ضحك جواد بصوت عالي وهو يدير جمانة خلاها تواجهه وهو يباوع بعيونها وكال .
جواد: شني فاقده الذاكرة انتي جا ماتتذكرين گبل . . جا غير اني ...
قاطع كلامه صوت الباب وهيه تندك ،
عاف جمانة وطلع ركض يفتحها طلع زيد وكف اباب المطبخ صاير قريب من الباب مالت الحوش باوعلها بنظرات ماعرفت تفسرها لزم باب المطبخ وسدها خاف يفوتون الزلم ويشوفوها رجعت جمانة اخذت صينية زغيره خلت بيها المقبلات وخلت الكباب بالفرن حمته واخذت خبز وكلاص بيه لبن وبطل مي حمه الكباب طلعته واخذت الصينيه وفتحت الباب علكيف باوعت من الصفحتين ماكو احد طلعت وهيه تسمعهم يحجون بس ماتفتهم شي طبت على امها لكتها فد مره تعبانه خلت الصينيه يمهه ع طرف الجربايه وسندتها وكعدتها كامت توكل بيها لحد ماشبعت انطتها علاجها ونومتها ، جانت امها تباوعلها بتعب وكوه تفتح حلكها تحاول تاكل وتصير زينة علمود بتها الي دتشوف الخوف بعيونها خوفها من ان تفقدها مثل ابوها وتبقى يتيمة الام والاب .
طبو ابو نبراس ووياه ولد يجي عمره بالعشرين عيونة جواها هالات سود وشكله مو نضامي رغم هوه كاشخ جاي بس وجهه بي شي غريب يخلي المقابل ميرتاحله ، كعدو كدام زيد وجواد الي جانو يباوعولهم بحقد وغضب خلاهم يرتبكون خاصة الولد چان مرتبك بشكل واضح وعيونه ماثبتت على مكان يباوع بوجوه الكل وكلساع يفرك بايده ، محد حجه منهم لحد ماسأل زيد .
زيد: اي حضرة الخاطب الشهم شوكت ناوي تعرفنا ع الاخ . . وتحجيلنا تفاصيل الحب المُفبرك .
الولد صار يحوس ويباوع بعيون ابو نبراس وذاك يحاول يطمنه بعيونه وكل هذا ما ينخفي على زيد وجواد استجمع ابو نبراس شجاعته المزيفه وحجه .
ابو نبراس: هذا سيف الولد الي عنده علاقة ابتكم اني جبته على ضمانتي وكتلة اذا تعترف بكلشي وتحجي لأهلها محد
يحاجيك فأني هسه انطيته كلمه للولد وماريدكم تفشلوني خلوه يحجي العنده ويروح .
باوع لزيد الجانت عيونة حمم بركان وجواد الي وجهه ميتفسر ابتسامة على غضب ووعيد .
زيد ببرود مرعب: تفضل حضرة العاشق احجيلنا قصة حبكم من الالف للياء . . وهاا خليها ابالك تره اذا كلمة وحده ماعجبتني وحسيتك جاي تلعبنه . . مصيرك رح يكون اسوأ من الكاعدين كلهم .
ارتبكو وهمه يسمعون كلامه وخاصة سيف الي كام يباوع لابو نبراس بترجي وذاك يباوعله بنظرات تحذيرية اخر شي حس بنفاذ صبر زيد تشجع وحجة بثقة مزيفة .
سيف: اني جنت مراقبها لجمانة من ..
نتر بيه زيد وكله لتذكر اسمها . . كمل كلامه بخوف وهو يجول بنظره ابين زيد وابو نبراس .
سيف: يعني من جانت تطلع يومية تجيب ريوك اني اراقبها وبقيت فترة تقريبا شهرين احاول وياها بلكي تحاجيني بعدين كامت تستجيب وصرنه نلتقي دقايق معدودة لو يم الفرن لو يم الاسواق ومن تروح للسوك اني وياها لحد ما قبل فتره . . يعني اااا هيه كالت تعال تقدملي . . واني بعدني ممكون نفسي صراحه وهيه كامت تلح كل يوم تعال اخطبني اخر شي قبل كم يوم اتصلت كالت اجوي ولد عمي ومتفقين ويه امي نرجع لبيت جدي واني ماريد ارجع وياهم . . ووو يعني هيه اقترحت نشرد سوه بس اني ماكدرت لان اهلي ماعدهم غيري اني الجبير والمعيل الهم فمن شافت مابيهه مجال كالت لعد خلينه نتقابل ونتزوج بالسر ومن يجون نخليهم امام الامر الواقع وبعد ميكدرون ياخذوني . . كلتلها شلون خاف يسوولج شي كالت لا ميكدرون اذا نتزوج . . اتفقنا بعدها وقبل يومين تقابلنا بهيكل هنا بالمنطقة اجتني ساعه ٣الفجر ااوو . . يعني صار الي صار .
زيد كال بهدوء مخيف وهو لازم ايد جواد الي يريد يهجم ع الولد يكطعه .
زيد: يعني تقصد بتنه مو شريفه يعني انطتك نفسها . . وانته واثق من كلامك . . وهسه هيه على ذمتك ؟.
باوع الولد لابو نبراس بلع ريگه وكال
سيف: لاا . . يعني قصدي صار كلشي بدون زواج هيج غلطة وتسرع من عدنة . . بس اني مستعد هسه اعقد عليها واتزوجها .
زيد بزمجرة: وليش ماتزوجتها بذاك اليوم
و
اذا كلنه فرضا بيومها مصارلك مجال تتزوجها ليش ما اجيت البارحه لو اليوم واخذتها من خالها .
ارتبك الولد وهو يباوع لابو نبراس ومحسن وكال .
سيف: اني اجيت وطلبتها من خالها بس هوه رفض وماقبل يزوجنياها .
باوع زيد لمحسن وهو يوجهله الكلام .
زيد بحدة وبرود: انته مو تكول اريد ازوجها واستر السالفة جا شو هسه طلع غير حجي طلعت انته الفاضحها يخالها لو تريد الستر من صدك جان زوجتها للولد وخلصت من السالفة . . المهم هسه انتم هذا اخر كلام عدكم يعني متأكدين من انه هذا الصار اذا اجيب البنية هسه واواجهكم وياها تبقون على نفس حجيكم .
باوعوله بثقة مزيفة وهمه يوافقون ومصرين على كلامهم وموقفهم . . لأنهم متأكدين انو زيد واهله رح يستسلمون للامر الواقع ويغصبون جمانة ع الزواج حتى مينفضحون كدام الناس .
باوع زيد لأخوه وكله .
زيد: كوم جواد جيب اختك خلها تواجههم ونشوف الصدك من الجذب .
كام جواد عافهم وهو يغلي بنار الغضب وجهه مايتفسر هو متأكد جمانة متسوي هالسواية بس هذول شعرفهم بزيد يريد ياخذهم وهالحجي ماجاي يدري بيه غير عمته اسيل واخوه زيد اكو كم شغله خلته يدخل بشك وتنفتح حرب ابين كلبه وبين عقله . . دك باب الغرفة ودخل اجت عينه بعين جمانة شافها تباوعله ببرود وثقة غريبة خلته يمحي الشك الي بداخله . . باوع لاسيل الي مبينة تعبانة ومتمددة ووجهها متغير لونه وكال الها .
جواد: عمه راح اخذ جمانة حتى نواجههم ولايضل بالج تره هاي دمنه منه وبينه مانخليهم يمسونهه باذية . . يلا جونة كومي البسيلج شي وتعاي وياي .
كامت جمانة باست راس امها وطلعت الرداء مالت الصلاة مالت امها لبسته وراحت ويه جواد .
طب جواد وهو لازم ايد جمانه والكل كاعدين ع التخم اندارو باوعو لجمانة الي اجت عينها بعين خالها وهيه تباوعله بغضب وحقد باوعت لزيد الي اشرلها براسه تقترب راخت يمه اشرلها تكعد وجواد كعد من الجهة الثانية صارت بنصهم مواجهة ابو نبراس وسيف والشيخ وخالها كاعدين بصفهم بس من الجهة اليسره .
زيد بهدوء: تعرفين هذا الولد .
واشر على سيف الي باوعلها بارتباك ودنك بسرعه . . عكس جمانة الي جانت تباوعلهم بثقة وبلا خوف .
جمانة: لاا ما اعرفه . . بس هو من منطقتنه واكثر من مرة يضايقني لمن اروح للفرن وكلت لزمن عليه وهو تصرف وياه وبعد ماتعرضلي .
باوع زيد لمحسن وكال: يعني عدنه هسه شاهد والي هوه ابنك زمن . . رجع باوع لجمانة وكال : هذا الولد يكول عنده علاقة وياج ومتواعدين انتي وياه بهيكل قريب منا وانتي مسلمته نفسج ويكول متقدملج وخالج ماقابل .
كامت جمانة وكفت ع حيلها بغضب وهيه تباوع لسيف الي منزل راسه وكالت وهي تنقل نظرها لخالها .
جمانة: شوف لوين وصلنا جشعك وسوء ذاتك . . تالي وكت بت حارث تجي هيج شكولات تتهمها بشرفها . . باوعت لسيف وكالتله : بالله شكد اطوك وجيت جازفت بروحك علمودهن . . اني لو عندي شي ما اروح اكل لاخويه واخليه يسحلك بالمنطقة والجوارين كلهم شهود على الي سواه بيك زمن . . بس العتب مو عليك على خالي الي باعني علمود كم فلس .
لزمها جواد ورجعها تكعد ابنصهم . . جمانة احترك كلبها ماجانت تدري بخالها راح يوصل بيه الامر يتهمها بشرفها بس حتى يحصل مبتغاه . . كامت تتذكر حجي امها وشلون تهموها قبل وهسه انعاد نفس الشي على جمانة وهيه متأكدة مثل ما ظهر الحق والله برأ امها رح يضهر الحق وتطلع برائتها .
باوع زيد لابو نبراس وسيف وكال: هسه الحجي خلصنا منه نريد منكم دليل يثبت علاقة بتنه بيك انته مثلآ تسجيل مكالمات رسايل صور اي شي .
ارتبك سيف وانخطف لونه باوع لابو نبراس يستنجد بيه . . خاف ابو نبراس من سيف يحجي شي ويخرب شغلهم كله وهو جان متفق وياه ع كلشي وحاسب حساب انو اهلها رح يطلبون دليل .
ابو نبراس: الدليل موجود عند الولد موجودة رسائلهم بس هوه مرتبك شوية .
زيد: اعتقد هوه عده لسان ويكدر يحجي بيه . . واذا هوه مثل مايكول يريد يتزوجها ويصلح غلطته خليه يطينا الدليل حتى نتاكد من كلامه هاي اذا جان صدك .
مد سيف ايده بجيبه وطلع تليفونه وكام يكلب بيه شوية وكام راد يطيه لزيد بس جواد زكح بيه وخلاه يرجع لمكانه وكام هوه اخذ التليفون من ايده واطاه لزيد الي اخذه وهو يباوع لسيف بحدة . . كام يكلب بالرسائل الي هيه عبارة عن خمس صور لقطات شاشة سيف حافضها بالاستوديو رفع عينه زيد وهو يباوع لسيف ويحجي .
زيد: اني ردت دليل حقيقي مو صور يكدر اي زعطوط يعدل عليها بالفوتوشوب ويكتب الي يعجبه . . افتحلنا الماسنجر وخلينا نقره الرسايل الحقيقية .
باوع سيف بخوف لمحسن ولابو نبراس وكال .
سيف: اني ما اخلي الرسايل امسحها لان دايما تليفوني بيد جهال اخواتي وخاف واحد يشوفهن وهمه يعرفون بيت ابو زمن وخاف يسوولي مشكله فامسحهن دايما .
شمر زيد التليفون يم رجل سيف وكله ردلي رقمك ماعاند سيف وبسرعه رد رقمه الي كتبه زيد بجهازه كلب زيد شوية بتليفونه الي جان صوته عالي وينسمع واتصل برقم جاوب رجال سلم عليه وكله .
زيد: سيادة الرائد يمان رايدك بشغله وادري بيك اصيل وتكضيها .
يمان: كول عد عيناك التريده يجرالك
انشالله .
زيد: راح يدزلك اخوي جواد رقم اريدك تجيبلي كل المعلومات عليه واريد قائمة بالارقام الي يتصل بيهه والرسائل واذا تسجيلات المكالمات وخاصة اذا بيهه بنات اريدهن كلهن يمي وياريت لو خلال هالاسبوع تجيبلياهن لبيتي ابغداد .
باوعله خال جمانة بقلق وهو يفكر بحجيه وخاصه من كال عنده بيت ابغداد ، بينما سيف انخطف لونه وتغير وجهه وابو نبراس سبح بالعرك مالته ، والشيخ يحوس بمكانه ما ثبت يريد يشرد من البيت ، وهالكد ما خاف ابو نبراس كال .
ابو نبراس: يابة ليش تخلون السالفة تطش وتطلع من بيناتنه ويصير طاري البنيه على كل لسان . . اني اكول لو نتستر ع السالفة وهذا الولد موجود يعقد عليها يتزوجها شهر ويطلكها بحجة ماتوالمو واذا ماتردوه اني حاظر اتزوجها شهر واطلكها وهيه مثل بناتي الله شاهد .
جواد: الله لا شافك ولك هم الك لسان وتحجي شني عبالك تايهه وانته ياهو وتسترها ولد عمها موجودين وبناتنه يمنه مكانهن انته شو ماتعرف تحجي . . من رخصتك خوية زيد .
اخذ جمانة من ايدها وكام طلع من الاستقبال . . دخلو للغرفة لكه اسيل كاعده ع الجرباية ومنزله رجليهه للكاع وتفرك بايديها بقلق شافتهم كامت على حيلها تمشي بتعب وقبل ما تسألهم شصار وشسوو . . حجة جواد .
جواد: عمه اني اريد احاجيج بموضوع انتي وجمانة بس اريدجن تفكرن بمصلحتجن اهم شي عدنة جمانة تطلع برائتهه ويضهر الحق تره لا اني ولا زيد مصدكين بحجي هذول وبراهينهم الجذابة . . عمامنه على جيه
هسه وهمه مو مثلنا مايعرفون شني معدنجن واكيد من يسمعون حجي ذول الجلاب ويشوفون الدليل راح يصدكون اني شاريد منج هسه يا جمانة توافقين يعقد عليج زيد وبس تفض هالسالفة يطلكج . . اشش لا تحجين شي فكري زين تره حجي الناس مايرحم وانتي بعدج زغيره وماتلكين غير زويد ضهر الج وسند يوكفلج ومايخلي احد يعيل بيج وافقي منا لحد ماتفض السالفة احسن ما يجون عمامي وجدي ويسمعون حجي ذول المسمومين ويجبروج ع الزواج بالولد وهوه مبين مو راحة وشراب عرگ هاي عيونة ورجفة ايده مو مال واحد صاحي . . حتى من طب للديوانية ريحته عطت مال شرب .
باوعت جمانة لامها وعيونها مفتوحة على وسعها وأمها الي صفنت ع الفراغ وتجت روحها ع الحايط سندت نفسها بيه حتى تكدر توكف . . باوعت لبتها المصدومة ورجعت باوعت لجواد الي كام يحجيلهن
عن مكر هذول الي راح يسوون المستحيل حتى يخلون عمامهم وجدهم يصدكون بيهم وراح يجيبون شهود وادلة تدين جمانة وبهالطريقة رح تنجبر جمانة ع الزواج من واحد منهم فالاحسن انها تقبل بابن عمها
لفترة معينة من الزمن وبعدها تكون حرة من هالزواج لكن تردد جمانة ونظرات امها خله جواد يتنهد بأسى وهو يريد يطلع من يمهن وقبل ما يطلع سمع شهگة جمانة اندار شاف اسيل وهيه تسند نفسها على تاج الجرباية ووجها اصفر ركض جواد كعد يمها وهو يطبطب على ايدها وجمانة تناوشت كلاص مي وشربتها شوية منه ، باوعت اسيل لبتها بحزن وهم وكالت بضعف .
اسيل: يوم حبيبتي لتزعلين مني بس اريد هالمرة اطلب منج هالطلب . . وافقي على ابن عمج . . ادري صعبة عليج وادري بيج انظلمتي بس صدكيني ابن عمج راح يكون سند وضهر الج وهو راح يطلع حقج من عيونهم اقلها منج وبيج ماراح يخون بيج مثل هذول الجلاب البره . . جمانة اني يمكن بوحده من هالهبطات اسلم الروح لخالقها وافقي يمه وخليه يسندج ويحميج من بطش الناس وحجيهم واتهاماتهم الباطلة
الج خليه يطلعلج حقج وذاك الوكت انتي حرة تبقين وياه لو تتطلكين وتعيشين حياتج وهذا اخوج جواد شاهد خليه واني هم .
تنهدت جمانة بقهر على حالها وهيه تباوع لجواد الي بنظراتة يشجعها على اتخاذ القرار الي رح يكون من صالحها . . هزت راسها بموافقة لأمها لكن جواد ما اكتفى بهاي الموافقة الي مو من گلبها لجمانة .
جواد: شني يعني موافقة احجيهه يبعد اخوج خل اسمع حتى ما اروح اصيح للزلمة وتالي تكليلي لا .
جمانة بتلعثم: ااي موافقة .
طلع جواد وراح للاستقبال وكف ابابها وصاح لاخوه وكف يحجي وياه شوية ومبين الحجي ماعجب زيد الي عگد حواجبة وهو يباوع للكاع بتفكير شوية واجو تجاه الغرفة وكف زيد بالباب وطب جواد اشر لجمانة تجي توكف علمها الحجي حتى يكون هوه وكيلها وفعلا حجت وصار هوه وكيلها عافوهن وراحو للاستقبال شوية وسمعت جواد واكف بره يخابر ويكول يلا فضت وماكو شي ابقو هناك لا تجون احنه جايينكم وهو مبين مرتبك وكلساع يكول لا بوية شني سلاح لا يابة كضوهم لا يجون ويكتلون الوادم وتصير السالفة ضدنة هسه نجي ونفهمكم كلشي . . شوية وطب كام يصيح عليهم ويهددهم اذا يحاولون يشردون من بيوتهم لو يسافرون رح يلكونهم لان ابن عمهم واحد جبير وواصل بالحكومة .
شوية واجه جواد كال الهن يلا تعالن حاولت جمانة تسند امها وقبل ما تلزمها لكت جواد يسندها وهو يمشي وياها بره الغرفه لزمت الجنط صاح عليها عوفيهن بوية تعاي ويه امج اخذت جنطة ايدها وطلعت بسرعة قبلهم فتحت الباب الخلفيه لامها صعدها جواد وهيه افترت من الجهة الثانية كعدت وره زيد الي جان يباوعلها بنظرات مبهمة وهيه محتاره بأمها تعدل بكعدتها ولازمه ايدها تطبطب عليها . . اول ما حركت السيارة انفتحت الباب مال بيت خالها و...
. . . يتبع . . .
البارت هالمرة اطول من البارتات السابقة لعيون المتابعة مرت اخوي الحبابة😁 وامي ام حيدر الغالية والمتابعه Kafee Abed لانهم اكثر ناس متفاعلين بالتعليقات 🌹