| دُجـى في جوف البـغي |

•الفـصل السادس و الثلاثون•

#دُجى_في_جوف_البغي
#بقـلم_الراويه
#الفصل_السادس_والثلاثون

بسـم الله ♥

صلوا على النـبي 🧡

.

دجى

ذاك الصمت المـزعج
الـي رغم هدوء المكان و صمـته بـس مدوي كـلش
صمت يجـي قبل العاصفـة، يكـون مـثل الامـواج العاتيـه
تقتلع كـلشي من جذوره

ما ان ابتعـد عنـي
گعدت على الاريكه الي وراية..ساكته
متشبعـة بالصمـت و ضـياع كل الاحرف الابجدية من ثغـري

و هـو گدامي واگـف بثبات
ايده خلاها على خصـره و يرمقنـي بنظرة غريبة
نظرة عتـب و استهـجان
يصارع شي بداخلة يـدفعة للانقـضاص عليه بس يكبتـه

- ليش سويتي هيچ؟؟

سألني و دنگت راسـي
غمضت عيوني بقوة و انـي اضغط على ايدي و هو كمـل بذات الهدوء

- ليش متحچـين

- مـا عندي شي احچـي

- طبعاً شنو تحچـين و شلون تبـاوعين بعيني و انـتِ ضامه عليه حملچ و رايحه تموتينه و انـي مثل الاطـرش بالزفة

- منو گـالك

- هذا الي هامچ مـنو گالي؟؟
بس يلا ما اخليها بگلبچ داليا اتصلت بيه و اني بالطريق و گالتلي
تعرف خبالاتـچ كلش زين و حـذرتني لا تسوين بنفسچ شي

حچـاها بلهجه شديدة
و اني رفعت راسي اله و گـلت بهدوء عكس الي بگلبي من بلبله

- ما ردت اسوي شي

- و العلاج؟ تعرفين هذا النوع ممنوع على الحامل بكل مراحلهـا
و داليا گـالت..گالت مرتك متخـبله تريد تتخلص من الطفل

- و هو صدگ اريد اجهـضه

من حچيت هيچ دنگ عليه و لزمني من حنچـي و همس بحدة

- و ليش؟؟

- هيـچ ، او بالحقيقة هواي اسباب

- زيـن انطيني سبب واحد مقنع
يخليني اقتنـع و بيدي اخذچ للدكتورة تجهضينه

بللت شفتي و گـلت

- ما اريده ينظلـم مثل ما انظلمـت لهذا اريد اجهضه

ارتفعت زاوية شفـته بسخرية و هو يگـول

- عذر اقبـح من ذنب
اي عيني من منو ينظـلم..بس لا تگـولين منـچ

- اخاف اظلمـه مثل ما امي ظلمتنـي
ما اكون اله الام الي يستحقهـا

خـتمت كلامه و هنـا لانـت ملامحه
التـفتت بوجهي عنه و هـو گـعد بصفي، دنگت راسي لمـن گال بنبرة خـافته

- بـس انـتِ مو امچ حتى تظلمينه
انـتِ شفتي المـر و التعب، ما راح تعيـدين قصتچ وياه
شـيلي هاي الفكرة من راسچ