مر الوكت بسرعه عليهم بس ع البنات الساعه تمر بسنة والخوف اكل عقولهن وكلوبهن بعد ماحجت شاهندة لاختها كلشي سمعته وهنه بالسياره وشلون يريد هيبت يبيعهن لناس كبار بالخليج هنه وبعد بنات وهالشي خوف روزة اكثر على اختها الزغيره لكن الي طمنها وبث بيها ذرات من الامل هوه لمن حجتلها شاهندة عن الشي الي لمحته من بعيد .
شاهندة بهمس: لمن جانو يسولفون هيبت وهذا الاسمه شاكر اني جنت طول الطريق مسويه نفسي نايمه بس فاتحه نص عين واباوع من الجامه الي بصفي ع الطريق شفت دخان يطلع من جهة بعيده بالصفحة الثانية وبعدها مشت السياره مسافة طويلة شويه ونوب وصلنا لهذا البيت . . روزة مدام اكو دخان جاي من ذيج الصفحه يعني اكو بيوت هناك ذول العرب نفس الي جانو بالقرية الي اخذنا الها قبل هيبت بسامرا تتذكرينها لمن دبروله ربعه بيت هناك ومن طلعنه شفناهم يخبزون بتنانير طين . . يعني هذول هنا هم قرى وارياف واكيد هناك اكو قرية واذا نروحلهم راح يساعدونه واكيد ميقبلون اذا عرفو بهيبت خاطفنه .
سكتت روزة وهيه تفكر بكلام اختها ، حتى لو رادت تشرد منهم مراح تكدر تركض لأن السم تعبها واخذ من طاقتها هواي من غير الالم الي ابطنها وراسها ورجليها ومعدتها الي تگلب وكلساع تتقيأ ، فكرت وفكرت وفكرت لحد ماتعبت واتخذت قرارها اخيرا بأن تحاول تشرد اختها الي جانت طول فترة نضوجهن وهيه تحميها من هيبت ونجاسته ومن عيون ربعه ، سوت المستحيل والي محد يتخيله حتى تبعدها عن الاذى والسوء لكن حست كلشي سوتة مانفع ومافاد وياهم وهيه تشوف اختها رح تنباع وتفترق عنها ويمكن مصيرها راح يكون اسوأ من ماهيه عد هيبت . . طب هيبت وهو شايل ماعون سفري وبطل مي صغير ويباوعلهن بحقد . . نزل لمستواهن وهو يحط الماعون كدامهن ويحجي بتهديد .
هيبت: اخذن هذا السم اكلن لا تفطسن بنص الدرب وما استفاد منجن شي . . اذا رجعت ولكيت الماعون بيه ولو ذرة متلومن الا نفسجن .
عافهن ورجع طلع اقتربت شاهندة من الماعون وخرت العلاكه منه لكته كباب شوي وصمونتين مدت ايدها رادت تاكل لان جانن جوعانات وعطشانات بس روزة لزمت ايدها وهيه تهمسلها بتحذير .
روزة: لاا هندة لتاكلين شي ديري بالج باعي لشكل الكباب ليش هيج مبحرثيه وملعوب بيه ولتشربين مي انتبهي للبطل مفتوح وباقي على حاله ممشروب منه . . هاي سوالف هيبت يمكن مخلي شي بالاكل والمي
باعي انتبهي بسرعه لازم نخلص من الاكل والمي بدون ميحس علينه .
باوعت شاهندة لكل انحاء الغرفة الي هنه بيها ماجان بيها شي غير شباك على شكل فتحة صغيرة وسادينها بشي مثل الطبگ مال خوص كامت شاهندة ولزمتها حاولت وياها مرة ومرتين وتلاثة لحد ما انعتت من مكانها باوعت وراهه بقلق خاف سمعو صوت بس همه جانو ملتهين جايبين شرب ومشغلين اغاني صح منصين الصوت بس ملتهين بالسوالف والفلوس الي راح يستلموها شيسوون بيها ووين يسافرون
بيها ، بسرعه راحت ع الماعون اخذته هوه وبطل المي وخلتهن بره ومدت روحها من الفتحه وطلعت بالگوه وهيه تجر بروحها فرغت الماعون جوه الغراض الي جانن مكومات وره البيت بصف الغرفة الي هنه بيها وفرغت بطل المي ورجعت الماعون للغرفه ورادت تطب بس صفنت وهيه تفكر بشي باوعت داير مدايرها مالكت احد مشت وهيه تدور تجاه هيبت وربعه من وره البيت وكفت وره الحايط ومدت راسها بس عينها طلعت ، باوعتلهم لكتهم واحد واكف يركص وبيده بطل والبقيه يصنفون عليه ويصفكوله وياكلون ويمهم بطالة العرگ رجعت بكل خفه وحذر للغرفة وهيه تاخذ نظرات للداير مداير البيت وحددت اتجاه الدخان الي شافته لمن اجو بالسيارة ، طبت من الفتحه ورجعت سدتها بنفس الطريقة الي جانو ساديها بيها قبل وثبتتها زين حتى ماتوكع من الهوى .
باوعت لاختها لكتها لازمه الصمونات وتباوع بيهن وتشمهن ، تدنت من يمها كالتلها بسرعه اكلي هاي الصمونة ، خلصن الصمونات والماعون والبطل كدامهن ماحسن الا وهيبت يفوت عليهن باوعلهن بأبتسامة حقيرة وهوه يمدحهن بخباثة واضحة بكلامه .
هيبت: عفية بالحلوات هيج اريدجن تطيعن وتسمعن الكلام جيبن الماعون لا تلتم عليجن الحياية والدود وأخسر فلوسي كلها .
باوعن وحده بوجه الثانية بخوف وهنه يشوفنه يطلع وبيده الماعون ، تدنت روزة
على اختها وهيه تشاورها .
روزة: حاولي متنامين هذول شربو ورح ينامون فد شويه واذا تأخرو مانامو نحسب بعد ربع ساعه نص ساعه ونطلع منا بسس . . هندة . . اريدج توعديني وعد . . اذا حسو بينا لو لحگونا اريد٠ تركضين بكل ذرة حيل بيج ولتفكرين بيه ولتوكفين ولا تندارين ابد . . اذا انتي شردتي ولكيتي ناس يساعدوج يعني اكيد رح ياخذوج للشرطة وبهالطريقة رح تلحكيني وتخلصيني منهم بس اذا انلزمنا اثنينا مراح نكدر نخلص منهم بعد . . واذا صدك رح يسفرونا ويبيعونا يعني بعد مستحيل اشوفج وتشوفيني . . مصيرنا راح يكون اسوأ من هسة . . اوعديني واحلفيلي بغلاة ابونا عندج تنفذين هالوعد .
جانت شاهندة تسمع كلام اختها ودموعها تنزل بقهر هيه تعرف انو اذا لزموهن اثنينهن مراح يتخلصن منهم بعد لو مدري شيصير وباجر رح ينباعن ويتفارگن للأبد . . ومن المستحيل شاهندة تسمح بهالشي لذلك رح تحاول بكل ماتگدر انها تساعد اختها ، لان حالة اختها الجسدية متساعد على الركض والجهد وهالشي يعني انها ماراح تكدر تكمل الطريق وياها وهنا لازم شاهندة ترد جمايل اختها وتعب السنين الي تعبته وهيه تربي وتحمي وتعلم . . شاهندة ماعرفت ام غير روزة الي جانت طفلة وتعتني بطفلة . . رغم عمرها الصغير اعتنت بأختها ودارتها وياما سهرت على راسها لمن تتمرض . . وياما تحملت ضرب هيبت نيابة عنها . . كلما ينكسر شي بايد شاهندة بدون قصد ويجي هيبت يريد يعاقبها روزة تكول اني الي كسرت فلان شي اني الي خربت فلان شي ويبلش يضربها بقسوة وحقارة . . ورغم كل الاذى الي تحملته روزة علمود تحمي وتحافظ على اختها الزغيرة ،جانت تجي وتصبر بشاهندة وتبث بيها الامل وتواسيها وهيه المجروحة . . كل الي صار وياهن تحملته شاهندة وسكتت لعيون اختها بس لمن عرفت بهيبت يعتدي على روزة وشافت هالشي بعينها هنا مكدرت تصبر بعد ولا تسكت . . جان لازم تسوي حل . . واحسن حل هوه الهرب . . وهسه بعد ماشافت شلون قتل الجنود الابرياء الغيارى الي دافعو عنهن رغم معرفتهم بموتهم الحتمي مستحيل توكف وتضعف هالجنود بثو بيها قوة وصلابة وعزم . . شافت الغيرة والقوة والثقه بالنفس بعيونهم حتى وهمه يلفظون انفاسهم الاخيرة . . ولأنها واثقة من ضعف جسم اختها وعدم قدرتها على الركض والجهد جانت حاسبة حساب لهالموضوع رغم النغزة الي تصير بگلبها كلما فكرت بروزة وهيه تبقى بين ايديهم . . مرت الدقايق مثل العلقم ماتنجرع وهنه يسمعن حجي الي كاعدين بره يم هيبت كلساع واحد منهم يطلب منه وحدة منهن وهو يحذرهم انه الزباين يردوهن باكرات وهالكلمة وحدها تخليهن يرجفن ووحدتهن حاضنة الثانية برعب لحد مابلش صوتهم يخمد والموسيقى بقت مشتغله بس صوت ناصي . . صوت الحشرات بدى يعلى بالبستان ويتوضح اكثر هنا روزة همست لأختها انه هذا الوقت المناسب كامن طلعن من الغرفه وهنه يمشن بسكوت وبكل حذر باوعن تجاه هيبت وربعه شافنهم نايمين كلمن بجهة والنار الي شعلوها بعدها مشتعلة والبطالة مكومة بصفهم بس واحد منهم لازم تليفونه ويراسل وهو مجطول بصفهم وكل شوي توكع ايده ويرجع يسندها ويكمل مراسلة . . رجعن للغرفة الاخيرة بحذر وهنه يقتربن من فتحة الشباك الزغير وخرت شاهندة الخوص الي جان يغطيها بهدوء وروزة تراقب الباب خاف واحد منهم يجي ، مدت راسها شاهندة بالفتحة وطلعت جسمها من الجهة الثانية بسرعه وحذر ونفس الشي سوته روزة وسحبتها اختها ورجعت مدت راسها ولزمت الخوص وثبتتة شلون ماكان بالفتحة حتى ميعرفون الاتجاه الي راحن بيه لمن يحسون بيهن ويلكون مكانهن خالي . . مشن بهدوء وخطوات حذرة من وره البيت وهنه متجهات لنفس المكان الي شافت شاهندة الدخان طالع منه همستلها روزة .
روزة: هندة انتي كلتي المكان بعيد واني بالگوة اجر بنفسي اخاف ماكدر امشي لنص الطريق واعيقج اذا تشوفيني ضعفت كلش عوفيني وامشي وبس تلكين ناس خليهم يجون يساعدوني . . انتي وعدتيني شاهندة لتخلفين بوعدج حلفتيلي بروح بابا .
شاهندة بحزن: لتبقين تفكرين روز تره اني جنت حاسبة حساب لهالموضوع وادري بيج داشوف حالتج اني مو غبية . . ولو يصعب عليه هالشي بس اذا اضطر الامر كوني متأكدة راح اعوفج واروح اجيب مساعدة وما ارجع الا والشرطة وياي .
. . . يتبع . . .
لا تنسو الضغط على النجمة للتصويت
ومتابعة حسابي لقراءة باقي القصص
🌹❤️🌹