Unicode~
"အင်း.. တမြန်နေ့ကပဲ။ မလိုပါဘူး.. မကြည်ဖြူဘဲ ဘာမှလုပ်ပေးစရာမလိုဘူး။ တာဝန်ဝတ္တရားအရလုပ်ပေးတာမျိုးဆို မျက်ခြယ်လည်းသဘောကျမှာမဟုတ်ဘူး"
JungKookမှာ ဝါရှင်တန်ကဖုန်းဝင်လာတည်းက အာရုံက နောက်ကျိကျိ။ မိသားစုဘက်က ဖုန်းခေါ်လေ့ခေါ်ထမရှိသော်လည်း ရုတ်တရက်ဖုန်းဝင်လာသောအခါ စိတ်ကြည်နူးဖွယ်အကြောင်းအရာမဟုတ်သည်ကိုတော့ သူသိလိုက်၏။
အမေ့လေသံက ကြည်ဖြူတက်ကြွဟန်မရှိ။ မျက်ခြယ်ကိုလည်း အသာတကြည်လက်ခံမည့်ပုံမပေါ်။ သူ့အဖို့တော့ ပြောင်းလဲသွားမည်မဟုတ်သည့် တစ်ခုတည်းသော ရွေးချယ်မှုက မျက်ခြယ်ဖြစ်လို့နေသည်။ သည်အရွယ်မှာ လက်ထပ်မှတော့ အမေနားလည်လက်ခံလာအောင်လည်း အချိန်ယူဆွေးနွေးတင်ပြမနေချင်တော့။
"ဘာမှပို့စရာမလိုပါဘူး။ မျက်ခြယ်ကိုလက်မခံချင်မှတော့ ဘယ်ရုပ်ဝတ္ထုပစ္စည်းကိုမှ လက်ဖွဲ့မနေပါနဲ့။ အကယ်၍ ကျွန်တော့်လက်ထပ်ပွဲက အမေတို့ကို နစ်နာစေတယ်ဆိုလည်း ကျွန်တော့်ကိုအဆက်ဖြတ်လိုက်ပါ.. ကျွန်တော်နားလည်ပါတယ်"
ဖုန်းချလိုက်ပြီးနောက် JungKook သက်ပြင်းတစ်ချက်ရှိုက်လိုက်သည်။ မျက်ခြယ်နှင့်မိသားစုကြား စိန်ခေါ်ပွဲတစ်ခု စတင်ပြီဖြစ်ကြောင်း သူ့ကိုယ်သူသိလိုက်ပြီ။ သည်လွန်ဆွဲပွဲကို သူကစခဲ့ပြီး သူ့အတွက်အနေရခက်စေမည်ဆိုလျှင်တောင် မျက်ခြယ်ကိုတော့ လက်လျှော့နိုင်မည်မထင်။
အချိန်တွေက သက်သေပြသွားပါလိမ့်မည်။ အချိန်နှင့်တကွ ပူးတွဲလျက် သက်တမ်းကြာရှည်မည်ဖြစ်သော သူတို့ကြားက ချစ်ခြင်းတွေက အလိုလိုသက်သေဖြစ်တည်လိမ့်မည်။ ဘာအတွက်ကြောင့်များ တမင်တကာ ကြိုးစားနေဦးမလဲ။
"အိမ်က ဖုန်းဆက်တာလား မောင်"
လက်ဖက်ရည်ကြမ်းနှင့် အချိုပွဲမြန့်အချို့ကို ငွေရောင်လင်ဗန်းပေါ် စီစီရီရီထည့်ပြီး မျက်ခြယ်က ယူလာသည်။ စားပွဲပေါ်ကို အသာချပြီး သူ့ကိုအမေးရှိလာတော့ အသာခေါင်းညိတ်ပြလိုက်သည်။
YOU ARE READING
ℒ𝑖𝑠𝑡𝑒𝑛 𝑡𝑜 𝑡ℎ𝑒 ℛ𝑎𝑑𝑖𝑜♪
FanfictionTennessee Radio Station ? Turn on 91.3 MHz. One fine evening let me hear your voice. Captivate my soul and from my heart, can't I let it flee. Since then, you stay on my mind rent free. Kookv JJK × KTH [Disclaimer : This is just a fiction and nothin...
