| دُجـى في جوف البـغي |

•الفـصل الخامس و الثلاثون•

#دُجى_في_جوف_البغي
#بقـلم_الراويه
#الفصل_الخامس_والثلاثون

بسـم الله ♥

صلوا على النـبي 🧡

كيف التقينا ؟
كل شيء ضدنا صيفان بينهما أسئ وشتاء

.
دجى

لـمن يگـول قلبك لعـقلك
ابتـعد انـت..انطـيني زمـام الامـور
طول عمـرك كـنت المسيطر و القائـد و بهاي اللحـظة انـا المتحكم

بـوقتها..يبـدأ قلـبك و عـاطفتك
و كـل مشاعرك بالـمضي نحو طريق انـت بداخلك رافضـة لكـن بنفس الوقـت حـابه

و بهذا الوقت چـان گلبي المسـيطر
كمم عقـلي حتى ما اسمع صوتـه، چـنت مسـتسلمة لدرجة كرهتـها
لمـسة وحدة..قبلة وحـدة چـانت كافية كلش تخليـني مثل قطعة الهـلام بين ايديـه

بعد وجهه عني و سند گصـته على جـبيني
برودة الجـو تبخرت
و كـاني اعيش يوم بتـموز الحـار
شعـور كـانـي انسانه ثانـية، بمكان اخر
نسـيت كـلشي
نسيت العراقيـل الي بينا..عدد المـرات الي جـرحنا بيها بعض و الخيبـات الي تلقـيناها
كلمات الغـزل الي حچيناها و الوعود الـي قطعناها

كـلشي حـذفناه من بالنـا و من مجال ذاكرتنـا
فقـط شي واحد بقـى يتردد بأذهـانه انـو " انـي وياه لبعـضنا..حتلو بينا مسافة سبع بحـار و الالف الجـبال "

فتحـت عيوني على صوت الاذان الي اخترق مسامـعي
للحـظة بقيت اباوع للسـقف اعيد لذهنـي احداث قبل ساعـات
بس هاي المـرة السقف ما چـان ابيض..انمـا مثل الوان الطـيف
مـثل ازهار الربيـع و ضحكات الاطفال
التفـتت لجهتـي اليمين چان يغـط بنوم عميق و ايده على عيـنه

نهـضت من مكاني و دخلت للحمام اغتسلت
توضـيت و مديت سجادتـي بالصالة و صليت
كملت صلاتـي و گعدت وحدي اباوع للحايط و بديت افكـر
يا تـرى هم راح انـدم على الصار بينا؟
همـا راح اگـول يا ريـت ما خليته يتمم زواجنـا

تنفست بعمـق و اني امسح على گلبـي ادعي من ربـي ما اكون خطيت خطوة غـلط

رجعـت دخلت للغرفة و هو بعده چـان نايم
ابتسمت ابتسامة صغيرة و انـي اسحب الغطا اغطي كتفه لأن الجو بي بـروده
سندت راسي على الحـايط و اني اباوعله

اتمنى لو التقينا بغير ضروف و بغير مكـان
يا ريت چنا ناس عادية..بارتبـاط تقليدي
يا ترى شلون چـانت حياتنا راح تكون؟؟ هماتين تحتوي على هذا الحـب المندفع
على جنـونه بلحظات الغصب ناحية بعضنـا

يمكن ما چان صـار حبنا بهاي المتـانة
لأن دائمـاً الصعاب تقوي الحـب

رجعت تمـددت بصفه و اني اخلي ايدي جوه خدي
اريد استمتع بهذا الهـدوء و لو لحظـات

فتحـت عيوني على فتحت الباب
ضيقت عيوني و باوعتـله
چان طالع من الحمام و بعده شعره مبلل..دنگت راسي و  اني انهـض اريد اطلع من الغرفة
بس هـو قفني لمن لزمني من زندي و همس

- ليش ما تباوعيلي

- لا..اريد اسوي ريوگ

حچيتها و هو ما احرجني اكـثر وتركني
زفرت و تنفست الصعداء و دخلت للحمام غسلت وجهـي و دخلت للمطبخ و بديت احظور الفطـور

چانت الساعة بالـ8..يعني لازم يروح قبل التسعة
قبل لا تجـي داليا و تفتح الصالون و بوقتها اذا عرفت هو هنا اتخـلى بموقف لا احُـسد عليه

هو دخل للمطبخ و سألني على اتجاه القبلة يريد يصلي
و طلع
شويـة و فات و اني كملت الفطور
و هو خلى القوري على الطاولـة

چـنه ساكتين..اتهـرب من نظراتي اله
و بديت اريد انسى الصار البارحة
بس شكل غياث ما راح ينسى لمن گال

- حظري ملابسچ حتى تروحين وياي للشقة

- بس ما اني ما اريد

حچيتها و هو كتف ايدية و گـال بجـدية

- و ليش

- گـلتلك قبل ما اگدر، غيـاث انـ....

قـاطعني لمن گال بهدوء

- و الصار البارحـة چان جواب كافي مـنچ انو نستمـر

نزلت راسي و اني اضغط على ايدي و بـ تمالك اعصاب گلت

- انـت الي ردت هالشي

- و انـتِ ما منعتـيني

حچاها و اني رفعت راسي اله
هو ابتسم ابتسامة صغيرة و گـال

- ليش سكـتي ؟ انتِ ما منعتيني عنچ و لا اعترضتي على قربي مـنچ
يعني بعد ماكو داعـي للمكابره

التفتت بوجهي عنه و همست

- ما مكـابره، بس انـي ما مستعدة اترك كلشي وراية و ابـدي من جديد
و ارجع أسس حياتي و اني وگـفت على رجليـة

- و اني ما گلتلچ تتركين كـلشي
الصالون ابقي اشتغلي بي ما طول هالشي عاجبچ
اني راح التهي بالمـستشفى و صفد راح تتزوج فـ تبقين وحدچ
فـ تشتغلـين بالصالون و ماعندي مانع
بس الكوزمتـك لا اعترض هنا

رجعت اباوعله و هـو يباوعلي بنظرة ينتظر بيهـا جوابي
دنگت راسي و گـلت

- انت مستعد تبـدي وياي من جديد و تنتظري؟

- مستـعد ابدي وياچ من الصـفر، مستعد انتـظرچ سنـين
و مثل ما گـال حذيفة العرجـي

حرقت أحلامي وبعدُ مقاومٌ
لي ألف عينٍ في انتظاركِ ساهرة
لا تعجبي .. إنّ الحنين يؤزُّني
وعلى دمي أمراضُ حُبكِ قادرة
بي شوق لو غشَّاكِ منهُ أقلهُ
لمشيتِ من بيروت حتى القاهرة

ابتسمت بصمت..و احنيت راسي
ما زال يگـدر يأثر عليه بـقصيدة..بكلمات نهايتها قافيـة و اغنـية تحچي عنه

من شـاف ابتسامتي گـال بذات الابتسامة

- ها؟ اني اعرف محد يگـدرلچ بـس قصيدة من قـصائده

ضحكت و انـي اگول

- و انـت بس شاطر تاخـذ  من قصائده
عمرك ما گلتلـي قصيدة لو شعر منـك

مد ايده و احتضـن ايدي
و بالكف طبع بوسـة و هو يهمس خـلى القشعريرة تسري بجسـدي

- اعُجـز عن كتابة قصيدة توصـف حسنكِ
لأن الاحـرف غير كافيـة
تضيع الكـلمات و الـقوافي ما ان المـح ثغـرك البـاسم يا فاتنة
و تعـجز تلك العبارات عنـدما تأتيـن بخطـى ثـابته
بـ خلخالاً ترن اجـراسه تعـلن فـيه نهايتـي القادمـة

ختم كلامه و هو يرجع يقبل باطن كـفي و گال بابتسامة

- كتـبتها و اني بالخارج
چنـت بمؤتمـر، البروفيـسور يحچـي عن شي اسمـه المركز القلبي الوعائـي
القلب ينبض وحده بالحالات الطـبيعية..بس بحالات ممارسة الرياضـة و الصدمات الجـسدية يتدخل هذا المركز الي بالدماغ و يتولى المسؤولية حـتى يعدل نبضـات الگـلب

ضحك ضحكة قصيرة و امضـى بكلامه

- اجـيت استوقف الدكتور و اگـله شـوفتها هماتين تدفع المركز لتولي المسؤولية
لأن تغير معدل نبـضات الگلب
لگيت نفسي داكتبـها بالورقة الي گـدامي
الحمد الله الي بصفي چـان دنماركي ميفهم چان صرت  مضحكة للكـل

گمـت اضحك و هو سند خده على ايده و يباوعـلي و ابتسامته على ثغـره

سكتت و أشرتله يكمل ريوگـه
كمله و تحظر حتى يطلع بس قبلها التفـت عليه و گـال

- العصر اجي اخذچ..لازم الگچ متحضره

- خليها على باچـر

- تمام ما عندي مانع

حچاها بهدوء و دنگ باسنـي من خدي و طلع
سديت الباب و رجعت ارتب بالمطبخ
و افكـر بالي صار
مرة اضحك..و مرة افرح و ارجع اعبـس افكر اني غلطت لـو لا؟؟

طلعت للصالون و كانو ما صاير شـي
بأستراحة الغـدا گالت داليا تعالي تغدي عنـدي
كرار اليوم مو هنا راح توصلـه ادوية و يريد يروح يستلمهـن

لگيتها فرصـة مناسبـة حتى احچـيلها و اسمع رأييـها

بالمطبخ وگفت اساعدها بترتيـب الاكل بالصينيـة
و بـتردد گلت

- دالـيا، البـارحة غياث اجا من السفر

- ايي الحمد الله على سلامته..شوكت اجـا؟؟

بللت شفتي و گلت بأحراج

-اجـا بالليل..و راح الصـبح

من حچيت هيچ، هي ضيقت عيونها
تركت الچـفچير و تقربت عليه و هي ترسم ابتسامة مـاكره على شفتها و گـالت

- اي؟؟ و بين الصبح و الليل شنو صار

صار وجهي احمـر بس تمالكت نفسي و انـي اگول

- لا تباوعين هيچ، صار الي صـار
و هو هسا يريدني اروح وياه

بينت السعادة على وجهها و هي تگـول بعدم تصديق

- و انتِ وافقتـي موو؟؟

- متردده..گلتله ما اگدر اليوم خليها على باچـر

- اي؟؟ و ليش متردده
بعد الصـار بينكم يعني انـتِ متخذه قرارچ

- حايره..اخاف والله اخـاف نرجـع مثل قبـل و بس المشاكل تكون بينـا

تركت الي بيدها و وگـفت بصفي
لـزمت ايدي و گـالت بحنية

- لا تخـافين
قبل مثلچ چـنت خايفة، بس خطيت خطوتـي و قويت گـلبي
و شوفيني هسا مرتاحة فوگ ما تتصوريـن
چنت حابه وحدتـي و اگول ما اتأقلم
بس هـسا كلشي اختلف
و انـتِ كذلك اخطي خطوتچ و راح تشوفين كـلشي اخـتلف
خوفـچ من الفراق و انو مـشاكلكم تنهاد راح يتبـددن

باوعتله و هي ابتسم و قرصـت خدي بلطف و هي تـردف

- اظـن غيـاث هـواي قدملچ لدرجة كسر باب بـيتي مو؟

ضحكت و نزلـت راسـي
و هي على ضحكتي ضحكـت و رجـعت تگـول

- راح وكت التعب و الفراق
و هسا لازم يلـتم شمـلكم

هزيت راسـي بهـدوء، و كملنا ترتيب صحـون الغدا
گعدنا يم الحجـيه
و چـانت فرحانة لأن اني يمـها، كل ما اجي اسألـها يمه تتذكريني؟
و من تگـلي اي يمه نـور افرح كلش
لأن اكـو شخص يتذكرني قبـل..اخاف يجي يوم و تنـساني

العصر اتصـل بيه غياث و گـال اني گلت لأهلي عن موضوعنـا و باچـر من اجي اخذچ نتغدا يمهم
بوقتها ما گلت شي

بس چـنت شايلة شعور بداخلـي غريب
چنت باردة و كـانو الي راح يصير شي عادي، ما فرحانة و لا زعلانه
شعـور مو مفهوم

رتـبت اغراضي و ساعدتنـي داليـا
صح ضـاجت بس گلتلها راح اكون يمچ النهار كله
يعني ما راح يتـغير شـي

كملت ترتيب الاغراض و وگـفنا نباوع للجنـط
گعدت تـعد بيهن داليا و چانن 7 جنط
من ملابس بيـت الى ملابس طلعة..مكياج و اكسسـوارات

باوعتلي داليا و هي تگول بسخـرية

- متأكده شقة غياث تـشيل جنطچ؟؟

رفعت كتفي و گلت

- يلگه حـل محد گال اله يطلب مني ارجعله

گامت تضحك و شاركتها الضـحك

الصـبح گعدت و سبحت
لبسـت فستان رمـاني طويل و حجاب شيفون مثل الـون
باوعت للبيت و لكـل ركن بي
ابتسمت و اني احس بالاشتياق اله مـن هسـا

چانت داليا واگفه بصفي
لمن انـدگ الباب و چان غـياث، الي اخذ الجنط و خلاهن بالسيارة
انطـيت المفتاح لـ داليا و گـلت

- عمري ما راح انـسى هذا البيت و حيطـانه
شگد ضحكت بي و شگـد بچيت..البيت الي اؤاني لـمن انسدت كل الابـواب بوجهـي

ختمت كلامي و احتضـتنها لـ داليا
چان واگف غياث و هو يباوعلي و ايده بجيب بنطـرونه
ابتعدت عن داليا الي ابتسمت و هي تگول

- مني الچ اجازة اسبوع بس وراها تجين للشغل
ترا الصالون ما يسوه شي بدونچ

هزيت راسي بأي و انـي ابتسـم
ودعتها و غياث ودعهـا و تشكرها

صعدت وياه و تنفست بعمـق
باوعـت لـ غياث امتدت ايده للتلفون و ربطه براديو الـسيارة
و طلع اغنـية
ابتسمت و عرفتها مـن الحن..من شافني ابتسمت گال

- عرفتـيها؟

- في الطريق الـيكَ فايا يونان
من كلمات مهدي منصـور

- اوف اوف صرتـي تعرفين اغانيها اكثر مـني

رفعت اكـتافي بتفـاخر و هو گـال

- احلى جـزء منها بنـظرچ شنو؟؟

اخذت الـتلفون و گـلت

- اخر جزء

حچـيت هيچ و قدمت الاغنية لأخـر شي
لـمن گالت فـايا بصوتها الـشجي

- ومن قال إني تركت دياري
ما دام قلبك في العمر دار
أحبك لا شأن لي بإختياري
فحبك عاصفة لا خيار
وأهزم بإسمك كل جراحي
فأغنيتي في هواك إنتصار

خلصت الاغنية و هـو لـزم ايدي و بـنبرة خافـته گال

- و فعلاً چـنتِ انتصار الـي
انتـصرت على نفسي لأجلچ

ابتسمت و هو بقـى لازم ايدي، وصـلنا لبيت حجي قاسم
نزلت و اخذت نفـس عميق استعـد بي
فتح الباب و دخـلنا اني وياه
استقبلتنا الحجـيه بأبتسامتها المعتادة و جودي الي احتضنتني
شفت الفرحة بعيونهم
كـاني رجعت من السفر بعـد غياب طويل

الحجـي طلع من الصالة و هـو يرحب بيه
صح چانت اكو غصة من تذكرت الـي صار بس تناسيـتها

ذكرت نفسي صفحـة و انطـوت
و لازم اعيش حياتي..اذا مو لأحد فـ لنـفسي
اني كذلك استحق اعيش مثـل الكل
عائلة..زوج..اطفال بيت يؤويني يكون مملكه خاصة بيـه

چـانت اجواء حـلوة..محد بينا تطرق للمـاضي
و بسبب هالشي ارتاحـيت
الكـل چان متحمس لـزفاف مجيد و صفد، و اغلب الحديث عـن تجهـيزات القاعة
الاكل و المعازيـم، و بدون ما اسألها گالت صفد انو داليا راح اجي على داليـا محد يمـكيجني غيرها
فرحت الها لأن صدگ صفـد تستاهل

بقيـنا عدهم للعـصر و استأذن غياث و رحنـا للشقة برفقة صفـد

من وگـفت گدام الباب تذكرت اول مرة اجـيتها
چانت فرحة تغمرني بأول مرة
بس هسا اكو فرحـة كـذلك..بس اكو حـيرة و خوف من المستـقبل

دخل جنطـي للغرفة مالتـه
تفاجئت لمن دخلت الها و چـانت غرفة عرسان باوعتـله و گلت

- شوكت لحـگت

- والله مجيد ساعدنـي، ما ردت تجين بغرفة شبابيـة
ان شاء الله نـغيرها على ذوقچ

ابتسمت و انـي اگول

- لا بالعكس كلش حلوة

حچيتها و گـمت اباوعلها
وگـعت عيني على المكـان الي چانت بـي اداوات العطور
قطـبت حاجبي و گلت

- وين اداوات العطور

- فـرغت المخزن و خليته بيهن
من زمان كـلش ما سويت عطور، اخر مرة انـي وياچ

ابتسمت بهدوء و سديت الموضوع
ما ردت حتلو تلمـيح عن الماضي

گـمت ارتب بملابسي و اجـت صفد ترتب المكياج و العطورات و الاكسسوارات

و على العـشا طلب غياث من المطعم
چـنت بين المـرتاحة و المتقيـدة بس حاولت اتأقـلم بسرعة بس چان مثل الحـاجز اكو

بالليل سبحـت و چنت امشط بشعري گـدام المراية
فات غياث للغرفة و بـقى يباوعلي و هو مستند على الحايط
و بتساؤل گال

- ليـش گصـيتي شعرچ

- ما اعرف بس حبيت اغيـر

- بس تدرين..كلش حلو عليچ
ما احب شعر البنات يكون هلگد قصـير بس عليچ كلش مختلف

- يعني حلو

- اي

حچـاها و تقدم وگف بصـفي و اخذ المشط و گال بضحكة

- ما حاجه مشط..
باوعي طريقتـي بالتمشيط لمن اكون مستعجل

حچاها و گعد يخلخل اصابعة بين خصلات شعـره و يمشطهن باطرافهن
گمت اضحك و هو يـردف

- اذا بقيـتي تگصينه حتى مشط بالبيت بعد ما نحتاجه

- اعرف گاعد تستهزء بس راح اتغاضى لأن عاجبني شعري

- و انـتِ كلچ على بعضچ عاجبتيني

حچـاها بهدوء و اني تحمحمت لمن حسـيت بأيده لمست طرف رگبتـي دنگ و طـبع قبلة يم التـروقه و بخفوت گـال

- لا تبقين متقيـده دجى..هذا بيتـچ

- ممتقيده

همست بيها و هو بذات النبرة گال

- لا حسبالچ ما اعرفچ كلش زين
اعرفچ متقيـده و تحسين بالغرابه

- اتعود عود لا تشيـل هم

- تمـام

حچاها و ابتعد و اني تنفست بهـدوء، تمدد بمكانـه و اني رحت و تمددت بمكـاني بتردد
قبل لا احـس بأيده رفعت راسي و خلتها على ايده الثانـية
و رجعت احتلت خصري
غمضـت عيوني و نمت و اني احس بقبلاته الي كـل دقايق تتوزع على شعري مـن ورا

الحمد الله چـان موعد اقتراب عـرس مجيد و صفد خلاني اندمج وياهم بسرعـة بدون ما اسمح لعقـلي بالتفكير بالخوف او التـردد
التهيت وياهم كلش، اشياءها النـاقصة مستلزمات تحتاجـها
كلشي على السريع بدينا نكـمله
و اجا يـوم الـعرس

وصلنا مجـيد للصالون انـي و جودي و صفـد
چانت اول مرة ازور بيها داليا بعد ما رجعنا اني و غياث

من شافتني ما تمالكت دموعها و هي تحتضنـي و تعبرلي  عن شـوقها
و نهى ما چانت اقل مـنها
رغم بقينا على تواصل عبر التلفون بس القاء وجه بوجـه شي مختلـف

نهى گعدت تمكيـج جودي و اني و داليا تولينا امـر صفد
من مكياج و تسـريحه
چانت اجواء الفرح طـاغية، و فرحة صفد مبينه بعيـونها

كملـت صفـد و لبست البدلة
چـانت مثل الأميـرات..تركت شعرها منسدل بس رفعته الها شوية من فوگ و المكياج الملائم لبراءه ملامحها
و اخيراً فستانها الي كانه هربت بي من عالم ديزنـي

جـودي كذلك كملت..و اجا دوري مكيجتنـي داليـا و گلت للبنات روحن اني غياث يجـي ياخذني بس رفضن گالن نطلع وياچ الى جانب بعد وكـت

فجاة نهـى دخلت لغرفة الملابس و لمن طلعت
چانت شايله فستان ابيض بسيط كلـش يكون منسدل على الجسـم و اكمامه من فوف منفـوشة و تنزل ضيقـة
رفعت حاجبي لمن ابتسمت بمكر و هي تگول

- هـسا نكمل العروس الثانية

انتفضت و اني اگول بتعجب

- اوگفي يا عروس؟؟

خلت جودي ايدها على كتفي و بأبتـسامة گالت

- مـنو غيرچ انـتِ؟؟
اعرف رافضه تسوين عرس بـس ما يمنع تظهرين بمظهر العروس وي غياث مو؟

- بس اني...

قاطعتنـي داليا الي رجعت گعدتني و هي تكمل مكياجي و بـاصرار گالت

- هاي ما يفيد وياها الاقناع..سوي الي بالچ و هي ترضى شـائت ام أبت

باوعتلهن بعين دامعة
سكتت و خليت زمام الأمور بيدهـا لـ داليا و نهـى

كملنـا و اجا غيـاث اخذنا
لأن مجيد راح يكمل الترتيبـات، گعدت بصف غياث من گدام و هو يباوعلي و ابتسامة على وجهه و بـتساؤل گلت

- انت صاحب الفكرة مو

- ما ردت اخليها بنفسچ

- تعرف مچنت اريد هالشـي، لو رايده چنت اگلك اريد عرس

حچيتها بهدوء و هو گال بدون اكتراث

- المهم طالعة عروس اليـوم
خلينا نفرح بهذا اليـوم دجى تمام؟

ما ردت اكسر بخاطره..ابتسمت و اني اگول

- تمام

.

جودي

ماكو شي احـلى من تـشوف اخوك
صديـق عمرك..الي يشاركك بالضحكة و البچـيه، يكون متأنق باحلى ايام عمره

چـنت واگفه يمه المصورة الي تاخذ لقطـات قبل لا يدخلـون صفد و مجيـد من باب القاعة الي امتلـئت بأقاربنا و احبابنـا

اخذت نفس عميق لمن انفتح البـاب و خفتت الاضاءه و بدا من السقف تنزل ورود بالـون الابيض
زميت شفتي مانعـه دمعتي من انـها توگع
و اصوات الاغنية الي بالخلفية هادئـه
تقدموا و المصورة تمشي گدامهم تتأخـذ الهم الصور حتى تحبـس هاي الذكرى الحلوة بصـورة مثل ما راح تكون حبسية اذهـانه

ما ان گعدوا علـى الكوشة حتى ارتفـع صـوت صاحب القاعة من السماعة و هو يگـول

- اليـوم الحـفل مميـز كلش
ويانا رحـبوا بالاخ الثانـي هو و عروسته

علت التصـفيقات و الهلاهـل لمن دخل غياث و هـو لازم ايدها لـ دجى
اذا گـدرت اكتم دموعي بدخول صفد و مجـيد
هنا ما گـدرت و اني اخيراً اشوف غياث و دجـى سـوية، بعد ما چنت قاطعة الأمل انو اشوفهـم كتف بصف كتف

مسحت دموعـي و اني احط ايدي على گـلبي ادعي بكل صفاء نيـه انو يحفظهم ربي و ميشوفون تعب لو فراق بطريقـهم

التفتت حتى اتخذ الي مكان بعـد ما گعدوا غياث و دجـى بمكانـهم
فرت شـهقه رعب مني لمن صار بوجهـي رسلان
گوه تمالكت نفسي و اجـيت ابتعد بس هو گـال بصوت عالي تقريباً بسبب ارتفاع صوت الموسيقـى

- انهـزمي يلا

- ما انهزمـت منو گال انهزمت

حچيتها و حاولت تكون نبرة صوتي متماسكه
ضحك و اني التفتت بوجهي عنه و هو كمل

- روحي عينـي عرس اخوانچ لازم تفرحين
ما اريد انغـص عليچ فرحتچ

و بكل بساطة ابتعد
زفـرت و اني اكتف ايديـة ضايجة من تـصرفه
بس ابتسمت ما ان لمحـت داليـا تدخل للقاعة، رحت استقبـلتها و گـالت

- خلي غياث يروح عند الزلم سوده بوجهي كرار ميعرف احـد هنـاك

باوعتلها و اني اضيق نظراتي
و ما عرفت بوقتهـا هي تتشاقة وياي لو تحچـي صدگ؟

وصلتها عـند صفد و مجيد و باركت لصـفد
و راحت لدجى..الي تفاجئت لأن مچانت تدري انو دزينه دعوة لـ داليا
فرحت كلش و سعادتها عيونهـا تنطقها

عكـس نظرات ثانـية..چانت نظرات رند كلها حزن و انكـسار على حب ضاع من ايديها و هي تشوف غياث و تمسكـه بيد دجى

انقهرت عليها..صح تصرفاتها مرات تكـون مو حلوة
بس تبقى انسانه حبت و ما لاقـت الحظ
اجيت اروح الها و احچـي وياها، بس خفت لا تحچي حچاية تغثني و اجرحها و هي ما تتحمـل جرح ثانـي
دعيت انو اطلعه من گـلبها بعد ما شافـته بهيئة العريس مع عروسته بهيچ يوم
و تلتفت لأحلامها و طموحاتهـا و عملها و ان شاء الله تلگه الحب الحقيقي

هي هواي تملك اشياء و محـظوظه بيهن
اهل..عائلة تحبها ام و اب و اخـوان
مهنه مشرفـة و اسم لامع، عكس دجى الـي ما تملك غير حبه لغـياث

.

دجى

صحيت على صوت غياث الي يگعـدني من عز نومي
فتحت عيوني بانزعاج و هو چان يدگم ازراز قميصـه و يگول

- گومي يلا ضلعـي كافي نوم، تحضري حتى اوصلچ للصالون حتى ما تگرع راسـي داليـا

و بنعاس گلت

- منعسة اريد انام..ما اروح اليـوم

- صايره خاملة و كسلانه يلا گومي

حچاها و هو يسحب ايدي
تأففت و اني ادخل للحمام اغسل ابعد النوم عـن عيني
حضرت فطور على السريع الـي و لغـياث
حتى بعدها يوصلني للصالون و هو يتجه للمستشفى
كـ كل يوم تقريباً ما عدا ايام اجازاته يكون هذا روتيـنه من شهريـن

خلال شهرين عرفت انـو اني چنت عايشة حياة مو حياتـي
اما هسا..تغير كلشي
تغيرت نظرتي للحياة بشكل كامـل
گمت اشوف نفسي مرتاحه كلش هسا

اضحك..اسولف الي بگلبي
نتعارك و نتصالح..نعبر عن داخلنا بدون خوف او تـردد لا ما يتقبلني الاخـر

وصلني للصالون و هو يگول اليوم ارجع من وكت
هزيت راسي و ودعته و دخلت للصالون
قابلتنـي ريـم..البنية الي بدت تشتغل وي داليا

صار الصالون اوسع و يريد شغل اكثر
فـ اخذت داليا من الحديقة مساحة متر و كبرت الصالون بيهـا
و بيتها أجـرته حتى تستفاد منه

نهى حامل فـ ما نخليها تشتغل هواي خوفاً علـيها و على طفلـها
اما داليا..چانت تنتظر يوم يوم انو تحمـل
بس كل مرة تسوي فحص تخيب امالها بعدم وجـود حمل
هي ما حچت..بس نظراتها چانت تحچـي كلشـي

فرغ الصالون و بقـت بي زبونه تسوي شعرها على يد ريـم
گعدت انـي و داليا بنهاية الصالون و اليوم نهى چانت ممتواجـده

تنهدت و تقربت عليها و گلتلها بمخاوفي الي لازمتني من اسبوعين

- داليا، اني يمكن حامل

استبشرت ملامحها و هي تگول

- امانة صدگ؟؟ متأكده

هزيت راسي بـ لا و گلت

- لا..بس مجرد شك
اريد اختبار حمل و ادعي من الله ماكوو مثل الي بالي

تغيرت معالم وجهها و هي تگول

- و ليش عيني؟؟

- لأن ما اريد اطفال

حچيتهـا و انـي احرك بخاتم زواجـي
و هي بـجدية گالت

- و غياث؟؟ هو هماتين ما يريد

- يحب الاطفال هو..بس اني ما اريد يصير عدنا طفل

حچيتها بجديـة و اصرار على قراري
الي نابع مـن خوف بداخلي

- و اذا طلعتـي حامل

حچتها بـتشكيك و اني رديت

- ما اريده

من حچيت هيچ ضربت على رجلها و گـالت بعصبية

- تخبـلتي انتِ؟؟

- ما تخـبلت بس اني ما اريد اطفال خوما گوه

حـچيتها و گمت و اني اگول

- اروح للصيدلية اشتري اختبار حمـل

نهضت هي كذلك و گـالت ببرود

- ما حاجه عندي واحد امشي وياي للبيت

ما اعتـرضت و رحت وياها
الحجـيه ام كرار چانت نايمه، انطتني داليا الاختبار و علمتنب عليه
سويـته و انتظرت لحظات قبل لا يظهر خطين
هنـا تنفست بعمق و اني ازفـر اهدأ نفسي
طلعت من الحمام و چانت داليا واگفه تنتظـرني من شافتني گالت

- ها

- خطين

ابتسمت هي و طفرت من مكانها و هي تگول بحماس

- ويي الف مبروك
يعني دجـى الخبلة راح تصير حامل

- مرات يقرأ غلط..لازم اسوي تحليل بالمختبر

- اي هم صح..تروحين العصر

- غياث ما راح يطول اليوم بالمستشفى يجي يـاخذني
باچر تمام؟

- تمام

حچتها و هي ترجع تبتسم و اني اقابلها بتجـهم
اجا غياث اخذني و انتبه لتغييري بس تحججـت نعسانه

و بس رجعت للبيت تمددت بفراشي محتضنه نفسي و غياث راح للاسواق يجـيب شغلات محـتاجيها

شعوري الي عمره ما خـاب خلاني متأكده انو اكو جنين بين احشائي
جنين رافضـته..رافضه وجوده لسبب او بدونه

رافـضته خوفاً.. خوفاً عليه مني

بقيت طول اليوم متوتره و على اعصابـي
ما صدگت ينتهي اليوم و تشرق شمـس اليوم التالـي
وصلني غياث للصالون، و داليا چانت بأنتظاري
اخذنا تكـسي و رحنا للمستشفى

و هناك سويت تحاليـل و چنت طول الوقت اهز برجلي بتـوتر داعيه من ربي اكون مو حامـل
بس دايماً الاشياء الي اتمناها ما تتحقق و اقرب مثال دعائي بعدم حمـلي

نادت ام المختبر اسمي و هي تعقب بأبتسامة

-الـف مبروك حامل

ما تفاجئت..لأن چنت حاسه
حضـنتني داليا و هي تباركـلي فرحانه
و اني چـنت واگفه بمكاني، بدون ردة فعل

رجعنا للصـالون و اني اكتم غيضي و غضبـي من نفسي شلون ما فكرت ولو مرة وحدة بأخـذ حب مانع

داليـا من شافت وضعي و غضبي اخذتنـي لـبيت كرار و هي ترزل بيه بهمس حتى لا نهى و لا ريم ينتبهن للوضع

وصلنا للبيت و هي زمت شفايفـها و بغضب گالت

- الي يشوف هوستچ و عصبيتچ يگول حامل بالحرام
ولچ شبيـچ هذا رزق من الله

- و اني ما اريد هذا الرزق

حچـيتها بعصبية و هي خلاتني التفتت عليها و گالت

- ليش ما تريدين؟؟ بس لا تفكرين تنفصلين عن غياث المسكين

- لا

حچيتها بهدوء و هي حثتني اكمل
تنهدت و گعدت على مسطبـه بالحديقة و بشـرود گلت

- خايفة عليه مني

اجت گعدت گدامي و هي تگول باستغراب

- ليش خايفة

- خايفة لا اتركه مثل ما تركتني امـي

قطـبت حاجبها و گالت باعتراض

- هاي امچ جمالات..مو انـتِ دجى !!

- العرق دسـاس
يمكن بيوم تطلع جمالات الي بـداخلي، اخاف داليا
اخاف و خـايفة لا اجيبه لهاي الدنيا و اظلمه

- ليش تظلمينه
امچ تزوجت ابوچ غصب عنها لهـذا ما چانت متقبلتچ انتِ و اختچ
اما انـتِ و غياث العكس، انتوا تحبون بعض و ما راح تتكـرر مأساة امچ وياچ

هـزيت راسي بلا و دمعتي وگعت و اني احچـي بضعف

- مـا اريده داليا، ما اريد اكون ام
اخاف لا اكون ام بس بالأسـم، اخاف ما انطي الحنان الي ما ذقته
و لا يكون عندي حضن الأم الي انحرمـت منه

رفعت راسي و بألـم يعتصر فؤادي گلت

- مستحيل اجـيبه لهاي الدنيا و اظلمة

- شتريدين تسوين ؟؟

- اجهـضه

فتحت عيونها و هي تگول

- حرام عليچ هـاي روح، و بعدين هو مو ابنچ وحدچ
شلون تجهـضينه و ابوه يريده

- ابوه ما راح يعرف

حچيتها و قبل لا تحچي كلمة تركتها و هي لحگتنـي تحچـي عليه
بس ما انطيتها مجـال
رجعت للصالون و التهيت بالـشغل و تجاهلت كل كلام داليا

اجـا غياث اخذني العـصر و ما حچيت شي
چـان يسولف و اني اباوع من الشباك
من رجعنا للبـيت..كتبت اله لستـه بأشياء على اساس نحتاجها
چنت اريده يطلع حتى اگدر اروح اخذ اي شي يجهض الي ببطـني
راح للسوگ و اني على النت بحثت عـن الادوية الي تسبب اجهاض و من بين البحث لگـيت علاج الـ ديكـ......

بسرعة لبست عباية للحالات المستعجلة و حجابي و نزلت من الشـقة متجهه للصيدلية القريبه منه

العلاج تحججـت انو عندي الم بالمفاصل لأن هو يفيد بهاي الحالات
الصيدلاني سألني اكثر من مرة عن اذا چنت حامل لأن ممنوع على الحوامل بس انكرت
اخذته و رجعت للعمارة الـي بيها شقتنا

چنت اتنفس بقوة مانعه دموعي انو توگع
صعب عليه اقتل روح بداخلـي، بس لحظتها الشيطان اعمى بصيرتي الى جـانب خوفي و قلـقي
خايفة چنت لا اكون بيوم نسخة ثانية من جمـالات

الي زراتني بحلمي..تضحـك بشر و هي تباوع لحضني
مچنت اعرف شنو معناته للحلم..بس فسرته انو استهزاء بيـه

بطئت خطواتي لمن شفت سيارة غياث طابگه
شلون رجع بهاي السرعة..ابتلعت ريقي و صعدت العمارة
فتحت الشقة و دخلت..لگيته گاعد على القنفة و شابك ايدية

ضميت العلاج بقبضة ايدي و اني اغطيها بأكمام عبايتي الفـضافضه و اني اگول بأبتسامة

- شو رجعت بسرعة؟

- وين چـنتِ؟

سألني ببرود قاتل
بـللت شفتي و ما لگيت اي جواب
و على اثر صمتي هو نهض و مـضى بكلامه

- دأسالچ وين چـنتِ

- بالصيدلية

همست بيها و هو رفع حاجبه
دنگ عليه و گـال

- شنو تسوين بالصيدلية
او بالاحرى ليش رحتِ

- بندول..راسي وجعني و ما لگـيت بندول

حچيتها بتـوتر حاولت اخفيه
بس هو چان لمـاح..و ما اعرف شلون انتبه لمن ضميت الحبوب
بسرعة سحب ايدي و اخذ الحبوب
رفعهن و هو يباوع للأسم و بسخرية حارقة گال

- البندول صاير اسمه ديكـ.....

و قبل لا ارد شمره بالگاع و لزمني من حنچـي بقسوة و هو يصيح بعصبية بالغـة

- سوالفچ دجى متعبر عليه كم مرة لازم احچيهاا الچ

- عوفني

همست بيها و اني اريد افلت وجهي منه بس هو زاد الضغط و ضغط على اسنانـه و بـ فحيح گال

- تريدين تقتلين الطـفل بهذا السم مو؟؟

فتحت عيوني اباوعله متـفاجئه بشأن معرفته
و قبل لا يسمح الي انطق كلمة اخرى همس بتحذيـر

- ما راح احاسبچ على فعلتچ دجى
راح اعتبرها وسوسة شيطان..تصرف زعاطـيط، بس اقسم بـالله ان حاولتي مرة ثانية لو بدون قصد تعيـدين السالفة اشـوفچ جهنم الحمره بعينچ

.

السلام عليكم و رحمة الله و بركاته

شلونكم ان شاء الله الكل بخيـر

اتمنى البارت عجبكم

ارائكم و توقعاتكم 🥲💛

و ادري هسا اهازيچ و هلاهل ببارت اليوم 😂😂
والله فرحانه اكثر منكم اني 🥰💔
و اخيرا ام راس يابس راسها لان شـوية 🥺

و هسا عوفكم من الونسه الاولى و تعالوا نلطم بصمت على سوايت دجى 😁🥸🥸
الحمد الله تلاحگ غياث خبالاتها

و نجي للسـؤال المهم
يا ترى تـشوفون دجى حقها تخاف من تكرار تعاستها وي طفلها!؟

و ها اليون و اخيرا كدرنا نحصل اشباه شخصيات ظهرت
و هما  رسلان و كرار و الاهم داليا دولة و علم 🥺😂😂

يابه تشوفون حلاوتها 🥺❤
اقرب تشبيه الها هيج ملامحها مميزة والله 🥳🥳
الحمد الله بعد بحث تقطعت بي ايدينا لگينه شبيهتها

و نجي لكـرار ابو الوگفات 🥲🥺

دباوعوا للخلقة..اكثر شي يشبه بالاخص بالابتسامة تحسسك العراق و الامة العربية كلها بخير 😞😂❤

و نجـي لـ رسلان المسكيـن الي تهرب منه جودي كل ما اشوفه عبالك شايفة عزرائيل 🥲

يعني هي حقها تنهزم منه لو لا؟؟ 🥲🥲

و بس والله
نلتقي على خير احبتي
و استودعكم الله الذي لا تضيع ودائعه ♥