ថ្ងៃច័ន្ទ ដើមសប្តាហ៍ថ្មី ម្ចាស់តូចបើកឡានជូនកូនមកសាលារៀន ដោយខ្លួនឯង ដោយមិនចាំបាច់ពឹងពាក់អេហ្វេ ជាអ្នកជូនមក ពេលនេះអ្នកទាំងពីរ ឳពុកកូន កំពុងតែនៅក្នុងបន្ទប់ ការិយាល័យ
សកលវិទ្យាល័យ ម្ចាស់តូចកំពុងនិយាយជាមួយលោក លោកសកលវិទ្យាធិការ ផ្តាំផ្ញើពាក្យខ្លះ ឱ្យគាត់ជួយមើលថែកូនស្រីរបស់ខ្លួន ក្រោយបញ្ចប់កិច្ចការ ជំនួយការលោកសកលវិទ្យាធិការ
ក៏បាននាំនាងតូច ទៅស្គាល់បន្ទប់រៀនរបស់នាង តែមុនពេលទៅ ៖
" កុំក្បាលខូចណា ខំរៀនទើបប៉ាស្រលាញ់ មួយនេះទុកទៅ
ទុកទិញស្ករគ្រាប់ញ៉ាំ កូនឆ្លាតរបស់ប៉ា " ទោះនាងធំពេញវ័យ ពេញរូប ពេញរាង្គ ដូចស្រីក្រមុំក៏ដោយ ក៏ម្ចាស់តូចនៅគិតថាហ្វីយ៉ា
ក្មេងតូច អាយុ៥ឆ្នាំដដែល ព្រោះនាងជាក្មេងស្តាប់បង្គាប់គួរឱ្យ
ស្រលាញ់ ម្ចាស់តូចអង្អែលក្បាលកូនស្រី បន្ទាប់មកក៏ដកកាបូបលុយចេញពីហោរប៉ាវខោរមក ដកកាតខ្មៅស៊កចូលដៃកូនស្រី
ទុកឱ្យនាងចាយវាយទិញស្ករគ្រាប់ ទិញនំចំណីញ៉ាំ។
" ប៉ាប៉ា អគុណប៉ាប៉ា " នាងតូចពេបមាត់ ចង់រកយំដាក់លោកប៉ា នាងមិនធ្លាប់ចាយលុយខ្ជះខ្ជាយនោះទេ ក៏មិនធ្លាប់ទាមទារអ្វី ពីលោកប៉ាដែរ កាតខ្មៅមានលុយច្រើន វាល់លានដុល្លា នាងដឹងច្បាស់ នាងដើរទៅជិតលោកប៉ាវិញ ដោយក្រាបក្បាលផ្អឹបសំពះ ដើមទ្រូងលោកប៉ា លោកប៉ាតែម្នាក់ គិតគូរកូន ជាងគិតពីខ្លួនឯងទៅទៀត ម្ចាស់តូចក្រសោបស្មាកូន ឱនមុខថើបក្បាលកូនមួយខ្សឺត រួចប្រាប់ឱ្យនាងត្រឡប់ចូលរៀនវិញ ខ្លាចយឺតម៉ោងកូនស្រី។
" ឆាប់ចូលរៀនទៅណា ប៉ាទៅហើយ កុំយំឮទេ "
" អ្ហឹក!! ចាសប៉ាប៉ា បើកឡានស្រួលបួលណា យ៉ាយ៉ាស្រលាញ់ប៉ាតូច "
ជំនួយការស្រីបាននាំនាងតូច ហ្វីយ៉ាមកដល់បន្ទប់រៀនរបស់នាង ស្រីតូចឈានជើងចូល ឈរនៅខាងមុខកញ្ចក់ស្លាយ ខណៈ
ដែលនិសិត្សផ្សេងកំពុង ពិភាក្សាកិច្ចការសាលា នាងតូចឈរស្ងៀមរងចាំគ្រូបន្ទុកថ្នាក់ ណែនាំខ្លួននាង ទៅកាន់មិត្តរួមថ្នាក់ ៖
" ប្អូនៗ អ្នកគ្រូណែនាំមិត្តរួមថ្នាក់ថ្មី ទើបតែចូលរៀនថ្ងៃដំបូងណា នាងជានិសិត្ស មកពីប្រទេសកូរ៉េ ខាងត្បូង ជួយមើលថែនាងផង "
អ្នកគ្រូបន្ទុកថ្នាក់ បន្លឺហៅនិសិត្សទាំងអស់ ឱ្យងាកមើលមកខាងមុខតុអ្នកគ្រូបន្ទុកថ្នាក់ មាននាងតូចហ្វីយ៉ាឈរស្ងៀម ញញឹមដាក់ពួកគេ។
" នាងខ្ញុំឈ្មោះ មីន ម៉ារីតាហ្វីយ៉ា រីករាយដែលបានស្គាល់អ្នកទាំងអស់គ្នា សុំជួយណែនាំផង " មុខមាត់គួរឱ្យស្រលាញ់ ជាក្មេងស្រីម្នាក់មកពីប្រទេសកូរ៉េខាងត្បូង រៀនសាលាជាមួយ និសិត្សខាងប៉ែកអឺរ៉ុប សំខាន់ជំនាញនេះ មិនសូវមានក្មេងស្រីរៀនទេ សម្បូរដោយ និសិត្សប្រុសៗ និងភេទទីបី ច្រើនជាង ពួកគេនៅស្ងៀមដូចគ្នា សម្លឹងមើលនាងតូច មិនដាក់ភ្នែកព្រោះសម្រស់ និងស្នាមញញឹមនាង គួរឱ្យស្រលាញ់ណាស់។
" អ្នកគ្រូអនុញ្ញាត ឱ្យហ្វីយ៉ាចូលរួមក្រុម ពិភាក្សាជាមួយខ្ញុំផង "
សំឡេងស្រួស្រែសបន្លឺឡើង ធ្វើឱ្យនិសិត្សដទៃ ដែលកំពុងផ្ចង់ស្មារតីឈ្លក់វង្វេង និងសម្រស់នាងតូច នៅស្ងៀមងាក ទៅតាមប្រភពសំឡេង ម្នាក់បន្លឺហៅមុននេះ គ្រាន់តែឃើញនាងតូចហ្វីយ៉ាភ្លាមក៏ចង់បបួលនាង ឱ្យចូលរួមក្រុមជាមួយខ្លួនភ្លែត ខ្លាចអ្នកផ្សេងដណ្តើមស្រីស្អាតបាត់ទៅ ។
" អូខេ ជួយមើលថែនាងផង ប្អូនៗយើងបន្តមេរៀនទៀតណា "
ក្រោយខេត៍ធីសុំការ អនុញ្ញាតពីអ្នកគ្រូរួច អ្នកគ្រូក៏យល់ព្រម ចង្អុលដៃជាសញ្ញា ប្រាប់ទៅកាន់ស្រីតូចហ្វីយ៉ាចូលអង្គុយរួមតុជាមួយ
ខេត៍ធី និងអៃលីង។
" សួស្តី ខ្ញុំឈ្មោះអៃលីង " នាងតូចអៃលីង ជាក្មេងរស់រាយ សម្រស់មិនចាញ់ហ្វីយ៉ាប៉ុន្មានទេ នាងគួរឱ្យស្រលាញ់ណាស់
ពួកគេ រីករាយទទួលរាក់ទាក់ និសិត្សចូលថ្មីដូចជាហ្វីយ៉ា។
" ចំណែកខ្ញុំឈ្មោះខេត៍ធី រីករាយដែលបានស្គាល់ឯង សង្ឃឹមថាឯងមិនរើសអើងខ្ទើយ ដូចជាខ្ញុំ " ខេត៍ធី បោះដៃទៅចាប់ប្រអប់ដៃតូចហ្វីយ៉ាជាការរាក់ទាក់ គ្នាដំបូង នាងក៏បានប្រាប់និងណែនាំខ្លួនឯងជាមុនដែរ ថានាងជាភេទទី៣ អាចរាប់អានបានទេ។
" ចាស រីករាយដែលបានស្គាល់អ្នកទាំងពីរ ជួយណែនាំខ្ញុំផង "
មករៀននៅបរទេស នាងមិនរំពឹងថាបានស្គាល់មិត្តភ័ក្កល្អៗ នៅថ្ងៃចូលរៀនដំបូងបែបនេះទេ ហ្វីយ៉ាញញឹម លូកដៃចាប់ដៃខេត៍ធីវិញ នាងងក់ក្បាលជាសញ្ញា ថាយល់ព្រម នាងមិនដែលប្រកាន់ពូជសាសន៍ទេ ពួកនាងទាំងពីរ ទាំងអៃលីង ខេត៍ធី គួរឱ្យស្រលាញ់
គួរឱ្យរាប់អានណាស់។
" ឮអ្នកគ្រូនិយាយថានិសិត្សថ្មី និងចូលមករៀនសប្តាហ៍នេះពួកយើងខំរងចាំមើល មិននឹកស្មានថាជាស្រីស្អាតទៅវិញទេ ហិហិ "
អៃលីង ឆ្លៀតពេលម៉ោងពិភាក្សាក្រុម នាងរប៉ិលរប៉ូច កាន់ប៊ិចបង្វិលនៅមិនស្ងៀម ឱនក្បាលបីនាក់ ផ្គួបគ្នា ផ្ទប់មាត់សើចតិចៗ អស់សំណើចការរងចាំ ខកប្រាណអស់នឹកស្មានថា ជានិសិត្ស
ប្រុស ចូលមករៀនបន្ទប់នេះ ជាមួយពួកនាង ផ្ទុយទៅវិញ ជាក្មេងស្រីម្នាក់ដែលស្រស់ស្អាត យ៉ាងនេះទៅវិញទេ មើលយូរទៅ
ឯងកាន់តែស្អាត។
" សាច់ឈាមឯងទំនងដូចជាកូនអ្នកអភិជន ដៃឡើងទន់ល្មើយ "
ខេត៍ធី ច្របាច់ស្ទាបប្រអប់ដៃតូច របស់មិត្តថ្មី មិនលែង ដៃអើយដៃសែនទន់អ្វីម្លេះ ស្ទាបច្របាច់តែ ប្រអប់ដៃក៏អាចទាយដឹង ពីឋានៈរបស់ហ្វីយ៉ាបានដែរ ខេត៍ធី សម្លឹងនាងតូចដោយក្រសែភ្នែក
ក្នក់ក្នាញ់ ចំពោះនាងតូចហ្វីយ៉ា ខ្លាំងណាស់ មុខមាត់មានមាយាទ គួរឱ្យស្រលាញ់ គួរឱ្យក្នាញ់។
" ខេត៍ឯងដៃដល់ម្លេះ "
" មិនអីទេ "
វេលាម៉ោង១១:០០ថ្ងៃត្រង់ និសិត្សសកលវិទ្យាល័យ ត្រូវដល់ម៉ោងចេញពីសាលា នាងតូចទាំងបីដើរចេញពីបន្ទប់រៀនមក ខេត៍ធីបានទៅយកឡាននាងដែលចតនៅចំណតឡាន ដោយបបួលមិត្តថ្មីទៅជាមួយដែរ តែនាងតូចហ្វីយ៉ាបានបដិសេធ ក៏បន្តដើរទៅរងចាំនៅខាងមុខចំណងឡានក្រុងជាមួុយនិងអៃលីង មួយសន្ទុះក្រោយមក រថយន្តទំនើបមួយគ្រឿង ក៏បានបើកមកឈប់សំចត ខាងមុខអ្នកទាំងពីរ រាងសង្ហាឈានជើងចុះពីឡាន ដោយដោះវ៉ែនតា
ខ្មៅចេញ ៖
" ឡើងឡានមក " ថេយ៉ុងដោះវ៉ែនតាខ្មៅចេញ សៀតទៅនិងធៀវអាវរបស់គេ រួចបើកទ្វារងចាំចៅស្រី អៃលីងមានឋានៈជាចៅស្រីរបស់ថេយ៉ុងដោយសារ ថេយ៉ុងបានយក លោកយាយរបស់
អៃលីងធ្វើជាភរិយា ទើបនាងតូចក្លាយជាចៅស្រីរបស់គេ ហើយពួកគេទាំងពីរ នៅផ្ទះតែមួយ មិនសូវត្រូវធាតុជាមួយគ្នា ប៉ុន្មានទេ ការដែលមកយកនាងជារៀងរាល់ថ្ងៃ នៅសាលាព្រោះខ្លាចនាងគេចវេស លួចដើរលេងផ្តេសផ្តាស ជាមួយខេត៍ធី។
" ខ្ញុំអាចសុំឱ្យមិត្តទៅជាមួយបានដែរទេ? " អៃលីងដោះកាតាបស្ពាយចេញពីខ្លួនប្រគល់ឱ្យលោកតាចុង របស់នាង ថែមទាំងអេះអុញ ដាច់ចិត្តបន្លឺសុំលោកតាចុងរបស់នាង សុំឱ្យហ្វីយ៉ាទៅជាមួយដែរ បានគ្នា អ្នកកំលោះមិនបដិសេធ ក៏ដើរទៅបើកទ្វារឡានផ្នែកខាងក្រោយ ឱ្យស្រីតូចហ្វីយ៉ាចូល។
" ប្រាកដជាបាន ឡើងឡានមកនាងតូច "
" លោកពូ នេះគឺជាពូថេយ៍ពិតទេ? "
" ហេតុអ្វីក៏នាងតូច ស្គាល់យើង? " ថេយ៉ុងរៀបនិងចូលឡានហើយ នាងតូចក៏កាត់សង្វាក់ ធ្វើឱ្យថេយ៉ុងងាកមកវិញ ឈរស្ងៀម រួចសួរនាងតូចហេតុម្តេចនាងស្គាល់ឈ្មោះគេ មុននេះគេមិនបានប្រាប់នាងទេថាគេឈ្មោះអ្វី។
" ជម្រាបសួរលោកពូ ខ្ញុំគឺហ្វីយ៉ា កូនស្រីប៉ាតូច " ស្រីតូចញញឹមស្រស់ណែនាំខ្លួនទៅកាន់លោកពូ ព្រោះមើលទៅលោកពូដូចជាមិនស្គាល់នាងទេ ដោយសារនាងធំជាងមុនឆ្ងាយ។
" ហ្វីយ៉ា? អូហ៌!! ធំពេញក្រមុំបាត់ មោះ!! ឡើងឡានសិនមក
ពូជូនឯងទៅក្រុមហ៊ុនលោកប៉ាឯង អៃលីងចូលឡាន "
រំលឹកឈ្មោះនាងនិងប៉ានាងភ្លាម ថេយ៉ុងក៏ភ្ញាក់ខ្លួនបន្តិច មិននឹកស្មានថាក្មេងតូចអាយុ៥ឆ្នាំថ្ងៃមុនប្រែក្លាយខ្លួន ជាស្រីក្រមុំ ពេញវ័ពេញរូបពេញរាង្គបែបនេះទេ ចប់ប្រយោគថេយ៉ុងក៏បបួលនាងចូលឡាន ដើម្បីជូននាងទៅក្រុមហ៊ុនលោកប៉ានាង ជៀសវាងប្អូនប្រុសបាត់កូន រកកូនមិនឃើញ។
" ចាស លោកតា "
______
និពន្ធដោយ: មីនស៍ហ្វា
( ហ្វីយ៉ាបានដៃកង់ ដើរលេងហើយ🤭)
To be continue