فيان بتردد: عذرا استاذ زيد اني دا انقلك الي حجته اليه جمانة لكن ماكدرت انتظر للصبح لان سمعت خالها يصيح ويهددها يجيب شيخ ويعقدلها من الصبح لان عرفها دتخابر . . حاولت احجي وياهه بس انغلق الخط ومدا ارتاح عشت بقلق من اتصلت ولحد هسه . . ارجو ان تساعدها واذا تحاجيها وتشوفها اتمنى تطمني عليها .
زيد بعصبية ماگدر يكتمها: مشكورة يابة ماقصرتي بنت اصول والنعم منج . . انشالله بس اروح واجيبها اخليها تخابرج . . اعذريني اخيتي صيحت بوجهج مو قصدي انفعلت .
فيان بخجل: لا بالعكس حقك عاذرتك واتمنى تعذر تطفلي واتصالي بهيج وقت .
زيد: لا يابة ماقصرتي وجميلج ما ننساه انشاءالله نردلجياه باقرب وكت . . اخذي راحتج خيتي .
فيان: اشكرك مع السلامة
اول ما انغلق الخط تنفست فيان بصوت عالي وهيه تسحب نفس وتزفره . . حست براحة بعد ما سمعت الغيرة والأهتمام على جمانة من قبل ابن عمها . . وحست براحة بعد ماكدرت تساعد جمانة لكن القلق بعده ياكل بگلبها .
. . . .
ميسان/على ضفاف دجلة
بعد ماغلق زيد الخط هم نفسه بسرعه وهو يفتح الكنتور ويطلع بنطلونة وقميصه سد الباب بقوة فزز بيها زوجته الجانت بسابع نومة .
ماسه: ياستاار يمه اسم الله . . كمزتني . . خير شصاير .
زيد بعصبية: ماكو شي ارجعي انخمدي خابروني من الشركة لازم اطلع لبغداد وراح اخذ جواد وياي عود كلي لامي من تكعدين الصبح .
ماسه: انشالله .
رجعت نامت اول ماطب زيد للحمام سبح وطلع مشط ورش من عطر العود الخليجي الي يوصي عليه خصيصآ من الامارات . . وطلع بعجلة وهو يروح ع الغرفة الي بصف غرفته من الجهة اليمنى دك بابها بخفة مرتين وفتحها ودخل فتح الضوه وهو يباوع لأخوه جواد يطبك عيونه بأنزعاج ويتململ
اقترب منه وهو يصحيه ولمن شافه مايقبل يكعد تناوش دولكة المي ودارهه عليه خلاه يفز من مكانه ويطفر من فراشة وهو يتلفت يمنه ويسره ويصيح كعدت والله كعدت .
زيد بحدة: بسرعه بدل هدومك وانزل اتانيك بالسيارة جيب محفضتك وهويتك وياك طالعين لبغداد .
كال الي عنده وطلع بقى جواد صافن شويه لحد ماصحصح واستوعب فتح كنتورة وهو ياخذ دشداشة شبابية لون ازرق بدل ملابسه ورتب نفسه وتناوش محفضته تأكد من جنسيته بداخلها ونزل وره اخوه . .
لكاه كاعد بالسياره ومخلي راسه ع الستيرن (المقود) لازمه بايده ويضرب بأصابعة
عليه بتوتر واضح . . صعد جواد بصف اخوه وحرك السيارة وطلعو متجهين لبغداد
ماكدر جواد يكتم فضوله اكثر وخاصة بعد ما لاحظ التوتر والغضب الي على وجه
اخوه .
ВЫ ЧИТАЕТЕ
عشق الضواري
Любовные романыالرواية الاولى من سلسلة "عشق أسود الرافدين" تتكلم القصة عن توأمتين تعيشان تحت رعاية جدهما برفاهية ودلال حتى يحين وقت وفاته لتنتقلا للعيش في بيت زوج والدتهما فتبدأ حياتهما في بيت زوج والدتهما فهل سيتغير حالهم للأفضل ام سيكون ماتبقى من حياتهما جحيم؟...
