عيون النار داعش

تــكــمــلــة الــبــــارت ٥١

بلسم : شبي ...
سكينة : الليل كوله مصخن ، بالكوه نزلت حرارته ، هسه راح للحمام بلكي يصحصح ...

بلسم : خل اروح ادحكو ...
سكينة : ماشي، عباس وين ...
بلسم : نايم ...

سكينة : كملت الريوگ اخذته للغرفه خليت سفرة ، كعدت بلسم ورافد والجهال ، وكلنا التمينه على السفرة ، كعد عباس جابته بلسم اخذه رافد وخلا بحضنه ويطعم بي گيمر ...

.... ترى بعده صغير مو مال گيمر ، وهذا الاكل دسم عليّ ...
رافد : حتى يصير زلمه بسرعه ، دحكي شلون ياكل ...
سكينة : جيب الولد ،وانتي شبيج ساكته ترى مو زين على بطنه يتمرض ...

رافد : وج وليداتي كلهم ورى الاربعين اوكلهم تشاريب  باچه ، عجل شلون تقوا عظامهم ...

سكينة : عزاااا، باچه مرة وحده ، بس هذا بعده الاربعين مالته مطالعه ، خطية لتأذو ، خليت الممه بحلكه وكمت اهز بي برجلي باوعت رافد صفن عليه وابتسم ....

....شبيك يول ، تدحك بوجهك ...
رافد : لا هيج ، بس حلو الوليد بحضنج ...
سكينة : لا تفكر اصلا، كافي الروضه العندك ، وامي اكبر عباس ...

رافد : هههههه ، لا يول مافكر هسه بطفل اذا مااخليكم تستقرون بغداد ...
عثمان : صدك يابه تاخذنا البغداد ...

رافد : اي يابا بس خل تطلع الاربعينية مال امام الحسين عليه السلام ونطلع ...
سكينة : وليش مو هسه ...؟

رافد : اول شغله عدي كاع بعد مابايعها ، وثاني شي الحشد سدو الحدود كلها بينا وبين المحافظات ، يعني صعبه طلعتنا ، وانه ماريد ادخل ويا الزوار ، لان راح يشكون ببينا ويمكن يطردونا او يسوون القاء قبض علينا ماريد تتبهذلن ...

سكينة : ان شاء الله ، بلسم لمت السفرة ،وجابت جاي ، هاي كعدتنا هيج اكل وشرب وكلنا محصورين بالغرفه ...

.... تعشينا وكلنا كعدنه ، سحبت مبايل رافد ، تعالو خل اسمعكم مقتل الامام الحسين عليه السلام ....
رافد : نصي الصوت يول ،لا يخشعون الصوت برا ...

سكينة : وخل يسمعون ، على الاقل اذا متنا نموت واحنه دنبجي على الامام ، مو هيج ياولد ، كلهم صاحو اييي ، شغلت المقتل ، ويا تمثيل ، وهذولة صفنو على الاحداث ...

... رافد كاعد ليغاد يدخن ويباوع علينا ،
وصل المشهد لمقتل علي الاكبر ، باوعت الرافد ، عيونه غركت بالدموع بس ميبجي ، وصل للقاسم والقارء كام ينعى على العرسان ، باوعت الرافد خلا ايده على وجهه وبجي بس بدون اي صوت ...

.... مجرد ان يتنفس على السريع ،
كام يمسح بوجهه ، وخلا وطلع من الغرفه ، الجهال كامو يبجون وبلسم اخذتلها زاوية تبجي ، وصل المشهد مقتل الامام الحسين عليه السلام ، اني وياهم زدت بجي ....

.... طلعت ورى رافد ماكو ، رجعت للولد ، بلسم عينج عليهم ،سحبت شالي ، وطلعت من الباب ادور على رافد شفته راح يمشي بنهاية الفرع ، سديت الباب وطلعت ورى اركض ....