ကိုယ်တူစိတ်ခွဲ ချစ်သူ(灵异片演员app)[COMPLETED]

Arc 3 အပိုင်း {၅၈}(Z+U) Two

ခြောက်ခြားဖွယ်ရာ အစုံအလင် (၁၃)
ဒုတိယပိုင်း

UNICODE

ရှဲ့ချီ မျက်လုံးများကို ပြန်ဖွင့်လိုက်သောအခါ ၁၀ ကုဗမီတာပတ်လည်အောက်ရှိသော အခန်းကျဥ်းလေးထဲတွင် ရောက်နေကြောင်း တွေ့လိုက်ရသည်။ အခန်းတွင်းရှိ အလင်းရောင်မှာ သိပ်မကောင်းဘဲ မြင်ကွင်းသိပ်မရှင်းပေ။ အခန်းထဲတွင်း အသင့်စားခေါက်ဆွဲနံ့နှင့် မွှန်နေပြီး သူဝတ်ထားသော အဝတ်အစားများက စျေးပေါလှသည်။ ကြည့်ရတာ ဤဇာတ်ကောင်၏ ငွေရေးကြေးရေးမှာ သိပ်အဆင်ပြေပုံမပေါ်။

အခန်းတွင်းရှိ နံရံများတွင် ​ခြောက်ခြားစရာ ပိုစတာများရှိနေသည်။ ခေါင်းပြတ်နေသော ကျောင်းသူများ၊ မြေကြီးပေါ် မြွေလိုတွန့်လိမ်သွားနေသော သရဲမများ၊ ဦးခေါင်းခွံများ....ပြတင်းပေါက်များပေါ်တွင်လည်း ခြောက်ခြားစရာနှင့် ဆက်စပ်နေသော ဓာတ်ပုံလေးများ များစွာရှိနေသည်။

ကြည့်ရုံနှင့်ပင် သူ့အလုပ်အကိုင်ကို မသိနိုင်ဘဲ အတော်လည်း ဆင်းရဲပုံရသည်။

ဖုန်းက အချိန်ကိုက် မြည်လာသည်။

[သင်သည် တိုက်ရိုက်ထုတ်လွှင့်တင်ဆက်သည့် ပလက်ဖောင်းတစ်ခုတွင် ခြောက်ခြားစရာ သဘာလွန်ဖြစ်ရပ်များကို စူးစမ်းလေ့လာသော ခြောက်ခြားဖွယ်ရာ တင်ဆက်သူဖြစ်သည်။ ယခုအချိန်မှာ ည ရှစ်နာရီဖြစ်သည်။ သင် တိုက်ရိုက်ထုတ်လွှင့်နေကျအချိန်ဖြစ်သည်။ တိုက်ရိုက်ထုတ်လွှင့်သည့်အခန်းကို ဖွင့်လိုက်ပါ။]

တိုက်ရိုက်? ရှဲ့ချီ ရပ်သွားသည်။ အဲ့ဒါဆို အခန်းထဲက မီးရောင်နဲ့ နံရံပေါ်က ရှုပ်ယှက်ခတ်နေတာတွေက ကြောက်စရာကောင်းအောင် တမင်လုပ်ထားတာပေါ့။

[သင်တိုက်ရိုက်ထုတ်လွှင့်သည့်အချိန်မှာ ညရှစ်နာရီမှ နောက်နေ့ မနက်လေးနာရီထိဖြစ်သည်။ ဤအချိန်အတွင်းတွင် သင့်ကို အမြင့်ဆုံးလက်ဆောင်ပေးသော ကြည့်ရှူသူသည် သင့်အား သူတို့ပြောသော ကြောက်စရာကောင်းသည့်နေရာသို့ သွားခိုင်း၍ရပြီး ကြောက်မက်ဖွယ်ရာဖြစ်စဥ်ကို ကြုံတွေ့ခိုင်းနိုင်ပါသည်။]