نهوة الشيخ عياش

البارت عشرون

# نهوة الشيخ عياش
(البارت عشرون 20)
شلون انطاك كلبك تبتعد وتروح
جاوبني بعذر يقنعني من اسال
مات الكلب بعدك موتت فراك
وبس يسمع بجيتك ينهض ويعدل
واذا انت رحت المن اكول اهواك
وبعد ياهو الاوصفه ويامن اتغزل
لغيرك ماتوسل كلبي فد يوم
ولان هو يحبك بيك يتوسل
.👌🏻💔💔💔 '
مرتضى : الوو السلام عليكم شيخنة شلون الصحة
عياش : وعليكم السلام ورحمه الله وبركاته بخير انته شلونك الاهل شلونهم ان شااءالله كلكم زينين
مرتضى : الحمدالله شيخ نحمدالله ونشكره سمعت بيك خاطب بنت عميي عاصم والله كلش فرحتلك ربي يوفقك ويحفظك يارب والف الف الف مبروك ان شاءالله يوم الولد الصالح
عياش : حبيبي ابو علاوييي الوردة الله يبارك بيك تسلملييي يوم الالك وازفك باايدي
مرتضى : لا بعد وكت علييي هسه خل نفرح بالشباب طيبة
عياش : ولك يابعد وكت عمرك 30 سنـة ماتكلي شوكت نشوفك عريس
مرتضى : هههههههههه الله كريم شيخنة اي قبل لاانسه جايك بشغله
عياش : اعرف خويـة ع شنو جاايييي انه هسه اخابر الشيخ عزام والم الشيوخ ونروح راح اصير الكعده بيتهم ونشوف شلون تنحل وبنسبة الحمزة نشل نهائياً مايكدر يحرك شي من رجليه الحمدالله ع كل حال
مرتضى : اي زين  عبالي ماعندك علم ننتظركم شيخنة
عياش : ماشي حبيبي ابو علاوي في امان الله
مرتضى : الله وياك الغالي ..
الشيخ مصعب : هاا بويـة هسه شصفت !!
عياش : والله ياشيخ هاي جدام عينك خابرني مرتضى ويردون يحلون السالفة ويخلصون
ابو مروان : يعني هذا حمزه ماناوي يتوب ويبطل يعني الله بعد شيريد يسوي بييي
عاصم : والله ياخويـة ابو طبع مايجوز عن طبعه
مروان : طاحظه من ايام الكليه وهوه مسربت عمره وحياته مايتعدل العوج يضل اعوج
الجميع : اي والله صدكت
عياش : يلا انه اترخص ااسبح وابدل واخابر الشيوخ نطلع ماضل وكت هسه يلا ب3:00 ع مانرتاح ونشرب چاي ويلتمون العالم صارت ب4:00 نروح البيت الشيخ عزام
الشيخ مصعب : بويـة انه راح اخابر الشيوخ البقية هناك ينتضرونه
مروان : عياش انه راح اخابر الشباب تجيي
عياش : خابر اياد وفيصل واسر يجون للبيت بسرعة والي عنده شغل يلغييي خوش
مروان : صار ابو الشباب
.
.
.
عياش : دخلت للبيت من المطبخ لكيت جمارة واكفه صب الچاي هيه وازل ويسولفن مانطيتها اي اهتمام وردة فعل بس لا والله سامعه الكلام ولابسة دشداشه عريضة ماتجي اله بلعين الحمره رحت سبحت وبدلت وكشخت وخابرت الشيوخ ونزلت صحت ع ام امير خوية فد جايات من ايديج الحلوه للمضيف
سحر : صار شيخ تدلل
جمارة : عشتو ام امير جايات من ايديج الحلوه بعد بعد لو جاي حاضنج مو احسن
سحر : ههههههههههههههه روح عمييي اشتغلت الغيره
جمارة : كلابج اغار مين تروحولي فدوه انتي ويااا
ازل : هسه يسمعج احد وتنكفخين ويحطهاا بحلك الشيخ امشي ونجبي
سرور : ع كولتج خيه اخذيهااا لايطيح حظهاا
عياش : كعدنه بلمضيف اجو الشباب بدلو وخلصو وشربنه جايات وطلعنه البيت الشيخ عزام خابرت مرتضى كال احنة بلطريق جايين شويـة دخلو بيت عمي ابو حمزة وحمزه مكسر تكسرر نقهرت علييي بس لاجن هاي كرصت اذن اله دخلو بيت عمي ابو مرتضى وراهم بخمس دقايق كلنه التمينه
الشيخ مصعب : الله بلخير والبركة
الجميع : الله بلخير والعافيـة عليكم
الشيخ مصعب : احنة اليوم ملتمين بيت الشيخ ابن الاصول والاجاويد الشيخ عزام ورايدين نحل طلابـة بيت ابو حمزة وبيت ابو مرتضى ويكون محضر خير الجاييي واهلاً وسهلاً بيكم
الجميع : وبيك شيخنة
الشيخ عزام : ان شاء الله كلناا محضر خير صلو ع محمد
الجميع : اللهم صل على محمد واله محمد
الشيخ عزام : ييي شيخ عياش احجيلنه شنهي الطلابـة
عياش : { حجه السالفة من البداية للنهايـة } وهااا يااهل الاصول هسه شكلتو
الشيخ حاتم : هذااا الماعنده ضمير وغيره هيج يصرف مع الاسف تربية ابو حمزة راحت ع خالي بلاش
الشيخ ابو كاظم : ليش يابويـة ياحمزة شوف اخوانك صلاوات ذهب وينحطون ع راس ليش مستغل اهلك وناسك شنو طمعان بقطعه الارض هاي امانة شلون هيج سوي بيهاا
حمزة : غلطه ياعمي وصارت
الشيخ عياش : بعد كل الحجي مايفيد هسه راح ترجع القطعه بااسم عمي ابو مرتضى بالكامل ومااريد يااعمييي ابو مرتضى تشارك ويه بشر ثاني خليها حريتك وحلالك
الجميع : عاشت ايدك شيخ
الشيخ عياش : سند الارض هذا جدامكم وهاي الارض سالفـة المحاكم والتنازلات ع باجر انه بيدي امشي بيهااا هسه حالياً تاخذون حقكم بيت عمي ابو حمزه وتنفك الشراكه بينكم وبين ابو مرتضى سامعيني
الجميع : بارك الله بيك
عياش : نحلت طلابـة بيت عمي ابو حمزة وبيت عمي ابو مرتضى وكلمن رجع البيته راضي عن الثانييي حمزة انتظرو انتو كعدو لاترحون عندي جم حجايه وياك بالاخص حمزة
حمزة : تفضل شيخنة
عياش: اسمعني ياخويـة الي صاير بيك مو شويـة هذا درس اعتبره انه عندي استعداد امشي بيك للهند اعالجك هناك بس ياخويـة الي اريده منك توب الربك لااحنه نفيدك ولااهلك يفيدوك ومال الدنيا زائل باجر عكبه بس جفنك وياك بلگبر ماتاخذ شييي فَ برضاي عليك ارجع صليي واستغفر ربك وارجع احسن من قبل  قال الله عزوجل : بسم الله الرحمن الرحيم (وَأَنِ اسْتَغْفِرُوا رَبَّكُمْ ثُمَّ تُوبُوا إِلَيْهِ يُمَتِّعْكُمْ مَتَاعًا حَسَنًا إِلَى أَجَلٍ مُسَمًّى وَيُؤْتِ كُلَّ ذِي فَضْلٍ فَضْلَهُ وَإِنْ تَوَلَّوْا فَإِنِّي أَخَافُ عَلَيْكُمْ عَذَابَ يَوْمٍ كَبِيرٍ ) صدق الله العظيم فَ ياخوي كل هالدينا زائله خل يرجع عقلك الراسك وانه ان شاءالله هليومين تخلص الشغله بلمحكمه وتبدي تنازلات وابديييي بشغلتك ويه هذا ضربك وميكون خاطرك اله طيب
الجميع : بارك الله بيك اصيل والله ونعم منك
الشيخ عزام : ياابو امين خوش تربية ربيت حفيدك حكيم وعلم وثقافه الله يوفقه ويستر عليه وبالمناسبه اعذروني ماجيت بلخطبة بس جان عندي خطار وان شاءالله هديتكم موجودة
الشيخ عياش : الله يسلمكم ، لا عميييي شوفتك النه كلش كافيه
الشيخ عزام : ذهببب وليدي
حمزة : رحمه الله والديك شيخ ان شاءالله خير الي يكتبه الله نرضه بي
عياش : ع بركة الله ، يلا احنه نترخص ، رجعت للبيت ميت تعب خابرت ولد صاحبي محامي وبلغت عن شغله علمود باجر صبح نطلع نشوف تنازلات دخلت للبيت واباوع الولد كاعدين يم الشيخةو بيت عمتي راحو والبنات كلمن بغرفتهاا كعدت يم الشيخة شوية هاا امونـة شلونج اليوم
الشيخة امنية : بشوفتك كلش زينة يابعد روحي
عياش: الله يحفظج النه الخير والبركة
الشيخة امنية : بعد اهلي كلهم
غيث : بيبي ماتكليلي ليش تحبين هلكثر الشيخ احنه شمالنه
الشيخة امنية : احبنة لانه زلمه يعرف ياخذ حكه يفتهم وطالع من ضهر اسد حوك مو ش مثلكم الله مطيح حظكم مايصير براسكم خير لا والله
ليث : ولك غويث لو ساد حلكك موش احسلك هل طاح حظنة من سمووو الشيخة
مهند : لا شلون يصير چاا هوه البيي مايخلييي لازم يحجي يموت اذا مايلغيييي
الجميع : ههههههههههههههههههه عده الشيخ * باله يم جمارة لأن ماشافها اليوم كله
عياش : احترمو نفسكم يلا وسكتو وتعالو كلولي شخبار الامتحانات ماتطلع نتائج
غيث : رحمه ع اهلك اسكت هسه يبجون انه كوه ساد حلكهم
ليث ومهند : اي مو انته شعليك مرتاح بس احنه ناكلهاا
عياش : ليش تاكلوهااا شنو مبين مزفتين حضراتكم الكرام😑
الشباب : لاشيخ مو مزفتين بس الخوف ومايعمل
عياش : تجي النتائج ونشوف + مهند ابن عمي عاصم بكد اخوي ليث بس همه كل واحد تخصص بحياتي مافرقت بينهم مهند احسبه نفس ليث اثنينهم حريص عليهم الله يوفقهم صح يشلعون الكلب لاجن يتعدلون محد اجه من بطن امه يمشي عدل ، كمت صعدت فوك ارتاح رحت بدلت ونزلت دكيت الباب ع جمارة ادك ماتسمع الباب تعصبت حيل وفتحت الباب ودخلت شويـة واسمع باب وراي ينفتح نداريت والكاها طالعه من الحمام بـ البرنص { الروب مالت  الحمام } وشعرها ع وجهاا مبلل وتمشي ع كيفهاا وتفرك بعيونهااا انه شيخ وشكدني وشكبرنيييي ذبت بتفاصيلهااا كبلل عطت عليييهاااا غبيه شلون طلعين من الحمام بلا واحد من اخوانج داك الباب واكف وانتي طلعين بهذا المنظر ادبسزز
جمارة : جنت بالحمام اسبح ونسيت اقفل باب غرفتي طلعت عادي منو قابل يدخل بلغرفه عيوني بقت تحركني من ورا صابون شويـة سمعت صوت رفعت راسي والكه عياش كبالي ذبحوني ماتلكون قطره دم بيههه حيل خفت منه كتله , * بخوف *انته شجابك الغرفتي ماتستحي ليش مادكيت الباب اطلع بسرعه يلا المن صافن
عياش : انه طالع بدلي بسرعه وحسابج بعدين سامعه ، طلعت من الغرفه وانه كليييي عركان وجسمي يتراجف حجيت بيني وبين نفسي عياش اهده هاي عود انته شيخ وهاالله هاالله مره هلكدهاا سودنتك الله يساعدك ياكلبي شتحمل بعد اثكل شويـة ، رجعت دكيت الباب عليها صاحت ادخل ، دخلت وقفلت باب غرفتها اي ست جمارة هسه نجي منو المايستحيييي ومنو الي ترفعين صوتج عليييي
جمارة : مو قصدي شي اسفة * بتوتر وخوف * بس يعني اني بالحمام انته شعندك بغرفتي وشتريد مني
عياش : استغربت من رده فعلها حسبالي مثل كلمره صيح وتعلي صوتهااا جنت محضر اعاقبهاا خوش عقاب بس شو رده فعلها صدمتني جاوبتهاا ضل بالي عليج اليوم ليش مانزلتي
جمارة : لانزلت سلمت ع عمه وتغدينه ومن راحو صعدت
عياش : جمارة بيج شي مصخنه شي
جمارة : لاشيخ مابيه شي انته محتاج شي
عياش: لامامحتاج شي سلامتج اترخص ، طلعت وانه متافجئ شغيرهااا معقوله هاي بنت روحييييي جمارة ام لسان طويل هيج ضليت منصدم كلت بلكت الله ويهديهااا وتسمع الكلام وصيررر ادمية دخلت الغرفتييي ارتاح واشتغل ع حاسبه ..
.
.
.
جمارة : بعد مااجة الشيخ ورديت عليه بااسلوب بارد حسيته مصدوم بس كلت خل امشيها بصراحه تعبت بعد مالي حيل اتناقش ويااا تعبت منه قررت شيكلي انفذ بسكوت مااريد اتعارك ويااا وانقهر مره ثانيه تعبت نفسيتي كاعده امشط ودخلت علييي سحر ..
سحر : ولج جميره وينج صار ساعه تمشطين
جمارة : خيرج شكووو ولج جهالج بيهم شي اسر بي شي
سحر : ولج لا اسم الله عليهم مابيهم شي بس زينة راح تجييي هسه جايه من الدكتور هيه ومروان وماتقبل تحجي شنوبيهاا ماخذه سونار
جمارة : جذب شوكت راح يجون يلا خل اكمل اكلج تعاي ضفري شعرييي وخل ننزل بسرعه
سحر : اييي يلا تعايي هسه شوية وتجي توها جانت تحجي ويانه كامره
جمارة : يلا بسرعه نزلنه جوه واجن البنات كلنه التمينه يم الشيخة اباوع ليث شلون ضاربله صفنه ع ريحان ويباوع عليها وهاي الفاهيه ولايمهااا كاعده يم سرور وتلعب ويه رزان باوعت علييي وغمزتله شو هذا رئسن ضل يكحكح وكام يشرب مااي صدك ضحكت عليييي تجي الثانييي مهند مدنك راسه بتلفون هوه وست نور وبس تبسم ع وجهه ياحبيبي بيت العاشقين مو بيت الشيخ مصعب هنيالك جدييي كل احفادك يحبون بس حضي مصخم ندست سحر اكلج
سحر : هااا خيه شمالج
جمارة : شنو الموضوع اشو العائله الكريمة كلها ساكته شعجب وذاك غراب البين وينه { ع شيخ تقصد 😂😂عاجبها تنكتل اليوم }
سحر : ياهو غراب البين منو تقصدين
جمارة : ولج خايبـة الشيخ عياش اسم الله ع عمرج اشو ماكو
سحر : يااااا دهر صابج كون ولج عيب لايسمعج احد شلون بالسانج الماينكض مادري بي وين ع اغلب بغرفته يستغل شتردين منه جلدج يحكج اليوم ماكو كتله وصياح
جمارة : ماريد شي شريد عشتو هيج حبينه نسئل شنو حرام
سحر : لا عيني مو حرام امشي وياي يلا المطبخ خنجيب كيك وعصير نشف حلكييي
جمارة : اي والله ميته جوع انييي دكومي
سرور : وين ع الله صبايا
جمارة : حبيبتي معليج خليج يم جهال عدنه اشغال
سرور : تجن لو ماتجن سهله
سحر : هههههههههههههههههه امشي ولج
جمارة : رحنه جبنه الاكل وكعدنة ناكل ونسولف شويـة ودخلت زينة ومروان كمنه سلمنه عليهم وضلينه كاعدين شويـة ونور سئلتهااا
نور : هااا زينة شنو مارحتيييي للدكتوره يلا عاد مو شلعتي كلبنه
زينة : هاي رجعتي منها الكم وعرفت جنس البيبي شنو !!
البنات : يلا احجي طلعتي روحنه
الشيخة امنية : بيها الخير بنيتي احجي راح يموتن
زينة : راح يجيكم ولي العهد (شاهين )* بفرحة ودموع
جمارة : صدك فرحتلهااا يمه يستاهلون كل الخير الله لايحرم كلش شخص من الاطفال كمنه تباركنالهاااا وبقينه نضحك وياها
منال: الف الف مبروك بنيتي تستاهلون كل الخير الله يكومج بسلامه بس شلونها صحت طفل ان شاءالله زينة
زينة : حبيبتي عمه الحمدالله كلشي تمام
منال : الله يسعدج بنتي ديربالج ع صحتج وصحه طفل
زينة : بعيوني عمه تسلمين
هناء : يمه بنيتي حبيبتي الف الف مبروك يمه يكومج ربي بسلامه ويتمم عليج بالخير والبركة
زينة : امي حبيبتي بوجودج ان شاءالله
الشيخة امنية : الف الف مبروك بنيتي بس هذا ياهو مقترح اسم شاهين
مروان : انه شيخه اقترحت حيل حاب الاسم
الشيخة امنية : يمه صدك جذب شهل اسم الماصخ لو انه كايلي جاانه سميته
جمارة : اي شيخة وشراح سمينه عود اسم الله
الشيخة امنية : اسميييي مزعل ع اسم المرحوم جدييي عمت عيني عليه
ليث : جده صدك جذب سمييي مزعل وشندلعه مزعولييي
الشيخة امنية : كلابك ولك تروحله فدوه شماله الاسم موش احلا من هذا الاسم الماصخ
مهند : جده اذا ماصخ حطيله ملح
الجميع : ههههههههههههههههههههههه
جمارة : ضلو الشباب يداهرون ويه الشيخة شوية ونزل الشيخ عم السكوت مو اكلكم غراب 😂😒
عياش: شكو هالمصايح خير ياستار هاا ابو شاهينو  الله بالخير اخوي ليش ماعندي علم جاي
مروان : الله بلخير والعافيـة والله صارت غفله اجيت حسبالي طالع انته مادري بيك هنااا توني بيني وبين نفسي ردت اخابرك جنه بدكتوره واجينة البيت جدي
عياش : خير ياساتر خو ماكو شي
مروان : لاياخوي ماكو شي بس ولي العهد راح يشرف عن قريب
عياش : صدك يعني ولد موو ييييي الف الف مبروك اخوي تستاهل كل الخير مبروك خيتي ام شاهين الله يكومج بسلامه يارب وتفرحونه بشوفته
مروان : حبيبي عيوش يوم الالكم يارب ونشوفك احلا واحسن اب
عياش : الله يسمع منك باوعت الجماره غمزتلهاا وضحكت ع ارتباكهاا
جمارة : جنت واكفه اسولف ويه البنات ومروان كله يوم الالكم ونشوفك احسن اب اشو هذا باوعلييي وغمزلييي ياكاع نشكي وبلعيني حيل ارتبكت مادري شسوي صدك مايستحي كعدنة نسولف ونضحك شوية ودخلو جدي وابوي وعني والشباب وبقو يباركولهم بعدين صارت الساعه بـ11:30 راحو البيتهم وكلمن صعد غرفته ينام مره اليوم عادي ...
.
.
.
7:28 دقيقـة صباحاً ..
قيس: اجرت شقه يم شقة صاحبي وبقه بس شغل ادور علمود استقر بلكامل كلش مشتاق الاهلي والجمارتي  مشتاق اشوفهم واحضنهم كلش صعبه تكون بلد ما بي احد يفهمك ماكو احد يفهم حجيك الحمدالله اعرف احجي نكليزي جان ضليت بلضيم 🤣 بديت اطلع واكتشف الاماكن شكد حلوو بلدهم نضيف وحلو وكلشي عدهم حلو ومرتب مو مثل العراق صح حلو بس مو مثل باقي الدول ضليت شوي شوي اتعلم ع العيشه هنا يوميه اطلع ادور شغل زين صح عندي فلوس الحمدالله واهلي ما مقصرين وياي كل شهر يحولولي فلوس بس هم ما يصير اضل بدون شغل جنت طالع ادور ع شغل والحمدالله لكيت  زين ومرتب كالو من باجر ابدي اتفقت وياهم ع كلشي ورحت للسواق اشتري مسواك للبيت ما عندي اشتريت  وانه بلطريق راجع  للبيت شفت بنيه سبحان الله تشبها جماره مدري هيه تشبها مدري انه لأن مشتاقلها تخيلت البنيه تشبها ضليت مركز بيها ونزلت دمعتي وبعدين استغفرت ربي وكلت هسه هيه صارت حلال غيري حرام افكر بيها مسحت دمعتي وكملت طريقي للبيت خليت كلشي بمكانه ورحت سبحت وحضرت ملابس لباجر ونمت ع جربايه وضليت اذكر سوالفنه وحجينه انه وياها طلعت صورتها وضليت اباوع عليها واحجي ويه الصوره انتي هم مشتاقتلي بكثر ما مشتاقلج انه هم حبيتي عياش نسيتيني لو بعدج تذكريني بعدج تحبيني ها جمارتي جاوبيني حبيتي موو ضليت ابجي وغفيت وانه ما ادري كعدت الصبح ع صوت المنبه غسلت وبدلت ورحت بلشت دوام..
.
.
.
.
البيت صباحاً ..
جماره: كعدت الصبح غسلت وبدلت وصليت وقريت شوي قرءان ونزلت جوه لكيت الكل كاعد يتريك صبحت ع الكل وبست راس الشيخة والشيخ {صباح الخير يا خير انتو }
الجميع : صباح النور
الشيخ مصعب : صباح النور بنيتي شلونج اليوم
الشيخه: صباحج خير يا بعد كلبي انتي
جماره: فدوه اروحلكم بخير الحمدالله شيخنة وكعدت اتريك كملت ورحت اساعد البنات بلتنضيف
سحر : ولج جميره  اشو صايره عاقله شعجب منج من الشيطان ماكو مشاكل ولا شي صايره خيره
جماره: والله مال خلك مشاكل صرت عاقله بعد *بضحك
سحر: يي احسن خيه صيري عاقله وعوفي الخبال وبلكت تعقل ازل مثل ما عقلتي انتي
جماره: *بضحك ازل ما تعقل لو مدري منو يجي خبله واخذت واحد اخبل منها
سحر: *بضحك اي والله صح يله تعاي خل نكمل لا تجيلنه الشيخه بلعوجيه
جماره: ع كولتج يله امشي * بشقه
الشيخه: جني سمعت اسمي
سحر: ها هلا شيخه لا سمعتي غلط محد جاب اسمج
الشيخه: نجبي ولا جذبين علي وبعدين شقصدج سمعت غلط شنو ما اسمع انه قصدج خرفيت (وهيه تضرب سحر بلعوجيه)
سحر: (بصياح خفيف ) لا شيخه شنو خرفيتي بعدج شباب والله
الشيخه: امشي من وجهي لا بارك الله بيج وانت جماره اشو ضحكين جلدج يحكج (وهيه تتقرب من جماره تريد تضربها)
جماره: بتعدت عن الشيخه لا والله ما يحكني جلدي * بضحك
الشيخه: لا واضح جلدج يحكج * وضربتها بلعوجية
.
.
.
.
عياش: جنت طالع ورجعت للبيت دخلت واسمع صوت حجي بلمطبخ  رحت واشوف الشيخه جاي تضرب بجماره وجماره تضحك بكلبي اروح فدوه لهل ضحكه شمالج وياي حته سنونج ماترويني شكلهن  ضحكت عليها وحجيت ويه الشيخه ها الله يسعدج امونـة اشوفج ضربين بمرتي تره ما اقبل ضربيها
الشيخه: هلا يبعد هلي يي يغالي اضربها لأن تستاهل وانت لا دافع عليها لا يجيك السره
عياش: بضحك*  شسوتلج علمود ضربيها وهاي شمسويه بسحر
الشيخه: يستاهلن ترضاها  يحجن علي
عياش: افا طبعاً ماارضاها ليش يحجن عليج لتفتت عليهن ليش تحجن ع الشيخه ولجن
جماره: والله ما حجينه عليها بس جنه نسولف اني وسحر وكالت امشي نروح نكمل تنضيف لا تجي الشيخه بلعوجيه وضحكنه والشيخه اجت وبلشت ضرب بينه
عياش: بضحك * تستاهل ليش تكولن هيج ع شيخه كلبي {وهوه يحضن الشيخه ويبوسها }وهسه يله روحن كمل شغلجن والمره الثانيه صوت عالي ما اريد اسمع خوش وخزرت جماره
جماره: عوذه مو بشر توك شحلاتك تضحك شبسرعه نكلبت غراب
سحر: وجع سكتي عاجبج تنكتلين بعد
جماره: نجبي انتي كملنه تنضيف اني وسحر ورحت صليت بسرعه علمود اكمل صب الغده ويه البنات صليت وكملت جاي انزل وعياش صار كبالي وكلي
عياش: ضليت اسولف ويه الشيخه شوي ونوب صعدت سبحت وصليت صلاه الضهر جاي انزل اتغده وجماره صارت بوجهي كتلها يي جماره اليوم تتمضحكين وصوتج عالي وربي مره الثانيه اذا سمعت صوت ضحك عالي اله اموتج ماشيي
جماره: صار اكو اوامر ثاني اريد انزل اساعد البنات؟
عياش: استغربت منها شعجب ما لاسنت كتلها لا ماكو اوامر ثانيه ويله نزلي كدامي نزلنه وراحت للمطبخ وانه اباوع عليها شلون تمشي دخلت للصاله كعدت اسولف ويه الشيخ
جماره: نزلنه رحت للمطبخ واحس عيونه تراقبني دخلت وهوه راح للصاله اجن البنات وحضرنه السفره وكعدنه نتغده ما اكلت هواي لأن ما اشتهي كملت ورحت اسوي جاي ونضفت المطبخ بين ما يكملن البنات ويغسلن الماعين خليت الجاي ع نار وصعدت اسبح سبحت وكملت جاي امشط بشعري وذكرت قيس ذكرت حجيه وحبه الي ضليت ابجي اجت نور يمي شافتني ابجي
نور : عززا جماره شبيج تبجين صاير شي بينج وبين الشيخ؟
جماره : هزيت راسي ب لا
نور: لعد شبيج فهميني عليش هل بجي 
جماره: حضنت نور وزدت بلبجي
نور: ياا حبيبتي شبيج رحمه الاهلج احجي
جماره: بجي* مشتاقه القيس راح اموت ع شوفته كله من وره عياش الله لا يطي حرمني منه
نور: ياا ولج لا تحجين هيج لا يسمع احد بعدين حاولي تنسين قيس لأن انتي هسه بذمه رجال وحرام تفكرين برجال ثاني
جماره: مو بيدي نور مو بيدي احبه والله احبه بعدني ما مكمله حجي وما احس اله دخل عياش كلشش خفت ونصدمت شلون هيج يدخل علينه 
عياش: كملت غده وكلت الريحان تصعد الجاي الي بغرفتي صعدت ع درج وصدت الغرفه جمارة  وسمعت صوتها وكفت اسمع  كل حجيها ع قيس ودعاويها علي كلشش عصبت احس الدم صعد الراسي ردت افوت اكسرها تكسر بس سمعتها كالت احبه مو بيدي احبه انه هنا ما ضليت اشوف كدامي دخلت عليها بسرعه هيه كامت من مكانها مخترعه لزمتها من شعرها وكلت النور تطلع كتلها بعدج تحبينه موو ومشتاقتله موووو وكله من وراي لج اليوم اموتج يا كلبه...
# الكاتبـة نيروز الكربلائيـة 🖤.