عشق الضواري

بارت 36

بغداد / زيونة

هواية تغييرات لاحضتها فيان بأختها الي مو من عادتها ابد الهدوء وعدم التدخل بأي شي يصير وهالشي اثار استغراب فيان وقلقها وصارت تراقبها وتتنصت عليها لمن تطول بداخل غرفتها واكثر الاوقات تسمعها تحجي بالتليفون بهمس وهالشي خوفها على اختها الزغيرة الطايشة الي ماتعرف مصلحتها وين واكثر شي خوف فيان هوه شكها من انو تكون اختها متزوجه من ايسر بالسر . . بسس لاا ايفان اذا تريد شي متهاف من اختها وتسويه بعلمها وبعدين هيه باخر مرة اجتي بنفسها وطلبت من فيان انها تطرد ايسر وتكله انو ايفان ماعادت تريد اي علاقة تربطها بيك . . لعد منو هذا الي على طول تحجي وياه سواء بالرسائل او مكالمات بالخفية . . تنهدت بحزن وهيه تلزم تليفونها واتصلت على زيد يدك ومارد خلت التليفون على صدرها بحركة عفوية وهيه تبتسم لأن كدرت تساعد انسانة مثل جمانة الي دخلت گلبها دون استئذان ، بعد مرور دقايق اجاها اتصال من زيد فتحت خط وبعد السلام انطاها جمانة . . وبعد حديث دام نص ساعة وفيان تسال جمانة عن الي صار وجمانة تجاوبها وحجتلها عن الي صار بصدمة وهيه تدعي وتسب بخالها وزوجته وحجتلها عن خوفها من ان يسمع اخوها زمن بعلاقة اخته رؤى وسيف الي اتهمومها وياه وبعد ما نهت جمانة الحديث سألت فيان عن اختها وعن امهن اذا اجت سألت عليهن . . تنهدت فيان بقهر وسكتت ثواني ورجعت حجتلها عن مخاوفها من ايفان لا تكون متزوجة لو مسويتلها شي جبير وهنه ماعدهن احد وحجتلها عن امها الي سمعت انها راجعة من سفرتها وماكلفت نفسها تجيهن لو تتصل ، قاطعتها جمانة وهيه تكول .

جمانة : ليش ما اتصلتي بضرة امج وافتهمتي منها التفاصيل او ع الاقل تبنين وياها علاقة صداقة حتى يكون عندج شخص يساندج ويدعمج اذا يصير عندج شي واني متاكدة انها رح ترحب بهالفكرة والمبادرة منج ومتاكدة همين انو رح تكون الج عون عكس امج .

فيان : ماعرف جمانة احسها صعبة شوي . . رغم هيه المرة من اول لقاء كسرت حاجز الخجل والرسميات وحجتلنه هواية شغلات مثل ماكتلج بسس . . اخاف يجي الرفض من ابنها ايهم تتذكرين من كتلج لاكيته بالباب لمن طلعنه من بيتهم وبقيت كم يوم صافنه احاول اذكر وين شايفتة وراهة تذكرتة هذا المزعج اجه لشركة جدو 3مرات تقريبا وبكل مرة اروح للشركة حتى اشوف جدو شيحتاج الاكيه كاعد بصالة الانتظار
ويبلش يباوعلي بنظرات مرعبة صراحة ولمن اكله نزل عينك لو ارزلة يكعد يبزني بكلمات مو مفهومة بالنسبة الي واخر شي ينتقدني سواء بلبسي او مكياجي واكثر شي يغثني بيه لمن يكلي ام اربع عيون ويعيب ع نظارتي ولازم نتعارك ونتصايح وبعد كل هذا من يطلع يتعمد يفوت من يمي ويهمسلي يكلي اذا تدرين بصوتج ينوص مثل الفيران لتدخلين بعركة وية زلمة وتفشلين روحج . . يعني لازم يذبلة كم كلمة تغثني وتشعلني نار قبل ما يولي .

جمانة : اهووو هذا مبين مزعج مثل ابن عمي هم غثيث لمن تشوفيه اول مرة تكولين الله هذا الرجال شكد هيبة ووسيم وهادئ ورزن وكلشي حلو بيه ولمن تكعدين وياه تلكيه واحد شايل خشمه ومغرور لمن تحاجيه الف كلمة يرد عليج بكلمة وحدة بس . . هيج اتمنى اذبحة واني مصارلي بس يومين يمه لعد هناك شلون رح اتحمل برودة وغروره .