်တော့ အကြည့်လွှဲလိုက်ပြီး ဒေါ်ခင်သန်းနွယ်ကို ခေါင်းငြိမ့်ပြသည်။
" ဟုတ် စားမယ် အန်တီ "
" အန်တီ မြန်မြန်လေး လုပ်ခဲ့မယ်နော်။ "
သောက ပြုံးပြပြီး ခေါင်းငြိမ့်လိုက်သည်။ သောက ချယ်ရီသီး တစ်လုံးကို ယူကာ အလုံးလိုက် ပါးစပ်ထဲထည့်လိုက်ပြီး ခပ်ဖြည်းဖြည်းဝါးကာ ထိုင်းသရဲကား ကြည့်နေသည်။ ဇာတ်လမ်းတွဲထဲက သရဲမက အိမ်အောက်ကျသွားသည့် ဟင်းချက်စရာ ပစ္စည်းကို လက်အရှည်ကြီး ထုတ်ကာ လှမ်းယူသည့် Sceneရောက်တော့ သောက လက်သီးကို ခပ်တင်းတင်းဆုပ်သည်။ ပြီးနောက် ထိုင်ခုံ၏ နောက်ကျောဘက်က လျှောက်လမ်းကိုလည်း အသာလှည့်ကြည့်သေးသည်။