| دُجـى في جوف البـغي |

•الفـصل العشرون•

#دُجى_في_جوف_البغي
#بقـلم_الراويه
#الفصل_العشرون

بسـم الله ♥

صلوا على النـبي 🧡

.

دجى

ارتچـيت على تاج الچربـاية و بنبرة تشكيك گلت

-و انـت ليش ضايج
ترا لا عـيب و لا حرام

- اعرف لا عيـب و لا حرام، بس انـي ما مقتنع بـ مجيد

- يمكن صفد مقتنعه

حچـيتها و هو زفـر و همس

- اذا شافتـني ما متقبل الموضوع هي هماتين ما تتقبلـه

- غياث تريد نصيحتي

گال و خلى ابتسامتي تزين ثغـري

- هو خابـرتچ اريد نصـيحتچ

- تمـام، بالأول انت ليش رافض مجيد
انـت اخوه و تعرفه اكثر مـني، ما عنده سوالـف محلوه و انسان مجتهد و يدرس و شايل نفسه

- مو قصة رافض مجيـد
اني رافض الفكرة من الاساس

- انو هو اخوك و هي اختـك

- لا

- لعد

حچيتها بنفاذ صبر و هـو گال ورا ثواني بـ خفوت

- صفد بعـيني بعدها طفلـة
ما اتخيل اشوفـها ترتبط و تكون عائلة و هـي اذا ما عرفت تربط شعرها تجـي تبچي عليه اسوي الهـا
فهمـتيني دجـى مو؟ ما اريد اختي تكبر فجـاة و تشيل مسؤوليـة هي مو گدها

- تخاف عليها

- اخاف عليهـا اكثر مما اخاف على نـفسي
الوحيـدة الما وگفت ضدي يوم، والله اشوفها صغيرة مو مال زواج و حمل مسؤولية

ابتسامة صغيرة ممزوجه بالـحزن انرسمت على وجهي
لگـيت صوتي انخنق بالعبـرة و اني اگول

- بس كلـنا لازم بيوم نشيل مسؤولية مو ؟
ما طول تحبها لازم تبطل خـوف عليها، هي اقوى مما تظـن، ما دام تحبـها و تعتبرها شي كلش چبير بحياتك
المفروض تشد على ايـدها و تقوي شخصيتهـا
هي متعرف شي من هاي الدنيا و انت بسبب خوفك و حرصك الزايـد عليها راح تخلـيها تكبر بقوقعة
بيوم من الايام هاي القوقعة بعد ما تگدر تحـويها و تحوي افكارها و احلامهـا

لهـذا اخذها من ايدها و طلعها منها، شوفـها الحياة على اصولها علمـها تخاف على نفسهـا مو احد يخاف عليهـا، من تغلط مو تلتجى الك
علمها هي تصلح هذتا الغلط..من تخاف من شي لا تنهزم عنه لازم تواجهـه

سكتت و هـو التزم الصمت، لحظات مرت قبل لا يگول بحيرة

- هي ضعيفة برأيـچ تگدر تواجه الحياة

- و گلتهـا مرة هي ذكية
و بذكاءها تگدر تواجهه كلشي يوگف بطريقهـا، انطيها فرصـة تكون معتمده على ذاتها و لو مرة وحـدة
اذا ما طلعت من المكان الي هي بي عمرها ما راح تـشوف الاشياء بشكل واضح و تفهمـهن