الموت الحي

البارت الثاني/الجزء الثاني

مرحبا حبايبي العسل شلونكم ❤️❤️

حبايبي كل سنة وانتو ومتباركين بعيد الغدير ان شاء الله ربي يعيده عليكم بالعافية ❤️

#الموت الحي
#للكاتبة براء الموسوي

زبيدة : احس بشي مقيدني ومو كادرة اتحرك ، حركت راسي داشتم ريحة كريهه تكتل عبالك كاعدة بمسلخ ، ريحة دم او شي ميت بس لا تطاق كلبت معدتي من استنشقتها

حاولت افتح عيوني لكن عبث ضليت دقايق اصارع حتى اشوف و بعد عناء ياله كدرت افتحهن واسترجع الرؤية

اباوع لنفسي كاعدة على كرسي ومقيدة بحبال ، شلت عيوني على المكان الاني بي

الدنيا ظلمة هندس كلشي مداكدر اشوف بس اصوات الشجر والهوى العالي خلاني اتيقن إني بمكان مفتوح

يمكن بستان ويمكن ، يمكن غابة !!

رجعت نظري لكدام ويبس دمي من شفت اربع عيون تشع بلون اصفر فاقع وبمواقع مختلفة ، كل زوج بجهه ومتشخصة بنظهرها عليه

بلعت ريكي دخيلك ياربي اني وين وشجابني هنا ، بديت استرجع ذاكرتي ، الاتذكره من بعد ما هارون انطاني كاسة المي وشربتها بديت ادوخ وما اشوف
واغمى عليه وهسه كعدت لكيت نفسي هنا

يربي هذا وين عافني وراح ومعقولة هو الرابطني هالربطة هاي ، اي اكيد هو بس ليـ ... فزيت من انفتح ضوه قوي بوجهي جبرني اغمض عيوني

فتحت عيوني وتوضحت الرؤية عندي ، انداريت على نفس المكان واقسم بالله العلي العظيم اجه گلبي يوكف من الشفتة

هارون كاعد على كرسي بوسط المكان وعلى جانبه
اسد ونمر !!

هارون : صح النوم

زبيدة : عيني على الكائنين الكدامي ، احس الهوى ضاگ بصدري من شفت عيونهم تخزر بيه

يا الله شـ شنو هاي ، اباوع لهارون كام وهمه كامو ويا

هارون : كعدو مو وكت كومتكم هسه

زبيدة : اباوعلهم امتثلو لكلامه ورجعو كعدو وكأنهم يفتهمون شجاي يكول

هارون : اي ست زبيدة ان شاء الله مرتاحة بضيافتنه

زبيدة : ااا انت للـ ليش جايبني هنا وليش رابطني هيج شترييييد منييي ، فزيت من صفكني راشدي

هارون : صوتج هذا اذا تعلي عليه بعد اخفي الج

زبيدة : ضليت باهته ، اني !! اني زبيدة واحد مثل هذا يصفكني راشدي !! دمعت عيوني ما هانت عليه نفسي واني اشوف روحي لا حول ولا قوة وهذا النذل مستغل ضعفي وقلة حيلتي لدرجة يرفع ايده ويضربني

واني !! اني ما اكدر اسوي شي ولا ادافع عن نفسي

هارون : تؤ تؤ اشو الوجهه گلب احمر والعيون دمعت ، شنو انجرحت كرامتج سودة بوجهي

زبيدة : اذا انت صدك رجال ومحسوب على الزلم وهذا شاربك عليك افتح قيودي ووخر الحيوانات المتحامي بيهن و وحق رب الحق اراويك الكرامة شلون تصير

هارون : *** بيج وبالزلم واذا على شاربي فميحتاج تحلفيني هسه ازينه كدامج عاد شلون اهتم

*** عليج وعالزلم والشوارب

زبيدة : مريض

هارون : انتِ كلتيها مريض ولا على المريض حرج يعني هسه اذا افلت عليج ولدي ينهشون عظامج نهش محد راح يكدر يعتب عليه

زبيدة : زين تعرف بنفسك حيوان وذوله ولدك

هارون : لغوة زايده ما اريد ، نقطة على السطر هذا الزواج اني ما اريده وانتِ لازم ترفضين وتمنعين جدي
يخلينا نرتبط

زبيدة : لعددد متحجييي انتتت مو نعااال رجال واللللك رأيي لو همممه حاطيييك حمار بالبيت

رجع صفكني راشدي

هارون : صوتج

زبيدة : للللك وداااااعة امي اذا الزمك اشررررب من دممممممك لتضررررب لتضررررب

هارون : راح نطلع منا وانتِ راح ترفضين هالزواج والا صدكيني اسوي بيج سوايه ما سواها بشر

زبيدة : مترفض انتتت اشو جدك اقربلك مني وهاي المهزلة كلها سوالها علمودك متصخم على وجهك وترفض انت

اباوعله تنهد ومسح على راسه ورجع سحبني من هدومي بقوة

هارون : ما اكدر ارفض بس انتِ تكدرين ، تكدرين تكولين لا وتنهين الموضوع عندج سبب ، اني شكيت راسج وين كرامتج وانتِ قابلة تاخذين واحد وصلج للموت وگال عنج وعن خواتج گ****

زبيدة : دمعت عيوني ، لك انييي مو بحااالك بس هم ما اكدر ارفض جدك سوامني على احوتي لو اتزوجك
لوما ارجع حقوقهم

ما ميتة عليك اني وما ادورك لا بالشمس ولا بالفي بس مجبورة اكل تبن واقبل والا ما اكدر استدر حق اخواني وجدك الوحيد اليكدر يساعدني

هارون : ميهمني طز بيج وباخوتج انييي زووواج ما اريييييد اتزوووج

زبيدة : طببببك مرررض عساك لا ردتتتت انييي شعلية متروووح تحاجيييي جدك

هارون : ما اكدرررر

زبيدة : لعدددد اني الاكدرررر

اسمعني خلي نحجي بمنطقية ، افتح الحبل عندي وطلعني منا واني اوعدك اروح وياك ونحاول نقنع جدي انُ ثنينه ما موافقين على هالزواج وهو لابد انه يتفهم وضعنا

هارون : انتتتِ راسج ممدد بي مطي جاي اكلج اني ما اكدر ادخل

اسمعي لج اني انطيتج هواي من وقتي وحجيت وياج هواي واني ما متعودة احرك عضلة لساني هالكد
راسي كام يوجعني من الحجي

حجايه وحدة متصير ثنين ترحين ويايه وتنهين هالمهزلة وتاخذين اهلج وتطلعين من حياتنا للابد والا الراح يبدر مني ميسرج

زبيدة : ما اكدر مصلحة اخواني اهم مني ومنك واني لا يمكن افوت فرصة اني اشوفهم مرتاحين ومكملين حياتهم بسلام علمود واحد خسيس مثلك

هارون : براحتج

زبيدة : اباوعله جر الباب الحديد مالت السياج وطلع

رجعت نظري على المصخمين المكابليني ، عزة بعينك ان شاء الله اني شجابني على هالعائلة الجد ظالم وميخاف الله والحفيد عايش بنص الحيوانات المفترسة

ما انكر إني ميتة من الخوف يمكن دكات گلبي هسه سمعتها حتى ملائكة السماء ، بغض النظر عن جرائتي لكن بالنهاية اني انسان واخاف خصوصاً اذا انحطيت بوضع خطر مثل الاني بي هسه

يكرم طاري الله من الخوف احس راح يصير بيه سكر لو تضربني جلطة خصوصاً إني من الاساس عندي فوبيا من الحيوانات وحتى من جنت اسافر واروح لحديقة الحيوان اكتفي اني اصورهن من بعيد اول مرة اكون بهالقرب منهن

صحاني دخول هارون شايل صندق جبير بأيده ، اباوعله نزله بالكاع وفتحه مطلع منه اكياس جبيرة مليانه بسائل لونه احمر

ما اخذت وقت حتى اعرف انه دم ، ياربي هذا المسودن على شنو ناوي

اباوعله سحب مكص من جيبه ، كص اعلى الكيس واجه وكف كدامي

هارون : جنت من البداية متردد اخطي هالخطوة لكن انتِ عنيدة او يمكن الله كاتب لولدي اليوم خوش رزق

زبيدة : ششـ شراح تسوي

بدون ميجاوبني تحرك وافتر دايري مدايري محرك ايده للاسفل وعلى اثر حركتة انصب الدم بالكاع

انصدمت من الجاي يسوي اريد ابلع ريكي وما اكدر ، الارض المحاوطتني انملت دم وانتشرت ريحة الزفر بكل المكان

اباوع للاسد والنمر كامو وبرزو انيابهم على اثر الريحة بس المانعهم من التقدم السلاسل المقيدتهم

ههـ هارون شجاي تسوي ، عفية لتتخبل

هارون : اش

زبيدة : سحب كيس ثاني وصبه على ملابسي وذولاك كامو يجرون برواحهم يردون يتقضون عليه واني من شفتهم هيج بدون شعور كمت اتقيئ من الخوف والريحة

طلعت روحي خصوصاً معدتي جانت فارغة تكرمون كمت اتقيئ بس مي واهوع

يبس دمي من شفت هارون راح فتح اقفال النمر والنمر كام على حيله وتقرب على كيفه مني

تمنيت الموت بلحظتها من شفته قريب عليه لهالدرجة ، كتمت النفس وعيوني تتباع حركته يمشي على خطوات هارون ويتحرك داير مدايري

وكل شويه يرفع ايده يدفع جسمي لو يلمسني وهارون كاعد على كرسيه وصوت ضحكته ترن بالمكان ولا كإنما اكو شي

اني لا اراديًا من حسيت بملمس اديه عليه كمت اصرخ بعلو صوتي

ووولج يييمه ساعدينييييي رااااح اموتت امووووت
هاررون لاااا الله يخلييييك لا وخره عني

هارون : هههههههه

زبيدة : بجيت من كل گلبي على الموقف الاني بي ، انذليت واني اتوسل بي ينجدني وهو يقابلني بضحكة كلها تشفي واستهزاء

الذل والخوف والقرف العشته بهالموقف خلاني اكره حياتي واكره الساعة الاجيت بيها لبيت جدي اول مرة افقد السيطرة على نفسي لهالدرجة ، الخوف وصلني لمرحلة مستعدة انزل ابوس ايده بس في سبيل يبعد عني هالحيوان

كافي الله يخليك والله كلبي راح يوكف ، تعال ازرع طلقة بگلبي بس لتسوي هيج وياي راح اموت من الخوف اذا تحب الله وعندك ذرة مخافة منه تعال وخر حيوانك عني الله يخليك

هارون : تتراجعين عن موافقتج وتاخذين اهلج وتطلعين من بيت جدي وما اشوف وجهج بعد

زبيدة : هزيت راسي ودموعي تنزل هاهي التريده يصير بس ساعدني

هارون : هييي تايغر تعااال هنا كافي لعب يله تعال اكعد يمي

زبيدة : عافني النمر وراح يركض لهارون يتمسح بي ويتلاوه ويا

هارون : عفيه بالسبع ، ههه كافي يله تعال نام

زبيدة : قيده بالسلاسل ومسح على راسه واجاني

هارون : راح افتح عنج الحبل ، اي حركة تبدر منج اذبج عالاسد وذاك ميشاقة گبل يصعد روحج فوك

زبيدة : هزيت راسي بدون ما اجاوبه ، كعد بمستوايه وبده يفتح الحبال عني ، الحقير جان لافني لف بالحبال وضابهن بقوة على جسمي بحيث ضلوعي كامن يوجعني كد ما شاد عليهن

هارون : يله تحركي كدامي

زبيدة : زمت يدة الكرسي وكمت ، رجلية كوه حاملاتني خدرانات والرجفه الغالبه على جسمي مخليتني بصعوبة اتحرك

مشيت ورا ، فتحلي الباب طلعت وهو وكف كدامي قفل القفص ووكف يخابر

هارون : الوو خالد اني طلعت هسه ، فد شويه وتعال طلع الاسد والنمر ووديهم كلمن للقفص مالته وانطيهم اكل راح اعوفلك لحم بالثلاجة مالت البيت ، يله في امان الله

اوكفي هنا اني رايح عشر دقايق وارجع

زبيدة : بدون شعور جريت قميصه ححـ حباب لتعوفني وحدي يمهم خاف ياكلوني

هارون : تره حابسهم ومقيدهم باقفال شيجيبهم عليج

زبيدة : ميخالف خاف يطفرون عليه الله يخليك لتعوفني

هارون : دتعاي اصعدج بالسيارة وارجع

زبيدة : لحكته ومشينه مسافة تالي وكفت بادن رجلية ما جاي اكدر امشي كعدت بالكاع وبجيت من الالم ما اكدر اوكف من الوجع الي بجسمي

انوب هو اندار لكاني كاعدة بالكاع كام يعد ويصف عليه

هارون : اهوو شلون احب هالافلام اني ، كومي فضيني تره مالي خلكج

زبيدة : سحبني من جتفي بقوة ، عطت اااخ ااخ ايدي
متشنجه لتلزمني

هارون : امشيييي ما فارغلج اني وراي كومه شغل

زبيدة : سحبني حيل ويا وضل يمشي بسرعة واني رجليه ميعينني وجسمي كله متشنج بسبب الحبال الجان شادني بيهن

بالف يا الله ياله وصلنا للسيارة ، اباوعله فتحلي باب الصدر ودفعني

هارون : يله فضيني صعدي

زبيدة : صعدت وهو طبگ الباب عليه وراح ، رفعت رجليه حضنتهن ونزلت دموعي ، اول مرة يصير ويايه هيج موقف واحس نفسي ضعيفة لهالدرجة

اول مرة بحياتي اتوسل بأحد هيج ، اول مرة اسمح لاحد يمد ايده عليه ، يضربني ، يفشر عليه ويهيني وفوك كل هذا اضل ساكته وما اكدر اسوي شي

دقايق مرت واني على هالحال ، نزلت رجليه وانداريت على الجامه من حسيت بالباب مالت السيارة تنفتح ما اريد اشوف خلقته ، صعد هو و حرك السيارة واني عيني على الطريق ودموعي تنزل بصمت

باوعت للساعة صايرة بـالـ4 الفجر كل هالوقت احنه بره البيت معقولة محد فقدني واتصل بيه ، جريت الجنطة من بين رجلية وفتحتها ، لكيت الموبايل صارله فوك الساعة يسجل لكن بدون فائدة سديته

ورحت على سجل المكالمات ما لكيت احد متصل عليه غير معين اخوية والظاهر عباله اني نايمة فما لاح بالاتصال عليه

سديته ورجعته المكانه ، حضنت الجنطة لصدري وغمضت عيوني ، ضليت طول الطريق مغمضه ما فتحت عيوني الا لمن سمعت صوته يبلغني انه وصلنا
اخذت جنطتي ونزلت بس استوقفني صوته

هارون : باجر الظهر اريد ارجع من شغلي الكه الموضوع منتهي

زبيدة : ماشي

عفته ومشيت داخله لجوه ، فتحت الباب الداخلي وصعدت بوجهي لفوك ، اخذتني رجلية لغرفة بيت جدي

دكيت الباب بخفه ماعندي القدرة اضغط على نفسي ولو قيد شعره

انفتحت الباب وطلعت بيبتي والي خطية اول ما شافتني شهكت بعلو صوتها

حمزية : عزه العزاني يمه زبيدة شبيج شهالدم التارس وجهج وهدومج نوووح نوووح تعااال الحكلي

زبيدة : خليت اصبعي على شفايفي وهمست صوتج حبابه صوتج لتسويلي مشكلة ، فدوة اروحلج صيحي جدي خلي يجي لمكتبة بسرعة

حمزية : صار صار هسه اكعده واجي

زبيدة : سبقتها ومشيت للمكتب ، فتحت الباب و كعدت انتظره

شويه واجه هو وبيبي يركضون ، اباوعله بس شافني فتح عيونه واجه يركض عليه ، لزم جتافي وحاجاني والصدمة مبينه على وجهه

النوح : حبيبتي زبيدة منو وياج

زبيدة : منو وياج !! كلمة هزتلي كل حصوني وعلى اثارها دموعي غرگت وجهي اريد اسكت بعد ما اكدر

حمزية : احجي يبعد روحي روحج منو السوه بيج هيج وليش الدماية مغركة هدومج

النوح : كومي حمزية كومي اخذيها لغرفتنا واني رايح اجيب الطبيب واجي

زبيدة : بدموع ، اوكف جدو هذا الدم مو الي

النوح : لعد دم منو هذا ؟

زبيدة : رفعت ايدي الترجف وفتحت بيها مقدمة قميصي ومديتها على صدري سحبت مسجل الصوت من صدري

اي اني شكيت انُ هارون ممكن يسويلي شي واحتمال يفلش موبايلي اذا فتحه وشاف برنامج التسجيل مشتغل وظاهر على شاشة الجهاز فاخذت مسجل صوت صغير موجود من زمان عندي شغلته وخليته بصدري حتى يبقى وياي ويسجل كل الحديث اليدور بيني وبينه تحسبًا لاي شي ممكن يصير

خليته على الطبلة وشغلته

بدموع تفضل جدو هذا حفيدك التريدني اتزوجه واعيش ويا ، اني ما راح احجي شي انت بنفسك اسمع واحكم

بده تسجيل الصوت يشتغل من اول ما جنت بغرفتي ولحد ما صعدت ويه هارون ودار بيني وبينه كل الصار

اباوع على بيبتي كعدت وكامت تدك على راسي وجدي صار وجهه اصفر

النوح : هاهي بوية طفي السمعته لحد الان كلش

زبيدة : حباب اعفيني من هالزواج اذا تخاف الله اعفيني اني ما اكدر اعيش ويه هيج انسان حفيدك نذل وكلشي ممكن يطلع منه والله لوما متنازله ومسايرة جان اني هسه مباقي مني غير العظام

انت ترضاها عليه مو اني هم حفيدتك ، بيبي انتِ ترضيها ، قابله على السوا حفيدج ، ليش محد بيكم ديرد عليه جاوبوني

النوح : حمزية تركضين تصيحيلي هارون فوراً

حمزية : كايمة ومن هسه اكلك ايالك تتساهل ويا هارون هواي طغه وصار لازم يتوقف عند حده

اني بنات ابني مو رخاص عندي وما لاكيتهن بالشارع هالمرة اذا انت تسكت فاني ما راح اسكت

زبيدة : طلعت بيبتي وشوية ودخلت ووراها هارون

هارون : هاا شعدكم كاعـ..

زبيدة : سكت من شافني كاعده ، ومن صارت عينه على تسجيل الصوت خزرني وقبل ليدر وجهه عني نزل على خده راشي من جدي

هارون : انت منتبه على نفسك ضربتمن ؟

النوح : اضربك واكسر راسك وانعل ابو اليطلع وراك
ابن النعال انت شنو من بشر شنووووو انتتتتت من يا طينة مصنوع

شلووون تتجرأ تمد ايدك على بنت عمك وتسوي بيها كل هذا ما خفت الله ما كلت خطية خاف تموت من الخرعة لييييش بيييش ماذيتك هي فوك ما راح تقبل بواحد معقد واناني مثلك

هارون : انتو الجبرتوني على هالفعل الف مره كتلكم زواج ما اريد اتزوج وانتو تجيبون وتحطون بخلقتي تعال تصخم وتعال تنعل شاكيلكم اني ؟

طبعا لا فما دامكم تفرضون عليه امور اني ما رايدها اذاً تحملو اليبدر مني وعود خلي تفيدكم عمايلكم وخططكم

حمزية : وهاي جزاتنا لان خايفين عليك ونريد مصلحتك ونسعى حتى تستقر بحياتك حالك حال العام بدال ما عايشلي بنص الحيوانات تصبح وتمشي وياهن حتى حجي ما كمت تحجي مثل الاوادم

هارون : انتو مو اعرف مني بمصلحتي وبعدين محد عتب عليكم وكلكم خافو عليه ، اني هالحياة عاجبتني
ومرتاح بيها لا احب اتدخل بحياتكم ولا اقبل تتدخلون بحياتي

اني انسان كافي خيري وشري لا احب ااذي احد ولا احب احد يأذيني عايش بعالمي بدون لا ااثر على احد او امس احد

بس انتو الكاعدين تجبروني امشي بطريق اني اكرهه واكره كلمن يمشي بي

اي لتباوعولي هيج انتو تدرون بيه ما احب ااذي احد ما مأذيني بس شسوي ماعندي خيار ثاني انتو تردون تدمرون حياتي ودخلوني بعلاقة ما اكدر اتقبلها

اني مو طفل حتى تتدخلون بحياتي ، اعيش ، اموت اتزوج ما اتزوج هذا مو شغلكم ماكو اي حق يكفله الكم دين او قانون يسمحلكم تتطفلون على حياتي وتدخلون بيها شخص اني ما اريده

النوح : ما دامك تحجي هيج غصبًا ما عليك وعناد بيك تتزوجها وانت الممنون وكلمة زايده ما اسمع منك والا انت تعرف شراح يصير بيك

هارون : لهنا وبس اني زواج ما اتزوج وشتريد تسوي سوي

زبيدة : رغم كل الصار بس طرت طيور من سمعت بي عارض جدي و نهى كلشي لكن للاسف تحطمت كل آمالي من حجه جدي

النوح : هاهي براحتك بس لتلومني اذا باجر عرضت تقاريرك على وزارة الصحة وعود لتيجني تگلي ليش فصلوني

زبيدة : اباوع لهارون يبس بمكانه من سمع كلام جدي

النوح : اسويها وحق الخلقني وخلقك اسويها واحرمك من شهادتك و وظيفتك الكاتل روحك عليها

حتى من التدريب والعروض التسافر تسويها احرمك منها ، اخليك كلشي متسوه والله العظيم حتى مصح ادخلك لتلعب بذيلك وياي يا هارون

بعد جم شهر عندك عرض خارج العراق وحسب الجاي اشوفه كاعد تتدرب عليه من هسه فاريدك تگلي لو الوزارة شافت تقاريرك راح تسمحلك تسافر وحدك ؟

تدري ليش ما راح يخلوك تسافر لانك صحيًا تعتبر فاقد للاهلية وتقاريرك الطبية تثبت هالشي فمستحيل بعد يخلوك تطلع وتطب بكيفك حتى بوظيفتك ميخلوك لان يعتبرون وجودك خطر على الحيوانات والبشر الداير مدايرك

يله گلي تقبل اسوي هيج ، اذا تقبل هالشي على نفسك اخذ راحتك ما اجبرك اني

زبيدة : ضليت صافنه على كلام جدي وبوقتها ياله عرفت انُ حقارة مبين اخوية وعمي فؤاد وعمتي بيداء وراثة من جدي

عجيب شكد كرهته بيومها من شفته شلون يساومنا على الاشياء العزيزة علينا بس في سبيل يمشي حجايته ويكون محافظ على كبريائه وغرورة

النوح : هاا شو سكتت متحجي وينه الصارله ساعة يرعد ونافش ريشة ، احجي سمعني صوتك

هارون : موافق

النوح : على شنو موافق ؟

هارون : موافق على زبيدة

النوح : عفيه بيك هذا حفيدي الاعرفه عمره ماكسر حجايتي ، يله روح ارتاح وايالك تحاول تغافلني وتسويلك شي منا منا

تره هالمرة لان غلبتني عاطفتي تجاهك راح اعيدها الك المرة الثانية گبل اتصرف بدون ميرفلي جفن وانت تدري بيه حتى لو احبك واعزك اذا تطلع عن طريقي اعتبرك اصبع يوجعني واكطعك حتى ارتاح

وانتِ حمزية اخذي زبيدة بدليلها وابقي يمها اليوم خاف تتخربط واي شي يصير اطيني خبر

حمزية : كومي يمه كومي حبيبتي ، بعد طولي طولج

زبيدة : استندت عليها ومشيت ، احس اكو بداخلي انكسر فجأة احس حياتي انكلبت وصرت مسيرة بأيدة جدي ولازم امشي على اوامرة

رغم اني ما مجبورة بس هالعاطفة القوية العندي تجاه اخواني ليش دتجبرني ارضه بكلشي في سبيل اسعدهم واشوفهم مرتاحين ما ادري

حمزية : يله يمه دخلي

زبيدة : دخلت لغرفتي وكعدت على الجرباية ، اباوع لبيبيتي راحت تدور بكنتوري ، طلعتلي دشادشة واجتي كومتني

دخلتني للحمام وراحت جابت علاكة واجت لفت بعد راسي حتى ليوصله مي

نزعت ملابسي وبقيت بالداخليات وهي حضرتلي البانيو وكعدتني بي وكمات تفرك جسمي ووجهي من الدم اليابس بي

حمزية : لتضوجين ولا تنقهرين يبعد روحي تره والله جدج يريد مصلحتكم ولوما يدري هذا الزواج مناسب الج ولهارون ما جان فرضه عليكم انتو تعرفون شي وهو يعرف شي يا يمه باجر عكبه تكولون الف رحمة على روحك يا جدي على هالزواج

زبيدة : رجاءًا بيبي ما اريد اسمع او احجي بأي شي

حمزية : هاهي يبعد طولي طولج التردي يصير ، افييش يمه البنات عشرة واكول گليلات رحتلج فدوة يا حنينة الله شاهد كلما اشوفج اشوف وسيلة كبالي

زبيدة : خليت راسي على صدرها ، حضنتها وبجيت

حمزية : اووووف يا بيبي والله اني ما بيدي شي لو اكدر اسوي شي وابرد كلبج وگلب هارون فلا اقصر بس اني هم لا حول ولا قوة يا يمه جدج ميتناقش ولا ينگاله لا البراسة براسة

اكثر من سالفة ابوج الكسر ظهري من حرمني منه لا خليت نبي ولا امام ما خليته عليه حتى شيخ عشيرتي رحت حاجيته وجبته واسطة علمود يرجع ابوج وهم جدج عند وما قبل وهم ما كدرت اسوي شي

زبيدة : هزيت راسي ، هي هم خطية ما اكدر اعتب عليها وعلى كولتها لو تكدر تفيد جان فادت روحها وما انحرمت من ضناها بذاك الوكت

حمزية : يله كومي يمه ، اني راح اندار عنج حتى تنزعين ملابسج الباقية وتشطفين جسمج على راحتج خاف تستحين مني

زبيدة : بدلت وكملت غسل وهي انطتني ملابس بدلت وطلعت وياها ، نيمتني وغطتني وكعدت تمسح على راسي بخفة ايدها وتقره قران

بيومها من التعب گبل نمت حتى صلاة الفجر ما صليتها

_______________________________

ديمة : جنت داعزل الفوگ اني وبصائر وسمعت خالة هناء تصيحلي ، نزلتلها نعم خالة

هناء : بعد روحي بيج حيل تبدلين وتاخذين صينية هالاكل للجوارين

ديمة : تدللين خالة بس يا جوارين ذوله

هناء : الناس الكعدو جديد ببيتكم شبيج ولج المؤجرين الجدد

ديمة : هاا اي هسه اروح بس تعاي شنو المناسبة

هناء : هههه يمه منج ولج شكد تسألين غير كعدو جديد هنا ولازم ندزلهم نزله كنوع من التوحيب بيهم
افتهمتي

ديمة : تمام لعد انتِ كملي صب واني رايحة اغسل وابدل واجيج

دخلت للحمام غسلت وطلعت للغرفة لبست عباية اسلامية وشال وتمكيجت شويه خوما اطلع مبهذلة

رحت لخالة داخذ الصينية وهي من شافتني رزلتني

هناء : يمعزاية هاي شنو وجهج وين رايحة وحاطة حمرة

ديمة : شبيج خالة قابل اطلع ووجهي باهت تقبلين يكولون على جنتج مبهذلة غير اريد ارفع راسج اني فوكاها

هناء : طبهم وجع خلي يكولون احسن ما يركعوج عيب وتتمرضين ، امشي امشي يله مسحي حلكج الاحمر هذا لا اجي ابسطج

ديمة : لا فدوة خالة والله ايدج توجع ذاك اليوم كرصتيني سويتي ايدي زركة

هناء : والله يا يمه اني كرصتي متوجع بس انتِ مايعة روحج وتتمجعصين ، يله ولج لتلهيني وامشي مسحي حلكج

ديمة : والله متنمسح خالة حتى لو مسحتها متروح هاي مات

هناء : مات ! منوه المات ؟

ديمة : هههههه ياا خالة اسم الله محد مات بس اقصد هالحمرة مات مطفيه يعني متروح

هناء : هاا يعني سحري

ديمة : لا خالة السحري يختلف

هناء : اكلج شو هاج اخذي الصينية وطلعي جفيني شرج انتِ وحمرتج

ديمة : ضحكت واخذت الصينية وطلعت ، دامشي واجه كاظم باتجاهج

كاظم : هااا نثية شلونج

ديمة : اني جم مرة كتلك لتصيحلي نثية شنو فختايه كدامك ، اسمي ديمة صيحلي ديمة

كاظم : عود خوش اكلج ديمة انتِ صدك مرت امين

ديمة : اي ليش تسأل

كاظم : عادي تكليله ينطينه الستوته مالته نلعب بيها

ديمة : وكفت وانداريت عليه ، شتلعبون بيها ؟

كاظم : شلون درايفر شبيج

ديمة : لا ربحنا اذا تريد تلعب داريفر بالمنطقة لا وبالستوته كون يسمعك درايفر اذا ميدك راسه بالشحاطة اطلع كلشي ما افتهم

كاظم : يعني هسه متحاجين امين يطينه الستوته

ديمة : طبعا لا

كاظم : تففف عليج يالنحسة كبببر لفج انتِ بحكلج هذا جنج مطي ماكل معجون

ديمة : طاحظك ادبسز ااااله اگل لامك والله

مشيت وگلبي محترك من هذا القزم الادبسز والله فلا تنلام بي زبيدة

وصلت لبيتنا القديم ، ابتسمت من وكفت كدامه ، رغم كلشي صار بس ابد ما انسى انه بهالبيت عشنا ايام رغم صعوبتها بس جانت ايام حلوة

ايي الحمدلله على كل حال اكيد الله يعرف الصالح النا وين

خليت الصينية على سيارة الجوارين ودكيت الجرس ورجعت شلتها ، ماكو شويه وانفتح الباب وطلعتلي بنية كلش حلوة من شفتها ابتسمت

السلام عليكم

: وعليكم السلام تفضلي

ديمة : احنه جوارينكم الي بنهاية الشارع تفضلو واهلا وسهلا بيكم نورتو المنطقة

: منورة بأصحابها يگلبي بس بيت منو انتو لا صغراً بيكم

ديمة : بيت ابو امين

: هاا اهلا وسهلا حبيبتي تفضلي تفضلي

ديمة : لا شكراً جزيلاً مستعجلة

: لا عيب والله على الاقل شربي مي تفضلي گلبي اهلا وسهلا

ديمة : استحيت افشلها ، دخلت للطرمة ، اباوع للطرمة مليانه تراب عززه هاي ليش هيج وصخة خطية احتمال دينظفون شويه شويه

اباوعلها طلعت بايدها دولكة مي انطتني مي ، اخذت الكلاص شربت شويه وانطيته الها ، يله حبيبتي من رخصتج

: الله وياج عيني

ديمة : طلعت بسرعة ورجعت للبيت لكيت اسلام راحع وخالة دتصب غده ، كعدنا كلنا نتغدة وعفنا لامين مثل العادة لان يرجع متأخر ياكل وحدة خطية

واني ما اكدر انتظرة لان عندي علاج فاضطر اعوفه واگل ويه اهله

ابد ما انسى بيومها خالة مسوية تمن باگله وهي شلون تمن باگله تسوي يجننن ، داگل باستمتاع وحاجاني اسلام

اسلام : اكول ديمة

ديمة : هاا

اسلام : انتِ عندج صديقة اسمها هبه ؟

ديمة : بس سمعت اسمها شرگت ووكفتلي باگلايه كطعت عليه النفس

*****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟