🍃⚘🍃رواية عيون النار🍃⚘🍃
داعش
⚘الحلقة -٤٨-⚘
⚘"الكاتبة: فاطمة علي"⚘
..🍃رأيكم+لايك🍃..
أنه المتعـــوب بس مابيــنت تعبي
أنه البــيه الـــحزن يدبي
.................................
آصف : طبينا اني وحيدر نركض للمستشفى ، وصلوني الباب غرفة العمليات ، باوعت واشوف الولد كاعدين وحالتهم حاله وعلي الرضا يبجي ....
.... بصوت قهرة ، خوية علي الرضا ...
علي الرضا : باوعت واني ابجي ، تسندت على الحايط ، اجه عليه آصف وحضني ، كمت ابجي واشهك بحضنه ، لان جنت احس بعباس من يسوله العملية ...
آصف : لزمته من وجهه بثنين اديه ، علاوي لتبجي قوي نفسك ، وكول عباس راح يطلع من العمليات سالم غانم ، اصبر وادعليه ....
علي الرضا : حجي آصف ، وحگ هو علي ، احس بي ، احس المشرط اذا دخل خاصرته لو شگو بطنه احس
بي من يختنگ ، والله من انضرب بخاصرته جن نار وطبت بخاصرتي ، ومن اختنگ وكطع النفس اني هم وكعت ....
طه : عباس بطل وصاحب بنية قوية هسه يطلع منها سلامات ...
آصف : كلتو الماجد ...
معتز : لا ، كلنا البارحة اجته ابنية وفرحان بيها ، خطية صارله هواي مفرحان ...
طه : بس علي يدري وخطية تخبل ، وراد يرجع بس اني كتله ابقى ويا ماجد ....
آصف : ربي لا تشوفنه بعباس شي موزين ، درت وجهي عليهم ولكم هذا عباس ، اااخ ، من سمعت الخبر واني مدري شصار بيه ....
طه : كلنا عدنا عباس معزه خاصه ...
علي الرضا : كعدت بالكاع وادك على راسي وابجي ، كله مني كله مني اني العفته وحده جان لازم ابقى ويا .
....
طه : لزمته من ايده ، انت قائد سرية ، وجان لازم ترجع بالجرحى ، هذولة كلهم ذمه بركبتك اذا استشهدو ...
علي الرضا : باوعت على طه ، وشفايفي ترجف وبالكوه حجيت ، جا عباس مو ذمه هو وجهاله ....؟!
آصف : مو وكت هذا الحجي ادعولة يطلع سلامات ، اتصلو علينا بالمقر ، نعم سيادة اللواء ...
القائد : الفجر عدكم هجوم لازم تتواجدون في منطقة الحراريات في بيجي ...
آصف : ان شاء الله سيادة اللواء ، باوعت عليهم ، مراح تخلص بيجي الا تخلصنا ....
طه : لا حجي آصف ، هل مرة نطب الها بكل قوتنا ، لازم نحررها بأي ثمن ...
آصف : لازم نكعد ويا القادة ، نسحب قوتنا من بيجي ، ونسيطر على الفلوجه والرمادي وبعدها ندخل بكل قوتنا البيجي ....
طه : هذا احسن حل ، بعدين جاينه محرم مضل شي ، لازم نسيطر على الرمادي والفلوجه ، حتى نبعد خطرهن على زوار الامام الحسين عليه السلام ....
آصف : هاي الخطوة الاولى للنصر ، شيخ طه ، لازم الفجر ننطلق ، اني اعذروني مااكدر ابقى وياكم ، سمعتو الاتصال ....
علي الرضا : وكفتك هاي هسه وجيتك بهدوم الهجوم مترب ، وخوفك على عباس كافية وعلى راسي والله ....
آصف : اني باقي وياكم منا لمن يطلع عباس من غرفة العمليات ، لان شغلتي سهله طيارة عسكرية دقايق اني بيجي ....
طه : اتصلو بيه من المقر ، ولازم اللتحق ، الهجوم الفجر ، شنو السالفه ماكو غيرنا ....
معتز : روحو واني ابقى يم علي الرضا ، مااعوفه ....
علي الرضا : روحو اللتحقوا الواجب اهم من عدنا ، ماكو شي اغلى من الواجب ، وهاي الحرب تاخذ ومترجع ....
آصف : شيخ طه يجي وياي ، خلينا هسه يمك ، حيدر جهز الطيارة على الساعه اربعه ونص الفجر ...
حيدر : حاظر اعتبرة تم ....
علي الرضا : ساعات ننتظر صار ثمن ساعات عباس بالعمليات ، انتهيت ، مخليت صلا مصليتها ولا دعاء دعيته وكل الأئمه نخيتهم ....
.... انفتح الباب وطلعوا الدكاترة ، ركضنا عليهم ،
وجسمي كله يرجف ....
معتز : وكفت على صفحه وخليت ايدي على اذاني ماريد اسمع خسرنا واحد ....
آصف : كلنا منتظرين الدكتور يحجي ، حسيت اني قلبي انكطع ...
طه : اصعب شعور من تنتظر ان يجيك خبر يفرحك لو يبجيك ...
علي الرضا : برجفه ، دكتور اني اخو اني اخوووو ...
الدكتور : بأبتسامه ، الحمدلله على سلامته بطل مريضا عباس ...
علي الرضا : يعني شنو اخوية عايش ؟؟
الدكتور : اي عايش ....
كل الولد فرحو واحد كام يحضن بالثاني ويبجون ،
ويرددون ، الف الحمدلله والشكر الف الحمدلله والشكر ، دخيلك ياعلي ....
علي الرضا : دكتور فهمني وضعه ؟ وضعه شلونه ؟ يعني زين ؟ ...
الدكتور : الحمدلله زين ، جنه خايفين ان الطلقه واصله للمثانه بس الحمدلله مواصله مجرد خدش جدا بسيط بجدار المثانه ، وعالجنا ، لازم يبقى تحت البنج مدة لا تقل عن ٤٨ ساعه حتى لتتأزم حالته ويصير عنده مضاعفات ...
علي الرضا : عادي عادي خلو سنه المهم هو بخير ...
الدكتور : اي بخير بخير ، وضع عباس جان منتهي بس بركة الله سبحانه ، وبفضل ال البيت عليهم السلام ، نجى والله اسوي بالعملية اردد دخيلك يا ابا الفضل ، خلي هل بطل يكوم ...
علي الرضا : حضنت الدكتور ، والله انت البطل دكتور ، الف الحمدلله والشكر ، مشكور يبو فااااضل ....
معتز : يله لازم نرجع الواجبنا الجهادي ، لازم نروح ناخذ بثار شهدائنا وجرحنا ....
آصف : علي الرضا امشي ويانه ، كعدتك هنا مالها داعي اصلا ، وعگب باجر يله يصحى عباس ، وانت شوكت متريد تنزل اني انزلك ...
علي الرضا : اصلا اني اموت اذا بقيت هنا ، وهذا الخبل جوا بالغرفة ، شيخلص هل يومين ، ربي مشيهن على خير ....
طه : انطلقنا كلنا ، منطقة واسعه ، نزلت طيارتين ونقلتنا لمنطقة بيجي ، اجتمعوا بينا القادة على رأسهم الحاج ابو مهدي المهندس والحاج قاسم سليماني....
آصف : منطقة بيجي من المناطق العصية علينا ،
بس اكو مناطق اسهل نكدر بسرعه نسيطر عليهن مثل منطقة الفلوجه و الرمادي ونكمل تحرير جرف الصخر والكرمه لازم هاي المناطق كلها تطهر ....
الحاج المهندس : اذا حولنا انظارنا لهاي المناطق راح يسهل علينا هجوم بيجي ، لان راح ندخل للمنطق من ثلاثة محاور يبقى عدهم بس المحور الي صاير على جهة الموصل وهذا صعب ....
الحاج سليماني : يجب علينا ان نتروى قليلاً بالهجوم نحن لا نريد ان نعطي شهداء ، نريد ان نخرج من الحرب بأقل خسائر ممكنه ، لهذا سنحول انظارنا مثل ماقال الحبيب آصف والشيخ طه ، الى مدينة الرمادي ...
الحاج المهندس : كانت فكرتنا من البداية ان نسحب قواتنا ونثبت قوات في المناطق المحرر من الجيش والاتحادية ....
الحاج قاسم : حتى نكتسب وقت اكثر ، ويكون التحرير في غضون هذه السنتين ، ولا تتعدا الاخرى ....
القائد : زيارة الاربعين قريبة ، ولازم خلال هذه الايام نأمن الطريق من المحافظات الى كربلاء المقدسة....
الحاج المهندس: مثل مانجحنا ب٢٠١٤ ، بخطة نقل الزوار وتأمينهم ، هاي السنه بأذن الله راح ننجح ، لازم نخلي القوات على كل الطريق ، وعلى رأسهم الوية الحشــــد الشعبي ....
القائد ٢ : يجب ان نبرهن لداعش واعوانهم اننا اقوى منهم ، بالعده والعدد ....
الحاج المهندس : نبدي بالخطه بأذن الله ...
طه : خلو الخريطه كدامنه ، وبدو يخططون ،
لتأمين اوقات زيارات محرم الحرام ، و نبدي بتحرير الفلوجه والرمادي ....
.... بدينا بتجهيزات الهجوم ، وسحبنا نص القوة من بيجي ، وخلينا انظارنا على الرمادي والفلوجه ، بس الي صار طلع البغدادي وخطب بتسجيل صوتي وهو يگول ....
البغدادي : انفروا خفافًا وثقالاً ، مانراه اليوم من كسر في الجيش الهالكي ، و قتال مايسمى بالحشد المنجس ، اليوم هو انتصار عظيم بالنسبة لنا ،
فلقد حققنا النصر في مناطق بيجي ،حيث قامو بسحب قواتهم من اراضيها ...
... بعد ان سمحو للفارسي المجوسي سليماني بالتدخل في الشؤؤن العراقية وادارة الحرب ضد تنظيم الدولة الإسلامية ، وبذالك نزف لكم بشرا فوزنا على اليهود من الرافض و الصليبيين والفرس المجوس ....
.... عليكم بذبح اليهود الروافض ، وتطهير الارض من انجاس كربلاء والنجف الاشنع ، الروافض اليهود هم اشد بغضاً بنا من اسرائيل وامريكا ، الروافض اليهود لادين لهم ، ولا كتاب لهم ، عليكم بذبحهم اينما تجدون رافضي يهودي او رافضي مجوسي فارسي ، فـ فيه اجراً لنا واضعافاً لكم ....
.... الصليبيين من التحالف الدولي ، ابريطانيا وامريكا الان مستمرين في عدوانهم علينا ، وهم تحت عبائتنا متسترين بغطاء نحن معكم لا عليكم ، وهم منتظرين اللحظه الحاسمه فيسيطرتنا الكامله على العراق ، لكي يقولو لنا هنيئاً لكم فوزكم هذا ....
.... اعلمو ايها الناس ، ان من يقف ضدنا سيعيش في ظلام وبأس هذه الحياة ، اتركو الفرس المجوس والروافض من اليهود ، لا باليهود اطهر منهم ،
عليكم الان بتثبيت العزم ، والقوة ، والرجوع الى مصفى بيجي بقوى ، وعليكم ان تردو الاراضي التي احتلها الراوفض والمجوس الاعاجم ....
طه : واحد باوع بوجه الثاني ، هذا جاي يزامط ...
معتز : القادة اكيد سمعو هذا التسجيل ...
محمد : دخلت للمقر ، سيادة اللواء سمعتو تسجيل البغدادي ...
اللواء : اي سمعنا ...
محمد : هذا كاعد يتحدانا بكل عين صلفه وفرحان لان وقفنا الحرب بيجي ....
الحاج المهندس : هو مايدري ان اذا دخلنا لبيجي بكل قوة ناخذها منهم ، بس اني ماريد انطي شهداء ...
قائد بدر : حاج ، لازم ندخل بيجي ، اذا مادخلنا راح ينكسر عزم الجيش ، ولازم ناخذها بأسرع وقت ممكن ....
الحاج قاسم : اعطي الامر بأن يأتو القادة للاجتماع فوراً ، لن نترك هذه الارض ، حتى نحررها ....
محمد : اجتمعو القادة ، ومنهم ، العقيد اركان التكريتي ، الفريق الركن عبد الوهاب الساعدي ، اللواء الركن ضيف خليفة ، العقيد صالح جبر ، الشيخ قيس الخزعلي ، الحاج هادي العامري ، والحاج ابو مهدي المهندس والجنرال قاسم سليماني ، وباقي القادة والضباط ....
الحاج المهندس : قادة داعش الموجودين بمنطقة بيجي همه ، ابو سليمان الناصر ، ابو نبيل امير داعش
وهذا متواجد بصلاح الدين ،
ابو ابراهيم الشيشاني قائد قوات مصفى بيجي
وخلف عيدان والي بيجي ....
.... هاي المجموعه هي تستوطن هاي المناطق ،
كلنا سمعنا تسجيل البغدادي وشلون يهدد بكل حيل صدر ، وفرحان ان احنه اوقفنا الحرب بيجي وبدينا بالفلوجه والرمادي ....
... المطلوب الان ، ندخل بكل قوة لمصفى بيجي ، وعليه ، اولا تجهيز القوات بكامل التجهيزات العسكرية من سلاح واسناد جوي واسناد ارضي ....
الحاج سليماني : الطيران الايراني سيكون مزلزلا على الاراضي التي فيها فلول داعش ...
قيس الخزعلي : عصائب اهل الحق ، ستكون بأتم الجهوزية ، من مقاتلين وهندسه عسكرية ، وتحت امرتكم ....
الفريق : راح نجهز ١٥,٠٠٠ الف جندي من الجيش والذهبية ....
الحاج المهندس : ١٠,٠٠٠ الالف ، جندي من الحشـــد ، والهندسه العسكرية ....
طه : جان الاجتماع جدا طويل ، بحيث ادق التفاصيل حجو بيها ، حتى عدد الجرحى والشهداء الي ممكن ننطيها بهذا الهجوم ....
العامري : راح انكون بالساتر الامامي مع الجنود ...
الحاج المهندس : سنكون كلنا في هذا المعركه في الساتر الامامي ....
الفريق الساعدي : قواتنا راح تكون يد وحده مع الحشــــد والجيش ....
آصف : كلنا كاعدين ، والمنظهر مهيب ، القادة العسكريين و قادة الحشــــد حسيت بفد احساس مو طبيعي ، بدء التحظير والتجهيز ، وندرات كل الانظار على مصفى بيجي ....
.... كل القادة اللتحقو ويانه للحرب ، وكل قائد يترأس الفصيل مالته ، احنه ويانه عصائب اهل الحق وعلى رأسهم قادتهم ....
............
علي : واكف احجي ويا طه ، ويا ماسديته منه ، دنكت وافكر بـ عباس ، ربي لاتحرگ قلوبنا عليّ ، ماحس الا واحد لزمني من جتفي ، كمزت ، وباوعت ها ، ماجد ، هاخوية ..؟
ماجد : علي؟! شبيك يول ،ادحك شكلك بي شي ، صاير شي ضامو عليه ...؟
علي : لا قابل شصاير ، شلونها البنوته ...؟
ماجد : لاتغير الموضوع ، احد من ولدنا صايرلو شي ، منو هذا التدعيلو ...؟
علي : ماصاير شي شبيك ، شكد تسأل ، روح جيبلي فطومه خل اشوفها ...
ماجد : توها نامت ، ليش ادك على الولد محد يجاوبني ...؟
علي : اكيد بالدوام ، وتلفوناتهم تاركيهن ....
ماجد : ويامن جنت تحجي ؟
علي : ويا عادل اسأل عن رضا ...
ماجد : يول بلعمت ياعلي ، كلي شصاير من الاخير ، لاتلف وتدور ....
علي : باوعت عليّ ، واخذت نفس ، دنكت راسي واني احجي ويا ، عباس تصوب وحالته خطرة ...
ماجد : شنوووو، وليش ماحجيت ؟
علي : الولد كالولي لتكوله لان فرحان بنته ، عاط بيه ...
ماجد : يوووول هذا عبااااس انت شتحجيييي ، بسرررعه خلينا نرد البغداد ...
علي : وبنتك وزوجتك ؟
ماجد : يابنتي ياحرمتي كل عقلك ، لك امشيييي ، جهز جنطتك ، بسرررعه رادين لبغداد ....
علي : ماشي ...
ماجد : رديت للبيت ، دحكت عمي كاعد يشوف الاخبار ....
معاذ : شفت ، يكولون القوات الامنية والحشــد انسحبو بيجي ...
ماجد : لاعمي كله جذب ، شينسحبون كافي الشهداء الي انطيناهم ، واذا صح هل كلام يخلون نقاط امنية بالمناطق الحررناهه ...
.... عمي انه لازم ارد للعراق ، لان تعرف الوضع شلونو هناك ، وانهمااكدر اترك السرية اكثر من تلث ايام ....
معاذ : اي عمي روح ، وبس ماردين تستعيد قوتها ، اني ارجعها للعراق مثل مااخذتها ...
ماجد : تسلم عمي ، تصلت على المطار حتى اشوف حجز اليوم ماكو حجز بس من تركيا لأربيل ، وعگب باجر من تركيا البغداد ، گبل حجزت ....
... صعدت فوگ ، سحبت جنطتي ، وخليت غراضي بيها ، دحكت ماردين وفاطمة نايمين ، يويل قلبي منكم شلون راح افارگج بويه ، دنكت على فطومه ، بستها بخدودها الصغار الناعمات ، رحت الماردين وبستها من راسها ....
.... ربي احفظهم اليه ، ولاتشوفني بيهم مكروه بحق حبيبك محمد ، نزلت وبيدي جنطتي ، عمي ماوصيك بعد على ماردين ، انه ماكدرت اودعها لان نايمه ، وماردت اكعدها لان البارحه للفجر هي كاعده ويا فطومه ....
معاذ : اتوصيني على بناتي ، روح يابا الله ومحمد وعلي وياك ، ومحروسين ومنصورين ....
ماجد : تسلم عمي ، يله انه اترخص بعد طيارتي بعد ساعه ونص ....
معاذ : الله وياك ...
ماجد : طلعت وعمي معاذ وصلني بسيارته للمطار ، اجه علي ، وكعدنا ننتظر موعد الطيارة ، جنت كاعد على نار ....
طه : نزلنا للهجوم ، وجان هجوم طاحن ، من جهه الاتحادية والجهه الثانية الذهبية ، والحشــد بالنص ، والجيش ورانه ،والطيارات فوگ روسنه تقصف بالدواعش ....
.... الحرگ بكل مكان والدخان يتصاعد ، وصوت الرصاص ، الهاونات الي تنطلق ، والصواريخ الي تزلزل الكاع ، الراجمات الي متوگف ...
... نص حرب ، بالبر ، على منطقة تكريت الواصله المنطقة بيجي ، والنص الثاني جهة منطقة الصينية ، والباقين الحراريات والسكك والمصفى....
.... الجرحى تسقط كدام عيونه ، نشيلهم ورجعهم للخلفيات ، والمعركه مستمرة ، بشهر التاسع ٤-٩-٢٠١٥
الدواعش رجعوا اخذو بيجي ، بس بهذا هجومنه ، الي بده نهاية شهر التاسع ، بدينا نتقدم بشكل مو طبيعي ....
ماجد : وصلنا لبغداد ، بوجهي للمعسكر ، لبسنا زينا العسكري وتوجهنا الكربلاء حتى ندحك حالة عباس ...
علي الرضا : دخلت لغرفة عباس ، لكيته نايم ،
وكفت فوگ راسه ، وجهه كله محرگ ،وراسه ملفوف ، وايده ورجله ، بحيث عبالك مومياء هلكد ملفلفي ....
.... عيوني دمعت ، لزمت ايده وبستها ، ماحسيت الا واحد يجرني من راسي ...
عباس : ها خوية ، عبالك متت ...
علي الرضا : زدت بالبجي ، نمت على صدرة وزدت بالبجي ، اخ ياخوية شعدي غيرك ولك ، ليش هيج تسوي بيه ...
عباس : ماسويت شي ، ردت اعرف معزتي بقلبكم ، ههههه ...
علي الرضا : معزتيش ولك ، هو غير متت عليك ورجعت انحييت من جديد ...
عباس : لتخاف ماموت ، كافي بجي ولك انت زلمه والزلمه مايبجي ...
علي الرضا : لك اكله ردت اموت ورك يكلي زلمه ، هي ضلت زلم على هل قهر هذا ....
ماجد : دخلنا لعباس ، ها يااسدنا ، يكولون اتصوب الهتلي مالتنا ....
عباس : هلا بيك خوية ، علاوي عدلي المخده ارفعوني ...
ماجد : صارلو شكد بالمستشفى ....
علي الرضا : خمسة ايام ...
ماجد : وليش ماتحجولي ، شني هي مال ضمضمه ....
علي : يابه ردنا نكولك بس طه مقبل ، وكال عوفو فرحان بنته ...
علي الرضا : اي والله ياخوية ، والحمدلله بطلنا عباس بخير ....
ماجد : اكعدو سولفولي الصار ....
طه : رجعنا للخلفيات ، جنه حيل تعبانين ، والحرب مستمر بعدها ، انتهينا من الحر والعطش ، وميفيد مي ولا اي شي الشمس نازله علينا ....
ماجد : شنو اخبار الحرب ....
علي الرضا : صار تحدي على منطقة بيجي ، والقادة كلهم اجتمعو قبل جم يوم ، وعلى اساس انسخبو بس رجعوا للمنطقة ، وهسه الحرب حيل قوية بيها ...
ماجد : باحر الفجر ان شاء الله احنه بـ بيجي ...
علي : اي والله طاگ قلبي على الطاگ والطيگ ...
علي الرضا : اي بالعباس ...
عباس : واني ...؟
علي الرضا : انت اذبك بحضن امي والتحق ، خليها هي ومرتك تداريك تعبت صارلي جم يوم اركضلك ...
عباس : مليت مني ....
علي الرضا : عبالي تستشهد ، ونستفيد من فاتحتك ...
ماجد : تف من حلگگ ياعار ، عباس معليك بي ، انت بس صير زين ،لان الجاي ادحكو حاليا وضعك ابببد مو مال تتحرك منا ليجاي ...
علي الرضا : الدكتور كاله اقل شي تلث اشهر راحه ، والله لو الطلق متحركه زايد شوية للمثانه جان كل يوم عملية ...
ماجد : ربك سترها ، يله اخوتي نزور حتى نروح الواجبنا الجهادي ...
علي : صارلي هواي مزايد كربلاء ، دخلت بين الحرمين ، باوعت المرقد الامام الحسين عليه السلام ، ونداريت لمرقد الامام العباس عليه السلام ، وكعدت بالنص ...
ماجد : شو هينا راح تكعد ...
علي : اني ماادخل ، الا ينطوني مرادي ، وهاي كعدتي ولاول مرة اسويها ، اطلب مراد ، ومرادي ترجع زوجتي ....
ماجد : ترد ترد وحگ هو جدي الحسين ، وتفرح بيها وبأبنك ...
علي : ماجد اني كل يوم جاي اموت ، التفكير اكلني ، كل يوم اشوف شلون الدواعش يعتدون على النسوان ويبيعون ويشترون بيهن ، وخايف خاف كاتليها لان هي شيعية ....
ماجد : الله سبحانو هو اليحفظها وهو اليردها الك ،
بركه ال بيتو الاطهار ....
علي : مضل شي على محرم ، راح ندخل بالسنه الثالثه واني مشايفها ولا اعرف اخبارها عايشه لو ميته مرتاحه لو متأذية ....
ماجد : ان شاء الله مرتاحه ، واكعه بيد ناس ولد حلال ، ترى هناك اغلبهم ماراضين على الدواعش ، بس مايردون يتركون ارضهم وبيوتهم ....
علي : ان شاء الله...
ماجد : هسه راح اتضل زعلان على الامام ومراح تدخل...
علي : اي ماادخل ، و هنا بنص الحرمين راح اصلي ....
ماجد : عجل انه هم ضال وياك ، واطلب مرادي يردلي وليدي كن فيكون شلون وين المهم يردلي ، واذا ميت يجيني خبرو حتى اكطع الامل بي ....
طه : الفجر صلينا ورجعنا للهجوم ، جان الهجوم على مدار ٢٤ ساعه بدون اي توقف ، مانشوف الا رايات سرية ماجد دخلت الحرب ، ناديت بالسلكي ...
.... اسد بيت شهم دخل للمعركه ، اسد بيت شهم دخل للمعركه ...
ماجد : ول اجيتكم ركض من تركيا ، عجل شلون اهدكم وحدكم تهدون ...
طه : يله ، ياعلي مدد ...
ماجد : علي ويانه ، وبدينا بالهجوم ، سبوعين احنه نقاتل بهذا المحور ، وصدك دخلنالهم نركض الحاج ابو مهدي المهندس والحاج قاسم والقادة ركضو كدامنه للساتر الامامي ، واحنه وراهن چيتنا ....
.... جانت حرب اثبات ثوة ، واثبات عزيمه ، واحنه صح صارلنها سنتين من المنطقة سيطرو عليها داعش ، بس دخلنالهم ركض ونهوس ....
.... هييي احنا الخااوينه هاااا احنا الخاوينه و بس المالح نمشي وياااا ، هييي هيييي ....
.... فزعو لي الساتر ناده ، فزعو لي الساتر ناده ....
.... بدت انطلاق عمليات لبيك ياحسين ،
رفعنا رايات الامام الحسين عليه السلام فوك السيارات ، وعلى ظهورنا رايات صغار ، لان قرب شهر محرم مبقى بس يومين ....
.... احموووو القادة ، لتخليهم يقتربون من الساتر ...
طه : هم يلزمون ، بس نبدي نتقدم يركضون على الساتر بدون خوف ....
ماجد : نركض داير مداير القادة لان منريد يصير كسرة عدنا ، كلهم محتاجيهم ، وكلهم يديرون عاي الحرب ....
.... الاصوات تتعالى من مدن بيجي ، لبيك ياحسين ، لبيك يامهدي ، لبيك يازهراء ، وندخل بكل قوتنا نقاتل ....
.... بيوم ١٥-١٠-٢٠١٥ ، سطرو الحشــد والجيـش والذهبية ، اجمل الملاحم ، العاجل يتطرق القنوات العراقية ، والعالم اجمع ، بخبر ....
ابو مهدي المهندس : اللهم صل على محمد وال محمد، بعمليات لبيك ياحسين ، الى جميع العراقيين ، نزف لكم خبر تحرير منطقة بيجي بشكل كامل والسيطرة على مناطقها جميعاً ...
.... الان بدء عمليات الهندسه لتنظيف المدينة من جميع العبواة والمفخخات ، الحمدلله وبارك الله بجهود كل الذين شاركو بهذا الهجوم المبارك ...
عاجل /// تم تحرير منطقة بيجي بالكامل ، شكرا لكل من شارك في هذه الهجوم ، من الجيش العراقي ومكافحة الارهاب من ابطال الذهبية ، وجميع فصائل الحشد المقدس ....
عاجل /// قائد الحشــد الشعبي يزف خبر تحرير منطقة بيجي بالكامل ، بعد حصار اهلها مدة سنتين ...
عاجل // الاهالي يستقبلون الحشد الشعبي والجيش العراقي بالاعلام البيضاء ، والاهازيج ....
ماجد : طبينا بكل قوتنا للمناطق ، يهوسون ،
... الخاين كله يسافر مالك كعده بهاي الدار ، الخاين كله يسافر مالك كعده بهاي الدار ....
...العصائب يهوسون : هد بينا ياقيس ارجالك ، هد بينا ياقيس رجالك ، وهاااا ،احنه اهل الحگ هااااا ، احنه اهل الحگ ، واحنه رجاله ، احنه اهل الحگ هيييي هييي ...
لواء علي الاكبر : هااا ، شيلة مرته تلوگ عليه ، المايفزع ويجاهد ، هيييي هيييي ....
الشرطه الاتحادية : هيي، اليوم العايل بيكم ، هيي اليوم العايل بيكم ، وكصبنا جناحي اليوم العيل بيكم كصينا جناحييي ، هييي هييي ....
محمد : جان نصرنا قوي ، وكلها تهوس ، احس منطقة بيجي كلها تهتز جوه اقدامنه واحنه انهوس ...
هادي : شلون انتصار ، الله حييييييووو الابطاااااال ....
محمد : القادة يفترون على المحاور ، وكلها زفت بشرا الانتصار ، صح انطينا شهداء ، بس هاي الحرب لازم بالدم ننتصر ....
.... الولد يهلهلون ، والرمي بكل مكان ، والهوسات بكل المناطق المحرره ...
ماجد : باجر اول يوم محرم ، خل ننطلق الكربلاء ، نرفع راية الامام الحسين عليه السلام السوداء ....
...طلعو والسيارات صوتها عالي ....
.... نحن لانهزم... ومنا عطاء الدم
سقى نخلة الصبري ...رغم ريح الهم
شراع الاباء يمم ... الى ضفة النصري
منتصرو ... شهداء .... سجناء ... غرباء ... والله لانهزم
في كل عاما لو مضى .... نزداد عزما ورضى
بالشعب والثورة
لانسأل النصر متى فلنصر بالله اتى والامة الحرة
منتصرون ... إنا وصابرون .... كنا وثابتون ...
عل ناس قطرةً قطرة ....
ماجد : نجدد البيعه عند الامام الحسين عليه السلام ، دخلنا ارتال الكربلاء ، وكل الوية الحشــد ، لواء علي الاكبر ولواء اخوة زينب العصائب ، ولواء بدر ، ولواء المختار ، ولواء النجباء ولواء كتائب حزب الله وباقي الالوية كلها ....
... دخلو الحشــد ، وهمه يهتفون ،
لا ياعلي قسما قسم
لن يقربو شرف الحرم
في عرقنا نبض الولاء
لن يقربو شرف الحرم ....
....ياعلي نهواك ماننساك
ياولينا
حگنه ننجن بيك وبطاريك
مو بدينا
واحنه معروفين يابو حسين
لو هوينا
مانهاب عداك واحنه وياك
ياعلينا
شحدا اليوصل المثواك
واحنه يلصميده .... والله نكطع ايده
وياك علمنا العشك والموت نحمل عل ظهر تابوت
ونصون العقيدة .....
..............
عاجل العربية // ميليشيات الحشــد تدخل الى اراضي بيجي ، بعد ان سيطرت عليها الدولة السلامية داعش ....
عاجل الحرة // ميليشيات الحشــد ، تعتقل عدد كبير من اهالي بيجي العزل ....
عاجل // الشرقية ميليشيات الحشــد تتوجه الى كربلاء ، بعد ان تم تحرير بيجي بالكامل ، على قولهم نجدد البيعه مع الامام الحسين عليه السلام....
عاجل // العوائل في بيجي تواجه ظلم جديد من قبل قوات ميليشيات الحشــد الشعبي ....
آصف : اباوع على العواجل حتى مافات يوم واحد على التحرير ضليت صافن ، حيدر جاي تشوف شديكتبون هذولة ، ولك هستوها بدت الهندسه اطهر المناطق ، وين ياظلم هذا الجاي تتعرضله الاهالي ...
حيدر : اني هم صافن على الاخبار ، معقول الجاي يصير ..
آصف : لازم القادة يطلعون ينفون هاي الاخبار ، لان كلها محرضه ، وتسبب فتنه بين الشيعه والسنه ، على ابو دخلو الشيعه للمناطق وكامو يكتلون بالسنه ، بسرعه اتصلي بقيادة عمليات بغداد ...
حيدر : امرك سيدي ....
آصف : اتصلت على رئيس الوزراء العبادي ،
حتى يوقف هاي المهزله الدا تصير ، بس صدمني برده ...
...( ان لازم نتحمل هذا الكلام , وبكل حرب اكو اعلام محرض واعلام حقيقي ، ونصف الحرب هي اعلام ) ...
... سديته منه ، واتصلت على الحاج المهندس ، ومباشرتا طلع بلقاء ويا قناة العهد ، وبده يحجي عن التضحيات الي قدمناهه ....
الحاج المهندس : اكثر من ٢٠٠٠ شهيد ، من بين جندي وقائد ، في الحشــد والجيش والذهبية والاتحادية ، في تحرير بيجي خلال سنتين ، واكثر من ١٠٠٠ جريح ، عوائل الشهداء الراحت بالحشــد علمود تالي نسمي اولادهم ميليشيات ؟ ....
.... نحن لسنا ميليشيات ، نحن قوة عقائدية خرجنا بأمر السيد علي السيستاني حفظه الله ، ونسير بأمر قائد القواة المسلحه السيد حيدر العبادي ، ورواتب الحشــد حصراً من البنك المركزي العراقي ...
آصف : هذا الحجي الي لازم ينحجي ، حيدر بسرعه اتصلي بماجد ، وخليهم يجهزون نرجع لبيجي ...
حيدر : اكدر اعرف شراح تسوي ...
آصف : اتصل ومعليك ...
ماجد : انرفعت رايات الامام الحسين عليه السلام ، السود فوگ الگبه ، الجنود واحنه اخذنا تحية ،
دك تلفوني ، سحبته آصف ، الو ها خوية ...
حيدر : اني حيدر ، القائد آصف يطلب منكم الرجوع لمنطقة بيجي ...
ماجد : كله نرتاح والفجر احنه يمو ...
حيدر : ماشي ...
ماجد : صلينا الفجر وطلعنا ردينه لبيجي ، لكينا الاعلاميين بكل مكان ، ناديت على آصف بالاسلكي ،
وصلنا لمكان آصف ، طلع لابس عسكري ، ها وين العزم ...
آصف : سمعت الشرقية والعربية تسميكم ميليشيات ، فـ بأعتباري قائد الذهبية ، لازم نبرهن الهم انتو مو ميليشيات انتو ابطال وكفتو صف واحد ويانه ....
ماجد : احنه قادة ميصير نطلع للعلن ، اتلثمو شباب ،
طلعنا كلنا والكاميرات اتصور الهندسه كدامنه ، قادة الحشــد والجيش والذهبية سوى ....
.... رجعنا البغداد منتصرين وتعبانين ، و منطين شهداء وجرحى
، وهسه اجه وكت الراحه ، صار سبوعين مااعرف شي عن فطومتي ، وميت عليها ، لان الهجوم طول سبوعين وماكو تغطية هناك ....
علي الرضا : طبيت للبيت ، اهوس بسلاحي ،
ها وها وها وها ، والغيرة اطگ بشاجوري ، والغيرة اطگ بشاجوري هييي هييييي ، تلكاني عباس يهوس بالعكازه مالته ...
عباس : شلون ابن اليهودي يدوس هاي الكاع
وابجف البطل موجودة رايتنه ....
علي الرضا : طلعو الجهال يهوسون ويانه ، هيييي هيييي ، وامي طلعت تهف بعبايتها وتهلهل ....
.... وجان اجمل انتصار هو انتصار القوة كلها على داعش ، جانت اعظم هزيمه للدواعش وكسرة جبيرة
الي هي منطقة بيجي ....
قالها القائد ابا مهدي المهندس ، وفعلها وتحررت بيجي بالكامل ٢٠١٥-١٠-١٥ ....
....هسه توجهت انظارنا للفلوجه والرمادي ......
................................
يـ البعِيد وصوتك أقرَب حتى مِني
إنتَ شِباچي اليغني ...
سكينة : رافد ضل مرابط باب البيت ، وعشيرتهم كلها متجهزة ، ويخافون لا يجي كريم وفاروق ويهجمون على القرية ....
... ماعرف ليش من اباوع على رافد من الشباك يروح ويجي وسلاحه شايله على جتفه احس قلبي ينقبض ، ربي لا تشوفني بي مكروه ، صح اعترف مااحبه ، بس اكو شي بداخلي يجبرني انقهر عليّ ...
.... واني بشر واليه مشاعر ، ومن بعد هاي السنين العشتهن بظلام ، هسه طلعلي رافد ويريد بأي شكل يخليني احبه ، لو يحافظ عليه مو مهم اني حبه المهم اني كدام عينه ....
.... مر سبوعين هدوء ماكو شي ، دخل رافد للغرفة ، وهو مبتسم واول مرة اشوفه هيج ، شكو صاير شي ...
رافد : الحشــد اخذو بيجي ....
سكينة : يعني شنو ؟
رافد : يعني حرروها من الدواعش ...
سكينة : يااااااا الله ، الف الحمدلله والشكر ،يوم الباقي المدن ...
رافد : اي والله ...
سكينة : ابتسمت ، واني اباوعله ، انت منين طلعتلي ...
رافد : انه ...
سكينة : اي انت ، انسان غريب ، دخلت البيتك انت امير بداعش ، تعنيفك اليه وضربك ، كله كوم ، ومساعدتك اليه كوم ثاني ، وفجأه طلعت لايم داعش ولاهم يحزنون ....
رافد : افهم من هج ، انت قلبج رف الي ...
سكينة : هههههههه ، لا بالله بس كلام بقلبي وحبيت اكوله ...
رافد : عجل خلينا نخشع هل كلام كل يوم ، انصبر رواحتنا بي ...
سكينة : تعرف الي خلاني اباوع بوجهك شنو ؟
رافد : شنو ...؟
سكينة : من اجتك ضربه بجف الامام العباس عليه السلام ، خلتك متندل دربك ...
رافد : عجل هو الينخى اهل البيت يردوا ...
سكينة : لا والله ميرجعوا ، بالاخص اذا جان مظلوم مثلي ، صفن بوجهي ، ورجع ابتسم ....
رافد : اعذريني اذا اذيتج فد يوم ،
اعذريني حتى تطيب عيني ...
سكينة : مطيب الا تنخى الامام العباس عليه السلام ، اني بالنسبة اليه سامحتك على كل السويته بيه ، لان طلعت رجال وكفو والنعم منك ، غير واحد جان ذبني من زمان عد كريم واهله ....
رافد : لاتشكرين مني ، انه حميتج بنص قلبي ، وماطلعتج منو ...
سكينة : هههههه ، الصراحه حلو تتغزل ، بس هدي علينا يول ....
رافد : انتي بس اشري وانه اشبعج غزل ...
سكينة : لا ماريد خلينا هيج ، وهو هيج واني كوه لازمتك انوب تكعد تتغزل بيه ، عجل نهج ...
رافد : يويلي ، شكثر حلوة العجل بلسانج ....
سكينة : كعد كدامي ورفع الجلده المخليها على عينه ، جان الجفن ميتحرك ، وبي اثر ضربه ، شتريد ...
رافد : ادعي العباس وامسحي على عيني ...
سكينة : لازم انت تأمن بي وبمعجزاته ...
رافد : ول انه من وراج كمت احلف بالعباس جدام هلي ، شيعي الا شوية ...
سكينة : ههههههه ، ترددت اخلي ايدي على عينه ، بس باطراف اصابعي ، دعيت ان ربي يشافي بحق محمد وال محمد ، وكف على حيله ، باوعتله ، سحب ايدي وباسها ابتسم ، خلا وطلع ....
.... ههههه ، شنو هذا البني ادم ، ممكن بلحظه يخليني ابجي وبلحظه يضحكني ، و الكلام الي بقلبه على لسانه ، من اتذكر الضرب الي اكلته منه والشغلات السواهن وياي الموزينه قلبي ينعصر عصر ، وارجع اكول لا اني سامحته ...
.... والله لو ماهو اني لحد هسه اتعاطى مخـــدرات ،
وملعوب بحوالي لعب ، الله سبحانه خلا بطريقي حتى ينقذني من هواي شغلات ، اولهن نقذني من اريج ...
.... اخذت نفس ، شبيج سكينة ، صايرة هواي تفكرين برافد ، لتنسين بعدج تحبين علي ، وارجع اكول بس علي استشهد ، عافني واني بأمس الحاجه اله ، باوعت الايدي رجفت ، اي ترجفين لان بيدج كتلتي .....
.... رافد اختفى سبوع هو ماكو ، وين راح ماادري ، كمت احس اكو شي ناقص بحياتي ، هو وياي كل يوم من الصبح لليل ، واذا ميجي للبيت يضل برا اشوفه يروح ويجي ، بس وين راح بلسم تجيب الاكل ومن اسألها وين رافد ...
بلسم : ماادري وين راح ....
سكينة : خفت عليّ اكثر ، معقولة اخذه فاروق وكريم ، يمه قلبي ليش هيج خايف عليّ ، حاولت اخلي نفسي يهدء بس ماكو ....
.... لبست هدوم الي انطاني ياهن مال زلم ، وطلعت افتر بينهم ، واي واحد اسأله عن رافد محد يجاوبني لو جوابهم ( مانعرف ) (مادحكنا من سبوع) ...
.... وين راح غير اعرف ، عشرة ايام مرت وهو ماكو ،
كاعده الفجر اصلي ، وماعرف ليش دعيت الله يحفظه ويرجعه بالسلامه وين مجان ....
.... ذبيت العباية ونزعت الشال وكعدت اعدل بشعري ، اسمع صوت هوسه صارت برا ، كمت على حيلي وخفت اتقرب من الشباك ، صوت طلق وهوسات ...
.... خليت ايدي على قلبي ، وانفاسي تتصاعد والرجفه زادت بجسمي ، انفتح الباب وفات رجال لابس دشداشه بيضه ومزين لحيته وبس شوارب ، ولاف غترة على راسه وكف كدامي وسد الباب ، للحظه ماعرفته ....
.... گبل كمزت ، خليت ايدي على راسي و نداريت ادور على الشال ...
رافد : ول شيبج دحكي هين ، انه رافد ...
سكينة : رجعت بصدمه باوعتله ، رافد ؟
لا ارداياً ، ركضت
وحضنته ، وكمت ابجي ....
رافد : سكينة ؟؟!!!!......))))))
سولف
لا يجينا افراك يحچي اوياك
ويبوگك
مظفر النواب
.
.
.
.
رأيكم بالبارت
توقعاتكم للقادم 💥
الكاتبة : فاطمة علي ❤️
ملاحظه // ترى سكينة المرت بي صعب
حييييل صعب ، مااتخيل وحده تتحمل
حياة سنتين تبيع بالشوارع
لو ييتهموها بشرفها ؟
لو تتزوج شخص متعرفه بعدين تبدي
تحبه ؟
لو تقتل زوجها بين ايدها؟
لو يخلوها تتعاطى ، وتتعرض للتعذيب
وتجيب غصب عنها
لو متشوف ابنها
بس مرتين
لو تصعد بالملاهي تركص
بدون وعيها
لوتسقط طفلين بالحرام
لو تروح المكان هي مرايحتله بحياتها
وبنص الدواعش الاخطر ناس
بالكرة الارضية
لوتتعرض للتعنيف
بأشد التعنيف
وتتخيل زوجها استشهد خلص
من حياتها
وطفله سافر بعد متشوفه لو شسوي
وكل هذا ومترضون على
مشاعر سكينة اتجاه رافد ؟؟؟؟!!!!
اكو اشياء مذكرتهن بحياة
سكينة لان شغلات ❌
لهذا اني ذكرت هذني الشغلات
والباقي تركتهن
هو انتو بس هاي وميتين قهر عليها
....