| دُجـى في جوف البـغي |

•الفـصل الخامس و العشرون•

#دُجى_في_جوف_البغي
#بقـلم_الراويه
#الفصل_الخامس_والعشرون

بسـم الله ♥

صلوا على النـبي 🧡

.

جودي

چـانت فترة صبح
گعـدت من النوم رغم النوم بعده بعـيني بس الساعة صارت بالـ9  و نص و اني ما متعوده انام لهذا الوكـت

سويت ريوگ الي و گعدت اتريگ و اباوع للطباخ جدر الدولمة عليه بس بعدها امي ما مشغلة جواهـا

فاتت للمطبخ من الحديقة
صبحت عليها و هي سحبت كرسي و گالتلي صبيلي چاي

انطيتـها و رجعت اكل و اني اغمـس بالقشطه و صافنه و ذهنـي شارد بسبب الصار البارحه من عرفنا انو دجى عند الرجال

چانت صدمة الكل ما توصل لصدمة غياث
الي طـول الطريق ما نطق كلمة وحـدة، ذبنا باب البيت و مـشى

- اخوچ ما گعد

- تـدرين مجيد يحب النوم شفته بعده نايـم

- مو مجيد غياث
نايـم بغرفة دجى

تركت گلاص الچاي و باوعتلها و باسـتغراب گلت

- ليش شوكت اجـا؟

- الفجر ابوچ فاتحله الباب
و نايم بغرفتـها

حچتها بنبرة اسى عليه، و اني نهضت من مكاني
و اتجهت للغرفة..فتحت الباب على كيفي و لگيته متمدد على الچـرباية
السبلت مـشتغل و الغرفة بارده كلش
و ما متغطـي

الحاف چان مطبگ يم رجليـه شلتـه و غطيته بي
لزمت گصته بارده حيل
تنـهدت و عيني دمعت و اني اشوفـه بهـالحال
اكيد الندم ياكله مثل ما ياكلـنا

گـرمزت يمه و انـي امسح على شعـره
و دعيت بگلبي ترجع دجى و تكون بخير، حتلو ما سامحتنا على الي سوينـا ميخالف
المهم تسامحـه لـ غياث

فتح عيونه و اني ابتسمت الها بأطمئنـان
گعد على حيله و مسح وجهه بكفوف ايديـة
صبحت عليه و رد بصوت مبحـوح

وخر الغطا و اني گلتله بابتسامـة

- چنت اتريگ و گالتلي امـي انت هنـا
شنو رائيـك اكمل ريوگي ويـاك؟

ما رد بس چانت عيونه تتحـرك بانحاء الغرفة
رجع بـاوعلي و بهدوء گـال

- ما گـدرت انام، ظليت افكر و خايف لا صار بيها شي للفجر ورا الاذان
ما لگـيت نفسي الا جاي هنا لغرفتـها

- صفد تدري بيك

هز راسه بأي
و اني لزمت ايده و ما زلت على گعدتـي

- زين غياث ليش مـا نسأل بالمستشفـيات و بمراكز الشرطـه؟

- شنو الفائدة

- على الاقل نسوي الي علينـا، بلكـتن نلگاها بمستشفى بمكان

تنهـد و گام و اني ابتعدت
غسل وجهه و بعـد اصرار مني يلا گـعد تريگ
اكل شوية و راسلتـه صفد تسأله عن حـاله