عشق الضواري

بارت 31

ميسان/ المجر الكبير

بعد ما حاولت غدير تحرك نفسها وتنتحر ونقلها ابوها للمستشفى . . صار عندها انهيار عصبي وعلى اثر الحادثة الاخيرة صارت منطوية على نفسها وعازلة روحها بغرفة بأخر البيت جانو مسويها مخزن . . حاول ابوها وياها بكل مايكدر حتى ترجع لغرفتها يم اختها وحاول ياخذها لطبيب بس جانت قافلة ماتقبل حتى تطلع تكعد يمهم الاكل والشرب جانت قاطعته ،الشخص الوحيد الي تتقبل تسمع منه وتاكل كم لگمة وياه هيه اختها منسة

منسة الي ماعافت اختها وبقت ملازمتها بمرضها وتحاول تساعدها تسترجع عافيتها ، اما امها فجانت تزيد الطين بلة ، كامت تحجي براس ابوها انو البنيه اتخبلت وبيها تابعة وجن ومن هالسوالف لحد ما ابو غدير اقتنع بالسالفة وكام يتوسل ابته حتى تطلع وياه ياخذها لشيوخ وسادة معروفين حتى يشوف علتها وغدير جانت تجاوبة .

غدير: هسه سويتوني مسودنة وبيه جني موو؟ . . بوية تره انه مابيه شي اني اريد بس تطلكني وتعتقني من قاسم واهله بوية شكد صار تلث اشهر واني معلگه لا هوه يرضه تطلكني ولا انته ترضه تتنازل عن الغايب وتخلصني . . بوية انه ماريد شي فدوة ترجيتك هواي خلصني منهم وماريد شي . . ليش ماتحسون بكسرتي وقهري ليش مخليني مضحگه لليسوه والمايسوه . . شوف بنات الناس شلون اهلهن يكلبون الدنيا اذا دمعة تطيح من عينهن وانته مخليني معلكه علمود الغايب ما اخسره . . شيفيدني الغايب اذا افقد صحتي وعقلي واحساسي بهاي الحياة . . بوية فدوة عوف حجي امي وكلهم متنازلين عن كلشي وخله يطلكني فدوة بوية اترجاك .

حسن: ولج كل السووه بيج وتردين تعوفينلهم الاول والتالي مو هذا حكج يابوية شلون تردين نتنازل عنه جا شوية السووه وهم نروح نتنازل الهم . . فوكااهه احنه النتنازل .

غدير بقهر: بوية صوجكم انتم محد وكفلي جم مره اجي اشتكي وترجعوني الهم وفوگاهه انتم التعتذرون . . هسه من تالي تريد تنصفني وتاخذلي حكي . . عوفها بوية اترجاك كلشي ماريد بس خل يطلكني .

كام ابوها وهو يسد الباب وراه بغضب . . طبت منسه وهيه تباوع لأختها بقلق كعدت يمها وهيه تحتضنها وتمسح على ظهرها بحنان . . تنهدت وهيه تشوف اختها تشد على حضنها وتبجي بتعب من حالها .

. . . .

مرت الايام يوم وره يوم غدير تذبل وتنتكس صحتها اكثر واكثر لحد ما كامت ماتتحمل تسمع من امها كلمة . . كلما تعيرها لو تصيح عليها ، رأسن تتخربط وتنهار يكوم جسمها كله ينتفض ويرجف ووجهها يتغير لونه وتصك على سنونها بقوة وهيه تتنفس بصعوبة لحد مايغمى عليها . . كام ابوها يراجع بيها اطباء يكلولة انهيار عصبي ونفسيتها تعبانه خلوها ترتاح وتبتعد عن الاشياء الي توترها وتضوجها . . والساده والشيوخ يكلوله هاي عدها تابعة وبيها جن ومسوالها اعمال وراح تتسودن عليكم بسبب السحر اذا مانسويلها جلسات . . وبعد شهرين من الجلسات الي كله دجل وشعوذة كامت غدير ما تكدر حتى تنام وامها بعدها معاندة ماتقبل تخلي ابوها يتنازل عن الغايب مالتها لحد ما فد يوم طلعت غدير من غرفتها للمطبخ وقبل ما تطب للمطبخ تمر من يم غرفة امها وابوها ، سمعت ابوها يعاتب بأمها .