| دُجـى في جوف البـغي |

•الفـصل التاسع و العشرون•

#دُجى_في_جوف_البغي
#بقـلم_الراويه
#الفصل_التاسع_والعشرون

بسـم الله ♥

صلوا على النـبي 🧡

أنا "سُليمانُكَ" المخلوقُ من ولَهٍ
‏هل لي بهدهدِ شوقٍ
‏خلفهُ نبأُ؟
‏عُد للذي فوقَ عرشِ الشوق مُنتظِرٌ
‏بلقيسُ عينيكَ
‏قد حنّت لها "سبأُ"

- علوي الغُريفي

.

دجى

البكـاء من قديم الزمـان چـان ابسط و اوضح رسالة يعبر بيـها الانسان عـن الي بداخلـة
ان كـان حـزن، قهـر
ضياع و تشـتت
و حـتى بأوقات الفـرح..نلگها توگـع

من اثقـل الاوقات الي مرت على گـلبي و روحي
الشقة صامتـه بشكـل مخيف
فقط دمعاتي الي توگع و شهگاتي بين الفـينة و اخرى

رفـع راسه و صارت عينه بعيني
اشحـت نظراتـي عنه و اني امسح دمـوعي بطرف اكمامـي

- احچـي

صوته چـان بي بحه
خلتني اغمض عيوني و اني اگول

- حچـيلتكم كلشي بهذاك اليوم
ما تغير شي

- لا اطلعـيني عن طوري و احچـي

حچاها بعصبية و اني باوعتله و بـسخط گلت متمالكه دموعي

- شنو تريد تعـرف بعـد ؟ حچيتلكم كلشي
انـي وحدة ذبتها امها و باعت اختها و مـا سألت عنـها
عاشـت بالشوارع و تربت بيهن، اخذوني لبيت دعـاره اغسل و امسح و انظف بي
و بالاخير باعنـي على ملهى هـاي قصتي و هذا الي تريد تعرفه

قطـب حواجبه و انتفض من مكان
دنگ عليه
لزمني من حنچـي و همس بحدة

- اريد اعرف كلشي..كلشـي بدون ما تغفلين عن شـي
يوم يوم عشتي قبل اريد اعرفه

ابتسمت بسخرية و دفعـت ايده
گمت من مكاني و ابتعدت واگـفه خلف الاريكـة و بـاستهزاء گـلت

- و شنـو راح تستفاد
حياتي و ما اريد اذكـرها بعد ما فتحت صفحة جديدة

- دجـى لا تستفـزيني

حچاها و هو يصر على اسنانـه
اخذت نفس عميق و گلت بفتور

- حياة وحدة مشردة..مـا لگت سگف تنام جواه
و لا اكل يسد جـوعها..عشت طول عمري اقـارن نفسي بكل بنيه اشوفها
عشت حياتي جاهله هويتي..جاهله اسم ابوية و منين انـي، افكر شنو ذنبي اعـيش كل هذا
ليش تشردت بالشوارع ؟ ليش بگت و جديت من النـاس؟
ليـش اغتصـبت و اني كل عمري 13 سنة؟؟ ليش شفت وحدة اعتبرتها صديقتي تموت گـدامي
ليش تخليت گدام خيارين
لو ارگص گـدام الزلم بس بدون مـحد يلمـسني، لو ارجع اتشرد بالشوارع و اني ما اعرف شنو ينتظرنـي

سكتت و هو صافن عليه
بعده على وگـفته
و اني توجهت لقنفة و گعـدت و بهدوء كملت و كلشي يرجع ينرسم گدامي