Unicode~
ယနေ့မှ အချိန်အခါမသင့်စွာ ဥတုအခါရာသီရယ်က မှိုင်းညှို့ညှို့။ မိုးမရွာသော်ငြား တိမ်မကင်းစင်။ ယမန်နေ့ကောင်းကင်ကြီးနှင့် လားလားမှမဆိုင်အောင် ခြားနားလျက်။
ဝါရှင်တန်မြို့လယ်ခေါင်ရှိ မီးခိုးရောင်တိုက်အိမ်ကြီးက ထီးထီးမားမား။ မောင့်လက်ကို တင်းတင်းဆုပ်ကိုင်ကာ မော့ကြည့်နေမိသည်။ မူမမှန်သော နှလုံးခုန်သံအရ စိတ်မလှုပ်ရှားဘဲ မနေနိုင်ကြောင်း သိသိသာသာ။ သူဒါကို ဖြတ်ကျော်နိုင်မည်တဲ့လား။
မီးခိုးရောင် တိမ်တိုက်များအောက်က မီးခိုးရောင်တိုက်ကြီးက သူ့ကို စိတ်မဖြောင့်စေပါ။ ကျယ်ပြန့်သော တံခါးရွက်များနောက် သူဘာတွေကြုံကြိုက်ရဦးမည်လဲ။
"လာ.. အထဲဝင်ကြစို့"
မောင်က လက်ဆွဲခေါ်တော့ သူတန့်ခနဲသာ တုံ့ပြန်မိသည်။ မောင် သူ့ကို သမင်လည်ပြန်ကြည့်လာစဥ် သူ့မျက်နှာပေါ် မဝံ့မရဲအရိပ်အငွေ့တို့က သိသာနေလိမ့်မည်။
"ဖြစ်ပါ့မလား။ ကျွန်တော့်ကို ကြည်ဖြူပါ့မလား"
"မောင့်ကိုပဲကြည့်နေ။ မျက်ခြယ်ကို လက်ထပ်ခြင်းမထပ်ခြင်းက မောင့်တစ်ယောက်တည်းရဲ့ ဆုံးဖြတ်ချက်။ အသိပေးချင်ရုံသက်သက် မောင်တို့က ဒီကိုရောက်နေတာ။ မောင့်မိသားစုကလည်း မျက်ခြယ်ကို လက်ခံသဘောမကျဘဲ မနေနိုင်ပါဘူး"
အားတင်းလျက်သာ ထိုအိမ်ကြီးထဲ ဝင်လာခဲ့သည်။ တံခါးမကြီးကို ဖွင့်လျက်သားဖြစ်နေပြီး ဆင်နားရွက်တံခါးရွက်များကတော့ လေအရှိန်အတိုင်း တစ်ဖက်နှင့်တစ်ဖက် ရိုက်ခတ်နေကြလေရဲ့။
"ငါ့မောင် ရောက်လာပြီလား။ အမေရေ.. အမေ။ ဒီမှာ အမေ့သားခရိုင်မင်းကြီး ပေါ်တော်မူလာပြီတော်"
မြောက်ပိုင်းလေယူလေသိမ်းအတိုင်း မောင့်အစ်မဖြစ်သူက အသံပေါ့ပေါ့လေးနှင့် သူ့အမေကို လှမ်းခေါ်သည်။ ထိုစဥ် နောက်ဖေးတံခါးမှ ထွက်လာသူ အသက်၆၀နီးပါးရှိမည်ဟု ထင်ရသော အမျိုးသမီးကြီးတစ်ယောက်။ မောင်နှင့်တူသော မျက်ဝန်းများကို ပိုင်ဆိုင်ထားသည်။
YOU ARE READING
ℒ𝑖𝑠𝑡𝑒𝑛 𝑡𝑜 𝑡ℎ𝑒 ℛ𝑎𝑑𝑖𝑜♪
FanfictionTennessee Radio Station ? Turn on 91.3 MHz. One fine evening let me hear your voice. Captivate my soul and from my heart, can't I let it flee. Since then, you stay on my mind rent free. Kookv JJK × KTH [Disclaimer : This is just a fiction and nothin...
