عشق الضواري

بارت 4

جمانة: بس شنو ؟!.

اسيل: بس ترجعيلهم وحدج اني مااكدر ارجعلهم بعد الي صار .

جمانة: الله يخليج أحجيلي شصار وياج هناك وخلاج متخوفة من الرجعه ومتحملة ظلم خالي وجوره علينه . . ماما اني كبرت خلص عمري 21 يعني شكد لازم يصير عمري حتى تحجيلي الي صار قبل أرجوج لازم أعرف التفاصيل حتى ما ابقى الح على الرجعه واضوجج .

تنهدت اسيل بحسرة والحزن بان على ملامحها وهي تباوع لعيون بنتها الوحيدة الي تترقب شراح تكول الها ، هزت راسها بقهر ووافقت تحجيلها الي صار وياها ببيت الشيخ ضاري ابو زوجها .

أسيل: مثل ما تعرفين اني تعرفت على ابوج هنا ببغداد بعد ماجان يدرس بنفس جامعتي وصارت بيناتنا علاقة حب طاهره ونضيفة مجرد نظرات ولقائات نقية بحظور اصدقائنا
وبعدها تقدملي اكثر من ثلاث مرات ووالدي ما وافق بسبب كونه من محافضة بعيدة وجدج جان يخاف ينطيني بعيد عنه ، أخر شي اجه ابوج وجايب جدج الشيخ ضاري ووياه ناس واصلين ومعروفين وناس بالدولة أذكر بوقتها والدي احتار وين يكعد كل هذول الشيوخ والوجهاء والقادة الي اجو
بس جدج ضاري جان متعمد يسوي هيج حتى يثبت لوالدي انه ابنه مشتريني ورايدني من صدك ولخاطري جاب كل هاي الناس وجان متاكد لمن يخطي هالخطوة والدي رح يوافق ، وفعلا وافق وخلاني بأمانة الشيخ ضاري قبل أبوج وكله بنتي تحت رعايتك وبأمانتك هناك ماعدنه احد تروحله اذا صارتلها مشكلة لذلك اني مأمنها يمك وانته شيخ ومعروف كد الأمانة ، وجدج ضاري ماقصر بعد زواجي دللني هوه وابوج وكله يصيحلي بت بغداد وبت بغداد وصرت اقرب چنه اله من بعد فيحاء مرت عمج عبد الله والي جانت اقرب وحده اليه هيه وعمتي الي هيه بيبيتج حسنه ومثل ماتعرفين جدج متزوج ثنين وبيبيتج هيه الجبيرة بس جانت فقيرة كُلش وحبابة ومابيهه اذية على احد مثل مرت عمج فيحاء وسبحان الله فعلا الله ينطي كل واحد على گد نيته لان اني وفيحاء صرنه جناين لبيبيتج حسنه الفقيرة الي تخاف الله واحنه هم مابينه اذية وصرنا قلب على قلب وانطى تلث جناين مثل العقارب والحياية لزوجة جدج الثانية حمدية جنتها الجبيرة تصير بنت اختها اسمها بدرية والوسطانية بنت اخوها اسمها سميرة والزغيرة هم بنت اخوها تصير اخت سميرة واسمها محاسن ، جانن عبارة عن زمرة شياطين ونازلة على الأرض تعيثها فساد ودمار وهالشي عرفته من عاشرتهن وعشت وياهن كل الي تشوفيه من مرت خالج أقبال وكل الي تسويه وياج ووياي يُعتبر شيء بسيط بالنسبة للي سونة حمدية وچناينها . . حمدية چانت شادة ويه بيبيتج حسنه اربعه وعشرين ساعه تسمعها كلام يسم البدن لكن بيبيتج جانت انسانة عجيبة تطنش ولا عبالك دتسمع شي وكلامها قليل ع كد حاجتها وعلى كد الجواب اذا واحد سئلها لذلك جانن يسمنها الخرسه ابيناتهن لكن ياويله الي يقلل من احترامها جدج يحاسبة حساب عسير لانه جان يحبها ويقدرها ودائمآ يكول لمن نجتمع امكم حسنة الها مكانة بقلبي لا يُعلا عليها ..
وهالشي زاد من الحقد والغيرة بقلب حمدية تجاه بيبيتج حسنه وصارن بمرور الايام هيه وجناينها حزب وبما انو هيه زوجت ولدها بعمر صغير لبنات اخوها واختها لان ع گولتها متريد غريبة ابيناتهم ،كلهن جان عدهن اطفال حتى زوجة عمج فيحاء الا اني مر على زواجي سنه وكل يوم اسمع حجيهن ومعايرهن اليه ويصيحنلي العاقر ، وخلال هالوقت مجنت ادري بنفسي حامل هملت نفسي هالكد ما اشتغل بالبيت وهو جان مو بيت عبالك قصر جدج جايب مهندسين مخصوص وهو طالب تصميمه جان كُلش جبير وفخم وداير مدايرة المزارع مالته منين ماتندارين بساتين وبيوت بعيدة اغلبها لاقاربهم جدج جان يريد جميع اولاده يبقون ببيته تحت سقف واحد وجان يحب ولده وبناته التلاثه ومفضلهن ع الولد كلهم وماشاء الله انتي عندج ١١ عم وكلهم حاليآ متزوجين وعندهم اولاد وبنات اكبر واصغر منج ، المهم لاحضت فيحاء دايما تراقبني وتبتسم لحد ما اجت وكالتلي ديري بالج على نفسج تره انتي حامل انصدمت بوقتها وسئلتها شعرفها واني نفسي مامنتبهه جان تكول شهر الفات اني وياج اجتنة الدورة وهسه قبل عشر ايام اجتني وانتي لحد الان ماكو واني عرفت هالشي لان كلما تجيج تتخربطين واسويلج دارسين "قرفة" تشربيه وترتاحين هالمرة ماكو لا اجت ولا سويتلج الدارسين صار عشر ايام ، بوقتها فرحت وماصدكت اجه ابوج راسن كتله هوه خطية هالكد مافرحان اخذني العصرية بنفس اليوم لدكتورة نسائية سويت تحليل وطلعت حامل من صدك ابوج هالكد مافرح جاب حلويات وجكليت وصار يوزع ع البيت كله وجدج اول ماسمع كال الهم من هسة تجهزون ذبيحة لحد مايجي الطفل بالسلامة هيه كبرانة ، خلال فترة حملي صار عندي نزيف استمر مدة ثلاث اشهر وانمنعت من الحركة وعمل اي جهد وصرت اخذ ابر ومثبتات كله بسبب كيدهن ومكرهن تخيلي عدهن جرأة وحقارة انهن يكونن مستعدات يأذن روح بريئة بسبب غيرتهن لا أكثر ، وميهتمن اذا اني صار خطر على حياتي غرفتي جانت بالطابق الثالث وهو احلا طابق بالبيت بيه حديقة بالسطح وتصميمه لوحده يحسسج انتي عايشة بالجنة مو بالارض جان الطابق مخصص النه اني وزوجة عمج فيحاء
وعمج هيثم وباقر جانو بعدهم ممتزوجين
همه غرفهم على جهة اليمين واحنه ع اليسار وگدامنه تجي صالة واسعة للكعدة ومطبخ صغير وحمام تواليت مشترك لان غرف الولد مجان بيها حمامات بس غرفنة احنه المتزوجين جانت مجهزة بكُلشي قررنه اني وأبوج بس ادخل بشهر الخامس ننزل جوه بالطابق الأرضي ناخذ الغرفة الي بصف غرفة بيبيتج لحد ما اولد ونرجع لغرفتنة وهذا الي تسوية زوجة عمج فيحاء اذا تصير حامل اول متطب بشهر الخامس تنزل تسكن هيه وعمج بهاي الغرفة لحد ماتولد ، بس اني اول مادخلت بالشهر الثاني نزلت من الدرج متعودة يومية ورة العشة وقبل ما انام انزل اشوف عمتي شمحتاجه واصعد انام رغم جان الشيخ ضاري مخليلنا اثنين شغالات وحدة تبات ووحدة تروح لبيتها وحسب مناوبتهن كل يوم بس اني وفيحاء منحب نترك جدج وجدتج قبل ما نتطمن عليهم ونلبي احتياجاتهم نزلت بيومها وكالعادة انزل درجة درجة بحذر لحد ماوصلت لاخر باية من الطابق الثاني خليت رجلي وشلت الثانية داريد انزلها وجان اتزحلك واوكع من الدرج وهو مثل الملوية ولو ماربج ستر وجان ابوج وعمج صاعدين بذيج اللحضة جان كملت وكعتي للطابق الارضي وطكت رقبتي وعضامي ومتت ، لكن رحمة ربج شملتني واول ماتزحلكت الباية الاولى والثانية لحد ماوصلت الخامسة وهمه لزموني وحاوطوني بوقتها نقلوني
مستشفى ومن صحيت هناك انصدمت لمن عرفت اني نايمة من ثلاث ايام والأطباء محاولين جهدهم ويايه والجنين مهدد بالأسقاط ومن عندها بقيت تلث اشهر انزف نزف خفيف واخذ ابر وعلاجات للتثبيت وبالشافعات يلا اجيتي انتي للدنيا وجدج ذبح ابمكان الذبيحة اثنين ووزعها ع الفقراء
الكل جان متعجب بيج وبجمالج المختلف عنهم همه اغلبهم سمر وحنطيين وانتي واثنين من ولد عمج بس البشرتكم بيضه لكن انتي جنتي مثل القطن مقارنة بولد عمج عبد الله جان ابن عمج زيد متعلق بيج هوه واخوه الاصغر منه جواد بس مو مثل تعلق زيد بيج جان جدج كلما يشوفة شايلج لو يلاعبج يكول جمانة لزيد وزيد لجمانة وهو اكبر منج بعشر سنوات لحد ما جابت فيحاء زمرد اصغر منج بخمس اشهر وصار زيد يهتم بيها ويلاعبها وبدت الغيرة وصرتي تكتليها ولمن تشوفيه يلعبها لو يشيلها تبجين وتعصبين لحد مايعوفها ويشيلج كل عمامج وجدج وبيبيتج واني وفيحاء جنه نتونس على سوالفج ويه زيد لعباتج وحركاتج ودلالج عليهم جان مختلف عن باقي الاطفال كل عمامج تعلقو بيج بدون استثناء حتى حمدية الي متحبنه صارت تحبج هالكد ما ترحين تبوسينها وتحضنيها وتسولفين
وياهه وصارت حمدية تعاير جناينها بيج وتذمهن وتحجي عليهن لان حفيداتها ولا وحده متعلقة بيها مثل ما انتي تحبينها وتتدللين عليها ، لهالسبب وهالكد ما حمدية تحجي وتعيرهن صارت بدرية جنتها الجبيرة تغار وتحقد عليج وعليه وصارت تعلم بناتها وولدها يضربوج وانتي يادوب كملتي سنة وثمان اشهر وبعد ما صارو عمامج يرزلون اطفال بدرية لان يأذوج انزرعت بقلب الاطفال الغيرة الحقيقية والكره والنفور منج وصارز يأذوج بشكل مخيف بحيث مرة لكيناج بره بالبستان بنص الساقيه شادين رجليج بطابوق ومخليهن ابداخل الساگية حتى يصير ثقل ومتكدرين تطلعين ولو ما عمامج دوم يفترون بالبستان وداير مداير البيت مجان لحكنالج، لمن طلعج عمج عمار لكاج شاربة من المي الوصخ بالساگيه ومختنگه وهم لو مارحمة الله مجان هسه انتي موجودة . ومرة بنت عمج سهيلة دفعتج من على الدرج والحمد لله جنتو بالطابق الارضي وبعدكم بالبداية صار عندج رض بالجمجمة وفصخ بالايد ، جدج لمن شاف يوميه دتصير مشاكل والاطفال بدو يحقدون وانزرعت الفتنة والبغض بقلوبهم بنى بيت بنفس البستان وقريب على البيت الجبير لعمج راشد وزوجته بدرية وكلهم اطلعو مالكم كعده بالبيت بعد الي سويتوه عمج جان ضعيف الشخصية ميكدر يوكف بوجه زوجته ويمنعها من شي لذلك بعد ما طردهم جدج طلع وهو ساكت تبع مرته لبيتهم بدون اي اعتذار او تطييب خاطر لواحد من عدنه ، مرت السنين وصار عمرج خمس سنوات من اجه ذاك اليوم المشؤؤم عمج خلدون ضاربله واحد بالسيارة غير متعمد يعني حادث والولد متوفي على اثرها بعد ماناقلة للمستشفى ،جايين اهل الولد وصايرة خبصة بالمشفى ورايدين يقتلون عمج ولازميهم الامن وعمج طافر وجاي للبيت ولد عم الميت جايين يدورون لحد ما عارفين عنوانه بوقتها جدج راح حاجاهم وفهمهم انه حادث وقضاء وقدر ولو جان متعمد مجان نقله للمشفى وكلهم اني حاظر شتردون جاهز لكن اهل الولد ماقبلو باي شي غير الدم بالدم صرنا بحالة رعب ومحد يطلع والشيخ صار يحذرهم كلهم ميطلعون لحد مايحل السالفة وبكل يوم يدز ناس لاهل الميت وبلا جدوى ، لحد ما فديوم بليل ...

. . . يتبع . . .

لا تنسو التصويت بالضغط على النجمة 🌹⁦❤️⁩🌹
ومتابعة حسابي لقراءة باقي القصص
🌹⁦❤️⁩🌹