عشق الضواري

بارت 16

تشرفت بمعرفتج سلطانة جمانة اني
الأميرة ڤيان .

رجع زمن كعد يمهن بعد ما سلم وعرف عن نفسه . . ثواني وشاف صديقة اجه عليه ترخص منهن وكام راح وياه كعد يم اصدقائه . . والتهن البنات يتعرفن على بعضهن ووحده تحجي للثانية عن حياتها والضروف الي مرن بيها لحد ما لزمت فيان تليفونها وكالت لجمانة .

فيان: سبحان الله شكد جنت ضايجه ومحتاجه احجي ويه شخص وارفه عن نفسي شوي وهاي انتي اجيتي . . هاج هذا رقم موبايلي حتى نتخابر والله احسج مثل البلسم الي نزل على علتي وشفاها .

انحرجت جمانة من فيان لكن لزمت ورقه وقلم وانطتهن لفيان وكالتلها .

جمانة: اني صح حجيتلج شي قليل عني لكن ماكدر اجذب عليج اني ماعندي تليفون خالو ميقبل يصير عندي واحد بس تكدرين تكتبيلي رقمج واتصل عليج كلما يصيرلي مجال من تليفون ماما او زمن .

ابتسمت فيان وكتبت رقمها لجمانة وانطتها الورقة كصتها جمانة واخذت الرقم ضمته بجيب البنطلون ورجعت لزمت الورقة والقلم وكتبت رقم امها ورقم زمن وانطتهم لفيان وكالتلها .

جمانة: هذا ارقام كتبتلج عليهم واحد مالت ماما وواحد مالت زمن اخاف اتاخر وما اتصل عليج تكدرين تتصلين عليه انتي .

تأخر الوقت وقررن البنات يطلعن شويه
وكفن بره الكوفي وطلع وراهن زمن الي استأذن من اصدقائه وكام اجه يمهن .

ودعت فيان جمانة وصعدت سيارتها ومشت اندارت جمانة على زمن وهيه تكول بحماس

جمانة: لك زمزم صارت عندي صديقة
نوب شلون كيوتة وحبابة . . ها على فكرة اذا تتصل عليك انطينياهه حتى لو جانت اقبال لو محسن ديبسطوني زين .

ضحك زمن بصوت على خبالات جمانة وهو يصعد وراهه للسيارة . . رجعو للبيت وصلو قريب ع الباب لكو سيارة أخر موديل ابابهم وكف سيارته زمن وره السياره الغريبة ونزل هوه و٠مانة واحد يباوع للثاني بتساؤل وقبل ما يطبون انفتحت الباب وصار رجال يجي عمره بالأربعين بوجه جمانه ضلت صافنه بوجهه وهو نفس الشي لكن نظراته الها جانت وصخة وتتفحصها بكل تفاصيلها أبتعدت جمانة بسرعة وصارت وره زمن الي سلم ع الرجال وطلع ويه ابوه وكفو بره ويه الرجال بينما جمانة طبت بسرعة للبيت وراحت لغرفة امها لكتها كاعده تسبح وبعدها برداء الصلاة . . كعدت ع الجرباية مالت امها وهيه تباوع للكاع وفكرها شارد
كملت امها وكامت نزعت الرداء وكعدت بصفها وسألتها .

اسيل: ها حبيبتي اشو رجعتي وبالج مو وياج . . صاير شي وياكم .

جمانة: لا يوم مصار شي بالعكس تونسنا وتعرفت على بنية حبابة فد مره . . بسس .