الموت الحي

البارت الواحد والثلاثون

مرحبا حبايبي العسل شلونكم ❤️

رمضان كريم عليكم جميعاً حبايبي ، ينعاد عليكم بالخير والصحة والسلامة والعافية وصيامكم وقيامكم مقبول ان شاء الله ❤️

#الموت الحي
#للكاتبة براء الموسوي

ديمة : كاعدة بحفلة عقدي واباوع بالوجوه وصافنة ، اني وين وشعندي هنا ، لا الناس الموجودين همه ناسي الي اعرفهم ولا المكان الكاعدة بي هو المكان الجنت اتخيله باحلامي والاهم من هذا كله الانسان
الراح ارتبط بي مو نفسه الجنت اريده و احلم بي

كل الداشوفه شي غريب عني ، ميمثلني ولا اله كل علاقة بيه ، مو هاي الاشياء الجنت ناويه اسويها بعقدي وبداية مشواري ويه الانسان الاصح لكن للاسف حتى الإنسان المناسب الي عجزت اختاره
والدنيا اختارته الي

تنهدت منزلة عيوني على ملابسي ، بدلة بيضة
منفوشة وقصيرة يزينها لؤلؤ ناعم وبسيط جدًا
رغم انها حلوة بس مجانت اختياري ، لا الملابس
ولا المكياج ولا اي شي اني الي اختاريته
كله دنيا اختارته الي

فززني من شرودي صوت خالة هناء وهي تبلغني ارد على الشيخ

هناء : حبيبتي ديمة جاوبي الشيخ

ديمة : هاا ، انتبهت لنفسي ما رديت ، رجع الشيخ كرر عليه السؤال واني جاوبتة " نعم انت وكيلي "
ومن بعد هالكلمة تم العقد وصرت حرم امين
رسميًا

امين الولد الجنت اعطف عليه واعتبره اخ عزيز على كلبي لا اكثر هسه صرت مرته والمفروض إني انظرله
غير النظرة الجنت اشوفه بيها سابقًا ويا ترى هل راح اكدر ؟

اباوع للنسوان اجوي بوسوني وباركولي ، شفت الفرحة والسرور بعيونهن يمكن هالناس فرحانين اكثر مني شخصيةً ، ماما واكفه على صفحة وحتى ما تقربت مني مجرد ماخذة زاوية وترد على الناس

واني بصراحة ما هالكد اهتميت لعدم وكفتها وياي بهيج يوم خصوصاً انُ زعلها ما جان على السويته
بكد ما جان بموافقتي على هالزواج وكأن الفعلة
الشنيعة السويتها كانت اهونلها من هالزواج

لهناك وسمعت خالة هناء تبلغ المعازيم بدخول امين ، اباوع للكل صار يركض الي تلبس عباية والي تبلس
حجاب الا اني كاعدة والهوى البارد يضرب جسمي
بس ماعندي اي ردة فعل

اباوعله دخل واشتدت الهلاهل ، ناس تصفگله وناس تبوسه وامه تحضن بي وهو يبوس باديها ومع كل هذا ابد ما رفع راسه

انتبهت مزين شعره ولابس قاط رصاصي غامق وجوا قميص ورباط لونهم اسود ، اول مرة اشوفه مرتب وانيق ، طالع شكله صدك عريس

اجه وكف يمي و اول ما رفع راسه وشافني بسرعة دنك وبين عليه الارتباك

انوب بدو كل اهله يصيحون حبها ولك حبها بس هو ابد ما قبل ومن لحت عليه خالة همسلها بالكلام ولان اني يمه سمعته