School of Myths: Ang ikalawang aklat (COMPLETED)

Chapter 40: Mga natitirang mapayapang araw.

July 18, CS242, araw ng sabado. Sa wakas ay natapos na ang matagal ng hidwaan sa pagitan ni Hades at Viel. Hindi nagawang matalo ni Viel si Hades ngunit sapat na ang naging paglalaban nila upang tuldukan ang kanilang alitan sa nakaraan.

Tinanggap ni Viel ang grupo ni Hades bilang kanilang mga panauhin at sa ngayon ay nasa kaniyang silid ang mga ito upang dito sila pribadong makapag-usap. Ilang sandali pa ay dumating na si Leiya kasama si Eclaire at Poseidon.

 

“Mabuti naman at hindi ka pinatay ni Hades.” Sambit ni Eclaire.

 

“*Fufufu.. Hindi ka pa rin nagbabago, Eclaire.” Sambit ni Viel.

Napangiti na lang si Eclaire matapos marinig ang sinabi ni Viel sa kaniya at kalaunan ay lumapit na sa kaniyang mga kasama. Samantala, nagtungo naman sa kaniyang kapatid si Leiya upang tumulong sa pag lunas sa mga natamo nitong pinsala.

 

“Siguro naman kuya, magtitino ka na? Kung nabubuhay lang si ama ay natitiyak kong pagagalitan ka non, dahil nakipaglaban ka na naman kay Hades.” Sambit ni Leiya.

                                                                                                                                      

“*Fufufu.. Mahigit tatlong daan taon na ako Leiya. Alam ko ang mga limitasyon ko.” Tugon ni Viel.

 

“Oo na! Oo na! Taas kasi ng pride mo!” Sambit muli ni Leiya.

Tahimik lang na pinanood nila Rain ang ginagawa ni Leiya sa kaniyang kapatid. Ngunit ilang sandali pa ay muli ng nagsalita si Hades.

 

“Mabalik tayo sa sinabi ko kanina, alam kong alam mo kung nasaan ngayon si Izual.” Sambit ni Hades.

Sandaling tumahimik ngunit nanatiling nakangiti si Viel.

 

“Papaano ka naman nakatitiyak na alam ko ang tungkol sa bagay na yan?” Sambit ni Viel.

Napangiti na lang si Hades at kalaunan ay napalingon kay Mishia na sa kasalukuyang may hawak na isang maliit na nilalang at tila wala na itong buhay. Napatingin din dito si Viel at kalaunan ay nagulat sa kaniyang nakita.

 

“Mama! Katulad ng kay Papa ang familiar na ‘to!” Sambit ni Mishia.

 

“*Hmm.. Kung hindi ako nagkakamali ay familiar ito ni Izual.” Sambit ni Lyrices.

Hindi pa rin maalis ang pagkagulat sa mukha ni Viel at iniisip kung papaano ito nalaman ni Hades at nahuli ng batang kasama nito.

 

“*Fufufu.. Siguro naman ay alam mo na ang sagot sa tanong mo kanina.” Nakangiting pagkakasambit ni Hades.