| دُجـى في جوف البـغي |

•الفـصل الثامن و العشرون•

#دُجى_في_جوف_البغي
#بقـلم_الراويه
#الفصل_الثامن_والعشرون

بسـم الله ♥

صلوا على النـبي 🧡

.

دجى

چـنت اسشـور بشعر الزبونه و هي تحچـيلي عن عمتها ام زوجـها و شلون متعبتهـا
بسبب شغـل البيت و الطـبخ و اهتمام بالصغـيرة قبل الچـبيرة

طفيت السشوار و وگفت مقابل الها و اني استند على ميز المراية الگدامي و الي عليه مستحضرات تجـميل و كلشي نحتاجه

- و زوجچ شنو يگـول

- زوجـي الله شاهد ما يرضى بس شـيسوي يگول هاي امي خوما اتعارك وياها
و اني ما مهتمه بالشغل و اربعة عشرين ساعـة اكرف
بس الي يضوجني تدخـلها بكلشي، يعنـي اذا العصر تمكيجت و كشخت تگعد تحچـي وين تريدين و شعنـدچ
و لا تگولين احـد ويانا من اخوان زوجي كلهم عازلين و بس واحد صغير بعده 12 سـنة و هذا مربيته وي بنتـي

- زين انتِ ما حاولتي تحچين وياها؟

- حچيت و من احچـي اطلع مو خوش و ارادد و ما احترمها

حچـتها بقهـر..و اني كتفت ايدية و گلتلها

- حاولي تتقربين منها

- صار 9 سنين وياها..كل يوم اريد اكسر الحاجز الي بينا و اتقرب منها بس هي متنطـي مجال

- باوعي العمه بالمجمل تحب احد يمدحهـا، و الاهم يدللها لأن تشوف زوجچ مهتم بيچ فـ تخاف لا تخسـره و ما يلتفت عليها
انتِ گلتيلي يم اهلچ جايه زيارة
روحـي للسـوگ و اخذيها فد قطعة قماش و شـيله و ها انتِ لنفسچ لا تاخذين شي
رتبيهن و خلي عطر عليـهن طيب و ملائم الها و خليهن بكيس و من ترجعـين من اهلچ انطيها الهن ورا ما تحظرين گعده مرتبه و گوليلها عمه امي راحت للسوگ و شفت هـاي القطعة و الشيلة و تذكرتـچ و حبيت اشوفـهن عليچ

لوت شفتها و گالت

- و اذا ما اخذتهن و فشـلتني

- ما تفـشلچ انتِ گلتي هي تحب سوالف الهـدايه و واحد يذكرها و تزعل اذا ما حصلت شي

- اي

- فـ هالشي راح يفرحها..يمكن مو بسرعة تكسر الحاجز الـي بينكم
بس كثر الدگ يلين الحـديد
مو الا تشترين الها ملابس، ابسط شـي من تنطين لبنتچ فلوس تشتري گوليـلها جيبي نستلة كيكه لجدتچ
ترا الكبار بالعمر يحبون الاهتمـام
و حتلو كبروا بس تبقى نفسهم بهيچ شغلات

ابتسمت و گـالت بلهـفه

- زين اني چنت مقرره ابات يم اهلي اليوم هماتين
شنو رائيچ ورا ما اطـلع منا اروح للسوگ و اشتريلها و اروح للبيـت

- براحتچ بس اهم شي سوي هالشي بنيـه صافيـه
لا تسويها من ورا خشمـچ

ضحكت و هي تهز الي راسها بأي
كملـت شعرهـا و انطتنـي الاجر و راحـت، رجعت للصالون و بديت انظـف الميـز
و داليا تمكيج ببنـيه اليوم حنتهـا
و نهى مكيجت البـاقيات الي وياها