الكبيره ٢ بقلم / لولو_محمد

الحلقه ٤٤

(((((( الكبيره ٢ )))))))
#لولو_محمد
الحلقه ٤٤
مروان قاعد فى جنب سرحان و مهره بتحط اكل على السفره
مهره / الغدى يا مروان
مروان لسه سرحان مهره تستغرب و تروح له ينتبه
مهره / اللى واكل عقلك الاكل اتحط
مروان / تسلم ايدك
مروان يقوم يروح يقعد مع مهره على السفره و يحط موبايله جنبه و يقعد يلعب فى الاكل مش بياكل
مهره / مالك فى حاجه و لا ايه
مروان / لا ما تاخديش فى بالك حوارات الشغل اللى ما بتخلصش
مروان ياكل
مهره / الكافيه و لا الالبوم
مروان / سيبك ... اخبار رامى ايه
مهره / بتسألني انا عن صاحبك
.............................
مروان / لا انا بسأل عن الشغل عموما ..  شغلك مش رامى المفروض مديرك
مهره / هو فى حاجه و لا ايه
مروان / لا ابدا كلى كلى تسلم ايدك الاكل جميل
مهره / الف هنا
مروان توصله رساله من اكرم مهره تشوف الاسم مروان يقلب التليفون مهره تبص لمروان
مروان / لا حقيقي تسلم ايدك الاكل جميل جدا
مهره / دا اكرم ؟!
مروان / ما تقلقيش مش بخصوصك  ... دا حوار بخصوص بابا
مهره / حوار ايه ؟
مروان / يعني نسيب الاكل الحلو ده و نقعد نحكى عن اللى بين ابويا و طليق امك ... جرا ايه يا مهره بعدين يا ماما بعدين خلى الواحد يستمتع بالأكل الحلو ده بقي
مروان ياكل و مهره عينها مركزه معاه تبص فى الطبق و تاكل و هى بتفكر
..............................
فى الاوضه
النور يشتغل بكامل طاقته نجاه و جوزيف يغطوا عنيهم
نجاه / الله اكبر ..  شوفت شوفت مش قولتلك مش هيسكتوا
جوزيف / انتى اللى قولتى برده !! ماشي ... اتعميت مش قادر
نجاه / غمض بس و افتحها تانى بالراحه
جوزيف / دا زى اقفل الراوتر و افتحه يعني
نجاه / تصدق انت فعلا غتت ... هقوم اشوف المايه اشتغلت و لا لا
نجاه تقوم تروح الحمام تفتح المايه تشتغل تطلع لجوزيف بتجرى فرحانه
نجاه / المايه جت المايه جت ... انا هغسل وشي و اتوضي و اصلى ركعتين شكر
جوزيف / خدى راحتك
نجاه تجرى تقفل عليها الحمام و جوزيف بيضحك
جوزيف / دا ولا فرحه العيال فى العيد
جوزيف يقوم يتمطع و يروح يقلب فى التلاجه ياخد تفاحه يمسحها فى هدومه و ياكل منها و يبص على الباب و يتنهد
جوزيف / ما تخلصوا امنا بقي
الباب يتفتح جوزيف يبعد شويه جابر ينزل بيجرى يشوفه يتصدم و جوزيف مبتسم باستفزاز
جابر / انت بتعمل ايه هنا ؟!!!
جوزيف / باخد تان
جابر / دا انا هاخد عمرك فين نجاه
عباده ينزل بسرعه نجاه تفتح باب الحمام تشوف ابوها تجرى فى حضنه
عباده/ نجاه
نجاه / كنت متأكده انك هتيجي
عباده يبص لجوزيف و يرجع يبص لجابر و بعدين يبص لنجاه و يبتسم
عباده / حمد الله على سلامتك و حقك على راسي اننا اتاخرنا عليكي
مختار ينزل من فوق يبص لجوزيف و يبتسم و يجرى يحضنه و جوزيف مش فاهم حاجه
مختار / حمد الله على سلامتك الف مليون حمد الله على سلامتك
جابر يبص لجوزيف بغل و يبص لنجاه
نجاه / ما حدش ينزل تانى ما عادش فى مكان ما نطلع لهم احنا اسهل
مختار يبص لنجاه و يبتسم
مختار / حمد الله على سلامتك
نجاه / الله يسلمك خرجونا من هنا بقي انا المكان ده تعب لى اعصابى
عباده / حقك علينا تعالى اطلعى تعالى
نجاه تطلع و عباده وراها مختار يبص لجوزيف
مختار / مش هتصدق سعادتى انى شوفتك دلوقت
جوزيف / انا كدا بدات اقلق خد بالك هو فى ايه
مختار يضحك
مختار / ما انا لو كان حد قالى انى هزعل لما يقولولي ان جوزيف اللى قرفنا فى عيشتنا سنين مات تحت الردم بالشكل ده ما كنتش صدقت يا ابن الغالى
جوزيف يبتسم و يبص لجابر باصصله و ساكت و الغضب باين عليه الابتسامه تروح من وشه
جوزيف / مضايق انى لسه عايش صح
جابر يسيب الاوضه و يطلع
مختار / ايه ده !! وريني كدا جرحك ده كدا وريني
جوزيف / بسيطه بسيطه ما تقلقش
مختار / طب تعالى اطلع فى عربيه اسعاف فوق فيها دكتور خليه يبص عليك و يعمل اللازم
جوزيف يطلع و مختار وراه و يطلعوا من وسط الانقاض لحد عربيه اسعاف نجاه واقفه قدامها و الكل ملموم حواليها
نجاه / لقيتهم انسحبوا طلعت و اخدت سلاح من الارض بس لما جيت استخدمه ما اشتغلش مع أنه فى ايد الراجل التانى اشتغل عادى
جوزيف / عشان شغال بالبصمات المتخزنه على الشرايح ... و انتوا بتشيلوا الردم ده لازم تلموا الاسلحه و تفحصوا الشرايح هتجيبوا منها بيانات كل الناس اللى كانت طالعه العمليه دى
دياب/ شغالين من غير ما تقول
مختار/ لا مؤاخذه يا دكتور تبصلنا على الجرح اللى فى راس يونس ده
جوزيف / انا تمام حبايه مسكنه مش اكتر
نجاه / ازاى بس و ضهرك خليه يبص عليه 
جوزيف / انا كويس ما تقلقيش
جابر يبرطم
جابر / اللهم طولك يا روح
جوزيف / اخبار البلد ايه مش تطمنونى
جوزيف يبتسم باستفزاز
مختار  / هنتكلم فى الموضوع ده بعدين
جوزيف/ ليه ما حلاوتها فى حموتها زى ما بتقولوا ... ايه يا جابر مبسوط انك بتتحرك من ورايا
جابر / عدت على خير ما تقلقش ما خسرناش حاجه
جوزيف يبص لنجاه
جوزيف / مش قولتلك انه غبى  ... خسرت وقت و الوقت يعني فلوس بس تعرف ايه انت اصلا
نجاه / يونس.. لو سمحت
جابر / سبيه ... ليه روقه
جوزيف يضحك باستهزاء
مختار / خف
جوزيف / عشان خاطرك انت بس و عشان خاطر نوجه
فارس / يا اخى انت طلعت لنا منين ما كنا ارتاحنا دا ايه الهم ده ... فدان اللمون اللى بعصر منى على روحى خلص
عباده / خلااااص !!! ما تاخذناش يا دكتور تعبناك و عطلناك ... ظبط الدنيا مع الجماعه يا جابر ... يلا يا نجاه نروح
نجاه / تمام يابا اتفضل
نجاه تروح تركب عربيه و جنبها عباده و قدام فارس بيبص لجوزيف بغل العربيه تتحرك
فارس / حسابنا فى البيت
عباده / دفنتنى امتى و اخدت عزايا و لا لسه
نجاه / بعد الشر عنك
فارس / لا مؤاخذه يابا بس انت عاجبك اللى حصل يعني ننزل نلاقيهم مقفول عليهم باب واحد
نجاه / كان فى مخرج و ما خرجتش و لا كنت اسيبه يموت و هو جاى عشانى
فارس / قلبك حنين اوى يا اختى
عباده / كلمه كمان يا فارس و هتشوف منى وش مش هيعجبك
فارس يبص للى بيسوق و يتنهد و يبص قدامه و هو بيفرك
عباده/ ايه اللى خلاكى تجازفى و تفتحى الباب ما يمكن كان معاهم كان يمكن الدنيا تتهد عليكي كان يمكن تتاذى كان يمكن حاجات كتير اوى تحصل ليه تجازفى بالشكل ده
نجاه / شوفتهم بيحطوا القنابل و بعدين لقيته دخل و اشتبك معاهم لو كان جاى ياذيني هيقتلهم ليه و بعدين هو ما يعرفش حاجه عن الاوضه اللى تحت الارض و طلع فوق يجرى مكان الموبايل و الحاجه و على فكره انقذ حياتى لما السلاح ما رضيش يشتغل و بعدين المكان من كتر الانفجارات كان بدا ينهار و خفت نطلع بره الفيلا يصطادونا و هو كان متعور جامد و سايح فى دمه
فارس / اياكش كان مات و خلصنا
عباده/ اركن العربيه يا عبده
فارس يبص لعباده
عباده / بقولك اركن
السواق يركن
عباده / انزل و حصلنا على بيت عمك فاروق
فارس / بس
عباده / قولت انزل بدل ما انزل اقل منك و انزلك بمعرفتى ... غور من وشي السعادى انزل
فارس يفتح الباب و ينزل العربيه تتحرك و فارس متابعها و مصدوم
عباده / انا عارف انك عملتى الصح ... و ان اى حد مكانك كان هيعمل كدا ..  هو بس انا مش فاهم انتى جايبه الثقه فى الواد ده منين اوى كدا ... ايه اللى لحق يتغير فيه فى الحبه دول ... ما هو هواه نفس الجدع اللى قاتلنا سنين ... اه بنديله فرصه بس ما بنسلملوش رقابينا
نجاه / يونس غير جوزيف
عباده / واحد  ... يونس جوزيف دانيال بلا ازرق واحد
نجاه / ما اذانيش بكلمه تحت و لا حتى نظره الوضع اللى ضايقني غيره و فضل قاعد على الارض فى مكانه ثابت ما بيتحركش و وقت الصلاه كان بيفكرني لان موبايله هو اللى شغال و هو اللى عارف الوقت و قام صلا بيا و كلامنا كله انه عاوز يتعلم دينه ... كل حاجه فيه اتغيرت يابا صدقنى هو بس محتاج فرصه
عباده / العقرب اللى لدغك مره عمره ما هيبقي حمامه سلام يا نجاه
نجاه / بس هو مش عقرب ... و لا حمامه ... هو بشر بيغلط و يتوب و ربنا بيغفر و يسامح  .. الاسلام بيجب ما قبله ... طب دا واحد مدسوس وحش و ابن ستين فى سبعين ايه اللى هيجيبه ورايا يلحقنى  ... جاى معاهم؟ طب هيقتلهم ليه ... و بعدين ما هو مش عارف ان فى اوضه تحت اصلا بدليل انه جرى على فوق واحد رمى نفسه فى النار عشان كان فاكرنى بطولى يابا دا فى عرفك تتردله ازاى
عباده / انا اللى اردله مش انتى
نجاه / و انا ما اعترضتش و لا عندى ذره شك واحده ان عباده الزيني بيظلم حد او بياكل حق حد
عباده/ نجاه
نجاه / ايوه يابا
عباده / انتى أغلى حاجه عندى فى الدنيا انتى عصبى يا نجاه يعني اللى عاوز يكسرني مش هيلاقى حاجه فى الدنيا تكسرني غيرك
نجاه / ما عاش و لا كان اللى يفكر بس يابا يمس منك شعره
عباده/ عايش وسطينا يا نجاه ... و بتحابيله
نجاه / تاب و اتغير
عباده / يعني مش تمثيليه منه زى امايا دى
نجاه / انا كنت تحت ايده يابا هو اللى رجعنى ... يابا يونس كان ممكن دلوقت يكون ميت عشان جه ورايا يلحقنى لانه كان فاكر انى لوحدى ... على فكره بقي هو نبه جابر لحوار الطالعه دى بس جابر ما انتبهش للكلام ... يونس كل اللى محتاجه انه يحس انه ما باعش المجلس بلاش
عباده / و انتى مش هتكونى التمن محروق ابو المجلس على الدنيا لو الحكايه فيها شعره منك
نجاه / يابا و انا ايه علاقتى هو كلمنى و لا جه جنبى هو بيقول ان انا الوحيده اللى بعامله حلو و دى الحقيقه انا الوحيده اللى مقتنعه انه يونس انا الوحيده اللى بديله امل اننا ممكن ننسى اللى فات و نقبله يابا انت ما بتشوفش بيكلموه و يعاملوه ازاى و صابر عليهم ازاى هو هيتوه عننا ما احنا عارفين يقدر يعمل ايه كويس يعني ابنك لما يفتح صدره و يروح يجر شكله و يفضل يستفز فيه ما يقدرش التانى يقل معاه ما بيعملش ليه
عباده / كلامى واضح يا نجاه ... انا ما بثقش فيه
نجاه / ماشي كلامك ماشي ... بس خليني افكرك بقصه ابن ام مكتوم الأعمى لما راح للنبي يطلب منه الارشاد و النبى عليه الصلاه و السلام كان متجاهله و مهتم اكتر بعظماء المشركين و نزلت فيها عبس و تولى ... يابا احنا قانونا القرآن و السنه و قدوتنا رسول الله
عباده / دى غير دى
نجاه / لا نفسها واحد كان و كان و دلوقت الوضع اختلف و جالك و قالك انا فى صفك و عاوز اتعلم ما شي ما تثقش فيه بس على الاقل ما تصدوش
عبده / هى بتتكلم صح بصراحه يا كبير
عباده / اركن العربيه
عبده / انا بس قصدى
عباده / قولتلك اركن
عبده يركن العربيه عباده ينزل يفتح باب السواق و ينزل عبده و يسوق هو و يمشي و عبده بيضرب كف على كف
............................
فى اوضه شاهين
شاهين قاعد فى اوضته بيفكر وفاء تدخل
وفاء / الاكل جاهز تحت هتنزل تاكل مع الجماعه و لا اجيبلك الاكل هنا
شاهين / تعالى يا وفاء و اقفلى الباب
وفاء تدخل و تقفل الباب و تروحله
وفاء / خير فى حاجه و لا ايه
شاهين / انتى زعلانه منى ؟
وفاء / على ايه
شاهين / انا مش وحش يا وفاء انا فيا عيوب كتير و انا عارف بس مش وحش
وفاء / و مين بس قال انك وحش
شاهين / و مش خاين
وفاء / على حوار ياسمينا يعني ما خلاص الحقيقه بانت و السيره اتقفلت بتفتحها تانى ليه
شاهين يبص الناحيه التانيه وفاء تروح تقعد جنبه
وفاء / احنا لسه صغيرين و بنتعلم و طول ما احنا شاريين هيجي علينا يوم و حياتنا هتبقي جنه بأذن الله
شاهين / ما انا برده مش ملاك و هم مش هيسيبونى فى حالى
وفاء / مين ؟ منصور و لا الجماعه اللى فبركوا الفيديو ؟ سواء ده او ده ما تقلقش انت مش متخيل الكل تحت ما لوش سيره غيرك و اللى انت عملته انا طبعا معلوماتى على قدى بس بيقولوا انك كنت مصحصح و طول ما انت مصحصح الكل هيعملك حساب ... الف حساب
شاهين يبصلها و يبص الناحيه التانيه
وفاء / ما قولتليش اجيب لك الاكل هنا و لا هتاكل معاهم تحت
.........................
فى عماره فاروق
راجل يدخل العماره شايل شنط يضرب جرس الشقه اللى تحت السلم جابر يروح يفتح
الراجل / الحاجات دى وصلت ليونس
جابر / حاجات ايه دى 
الراجل / ما فتحتهاش بس سي مختار كلمنى و قالى استلمها من المندوب و اديهاله
جابر / تمام روح شوف وراك ايه انا هديهاله
الراجل / تمام
الراجل يمشي و جابر يقفل الباب و يروح يخبط على باب اوضه جوزيف يفتح لافف وسطه ببشكير جابر يشوفه يحاول يدارى ضيقه و يناوله الشنط
جوزيف / ايه ده ؟
جابر / ما اعرفش
جوزيف يروح يحط الشنط على السرير و جابر لسه واقف عند الباب يشوف ضهر جوزيف كله ازرق جوزيف يبص فى الشنط لحد ما يوصل لشنطه فيها لبس يطلعه و يلبس
جوزيف / دا مختار اكيد ... الحاجات الحلوه دى يا مختار يا نوجه
جابر / لو ناديتها نوجه مره كمان يمين بالله
جوزيف / مش هتبقي ليك حتى لو مش ليا مش ليك فياريت تختصر كل الطاقه و الحزق ده و تنساها و تهدى كدا ... مقاسي بالمللى ... تعرف اهو انا كدا اقدر اطلعلها فوق اصل انا هدومى كانت متوسخه فغسلتها و سبتها تنشف شوف يا اخى سخريه القدر خالك انت يبعتلى هدوم جديده على مقاسي بالظبط عشان اطلع لنوجه
جابر يكتم جواه
جوزيف / ما عملتش حاجه يعني و لا هو كلام و خلاص
جابر / عاوزنى اضربك و انت منصاب كدا
جوزيف / so cute  ...  للدرجادى قلبك حنين
جابر / صحيح و انت ربايه الشوارع اللى زيك هيفهم ايه عن الاصول
جوزيف / معلش بس افهم  ... هو انت كدا بتشتمنى  ؟!!
جابر / ليه هو انت اتربيت فى مكان تانى و انا ما اعرفش ؟
جوزيف / لا انا ما اتربيتش اصلا
جابر / يبقي ما غلطناش
جوزيف / و لا تغلط انا ما بزعلش منك ... عازرك ... واحد حب واحده عمره كله ما عرفش و لا شاف غيرها و هى رفضاه بالرغم من كل تضحياته رفضاه برده و فجاه شاف حد تانى عينه عليها و هى نوعا ما
جابر / ما تسوقش فيها
جوزيف / كنت هقول حلوه و فيها الطمع
جابر / قولتلك ما تسوقش فيها
جوزيف / ايه ؟! هتنسي الاصول و لا ايه ؟!
جابر يمشي جوزيف يناديه
جوزيف / ادتنى ضهرك ... بقيت بتثق فيا و لا عشان انت غبى ؟
جابر ما يردش و يمشي يسيب الشقه و يرزع الباب جوزيف يدخل الاوضه و يقفل الباب و يروح يبص فى الاكياس يلاقي مصحف تفسير يبتسم و يتكلم باستهزاء كانه بينادى
جوزيف / يا جابر استنى يا جابر  دى طلعت نوجه مش خالك يا جابورتى هههههههههههههههههه يخرب عقلى مستفز
...............................
فى الشركه عند اكرم
مروان بيبص فى ورق
اكرم / قولى بقي هتقدر تقدملى ايه فى المقابل
مروان / مهره عمرها ما هتكون مراتك لا فى شرع و لا قانون يسمح بكدا بس لو عجباك اشبع بيها
اكرم / و حياه امك ما انا لو عاوزها كدا اقدر اخدها غصب عن عينك انت و ابوك
مروان/ ما انت لا عمرك هترجع معاها زى زمان و لا هتلمس منها شعره باى شكل تانى دا حتى فكره امريكا بتاعتك دى كانت عبط منك سورى يعني
اكرم / انا مش حيوان يا اكرم انا مش هقدر اخد منها حاجه غصب عنها
مروان/ لا استغفر الله اغتصاب ايه ؟! دى اختى يا جدع ... هتجيلك بكيفها ديتها ايه كام حبايه فى كام كبايه عصير ابويا و امها هيخافوا من الفضيحه و يرموها فى المصحه انت بقي قدامك حل من اتنين يا تخرجها من هناك و تحتويها بعد ما الدنيا اسودت فى عنيها يا تعتبرها فندق و تروح و تيجي عليها
اكرم / انت بجد مستعد تعمل حاجه زى دى فى اختك ؟!!
مروان / مش اختى .. و لا اعرفها ... انا ليا اخت واحده بس هى ايلين ... و اقولك حاجه حتى دى ما شوفتش منها خير و لو جالى فيها سعر كويس زى ده مش هتردد ثانيه اخلص منها ... انا راجل عملى ما بضيعش وقتى مع ناس ما كانوش جنبى وقت تعبى و ضعفى ما باقوش عليا ابقي انا عشانهم ليه
اكرم / طب و الجماعه نجاه و عمران و شله الصعيد دى هيسكتوا
مروان / واحده ادمنت عاوزين ياخدوها فى حضنهم و دى اشك فيها انهم يلطوا نفسهم اللطه دى بكيفهم هيعالجوها ازاى مصحه برده تقنع انت بقي ابويا الواصى عليها انه ينقلها مصحه تبعك يعني كل الطرق تؤدي إلى روما
اكرم / ما فيش سكه تانيه غير دى مروان انا بحبها انا مش هقدر اشوفها بتتالم قدامى
مروان/ اهى حنيه قلبك دى اللى مبرده قلبي و مخلياني اساعدك ... يا عموا هو انت هتعذبها دا انت هتريحها و تعالجها دا انت بتخاف عليها اكتر من ابوها اللى جابها للدنيا دى ذات نفسه ... على العموم فكر فيها و وقت ما تقول امين بلغنى بس بلاش على الموبايل عشان هى عرفت انك بتحاول تكلمنى و انا هربت منها بالطريقه بس مش عاوزين نكررها لو موافق اطلبني على رقم الكافيه و ما تقولش انك اكرم قول انك صديق ليا من امريكا و انا هفهم
اكرم يهز راسه مروان ياخد الورق و يقوم يعدل هدومه
مروان / تؤمرني باى حاجه تانى
اكرم يتنهد و يبص الناحيه التانيه و هو حزين مروان يمشي
.....................
فى اوضه نجاه
نجاه / تسلمى يا وفاء مش عارفه ارد جميلك ازاى
وفاء/ مش وقت افوره دى حياله عبايه و بعدين ثوانى و هتلاقيهم جايبين ليك احلى لبس و موبايل و كل الحاجات اللى ممكن تحتاجيها بدل اللى راحت
نجاه / و دا يمنع ان العبايه تحفه ... لتكونى فكراها هترجع
وفاء/ هههههههههههه ما تغلاش عليكي دى حتى مش مقامك
نجاه / من يومك زوق و بنت أصول
الباب يخبط
نجاه / ادخل
الباب يتفتح و دياب واقف بره
دياب / ايه الدنيا
نجاه / الحمد لله تمام تعال ادخل
وفاء / انا هروح اساعد الحريم فى الاكل
دياب / ارتاحى جبنا جاهز و على وصول دا جرمئ بره هتكفوا مين و لا مين ... ما علينا ... انا كلمت الجماعه و هنرجع اسكندريه مع الجماعه على الفجر كدا عشان تعرفى انى ما بقولش كلمه و ارجع فيها
نجاه / اسكندريه!!!
دياب / عاوزه تيجي ؟
وفاء / استنى ... انتى اصلك مش فاهمه ابن خالتك جابنى هنا ازاى طياره خاصه و رحله و شهر عسل و فيلم و فجاه لقيت طلعه و شغل
نجاه / يا كبدى يا بنتى اخص عليك يا دياب
دياب/ ايه ما انا هطلعها اهو و احلى فسحه فى اسكندريه كمان هو فى احلى من اسكندريه
نجاه / مفيش بس برده كسره النفس وحشه و انت عشمتها
وفاء / يا بنتى انا كدا كدا مش مصدقاه احنا الحاجات دى ما اتخلقتش لينا دا انا بقيت بحس انى ملكت الدنيا و ما فيها كل يوم لما ينام فى فرشته بس سليم ما فيهوش حاجه
دياب / ليه و انا كنت بتشخرم قبل كدا و لا ايه
وفاء / و هو حد يقدر ... بس عايش فى الدنيا روحك على كفك بتخرج يا ترجع يا ما ترجعش
دياب / طب ما كلنا كدا هو اللى قاعد جنب امه بتفليه لو أجله جه مش هيطب ساكت مطرحه انتوا بس اللى قلبكوا بقى رهيف اوى
نجاه / هى بس بتحبك
دياب يبتسم و يهرش فى شعره بحرج
دياب / لا كدا بقي فى كلام تانى ... انا جبتلك موبايل جديد هدخله على السيستم و اجيبهولك ..  هروح اشوف لو حد من الرجاله ناقصه حاجه
نجاه / هو ابويا فين
دياب / فوق بيامن على السطح اناديهولك ؟؟
نجاه / يا ريت
دياب / عيني
فارس يدخل
فارس / احنا قررنا نعمل محكمه عرفيه و نصوت ان جوزيف يمشي
نجاه / ليه عمل ايه
فارس/ هو كدا ظلم و افترا احسبيها زى ما تحسبيها
دياب/ اهدى يا فارس مش كدا
فارس/ انا كدا هادى لو هى عاوزه تشوف العصبيه اللى على حق تخرج عن طوعنا
نجاه / قول انك بتهزر عشان ما تشوفش انت عصبيتي اللى بجد
فارس يزعق / لا ما بهزرش و اقسم بالله العظيم
نجاه / انت تحلف على روحك مش عليا
دياب / بس يا فارس بس تعال معايا فى ايه مالك استهدى بالله يا جدع انت ما يصحش كدا تعال عيب تعال
دياب يسحب فارس بعيد وفاء تروح تقفل الباب و نجاه بتغلى
وفاء / على فكره هم كلهم مضايقين من وجوده و ان كان فارس انفجر بالشكل ده فعشان هو بيحبك و بيغير عليكي انتى اخته و بصراحه ما حدش ساكت
نجاه تبصلها
وفاء / انا عارفه انك ست الكل يا نجاه بس
نجاه / الإنسان لما بيبقي بيعصى ربنا الشيطان بيبعتله اعوانه تساعده و بيبقي معاه فلوس و سطوه و اعوان و بيبقي فاكر ان دى الجنه فى الارض بس لما بيتوب الشيطان برده بيبعت اعوانه بس تانين يمنعوه و يردوه عن توبته دى دا انسان كان حواليه جيوش تعينه على المعاصي ما يلاقيش مخلوق يعينه على التوبه يعني نقوله بابنا مقفول و مفيش امل ما حدش هيقبلك نقوله ارجع للى كنت فيه مين هيشيل وزره يا وفاء مين
وفاء / بس دا قراره هو مش قرارك انتى انتى فى الاول و الاخر حرمه و الرجاله
نجاه / يا ستي انا هقاطعه مش هتعامل معاه تانى انتوا بدل ما تعملوا جلسه و تقولوا يمشي احتوه انتوا علموه انتوا و اتقوا ربنا فيه انتوا
وفاء / ما هو دفاعك عنه دا اللى مجننهم
نجاه / انا بدافع عن الحق و الصح انا لو كان اى حد غيره كنت عملت كدا برده مش عشان هو بعينه و لو كنت شفتهم بيحاولوا معاه ما كنتش حاولت
وفاء / بس دا مش اى حد برده يا نجاه قدرى الرجاله اللى جوزيف عمله
نجاه / اسمه يونس عيل اتخطف من حضن امه صغير و اتعذب و اتغسل دماغه و غلط و ربنا أراد يرجع لاهله اهله يرموه طب كنا فين السنين اللى فاتت عشان نلومه عليهم
وفاء / دا مش دورنا احنا ما تنسيش اننا برده مش اهله هو و لا جارحى و لا زيني انا عارفه قصه عم رشيد و ان ده ابنه بس مش دورنا برده على الاقل مش دورك انتى انتى بنت مهما كان مبررك و نبل هدفك انتى بنت و البنت سمعه و هو سمعته زى الزفت ... نجاه انتى زى اختى الصغيره و بنصحك لوجه الله الرجاله دى على قد ما واثقين فيكى عمرهم ما هيقدروا يلغوا فكره ان بنتهم اتقفل عليها باب واحد مع راجل غريب طول الوقت ده
نجاه الدموع تنزل من عنيها
وفاء / الناس بتتكلم يا نجاه حتى لو مش فى وشنا عنيهم بتتكلم نظراتهم بتجرح الرجاله على اخرها و ساكتين عشان انتى مكتفاهم و الكبير مطاوعك لما هيجي وقت الكل هيهيج على الكبير و يقولوا انت ازاى سامح لبنتك بكدا احنا مش راضيين بحكمك
نجاه / مفيش كلب يستجرى يعمل كدا
وفاء/ لحد دلوقت مفيش بس طول ما انتى ماشيه ورا الجدع ده و راميه اهلك ورا ضهرك مسيره هيجي يوم و يحصل  احنا كل دا بنتكلم بغض النظر عن القديم انتى ما شوفتيش دياب كان عامل ازاى و انتى مخطوفه و لا لما الصور اتبعتت و اللى جرا لابوكى و مع كدا بيدوسوا على جرحهم ده و بيتعاملوا قدامك عادى اقسم بالله يا نجاه ما حد فيهم عادى ... احنا صعايده يا نجاه احنا مش خوجات و الجدع نفسه مش عامل اعتبار لحد و لا حتى ليكي ما هو استفزازه ليهم طول الوقت هو اللى وصلنا لكدا
نجاه / تمام يا وفاء ... تمام
نجاه تروح تقعد على السرير و تدى لوفاء ضهرها و الدموع كل ما تنزل تمسحها
وفاء / اقسم بالله انا بنصحك لانك غاليه عندى انا عرفاكى كويس و عارفه انك ما بتتردديش فى الحق بس المرادى ضرها اكتر من نفعها يا نجاه اقسم بالله بتكلم من خوفى عليكي
نجاه / خلاص يا وفاء الرساله وصلت... شكرا
وفاء / انتى زعلانه منى ؟
نجاه تهز راسها لا فى صمت وفاء تتنهد بحزن
وفاء / اقسم بالله انتى غاليه عندى و انى
نجاه / انا فاهمه يا وفاء فاهمه كل حاجه ... سبيني لوحدى لو سمحتى
وفاء تتنهد و تطلع بره و تقفل الباب
.......................
على السطح
جابر / بص يا خالى من الاخر كدا ابن صاحبك ابن حبيبك ابن اخوك حتى يانا يا هو و الكلام عندى خلص
عباده / طب اهدى و نتكلم بعدين
جابر / انا كدا هادى على فكره بس يمين بالله انا لو سبت النار اللى جوايا يمين بالله ما هتعرفوا تطفوها
مختار / تمام يا جابر ايه اللى يريحك
جابر / يمشي و ما اسمعش اسمه تانى ابدا فى حياتى ما اشمش ريحته و لا المح خياله
مختار / و انت فاكر ان حاجه زى دى ممكن تحصل بالساهل كدا ؟
جابر / اختارته عليا يعني ؟؟
مختار / لا اخترته و لا اختارتك احنا لينا الصالح
جابر/ و حضرتك شايف ان الصالح مع ده !!! دا أكبر خطر علينا ... يا جدعان دا احنا صعايده و هو داخل ضارب كرسي فى الكلوب فى كل الخطوط الحمرا اللى تخصنا و لا حتى عامل حساب لاى حد ..  طب بالله يا كبير انت راضي عن اللى بيحصل 
عباده / مش راضي بس الدنيا ما بتمشيش كدا
جابر / طب قولولى فايده واحده طلعنا بيها منه من يوم ما طب على حياتنا فايده واحده بس دا بيبقي عارف بالكارثه و ما بينبهناش و بيقعد يضحك علينا و يشمت فينا لما بنقع فيها نبقي عليه ليه اش حال ما كناش روحنا هاجمنا الفندق الشمال اياه عشان هو كان فيه
مختار / و سابه و طار يلحق نجاه
جابر / و حضرتك مصدق انه ما كانش عارف بالهجوم و عمل كل ده عشان يكسب بونط يا خالى الواد ده قال نيته صريحه طب انا شهادتى مجروحه عشان بحب نجاه و قولوا غيران منه فارس كمان شايف نفس الكلام
عباده/ انت عاوز ايه يا جابر من الاخر
جابر / احنا عيله ديمقراطية نقعد كلنا و اللى جواه حاجه يقولها تسمع منهم احسن ما يتكلموا من وراك يا كبير
عباده / تمام ... رتب القاعده و خلينا نسمع الرجاله
جابر يهز راسه و يمشي
مختار/ انت عارف انهم هيقولوا يمشى
عباده / يبقي الرأى راى الجماعه
مختار/ و انت رايك ايه
عباده يبص لمختار و يفرد ضهره
عباده / انا ما كرهتش فى حياتى قد الكائن ده و ما صبرنيش عليه غير انه رجعلى بنتى فى حضنى ... و انه ابن رشيد ... بس لو الجدع ده هيوجع قلبي على بنتى تانى يا مختار
مختار/ بنتك مش صغيره و عارفه الحلال من الحرام و
عباده / بس هو مش عارف او عارف و مش فارق معاه
مختار / بيتعلم و بيتعامل بيهم و من يوم ما جالنا فى الخير ما شوفناش منه شر
عباده / انا اب قبل ما اكون كبير ... اقولك حاجه انا هبقي معاك هصوت باللى هتصوت انت بيه بس انا و انت عارفين النتيجه ... يونس هيمشي يا مختار
مختار يبص فى الارض الناحيه التانيه عباده يسيبه و يمشي
.........................
فى فندق على البحر
ابيك / لازم نضرب على الحديد و هو سخن و نزغلل عينيه اكتر
بابلو / اديله وقته و خديه على الهادى و حاولى تلاقى طريقه تتواصلي بيها معاه بعيد عن عنيهم
ابيك / هى امايا مش المفروض ترجع بقي
بابلو/ عاوزه بس المجلس مش عاوز يحرقها دلوقت
ابيك / امال امتى انا مش فاهمه
رزق يدخل و هو مفزوع
رزق / نهارنا مش فايت انت عرفت ان الملك عايش
بابلو / و ايه المشكله
رزق / يعني عارف عارف و ساكت و قاعد كدا هادى دا هيطلع روحنا
بابلو / انت مالك ياله خفيف كدا ليه
رزق / ما تستهونش بيه انت ما تعرفوش قدى دا طلع من تحت الارض انت اكدتلى انه مات و شبع موت
بابلو/ يووووه مش هنخلص بقي بقولك ايه لو خايف امشي و أجيب مكانك ميه
رزق / ميه ايه قول الف مليون عشان يسدوا قدامه
ابيك / هو بيتكلم عن مين بالرعب ده ... جوزيف !!
رزق / ما ليكي حق يا كتكوته ما انتى ما تعرفيهوش
ابيك / و لا انت تعرفنا
بابلو / احنا اساسا مش اعداءه دا اخويا الصغير يا رزق يعني هيجيلى هيجيلى ما تقلقش
رزق / اخوك!! دا باماره ايه دا انت كان هاين عليك ترقص لما عرفت انه مات
بابلو / لا دى بقي مسائل عائليه ما تشغلش انت بالك بيها
رزق / انت شايف كدا ... تمام يا باشا تمام
رزق يمشي
ابيك / بس هو برده معاه حق
بابلو / أيه خوفتى مش كنا لسه من شويه ما انت ما تعرفناش
ابيك / امال اركب الصايع ده علينا ... لازم تفكر و تأمن نفسك كويس انا كدا كدا ما ليش علاقه بتخطيطك انت و رزق انا كنت فى البلد بنفذ اوامره
بابلو / هى بقت كدا ههههههههههههه ماشي حقك هههههههههههه
ابيك / سلام يا بيبي
ابيك تمشي و بابلو يقوم يقف يبص على البحر و يفكر و هو مبتسم
..........................
فى الشقه اللى تحت
نجاه تخبط على الباب جوزيف يفتح يشوفها يبتسم
جوزيف / بنت حلال كنت لسه هطلعلك اشكرك على الهديه على فكره انا قاعد بقرا فيها
نجاه / هديه ايه ؟
جوزيف / قران التفسير ... هو مش انتى اللى جيباه
نجاه / لا ... غالبا عمى مختار ... ما هو كان معايا و انا بجيبهولك المره اللى فاتت اكيد جابلك واحد بداله ... على فكره هو كمان مؤمن بيك و عنده ردود حلوه اوى على كل اسألتك
جوزيف / هبقي اقعد اتكلم معاه... هو انا ليه حاسس ان فى حاجه مضيقاكى
نجاه / عشان فى... يونس انا محتاجه اطلب منك خدمتين عمرى ما هنساهملك أبدا
جوزيف / اؤمريني خير
نجاه / الأولى انك تعاهدنى انك عمرك ما هترجع للى كنت فيه و ان مهما كان الطريق مسدود فى وشك او حسيت انك وحيد هتفتكر ان معاك ربنا و انك تقدر و ان اللى وصلك للمرحله دى قادر يعديك منها و ان رجوعك هو أكبر غلط ممكن تعمله فى حق نفسك و انك بتتغير عشان نفسك انت عشان اخرتك انت مش عشانا و لا عشان احنا معاك و لا عشان اى حاجه غير نفسك
جوزيف / التانيه انى امشي صح ؟
……………..