#دُجى_في_جوف_البغي
#بقـلم_الراويه
#الفصل_الرابع_والثلاثون
بسـم الله ♥
صلوا على النـبي 🧡
.
دجى
اسبوعيـن مرت من يـوم خطوبـة صفد و مجيد
و مـن هذاك الـيوم و بعد ما نزلت من سيارته لـ غياث
ما تقابلنـا مرة اخـرى
حـتى ما لمحته بالفـرع مثل كل مـرة
چـنت بالصالون واگـفه اصفف شعـر زبـونة
و كل تفكـيري منحـصر عند غياث و غيابه
معقـولة قطع كل آمـاله بيه؟؟ و قرر الابتعـاد
خلصت شـغلي بالصالون و رجعت للبـيت، بدت داليـا تسوي عشا
و هي تگـلي بالكـبة و انـي سويت زلاطـة و نظفت الخـضراوات
التفتت لـ داليا الي گـالت
- كـرار اليوم خابرنـي
- اي؟
- يريد يستعجـل بالزواج
قطبت حاجـبي مستغربة و هي خلت قطع من الكبة بالطاوة و اجـت گعدت گدامـي
كتفت ايديها و گـالت بتردد
- هو من الأول گـال ما نطول و نتزوج
و هسا يگـول ماكو داعي للتأخـير
- كلامه هماتين صح، انتوا تعرفون بعضكم من زمـان يعني لا تگـولين بفترة تعارف حتى اطولون، و انتِ شنو گلتي
- گلتلـه افكر بالموضوع
ابتسمت و اني اگول
- حقـچ، بس هو صبر سنيـن حقه هماتين يريد يعجـل بالزواج
- الموضوع انو شلون اتركـچ
اختفت ابتسامتي و اني اگـول
- شلون يعنـي
نزلت راسها و هي تگول باحـراج
- ورا زواجـي، شلون اتركچ مو معقولة ابقى بالبيت هذا
و مستحيل اتركچ وحدچ
ضحكت اضيع الموضوع و توتـره و اني اگول
- و شعليه اني؟؟ بعدين بس لا مفكرة اگعد وياكم
ترا ما ارضاها..بعدين لهذاك الوقت يحـلها رب العالمـين
- يعني من الأول قطعتي املي
اني گلتله لـ كرار عن الفكرة بس هو گال ما اظـنها توافق
- و فعلاً ما اوافق، انتِ الصالون ما راح تتركينه
هزت راسها و هي تگول
- اتفقت وياه من البداية الصالون ما اتركـه
گمت اني و طلعت الكبه من الطاوة و طفيت الغاز
التـفت عليها و گلت
- و البـيت راح تأجرينه
- يعني...
قاطعتها و اني اگول
- أجره منچ
- مستحيل مو اني الي اخذ منچ فلـوس
لا حسبالچ شايلة همه للبيت..ترا اخر همي والله، اني كل همـي شلون تبقين وحدچ
- و ليش شايلة همي
انـي هنا بنفس الفرع..و النهار كله بالصالون لو الـصيدلية، بس بالليل ابـات بي
و بعدين اني عشت هواي وحدي اگدر ادبر نفسـي
زمـت شفتها و هي تگول
- شلون تعيشين وحدچ
- مثل ما عشتـي انتِ قبل؟ ورا وفاة والدتچ مو عشتِ اشهر وحدچ
- ما اريدچ تسكنين وحدچ لأن راح تسمعين نفس الكلام الي سمعته قبـل، خايفة عليچ انـي
غمضت عيوني و تنـفست بهدوء
قبل لا ارجع اگعد گدامها و لزمت ايدها و بتفهم گلت
- فاهمه خوفـچ عليه و مقدرته
بس دالـيا اني مو صغيرة و اگدر ارد كل لسان حچه عليـه
- و غياث؟ راح يتقبل فكرة سكنچ وحدچ
- غياث صارله اسبوعين ما سأل عني
ما راح يعرف و حـتلو عرف، ما راح يگدر يمنعني من شي
- طبعاً يختفي و لا يسأل من بعد رفضچ و عنادچ
ضحكت و اني ارفع تك حاجب و اگول
- هاي منـو الي ادافع عـن غياث
- ما مدافعة عنه بس داحچـي الحق
حچتها و گامت على حيلها و هي تگول
- گومي نخلي العشا ترا جوعانة
- و انتِ حظري عشا كرار و امه
حچيتها و گمت احظر بعشـانا و داليا الي من بعد خطـوبتها من كرار تكـفلت انو تحظـر الهم الوجبات
بعد ما سمـعت الحجيه تگول اكل كرار ما بي طعم و لا ينأكـل
اخذتـلهم العشا و اجت و گعدنا نتعشى
و وراها تمددت بفراشـي و طلعت تلفوني
بحثت عن اسمه بالفيس و ظهر الي اول مقترح، طول هاي الاسبوعين ما چـان ينشر اي شي
بس هسا فـز گلبي من لگيته ناشر منـشور
عبارة عن صورتـه بأحـدى البلدان و كـاتب فوگاها
" الحمد الله كـتب لي الله التوفـيق و النجـاح فـي مشاركة أجـراء احدى اكبر العمليـات الى جانـب اهم الجراحـيـين و هـم.... و..... شاكـرهم جزيل الشكـر لجـعلي اخوض تجـربة فريدة من نوعها "
و كاتـب الاجنبي كـذلك دخلت للحسابات الي مـسويلهن منشن و كانن لدكاترة اجـانب
فرحت كـلش و اجيت اتهور و اني اندفع حتى اكتـب اله تعليق اعبر بي عن فرحتـي بأنجازه بس تـراجعت
يعني هذا سبب غيابة؟ هو مو هنا
زيـن ليش ما انطاني خبر؟ هنـا اجيت اصفع نفسي و اني أذكـرها انتِ الي ما تريـدين اي شي بينكم
لأن ما تريدين تنجـرحين بعد و لا تنخـذلين
رجعتِ للوحدة، الاعتماد على النـفس و الابتعاد عن الكل و حبس نفسچ بقـوقعة
بعد مـا كلشي تغير بيچ بيوم دخـولچ لبيت حجـي قاسـم
تركت التلفون و باوعت للسقف، و كـلام داليا خلاني اغفل عن شي
اذا طلعت معناتها راح ارجع لوحدتـي
داليا تعودت عليها..كـلش مو شوية
اگعد الصبح الگاها قبلي گاعده و هي تستعجلين حتى نفتح الصالـون
انعصر گـلبي متوجـعة بس تجاهلت ألمـي و اني اهمس لنفسي ميخالـف خوما تريدين طول عمرها ويـاچ
ايـام چانت تمـر ببطـى
عدم وجود غياث و لا كلامه وياي خلانـي احن الـه بس ادوس على نفـسي و على قلبـي
حچيت وي جودي كم مـرة و من خلال حديثها عرفت انـو غياث راح يطول هواي بالخارج قرابة الخمسـة اشهر، و من المحتمـل بس يرجع يقيمون عـرس صفد و مجـيد
مرت 3 اشهـر
ما بيها شي ينـذكر، فقـط اتنقل بين الصالون و الكـوزمتك
و گـلبي بمعارك مستمرة وي عقلـي لأجل التواصل وي غياث
كـل مرة ينتصر عقلي
بس باللـيلة الي قرر بيها كرار حفل زواجه من داليـا بعد اسبوع بالتمام لأن كلشي جاهـز
اعلن عقلي استسلامه و رفع الرأيـه البيضة
من حـسيت نـفسي راح ارجع لنقطـة الصفر
لگـيت نفسي ادخل لصفحته الشخصية على الانـستغرام لأن الفـيس چان عنده صفحة وحدة و اغلبها ينشر بيهـا عن مهنتـه و مرات قليلة ينشر عن نفسـة
فـ ازدحام الماسنجر عنده خلاني اخاف ما ينتبه لرسالتي
عكـس الانستغرام چـان عائلي
بس دزيته مـرحبا
توقعته راح يتجاهلني، او ما راح يعرفنـي
ساعة بدقائـقها الثقيلة مرت على روحـي و ضاقت بيها انفاسـي
فجـاة ارتفع صوت ينبئ بوصول رسالة
تلقفـت التلفون بسرعة و أيادي ترجف
مـا اعرف بردًا ام شـوقًا، رمشت بعيـوني هواي و اني اباوع لرسالته الي بيها يستسفـر عـن هويتي
و بـتردد بالغ كتبت
- دجـى
ما ان شـاف المسـج حـتى كتب
- بيچ شي
- لا
كتبتها و اجـيت اغلق التلفـون
بس توقفت لـمن دزلـي
- اكـره شـات الانستا راح اراسلچ واتسـاب
و دزلي وراها رقـمه
ترددت كلش، بس بهاي اللـيله فاض الحنيـن بيه
سجلت رقمه وي الأرقـام و دخلت للواتـساب
و ارسلت اله مـرحبا
متوقعت راح يتـصل، لذلك ترددت اجاوبـه
بس بالأخـير ضغطت على العلامة الخضراء سـامحه لصوته بالعبور عـبر الأثير لمسامعـي
غمضت عيوني لـمن گال
- شبيـچ؟
- انزعجت من مراسلتي
ضحك و هو يگول
- لا..بس استغربت
- حتى اني استغـربت من نفسي
- من شنو مزعوجـه
- مـن هواي اشيـاء
حچيتها و سحبت نفس عميق
و هو انطاني مساحة للكـلام، لگيت نفسي مرتاحه لهل الـشي و اني اگول
- احس نـفسي ضايعة، مشتته افكاري و بالي ابداً مو صافي
- شنو الـي خلاچ توصلين لهاي الحالة
سألني و بخفوت رديت
- علاقتنا المتأرجحه، و منا زواج داليا الي بعد اسبـوع
ابين الـها انو عادي حتى متنقهر و تفكر لأن راح تعوفنـي
- و تبقين وحدچ
- على الأرجح اي
حسيـت بنبرة صوته تغيرت للشده و هو يگول
- و شلون تسكنـين وحدچ؟
و قـبل لا تگولين اگدر و ما عليه شي، اگـلچ اني رافض هالـشي
انـتِ تعرفين شنو نظرة الناس عن البنية الي تسكن وحدها؟
- ما يهمـوني الناس
- طـز بحچيهم بس من يصير قال و قيـل و طعن لا هنا يهمچ هاي سمعة مـو لعبة دجـى
مسحـت على گصتي و گلت بـرجاء
- غياث حچـيت وياك اريد افرغ الي بداخلـي مو حتى اتعارك
- و انـي ما تعاركـت انطيتچ رأي
دجـى
همهمت لمن نادانـي و هو كمل بجـدية
- عاجبـچ وضعـچ؟
- مرتاحة
- ما اسألچ مرتاحه لو لا..اگلچ عاجـبتچ هاي الحياة
الى متى تبقين وحيدة بهذا الشكـل؟ متفكرين بالمستقبل منو يشيـل كبرتچ اذا وگعتـي
انـي امـد ايدي الچ مرة ثانية و اطلب منچ نرجع للبعض
- و اني مرة ثانية اگلـك ما اگدر ما اريد اظلمك و اظلم نفسي
- على اساس هسا ما ظالمتنـي و ظالمتها لنـفسچ
سكتت بعد ما حچاها بـقسوة و كمل بنـبرة اخفت
- بعد شهرين ارجـع للعراق، اريدچ تفكرين زيـن
تفكـرين من گلب و عـقل، انـي قبل گلتلچ ما اگدر بس هسا تغير رأيي و نظرتـي
اني اريدچ زوجـة و ام اولادي !!
سقطت دمعتي على خـدي
و بصعوبة همسـت
- و اذا رجعت علقتنـي بيك، و ترجـع تخذلنـي
- بهـذاك الوكـت لو اجـيتچ مترجـي على ركبتـي لا تسامحـيني
سكت و رجع كمل بـلطف
- دجـى اريد اكمل حياتي، اريد اكون عائلة و يصير عندي اولاد و ما اتخـيل امهم مو انـتِ
اني وياچ هواي هواي انظلمنـا، لا تخلين حتى انفسنا نظلـمها
ايدي دوم الچ ممـدوده و گـلبي يا ضلعي بعده الچ و عمره ما صار لـ غيرچ
شهرين گـدامچ كافيات تفكريـن بحياتنا بالمستقبل
احنا تعبـنا و هسا اجا وقت نـرتاح مو؟
ما گدرت اجاوبه..الغصة چـانت خانگـتني، تنهد و گال
- مقـدر صمتچ و خوفچ
لذلك انتِ بالمقابل اريدچ تقـدرين موقفي و حـبي الچ
- تمام
گوه رديت عليه و مسحت دمعتي و گلت بعدها بثوانـي
- اتركك براحتـك
- اي وقـت تحتاجيه اني موجود
عندي أمـل بعد هاي المكالمة لا تقتلينه
مـا جاوبته ودعته بهدوء و غلقت الخـط
الصـبح على الريـوگ حچـيت لـ داليا عن كلام غياث
الغريب چانت موافقة عليه
اعترضت و اني اگوللها
- ما اتفق وياچ..اني اگدر اعيش وحدي
- تگدرين بس عمرچ ما راح تخلصين من حچـي الناس
كل النساء تگدر تعتمد على نفسها بدون رجال
بس الحقيقـة لازم نحچـيها
بهيچ مجتمع لازم يكون وراچ رجال..حتى محد يحچـي وياچ، و انتِ گلتيها الي قبل لو چان اكو رجال بحياتي ما چـان خوالي گدروا يمـسون مني شعره
تنهدت و كملت و هي تهز برجلها و شكلها مقهورة
- حسبالچ مچنت اتأثر بحچـي الناس
ترا ابقى انسانه و عندي طاقـة، انواع الحچي سمعت
هاي ليش ما تزوجت..شلون ساكنه وحدها والله اعلم منـو يفوت و يطلع عليها
لو خوش انسانه ما چـان گرايبها من اخوال و اعمام تركوهـا
ميعرفون انو گرايـبي عقارب و حيايـه..هما نفسهم الي عمرهم ما دگوا بابـي و گالوا شنو محتاجه لا بس وكـت الكلام عليه و طعن بيه يظهـرون
و اني ما اريدچ تسمعين الحچـي نفس الحچي الي سمعتـه، منو هاي و شعدها و بعدها صغيرة و الله اعلم شنو تسوي ما تسوي
ما اهـتم برأيهم..بس كلامهم يأذي يدگ بسامير بالـروح
سكتت و ما رديت عليها چنت اباوعلها و اني احس بـ قهرها من خلال كلامهـا
گامت من مكانها و هي تگول
- رايحه للصالـون العروس راح تجي
طلعت و اني گمت وراها..نظفت المطبخ و غيرت ملابسي و لحگـتها
چان عدنا 3 عرائـس من غير البنات الي وياهـن
هوسـة كلش و تعب
من خلصنا الزبـائن رجعنا للبيت لگيت تلفوني الي نسيت وجوده اصلاً مشتعـل بالمكالمات
من بنات يريـدن حجـز بالصـالون و الأهم چانن اربع مكالمات من غيـاث و رسالة محتواها " من تكملين شغلچ عندي كلام مهم وياچ "
گعدت بغرفتي و اتصلـت بي
و هو ما طول و جاوبني
- چنت بالصالون و التلفون بالبيت..اكـو شي
- اي، اكو شي مهم
- و الي هـو
- اني اخذت اسم ابوچ الثلاثي و امچ
عنـدي صديق يداوم بالاحـوال المدنيه، طلبت منـه يدورلي على اسمـهم او اي شي يوصلنا لأهلچ
- اي؟؟
حچيتها بتردد و هو گال
- اتـصل بيه صديقي الي تكفل بالبحـث عن والـدچ اليـوم
گوه همهمت و هو رد بتنهيـده
- والـدتچ متوفي من 2009
من ختم كلامه حسيت شـي بـرد فجاة، اطرافـي ارتجفت و گـلبي شعـرت بنبضاته صارت ضعيفة كـلش
عيوني چانت مركزة بالفـراغ
اسمع صدى صوت غياث كانه مـن بعيد يردد اسمـي
وگعت دمعتي بثقل عـلى خدي بثقل ايامي الي عشتـهن
شهگـت بقوة اريد اسحب نفس بس اكو شي خنگـني
وگع تلفوني من ايدي و الخط بعده مفتوح، و بچـيت بقوة
بچـيت على اب ما اتذكر منه هواي
لا شميت عطـره و لا حسيت بحنـانه، چنت حاسه عمري ما راح اشـوفه
چنت احـس فارق هاي الدنيا بسبب احساسي الي ما يخيب
بس صعـبة رغم چنت متـهيأ لهذا الخبر
دخلت داليا للغرفـة مفزوعة
و هي تسألني..لگيت نفسي اشهگ و اني اگوللها
- ابوية ميـت..داليا مات و ما عرفت عنه شـي
احتضنتي و هي تهون عليه
انتبهت للتلفون و اسم غياث الـي على الشاشة رفعته و گالت بسرعة
- تهـدأ و تتـصل بيك
ما اعرف اذا لحگ يرد عليها و غلقت الخط
چنت ابچـي و گلبي يوجعنـي
دموعي الي ما نزلت و برودي على خبر وفاة امي
عوضهن خبر وفاة والـدي
البرد الي استحـلني لدقائق صار نار و موجره بقلبـي و بروحي
بقت داليا تمسح على ضهـري و هي تگول
- الله يرحمه ادعيله بالرحمة
- مقهورة لأن ما شفته..ما حضنته و عرفته داليا
- هذا نصيبچ من الدنيا
- ليش هيچ نصيبي داليا، نصيبي كـله حزن و كمـد
كل ما اگول استعدلت الگـاها تميل بيه
مسحـت على راسي، و باستني من كتفي و هي تگـول
- الحمد لله..الحمد لله على كل حال
بقـت محتضنتني و اني احـس دمعتي نشفت
نص ساعة و اني على وضعـيتي قبل لا تبتعد عني و تخلي راسي على المخدة و هي تحچـي بحنيه
- ارتاحـي هسا
هزيت راسي بـ وهن
و هي طـلعت و سدت الباب وراها، بقيت بمكاني اباوع للسـقف و دموعي ترجع تجـري بصمـت
جابتلـي عشا و گلتلـها ما اريـد
بس اصرت عليه اكل لگـمه، اكـلت گوه كم لگمه و بطلت
صلـيت العشا و المغرب لأن فاتتني
و دعيت الـه بالرحمة و المـغفرة و يجعل قبره من رياض الجـنه
طبگت السجادة و باوعت للتلفون الي رن مكالمة واتساب
چـان المتصل غياث، اكثر من مرة اتصل و چنت اسمع التلفون بس ما چانت عندي قدره ارد
اخذت التلفون و فتحت الخط
اجاني صـوته المتلهف و هو يگول
- دجـى بس طمـنيني عليچ
- لا تخاف ما بيه شي
- اعـرف صعب الي صارلچ، بس هي هاي الدنيا محـد يدوم بيها
- بالأخص وياي..لا دامتـلي بفرح و لا راحة بال
من وگـفت على رجليـه اجاني خبـره و كسرلي ضهري، ما اتـذكره و لا اتذكر ذكرى وحدة جامعتنـا
بس غياث، هذا ابـوية
- اعرف والله اعرف يا عيني انتِ، عارف شعـورچ لأن ضگته قبـلچ
اني تيتـمة قبل رغم ابوية عايش
- غياث گـلبي اول مرة هيچ يوجعنـي، احـسه يريد يطلع من حنجـرتي
- ابچـي لعد، ابچـي و طلعي كل دموعـچ
لا تحبسيهن
- بچـيت والله بچيت، بس بعده الوجع
همست بيها بتعـب و اني اسند گصتي على المخدة
و انـي گاعده مثل الساجدة و ايدي على گلبي
- غـياث، اريـد انام
- نامـي اذا ترتاحين
- لا..اريـد انام هواي، انام و ما اگـعد
- انتِ اقوى من هيچ
- اعـرف، بس هاي الكسرة تختلـف كلش
ليش ابچـي و موجوعة على انسان ما عرفته، يعني هيچ شعـور الفاقـد اب
- اي، شعور فـاقد اب و الفاقد ام
الكل يشوفون المات انسان..بس بعينك لا
مـاتت بعينك حياة كامـل
بچـيت و اهتزت اكتافي و اني احتضن نفسي اكـثر
سمعت تنهيدتـه لـ غياث و صوته الخافت المخـنوگ
- اريـد اغمض عيوني و الگاچ يمي
اريـد احضنچ و اخفف عنچ، ما بيدي غير الحچـي دجى
غمضت عيوني و اني من بين دموعي همست بوجع
- بس صوتك يمـي كافـي، لا تسد الخط غياث عفـية
- ما اعوفچ هياتنـي يمچ
حچـاها بسرعة و اني بقيت على وضعيـتي
اغمض عيوني و افتحهن و هـو بعده فاتـح الخط
تمددت عـدل و فتحت سبيكـر و اني اخلي التلفون بـصفـي
مرات نص ساعة و اكـثر على هاي الوضعية بصـمت
مطبـق، بس تنفسي يصدح بهاي الغـرفة
غمضـت عيوني لمن گـال
- نمـتي
- اذا مشغول روح
حچيتها و هو رد
- لا حتلو افرغلچ وقتي كـله
تحسين نفسچ احسن
- شويـة احسن، اذا تريد تروح روح
- لا ابقـى على الخط
حچاها و رجع الصمت سيـد المكان
چـان فقط وجودة خلف سماعة الهاتف كـافي الي، ما گدرت اشاركه البكـي لو الحـضن
بس گـدرنا نتشارك الصـمت..
فتحت عيوني فجاه
متغطـيه بغطائـي و الضو طافي و الخط مغلق، گعدت على حيلي و بعدت الغطا عنـي
اخذت التلفون الساعة چـانت بالـ12 و نص
مسحت گصتي و اني احسب الساعات الي نمتها
طلعت للمـمر و لگيـت داليا واگفه بالمطبخ
باوعتلي و گالت
- ها عمري شلون صرتـي
- احسن
- بالـعشره دخلت للغرفة لگـيت الخط مفتوح و انتِ نايمه
چان غياث خطية ما غالق الخـط و هو الثاني غافـي طمنته عليچ و راح
ابتسمت بـذبول و رجعـت للغرفة و لفراشي
و رغبة بالنوم رجعت داهمتنـي، النوم كل ما انقهرت و بچيت هربت لأحضـانه
.
جودي
واگـفه عند السياج بالطابق الثاني المطـل على الصالة من فـوگ و بقربي واگفه صفـد، صفد الي اجت عدنا مـن يوم سفر غياث و الي مضى على سفرة 3 اشهـر
اسـمع صوته لـ رسلان و عمي عبد الرزاق داخلين بجـدال وي ابوية
للمرة ما اعرف شگد..ضيعت حتـى العـد بعدد المرات الـي اجوا بيها و يطلبون ايدي
و ابوية نفس الرد
طلعوا زعلانـين نفس كل مرة كـذلك
و الجدال تحـول من بين عمي و ابوية الى امي و مجيد ضد والـدي
و هما يگولون اله ليش واگف ضـد قسمة البنية
الرجال يريدها و شاريـها
و هو يجاوبهم كالعادة..ما انطـي بنتي لشخص چان اخوه خطيبها و الأهم امه و اخته ما يريـدوها
تنهدت بـأسى و اتجهت لغرفتي بس وگفتني صفد و هي تأشـرلي بـ " انـزلي و احچي وياه بيني قبولچ بـ رسلان "
- ما اگـدر صفد، اني بهيچ امور انحرج
حچـيت هيچ و طلع مجيد من صالة الخطار مـعصب
صعـد الدرج و گـال موجه كلامه الي
- و انتِ مو صاحبة الشأن ما تحچين كلمة
نزلت راسي و هو تأفف و كمل طريقة
و انـي كل الي سويته دخلت لغرفنـي و طبگت الباب
چانت دنـيا عصر
بقيت بغرفتـي گاعده، كـ حالي كل مرة يجي بيها رسلان ابقى حبيسـة غرفتي حتى بعد خروجه
بالـ5 و نص قريب السـته المغرب
حسيت اكو صوت جوه..طلعت من غرفتي و من فوگ الدرج تفاجئت من شفتـها لـ دجى گاعده بصف ابوية و شكلها توي جايه لأن قدمت الها صفد كـوب مي
نزلت الدرج و اني ابتسم بترحيب
و هي من شافتني نهضت..و سلمت عليها
رجعت لمكانها و اني ما بـاوعت بعين ابوية
تبادلنا الاخـبار و حچتلنا عن شغلها
الصدمة انرسمت على وجوه الكل لمن گـالت انو غياث عرف عن والدها شي و انه متوفـي
و عرفت هالشي قبل 3 ايـام
حسيت بغصتها بس تـداركت نفسها و هي تگول
- و اني جـايه اليوم للحجـي
باوعلها ابوية باستغراب و گاللها
- أمـري بنتي
- مـا يأمر عليك ظالم يا رب
حچتها و رمقتني بنظرة سريعة مفهمت معناتها و رجعت گـالت
- عمـي اسألك بصراحة، انـت مقهور على غياث لأن اني رافضة ارتباطنا
شكله فهم شنو تقصد، و الكل فهم ما عـداني
لمن حرك حبات سبحته و هو يگـول
- ماكو اب ما ينـقهر على ابنه و هو يشوفه بهذا الحال
- زين ليش ما تنقهـر على رسلان رغم هو بنفس الموقف
فتحت عيوني على وسعهن و نطق لساني باعتراض
- دجـى شنو هالحچـي
- رجاءاً جودي خليني اكمل
حچتها باصرار و هي التفتت عليه
باوعت لـ صفد و مجيد ابتسمـوا و واحد يباوع للأخر و اني هنا اجاني الشك انو هـما الي حاكوا هاي الخطـه
- اذا غياث يقهرك حاله و كاسـر گلبـك، ليش ما انكسر گلبك على رسلان
الي بكـل مرة يثبت الك صفاء نيـته اتجاهها لـ جودي
- موضوعچ انتِ و غياث بعيد كلش عن موضوع رسلان و جودي، رسلان اخـوه الي چان خاطبـها
- و انـي و غياث بينا هواي اشياء..اولها كذبي عليه و خذلانه الـي مـاضيي و عدم اخباري اله اني متعرضة للاغتصـاب و انو تـربيت بالشوارع بين ناس متخاف الله!! تشوف العراقيل الي بينا اني و غياث سهله بس بين رسلان و جودي لا
التزم الصمت لمن ختمت كلامها بقسـوة
ضغطت على ايديه بقوة لمن هي كملت
- اذا انت رافضه لـ رسلان فـ لا تخلي موضوع رامي تعلاگـه تذب عليها رفضـك
گول اله ما اريدك لبـنتي رغم والله هي تريدك
- جودي تريده
حچاها بتعجب، و اني تمنيت لو احفر الارض و ادفن نفسي بيها
ما گـدرت اجمع كلمتين على بعضهن و دجى گالت بـقوة
- صمتـها ما بين الك شي عمي ؟
رفعت راسي و وگعت عيني على ابويـة الي تنهد
و دجى كملت كلامها بصـوت اخفت
- انت دا تقطع بنصيبهـا
انسان خلوق و محتـرم رايـدها ليش تكسر بخاطره، حجي انت تعرف اكـثر مني و اكبر مـني
و تعرف ميصير اجبار الشخص على الزواج و تعرف ميصير قطع نصيب احد اذا چان المقابل ما بي شي يستحق الرفـض
- لعـد ليش رافضه تكملين وي غياث
سألها حتى يضرب على الوتر الحساس بـس دجى تلافت الموضوع و هي تگول
- لأن ما اريد اظلمه وياي..باچر عگبه يگولون زوجته چانت خدامه زوجته چانت بالشارع
يصير عدنا اطفال يبقون يتعيرون بأمهم و غياث بـيه
لهذا انـي رافضه..مو كرهًا بي، بس رسلان و جـودي اولاد عم
و موضوعها وي رامي اكل عليه الزمن و شـرب
- اوافق على رسلان بشـرط ترجعين وي غيـاث
فـاجئ الكل بشرطه باوعت لـ دجى بللت شفتها و هي تگول
- عمي ليش مصر تربط موضوعنا بموضوع رسلان و جودي
- هذا الي عندي، اذا تريدين اجبر خاطـر رسلان فـ اجبري خاطـر غياث
سكـتت دجى و هي مرة تباوعـلي و مرة تباوع لأبوية
گـال مجيد بنبرة هاديه
- يابـه غياث و دجى القرار الـهم، و رسلان و جودي كذلك بيدهم القرار
مو من حقنـا نتدخل
- انـي ابوها و من حقي ادخـل
حچاها و گام الحجـي و هو يكـرر شرطة
- سمعتي دجـى بنتي؟ اوافق على رسلان بشرط توافقين على غياث
اذا اجيتي لو بعد ساعة و گلتي اي موافقة..اتصـل برسلان و اگله تعال گبـع و اخذ
و استأذن و فات لغرفته
زفـرت دجى و هي تگول
- سويت الي عليه و اكثر
- گلت بلكي تقنعـيه مثل ما قنعتـي بموضوع عمليته
حچاها مجيد و اني گلت
- يعنـي انت گلتلها
- اي
جاوبني باختصار و دجى گالت بتأنيب
- و انتِ هسا يلا سمعنا صوتچ؟؟
لشوكت تبقين بلا رأيي
فتحت عيوني مصدومه من كلامها
و هي عقدت حاجـبها و امضـت بـ نفس النبرة
- لا تبـاوعيلي هيچ !
طول عمرچ قراراتچ بيد الاخـرين، انتِ الچ كيان و الچ رأيي و الچ لسان تگدريـن تعبرين عن نفسچ
موافقة على رسلان گـولي احچي، لا تخلينه هو الوحيد الي يخوض الحرب لأجل وحـدة ما نطقت كلمة علموده
دنگت راسي و حسـيت كلامها مثل السهم بگـلبي
رغم حقيقـته بس ما گدرت اتقبلـه
رفعـت راسـي و هي كـملت بـتشكيك
- اگـلچ شغلة وحـده باچر شـلون توگفين بالمحكمه و ادافـعين عن شخص و انتِ ما تگدرين ادافعين عن نفسـچ؟ الي اعرفه المحامي گلبه من حجـر و يحچـي الي يريده بدون خوف بس الي داشوفه بيچ العكـس
ختمت كلامها و امـي گالت بـ تأكيد
- حچـيچ درر اذا رأييها ما تگـدر تحچي شلون صارت محامية
- كافي ترا يعنـي والله ميصير كلكم عليه
انـي مو جريئه بهيچ مواضيع..يعني تريدوني اوگف گدام ابوية و اگـله وافق على رسلان
الكـل سكت للحظات
قبل لا تقطعـه دجى و هي تگول
- و هسا شنو راح تسويـن؟
- ما اسوي شي..ابوية رافض و اني مستحيل اجادلـه بشي
گامت على حـيلها و هي تاخذ جنطتها و ببرود گالت
- اني خـلص شغلي سويت الي عليه، ابقي هيچ و خلي الفرص تضيع منـچ و بعدين تعالي ابچـي
- بنـتي وين تريدين ابقي على العشا
گالتلها امي و هي انحنت و باستها لأيدها للحجـيه و گالت بأبتسامـة
- والله ما اگـدر
داليا عرسها بعد اربعة ايـام، و كلش مشغولـه وياها
تركتهـا بالصالـون
- الف مبروك باركيلها نيابة عنـي
- الله يباركلچ ان شاء الله
حچـتها دجى و سلمت علينا
چنت ساكته افكـر بكلامها و ما انتبهت الا لمن گاللها مجيد اني اوصلـچ
طلعوا و باوعت لأمي الي گـالت
- بلكـي حچي دجى يأثر بيچ و الأ انتِ حمار وحشي لا يسمـع و لا يفهم
- حمار وحـشي !!
حچيتها باعتراض و هي فاتت جوه و گـالت
- حتى ما تزعلين اذا گتلچ ام صابر حمار وحشـي شوية ارقـى
.
دجى
طبگ مجيد سيارته گـدام باب بيت داليا
ابتسمت و اني اگول اله
- شكراً تعبتك وياي
- ما سويت شي واجبي
- اتـفضل نضيفك شي
- تسلمين الوقت متأخر
هزيت راسـي و اجيت انزل بس هو وقفني و گـال
- دجـى
التفتت عليه و همهمت
و هـو بان التردد بعيونه لمن گال
- انـي اسف على كـلشي بدر مني
اعرف چـنت حاد الطباع و هواي اذيتچ بكـلامي، بس اظن انتِ عرفتي طبعي من خلال حياتچ ويانا
ابتسمت و اني اگـول بتفهم
- و اني يشهد عليه ربـي مسامحتك و ما شايلة بگلبي عليك، لا تخـاف اني متفهمه وضعك و ردة فعلك الچانت كلش طبيعية بمثـل وضعي
نزل راسه و حرك محبـسه الي بيده و گـال ورا ثواني من الصمت بعد ما رفع راسه الي
- اي شي اني موجود..لا تعتبريني اخوچ لأن اني فعلاً اخوچ، اي شي تحتاجـيه بس اتصلي بيه و تلگـيني هنـا
- ربـي يسلمك، اعرفـك متقصـر
ابتسم و هز راسه بأي، و بنفس الابتسامة اردف
- انتِ تتواصلين وي غياث
- قبل 3 ايام حچينه..و البارحة
- يمكن حشرية مني..بس والله انتوا تهمـوني
شنو راح يصيـر هسا
- ما اعرف تاركه الايام هي الي تحدد
غياث وگف وياي لمن عرفت بموضوع ابـوية و ما انساه هاي الوگفه
- و لا تنسين حبـه الچ
حچاها بهدوء و اني همست باحراج
- ان شاء الله
فتحت البـاب و گلت
- اني استأذن
- اذنچ وياچ
نزلت و سلمت عليه، و من دخلت للبيـت سمعت صوت سيارته تحركت
شفت الصالون بابه مقـفول يعني خلصت شغلها داليا و نهى
فتت للبـيت چانت تسوي عشـا
من شافتني ورا ما سلمت عليها گالت
- هاا اقتنع الحجـي
- يگول من ترجعين لأبنـي اوافـق
اجبري خاطره لـ غياث و اني اجـبر خاطره لـرسلان
رفعت حاجبها و گالت بضحكة
- يريد يستغل الفرصة هالـشايب
ضربتها بخفـة على كتفها و اني اگول بعـتب
- اسمه الحجي قاسم لا تگولين شايب
گامـت تضحك و هي تتعـذر
كملنا العشـا و رجعنا نرتـب ملابسها بالجنط
و علب المكـياج و كلشي تحتاجه حتى ناخذهن لغرفتـها هي و كرار الجديدة
اباوعلها ضايجة و هي ترتب بيهـن
- ليش زعلانة المفـروض تفرحين ولچ
- تمنين لو اهلي وياي
حچتها بغصة و رفعت راسها و هي تكمل
- احس نفسي محتاجه وجودهم بهذا اليوم
گوه سيطـرة على دمعت و انـي اگعد بصفها احتضـنتها و گلـت
- و انـي هنا، اني أهـلچ كلهم
بچت و هي تلف ايـدها على ضهري و تگول
- بوقت چـنت محتاجه احد وياي اجيتي انتِ، ما اعرف شلون اجازيچ على كلشي سويتي الي
- اني الي چـنت بحاجتچ داليـا
اثنيـنه لگيـنه الي نحتاجه ببعض
هـزت راسها بأي و ابتعدت تمسح دموعـها مبتسمه بهدوء
رغم الفرح..بس چانت اكـو غصة
اكـو دمعـة تريد تـوگع
انمضت الاربعـة ايام و اليوم زواجهـا لـ داليا
هوسـة و خبصة
و ضحكات فرح تتعـالى، رفضت احـد يمكيجـها و گالت محد يطخ وجهي غيـري
و خلينـاها على راحتـها
سويتلها التسريحة و نهـى تكفلت بنـقش الحناء الي على ايدهـا
بنـات عمها اجـن..و خالتها كـذلك و بناتها
اجواء حلـوة و سعيدة، فرحـة كرار و دالـيا چانت واضحه بوجوهم
من اجا اخذها مـن الصالون شفته يحاول يخفي توتره
حقـه سنين و هو ينتـظرها
طلعنا للـقاعة و چـانت اجواءها حلـوه
اصـرت عليه اني و نهى ما نفـارقها و نبقى وياها لحظة لحـظة
عيوني ما گدرت اكتم دموعهـن و اني اباوعلها هي و كرار لمـن رگصوا سوية على انغام اليـسا الهادئه
دعيت بگـلبي ادوم هاي الفرحة و السعادة
داليـا رغم لسانها السليـط و تصرفاتها الجارحـة
و قوتها الي تظهرها دوم
بس ماكو احـن من گلبها و اطيب مـنه، مـاكو بحنانها على الغـير
خـلصت الحفلـة
و زفيناهم للبـيت..و اني رجعت للبيت
طگيت الباب بالقفـل و صوته تردد بالبيـت الفارغ من سواي
اباوع لكـل ركن بي و احس اشتاقـيت الها من هسا
و مـرت هيچ الايام بين الصالون و الكوزمتك
بالنهار مشغولة وي البنات بالصالون فـ ما احس بالوحدة
بس بالليل الگه نفسي وحيدة بين اربع جدران، دايماً اروح لـ داليا بالليل اسهر وياها هي و الحجـيه و كرار
و مرات هما يجـون عليه
الحمد الله داليا مرتاحة و فرحانـه و ما تخجل من تعبر عنها
خـلت الحجيه امه لاكرار بعيـونها
بنص شغل الصالون لمن كرار واگف بالصيدلية تترك الي بيدها و تروح الهـا
مرة جابتها وياها للصالون و كلش فرحت الحجيه على لمة البـنات و سوالفهـن
چانت الحجـيه من النوع الي متحب تطـلع كل وقتها تقضي بالبيـت
بس بعد زواج كرار و داليا و انتقالها الـهم
گامت دلـو اطلعها وياها اذا الها روحة للسوق القريب مـنه
تخليها يم الباب مع الجـارات يتبادلن الحديث
حتى نفسيتها استعدلت
من سألت داليا اذا ضاجت من اعتناءها بالحجية
گـالت ابداً..طول عمري اعتنـي بأمي و الحجيه امي الثانـيه
و الاعتناء بالكـبار اجـر بس دعوتها بالله ينور طريـقچ و يسعدچ هاي اعتبرها كنـز من كنوز الدنيا
اما علاقـتي بـ غياث
فـ چانت بلا عنوان، ما اعرف شنو اسمـيها
من بعد اتصاله بيه بيومين من علمي بوفاة والدي
ما حچـينا بعد..بس مجرد رسائل يسألني عن حالي
هو چـان المبادر دوماً
رسائل لا تتعدا العـشر مسجات باليوم..هو مشغول و انـي كـذلك
بس هذا البـعد خلاني افكـر و اعيد حسابـاتي
خلال شهرين تواصلت بيها وي جـودي
گالت رسلان ما رجع تقـدملي
حسيتها خايفة لا قطـع الأمل و بطل يتقدم الها من بعد كمية الرفض الي تلقـاها
غلقت الباب زين و خليت العشا و انـي مخليته على فيلـم و بنفس الوقت ارد على مسجـات الحجز بالصالون
الساعة چانت بالـ9 و نص
الجـو بارد صار و شغلت التـدفئه
قطبت حاجبي لمن سمعت صوت الباب يندگ، گلت يمكـن داليا بس هي تتـصل بيه حتى افتح الها الباب
خليت حجـابي على راسي و طـلعت
چنت لافه حولي وشاح صوفـي احـتضنته اكثر من حسيت بـ لفحة برد ضربتني
تقربت من الباب و باوعت من زرف صغير
حـبست شهگتي من شفـت الي خلف الباب
ايدي رجـفت..ما عرفت بوقتها شوق لـو تردد
بس لگيت نفسي افتح الباب
من شافني ارتخت ملامحـه و ابتسم، و اني رمشت بعيوني و گلت
- غياث
- ماكو الحمد الله على السلامة
انحرجت و اني اگول
- اسـفة الحمدلله على السلامة
- الله يسلمچ، ماكو تفضل
حچاها بذات الابتسامة و اني بنفس الاحراج ابتعدت و گلت
- تفضل
دخل و شفته ما جاي بسيارته
دخل جوه و هو يگول
- متوقعت باردة الدنيا و طلعت بس بالقميص
حچاها و نزع حذاءه و دخل للصالة
و اني چنت امشي وراه و الصمت مستحلنـي
التفتت عليه و گـال
- ضجتـي من زيارتي
- لا بس تـفاجئت..شوكت اجيت من سفرك ؟
- المغرب وصلت بيت الحجـي
حچاها و گعد يم الصينية، ضحك و هو يگول
- جوعان يصير اكل
عجبـني كباب الطاوه
- الف عافية
همست بيها و گعدت مـقابل اله
هو سمـه بأسم الله و گعد ياكل و اني بس اباوعله
هسا يلا ادركـت حجم اشتـياقي اله لمن وگع نظري عليـه
كمل اكل و گلتله اني شبعت..حظرت الچاي و جبت الي و اله
انطيته اله..و اجيت اگعد بعيد عنه بس لزم ايدي و خلاني اگعد بصفـه
غمض عيونه و باسني من گصتي و ايده محتضنه اكتافي و الثانـيه كوب الچاي
- لگـيت نفسي تارك اهلي و ماخذ اقرب تكسـي حتى اجي اشوفچ ضلعـي
نزلت راسي و فاجـئني لمن گال
- شنو قررتـي
- مادري
- شهرين و ما عرفـتي قرارچ
رفعت راسـي اله و نبض گلبي بسرعة لمن صارت عيني بعينه و بـ تعلثم گلت
- مو بسهولة اعرفة
قطبت حاجبي لمن ترك كوبـه
و التفتت عليه..مد ايده و سحب گلاصي من بين ايديه و هو يـگول
- هواي فكـرتي دجى هواي مو شوية
- شبيك غياث
همست بيها و هو رفع حاجبه و گـال
- شبـيه؟ دجـى
اني جاي اليوم حتى اسمع قرارچ، حتى من باچـر تنقلين اغراضچ للشقـة
اسبوعين و يصير عرس صفد و مجـيد، و انـي ما احب السكن وحدي
- من باچـر؟؟ يعني حتلو رافضة غصب عني
- مع الأسف اي
هنا انتِ وحدچ و اني ما اگدر اتركچ هيچ
- مو وحدي..داليا و كرار وياي
- محد وياچ..من تدخلين لهذا البيت وحـدچ
و ما اتقبل فكرة زوجتي تسكن وحدها
انتفضت من مكاني و گـلت باعتراض
- ما اگدر..الصالون و الكوزمتك ما اتركهن
- الكوزمتك اعذريني لازم تتركينه
الصالون ما عندي مانع تكملين شغلچ بي لأن اعرفچ حابه هـذا الشغل
چان يحچي بجدية و ببرود
خلاني امسح على گصتي و ايدي على خصري و بهدوء گلت
- غيـاث ما اگدر تعودت العيش وحدي
- تتعودين تعيشين وياي، للمـرة الألف دجى كافي نظلم انفسنا و بالأخص انتِ
الصار سوء تفاهم و كلنا اعتـذرنا و علاقتچ بأهلي رجعت
بقت عليه اني؟؟
سكتت و هو وگف على حيله و وگـف مقابل الي
حاوط وجـهي بأيديه و گال بهمـس
- ما غاب طيفك عن عيوني ليلةً
أغمضت قلبي أو أنا فتحتُ
يا آخر الأفكار قبل النوم ،
يا أولى ابتساماتي إذا ما قمتُ
تأتين ذکری کلما سـهر الهوى
و بثوب حلم إن قدرت ونمت
بالماء ما بللت قلبي مرة
وبدمعتي ما في الحنينٍ بكيتُ
خـتم تلك القصيدة بقـبله دافئه على شفتـي
بداية ليـلة شتائيه عادي..كوب شاي و مدفئه ادفـى من قلوب بعض البشـر
انتهـت بقلبـه ارتـوت روحي فيـها، تراجعت للخلف بس حاوطت خـصري ايديـة
و كانه بحركـته يعلن تشبـثه بيه و عدم نيته بالابتعاد
.
السلام عليكم و رحمة الله و بركاته
شلونكم ان شاء الله الكل بخيـر
اتمنى البارت عجبكم
ارائكم و توقعاتكم ❤😅
اسفة على التأخـير الدنيا مرات تحب تمرغل الواحد 😅❤️🩹
المهم 😁😁 هالبارت ان شاءالله يكون تعويض حلو الكم 💛💛
صح علم دجى بوفاة ابوها مؤذي 💔بس چان فرصة حتى يگدر غياث يقترب منها
و الله يرحمه و يجعل مئواه الجـنه 💔💔💔
و بس والله
نلتقي على خير احبتي
و استودعكم الله الذي لا تضيع ودائعه ♥