| دُجـى في جوف البـغي |

•الفـصل الثلاثون•

#دُجى_في_جوف_البغي
#بقـلم_الراويه
#الفصل_الثلاثون

بسـم الله ♥

صلوا على النـبي 🧡

من هاي أيدك چنت
طايح لهاي أيدك
بس بعد ماريدك
شتريد أعيد المضى
لو صرت بيت بشعر
صدگني ماعيدك

.

دجى

بعـد ما حچـيت
صار صمـت مدوي بالمكـان
مچـنت اريده يعرف، لأن اعـرف راح اثير شفقتـه
و يمكن يتراجـع عن هواي شغلات لمن يعـرف

عيونه چـانت تفترس الارض بنظرتـها
اشوف ايده تنقبض و ترجع تنفتـح..من يضوج او يعصب چـان عنده عـرج فوگ حاجبه يتضـخم
و هسا بديت اشوفه بوضوح

رفع راسه و صارت عينـه بعينـي
شفت النـدم واضح بيـهن، ابتلـعت ريقي ما ان حسيتـه گدر ولو قليلاً يتخطى الصدمه

خطى خطواتـه ناحيتي و اني رجعت ليورا
بقى يمـشي و اني ارجع و صوتـي خاني و خرج يـرجف

- لا تـقترب غيـاث ابقى بمكانـك

حسيت ضهـري طـخ باب البلكـونه غمضت عيوني بقوة لمن سحبـني ناحـيته
چـان هادئ..و من يكون بهذا الهدوء اخـاف
لأن اعرف اكـو الالف الاشياء ادور بعقلـة و بگلبه

تصنمـت بمكاني لمن رجـعني اسيـرة احضـانه
ما بادلته هالمـرة
لأن كلامه و هـو يقطع اخر خيوط الوصل بيـنا بعـده يرن بالي

- اسـف..اسف لأن صرت سبب بأذيتـچ

همس بيـها بصوت متحـشرج
و رجع اردف بخنگـه طغت على نبرة صوته مثل ما طغت القـوة على احـتضانه الي

- اكبر غـلط سويته انو ما سمعت الـچ
طـردتچ رغم اعتراض گـلبي، دجـى كل مرة چنت احتار الگ الجواب..بس هاي المرة اني مو محتار اني ضـايع
اريدچ و ما اريـدچ

- انت گلت بالغرفة ما اگدر اكمـل وياچ
لا تخـلي موضوع مرضـي يغير رأيـك

حچيتهـا و بعدته عنـي
وگفت شامخه گدام نظراته المكسورة و اني اگول

- رجـعني لبيت داليا غيـاث
اني ما اتحـمل اكثر من هيچ، عندي ادوية و لازم اخذهن

غمض عيونه و كل ظني راح يرجع يعـاند و يرفض
بس خلاني اتفاجئ لمـن گال و هو يبتعد عن محيطي

- حظري نفسچ

من حچه هيـچ فرحت..و ضجت بذات الوقت
بس تنـاسيت و لبست حجابي و طلعت وراه بعـد ما اخذ مـفتاح سيارته
الدنيا صـارت مغرب، گعدت بـصفه بالسيارة بدون ما اشـيح نظراتي عليه
ابـاوع من الشباك و الصمت مطاوقنـا من كل جهـه

كاره هذا الصمت الي بينا..بس اعرف اذا حچينا بعد راح نجرح بعضنا اكثر

وصلنـي للبيت و طبگ السيارة
لا اني نزلت و لا هو طـلب مني، بقيت بس اباوع ليگدام و شفت كرار طلع من الصيـدلية و غلقها لأن فترة مغرب و هو يروح يسوي اكل لأمـه