| دُجـى في جوف البـغي |

•الفـصل الثالث و الثلاثون•

#دُجى_في_جوف_البغي
#بقـلم_الراويه
#الفصل_الثالث_والثلاثون

بسـم الله ♥

صلوا على النـبي 🧡

ضلعي الأعوج لا يجد من يقوم اعوجاجه...

ضلعي الاعوج يظلل قلبك فلا تنسى هذا لا تنسى...

❤ من احدى المتـابعات
.

دجى

دخـلت للصـالون و اني مشغولة التفكـير بـ تصرف داليا
اول مرة تـتصرف وياي بهاي الحـده

چانت نهـى تصفف بشعر زبونة
تقربت يمها و همست بتساؤل

- شبيهـا داليا

رفعت اكـتافها بعدم مـعرفة و هي تگول بذات النبرة

- ما اعرف، اجـاها اتصال و طلعت متعـصبة مفهمت شبيها

- اجا للصيدليـة و هي متعصـبة و گالتلي اطلعي

- تريد تحچـي وي كرار؟

هـزيت راسـي بأي و ابتعدت و هي كملت شغلـها
عشر دقايق بالضبط و دخـلت
باوعتلـها چانت اهدأ، بس بعـد اثار العصبية على ملامحهـا
دخلت للبيـت و اني اجيت اروح وراهـا، بس نهى گالت اتركيها وحدها هي تبـرد و تحچي

امتـثلت لكلامها و رجعت للصيـدلية
من فتت انتبهت لـ كرار، سـاكت و حاط ايده على حنچه
گعدت بمكانـي و ترددت اسأله
اجت بنـية اشترت من الكوزمتك و من طلعت
التفتت بتفاجـئ لـ كرار الي گال بـشرود

- داليا تگـول اذا تخطبني فـ اني موافقة

گحـيت بصدمة و اني اضرب على صدري، اتسعت عيوني متعجبة و هو ابتسم شبح ابتسامة و گال بضحكة

- انـصدمي مثل ما انصـدمت

رفرفت رموش عيوني و اني اگول

- ليش شنو صار؟

- عمهـا يريد يخطبها لأبنـه، و هي ما تريد
گاللها اذا ماكو احد بحياتـچ فـ ما عندچ حجـة للرفض

ما گـدرت اكتم ضحكتي و اني اگول بحماس

-و انت؟؟ شنو گلتـلها

رمش و گال بـدرامية

- افكـر تعرفين هذا قرار مو بسهولة يتخذ

رفعت تاك حاجبي و هو طگـها ضحكة و گال

- يابه الگـمه وصلـت ليمي تريدين ارفضها و اني الي صارلي سنين صايـم؟؟
گلتـلها اني من اول مرة خطبتچ طـلبي قائم لحد هـاي اللحظة

غـورقت عيوني و اني اگول

- زين هي ليش متعصـبة

- لأن بينت الي عدها مـشاعر ناحـيتي

حچاها و هو يجهاد يكتم ابتسامتـه
ابتسمت و بـ ود گلت

- فرحت الكم، المفروض من سنتين تگـولها الك بس تعرفها عنيدة و جبانة رغم القوة الي تمتلكها

حچيتها و هو قطب حواجبـه بعدم فهم لمقصـدي
لكن سكت لأن دخلوا زبائـن للصيدلية

خـلص الدوام و رجعت للبيت شفتها واگفه بالمطبخ
غيرت ملابسي و صليت مغـرب و اجيت وگفت يمها، هي زفرت و گالت

- يلا ما عندي شي استقبل اسئلتچ

- احسن خطوة سويتيـها

- عبالك وحدة ميته عليه و رحت بكل عين صلفـه و گلتله اذا تريد تخطبني تعال
بـربچ وين صايره هالسالفة رحت خطبته رسمي

گمت اضـحك و هي انرسم على وجهها النـدم
خليت ايدي على كتفـها و گلت

- هو يعتبر هاي موافقة منچ بعظمة السـانه گال طلبي قائم من اول مرة خطبتهـا
لا تبقين تفكرين و تتنـدمين..باوعي للجانب الحلو، گدرتـي تتخطين خوفچ

سحبت نفس و همست

- خفت لا عمـي يجبرني على ابنه، لأن كلامه چان كلش جدي دجـى
و ما لگيت الا رايحتله لـ كرار، حسيت راح اخسره و اخسر نفسي اذا ما اخذت هاي الفرصة

-و احسن شي سويتيه..كرار ما راح تلگين احسن منه

هزت راسها بأي و گالت

- انـي گلت لعمي جيرانه طلب ايدي و لحد هسا ما رديت اله خـبر، تعتقدين راح يكـشف الموضوع

- لا ما اظـن

رديت على تساؤلها و هي تنهدت
طبطبت على كتـفها و اني أشد على ازرهـا

ثـاني يوم الصبح چنه بالصالون
اجـا كرار و طلب من داليا رقم عمهـا، راد يروح اله و يخطبها من اعمـامها رسمـي

لأول مرة احس داليا متوترة..عيونها كلها خجل
نهى تباوع و خربانه من الضـحك و هي تگول

- للحـظة گلت هالبنـية الخجل و الـتوتر مشاعر ما تملكهن

أبتـسمت و اني مكتفه ايدية اباوعلها و بگلبي ادعـي تكمل فرحتهـا

و فعلاً ثاني يوم اجـا عمها و گعدت وياه بالصالة يحچـون
بقيت بالصالـون واگفه، لمن راح عمهـا هي فاتت
و نهى طفرت من مكانها و گالت

- هـا بشري عمچ خوما اعترض

شوية شوية انـرسمت ابتسامة على وجهها و هي تگول

- لا، البـارحة متصل بـي كرار و حاچين سويـة
و عمي سـأل ابنه و گـال اله عن موضوعي و اذا يريدني، و ابنه گـايل اعتبرها مثل اختي
و منطي موعد لـ كرار حتى يجي عليه و يطلبني رسمي

نهى گـامت تگمز بمكانها و هي تضحك فرحانة
و اني حضنتها و هي همست

- مو بس طلب عمي الغير قراري، كلامـچ وياي چان دافع الي

وخرت عنها و غورقت عيـوني و اني اشد على احتضانـي لأيدهـا

دائماً اسمع لحظات الفرح تمـر بسرعة
و فعلاً هيچ صار، و ثاني يوم راح كرار مع عمـامه اثنين و احد اخـواله و طلبـوا ايدها لـ داليا
صح عمها الثاني بالأول معترض لكـن عمها الضابـط موافق و گايل القرار الاول و الاخير لـ داليا

و هـي اكيد انـطتهم موافقتها
و خـلال يومـين انشغلنـا كلش لتحـظير عقـد القران
الي راح يصير بيـت عمها الضابط نـاصر

تحظـرت بالصالون و اني سويت الها الشعرها و نهـى المكياج
چانت متوترة و خايفة..مرة تگول مكياجي اوفـر كلش خففوا رغم تعرف انو خلـتلها نهى مكياج مناسب لهاي المناسبة

لبسـت قفطـان ابيـض مطعم بالذهبي
چـانت انيقة كلش، حصنتـها بالايات و قريت ادعيـة لتسهيل الوضـع و حفظها من كل عين
اجـا ابن عمها و اخـذني اني وياها..امـا نهى فـ گالت ما اگدر اجـي و اخجل بالخطوبة اكون متواجـدة

وصلنـا لبيت عمها و چـان فيـلا من ضخامته و علـوه
انسان متمكـن و ما شاء الله هـواي معروف بين الناس

حز بگـلبي لمن شفت حالته و من خلال كلام داليا عنهم انو حالة عمها الثاني كذلك زينة
و تاركيـنها لـ داليا..صح ما ينخاف عليها بس تبقى بنية بزمن حقيـر مثل زمنا

استقبلتنـا زوجتـة و بناته، و ما شاء الله چـانن كلش مرحـبات بوجودنـا
دخلنا للصالة و چـانن مزيناتها
انصـدمت داليا و خجلت و هي تگول الهم ليش كلفتوا نفسكم
ابتسمت الام و هي تگـول

- لا داليا ما حـبيتها منچ، اليوم عقد قرانـچ و لازم كلشي على أكمـل وجه، و اكيد اقاربنا و اقارب كرار راح يكونون موجودين شنو يگولون بنت اخو الضابط ناصر حفلة قرانها بسيطة؟؟

باوعت لداليا التزمت الصمت
ما ردت اظن بيها ظن سوء، بس واضح تهتم لكلام الناس كـلش

الميز چـان مرتب كلش و الزينـة كذلك
متفـاوت الوانـها بين الذهـبي و الأبيض، و مخليات عـين زرقة چبيرة بالحـايط
مكان كلش حـلو بصراحة

اجوا بيت عمهـا الثانيـن و خالتهـا لـ داليا
چانت چبيرة بالعمـر بس واضح مو راضيـة لأن بس تباوع بطرف عينهـا
و اجوا من اقاربـهم، اجـوا الزلم و اهل كرار
الحجـية چانت وياهم

فرحت كلش من شفتها دعيت ما تنسـى الي ديصير لأن حتى تفرح لأبنـها
گعدت يمها و اني اگوللها

- يمـه فرحانه اليوم انتِ

گامت تضحك و هي تگول

- اي اي فرحانه، وينها داليـا
هو گال هناك تلگينها

داليا چانت ملتـهيه تسلم على اقارب كرار من فرغت منـهم اجت سلمت على الحجيه و باستها من راسـها

لحظات فرح چـانت لولا تعليقات خالتها لـ داليا لكن الحمد الله كـلشي مر على خير ما يـرام، اجا الشيخ و عقد الهـم و تعالت اصوات الهلاهل و تبـريكات

وگفت على جهه و اني اباوعلها بعيون مدمعة و هي تبتسم بخجـل
بصعوبة كتمت دمـعتي، و دگ تلفوني چـانت نهى
الي صورت الها كلشي و هي تگول افتحي كاميرا تريد تحچـي وي داليـا
سعادة و فرح خلتنـي اطلع من تفكيري بغـياث و كلشي مر بحياتي

رجعنا للبيت بعد ما وصلنا ابن عمها
سبحت و غيرت ملابسها و اني كذلك، گعدت بفراشي و هي دخلت لغرفتـي
ابتسـمتلي و گالت

- شكراً لوگفتچ وياي، بهذا اليوم ما حسيـت انو ما عندي اخت

دمعت عيـوني و اني اگول بخنگه

- و انتِ خليتينـي اعيش هذا الشعور، هذا لا شي امام افضالچ عليه
الله يقدرنـي و ارد الچ كل جميل سويتي الي

گعدت بصفي و لزمت ايدي و بحنيـة گالت

- مسويـت الا واجبـي، ما اريد اسمع منچ هيچ كلام زين

هزيت راسي و هي باستنـي من كتفي و صبحت عليه و طلعت
و اني بقيـت اباوعلـها و بعيني دمعة و على شفتي ابتسامة فرحانه لأجـلها

.

صفد

طـلعت من الجامعة و چـان بأنتظاري مجـيد، ابتسم الي و صعـدت وياه
و هو جر ايدي و باس كفها و گـال

- صاير الوجه احمر من الحـر

ضحكت و هو شغل السيارة و طلعنا متوجهين للسوق بـس قبلها ناخذ جودي من المكتب
علمود تحظـيرات الخطوبة، چان مجيد يحچـي وياي بحماس و اني اقابله بأبتسامة
حـلو يكون المـقابل مقدر وجودك..من تكون حاظـر يوليك كل اهتمـاماته

وصلنا للمكتب الي تشتغل بي جودي
و دگ عليها مجيد و طلعنا للسـوگ، هواي افترينـا و اشترينا اغراض
چنـت اتمنى لو الحجـيه ويانا..بس هي تتعب بسرعة من المـشي گالت انتوا شنو تحبون اخذوا و اختاروا و جودي وياچ

كملنا مسواگ و بقـى موضوع الصـالون و البـدلة
افترينا لمحلات تأجير البـدلات، و اختاريت بدلـة ذهبيه متكون منـفوشه كلش
و تصميمها بسيط و انـيق كلش، گالت جودي اكو بالچ صالـون
و ما لگـيت بالي الا صالون داليا..و الي تشتغل بي دجـى

گلتلهم عليه و مجيـد گال براحتچ المهم الي يعجبچ

علاقتـي بـ مجيد..چانت علاقة صداقة اكثر من كونـا قاطعين مهر
ما بينا قيـود او سوالـف الغيـرة و لازم يوميه نحچـي و ننطي موجز عن يومنا، مجيد چان متفهم كـلش
صبور عليه لحد ما بديت اتعـود عليه
رغم ما چنه نحچـي بشكل يومـي بس هالشي ما سبب النا مشاكل
بالعكـس مرات يگول ما اريد نبقى عـلى تواصل، لأن كثرة الكلام مرات تسوي مشاكل رغم الحمد الله ما بينا اي شي

ثاني يوم العصر اخذنا مجيد للصالون اني و جودي حتى اخذ حجـز
رغم اگدر اخذ عبر التلفون بس ردنـا نحچي وي دجى
و اطلب منها الحظـور للحفلة الخطوبة
چـان بالصالون فقط داليا و العاملة الثانية و زبونتـين

رحبت بينا صاحبة الصالون و گـعدت جودي تحچـيلها عن حفلة الخطوبة الي بعد باچـر، و شوفتها صورة الـبدلة حتى تشوف الي يناسبها

و خلال الحـديث دخلت دجـى
شكلها ما تفاجئت من شافتنا لأن سيارة مجيد برا
وگفت اني و جودي و هي سلمت علينـا و رحبت بينا
و داليا گالت الها علمود خطوبـة و شوفتها البدلة لأن هي مسؤولة عن الشعـر
گالت تمام بعد باچـر موجودة انـي، و بكل برود فاتت لداخل البيت
حسيت جودي ضاجـت كلش لأن ما ابدت اي اهتمام النا
كانوا احنا احدى الزبائن

باوعت لـ داليا و اشرت الها عادي احچي وياها هناك؟
بصعوبة فهمت الي اقصده، و من فهمت بعد ما وضحت الها جودي گالت بترحيب

- اكـيد گلبي البيت بيتچ

ابتسمت الـها و فتت للبيت على الحديقة، چانت تـوي طالعة من البيت و بيـدها تلفون و سماعات
ابتسمتلي و هي تگول

- محتاجه شي صفد

هزيت راسي بـ لا و اشرتلها اريد احچـي وياچ
شكلها استغربت طلبي بس وافقت و هي تگول

- تعالي نگعد بالصالة الجو حار

دخلنا للبيت و جلسنا بالصالـة، گعدت مقابل الي و اني حركت ايدي و سويت مثل الي دالبس خاتم و قصدت بيها بعد باچـر حفلة خطوبة
ابتسمت و هي تگول

- الف مبروك يا رب..شلونچ انتِ و مجيد

اشرتلها الحمد الله مرتاحة
و ترددت شلون افاتحـها بالموضوع، بس قـويت نفسي و اني احـرك ايدي بما معنـاه

تگـدرين تجيـن على الخطوبة، كلش افرح اذا اجـيتي
و الحفل راح يكون بيت الحجـي، لأن عمامي مو موافقين على ارتباطـي بـ مجيد فـ ما اگدر اسويها عدهم و الشقة صغيرة

هي بـقت ساكته و حكت گصتها
انحـرجت من طلبي لذلك گالت ورا لحظات

- شايفين كـل الخير يا رب، بس والله ما اگـدر
انـي مشغولة بالصالون ، و انـتِ تعرفين الي صار

أشـرتلها شي مضى و انتهى
و هي ردت بشبه ابتسامة

- صـح بس يبقى اثره، اسـفة صفد بس والله اسفـه الموضوع خارج عن طاقتي

حسيت بخيـبة امل مع انـي كنت متوقعة رفضها
هزيت راسي بأي و استأذنت و طلعت وياي و هي رجعت اعتذرت
گلتلها مـيخالف و حقچ هالشي

دخلت للصالـون و كملت اتفاقي وي داليا و طلعنا
صعدت بالسيارة و شفت دجى فاتت للصيـدلية الي بصف الصالون

مشينا بالسيارة و سألتنـي جودي شنو حچيت وياها و گلتلها عن الصار

و خلال يومين انشغلت كلش و چـنت ملتـهيه بموضوع الخطوبة
الصبح رتبت انـي و جودي المـيز و اجت رند و خواتهـا
و هماتين ساعدنا خطية
لمن اجا مجيد ياخذنا للصالون رنـد گالت اجي وياكم
لأن شايفه الشغل مال الصالون و عاجبها
ما گـدرت اگوللها لا تجين..مو علمود شي بس ما ردتها تشوف دجـى

فـ گلتلها تعالي
اخذنا مجيد و نزلنا باب الصالون و البدلة شايلتهـا جودي، دخلنا و رحبت بينا داليا ترحيب حـار
و لا كـانها الي تجاوزت علينا بيـوم الي اجينا نعتذر بي من دجـى

دخلت العاملة الثانية و الي عرفـت عن نفسها بأسم نهـى چانت بشوشة و انسجـمت كلش وي جودي

گعدت و بـدت داليا تمكـيج بيه و نهـى تمكيج رنـد الي طلبت لون سموكـي وي فستانها الاحمـر و بالاخير جـودي

استغربت عدم وجود دجـى، و فكرت يمكن ما راح تجي متريد تقابلنا
لكن قطعت تفكيري لمن دخـلت و هي محملة بالاغـراض شكلها ما منتبه النا و هي تگول

- دلـو ليش باب البيت سادتـه مو گتلچ هياتني جايه بالطريق

سكتت و هـي تباوع بالوجوه
لكن توقفـت نظراتها على رند الي فتحت عيونها مصدومه، بعدت ايد نهى عنها و هي تگول

- ياا هاي دجـى هنا متوقعت اشوفچ بصراحة

و ببرود ردت دجى

- و لا انـي

حچتهـا و گالت باعتيادية رغم نظرات داليا المـستغربه

- اخذ المسواگ للبيت و اسوي شعـرچ جودي بين متكمل نهى او داليا حتى تمكـيجچ

- تـشتغلين هنا؟؟

حچـتها رند و هي ترفع حاجبهـا، زفرت و اني احسها راح تسوي مشكلة احنا بالغنى عنـها
و بذات البرود ردت دجـى عليها

- شنـو تشوفين گلبي؟؟

- ههه خطيـبة دكتـور تشتغل بصـالون

فزيـت لمن ضربت داليا قبـضتها على ميز المكياج و هي تحچـي بنبرة حنق

- و شبيه الصالون؟؟ بس لا هم حطيتوا عليه شبهه
مو گاعد نصلـح بوجوهـكم

لـزگت بالكرسي و هي باوعتلي و گالت

- بس هالوجه الحـلو ميحتاج شي

گوه ابتسمت بس شنو خفت من عصبيتها
و رند حتى تصلح الموقف گالت

- لا استغفر الله مو قصدي اقلل منـكم، بس تبقى سالفة طبقـات

گلبت دجى عيونها بملل و هي تگـول

- و داليا خطيبهـا صيدلاني يا حـضرة المحامـية يعني سالفة الطـبقات الي بنـظرچ كذلك تمسها
تريدين نكمل الچ اگعـدي و على راسنا بس بدون تجاوز ترا ما الي خلگ سوالف

ختمت كلامهـا و دخلت للبيت
و جـودي تقربت من رنـد و حچت باذنها و گعدت رند متأففه
شوية و رجعت دجـى..لابسة دشـداشة ربع ردان و لجوه الركبة لونها اسود فـاحم و مطرزه بـزيتوني
لأول مرة انتبه لدجـى..فعلاً چانت حلوه و بشرتها بيضـة و خدودها من الحر صايرة حمـره
و شعرها قصير كلش مثل شعر الاولاد
و هاي اول مرة انتبه لوشمها الي ورا اذنـها..حسيت نظرات رنـد ركزت عليها و هي خلخلت اصابعها بيـن شعرها
و گعدت تحچـي وي جودي علمود تصفيـفة الشعر الي راح تعتـمدها جودي

بدت تصففه و جودي تحچـي وياها
و دجـى چانت تحچـي بشكل اعتيـادي، و كل شوية انتبه لـ رند تباوعلها و تزفـر

كملت شعر جودي و اخذت مكان رند حتى تتمكيـج، و بدت دجى تسأل رنـد عن شنو تحب تسوي الها تصفيـفه
و بنبرة تهكميه گالت رند

- اريـد شي جديد مو دارج
و اذا ما عندچ فكرة انطيـچ

ابتسمت دجى و هي تگـول

- لا عرفت شنو اسويلـچ، و لا زبونه سويت الها شعرها و راحت معترضـة

گالت نهى بأبتسامـة

-و انـي اشهد، صح دجى اشتغلت وراية هنا بـس تغلبت عليه

- انتِ الأصل نهاوي

حچتها دجى بأبتسامـة و اني فرحت لأن دجـى مرتاحة هنا و شكل علاقتهن قوية و بيها الاحترام و المحبة متبادل

رجعت رند تحچـي بتساؤل

- صدگ دجى تجـين للخـطوبة

ردت بدالهـا داليا الي گالت

- طبعاً تجي..حماتها و حماها شلون ما تحظر الحفلة

باوعتلها دجى باعتـراض بس التزمت الصمت
و كملت شعرها لرنـد الي بس تعلق اريد هيچ و هيـچ
چنت متوترة و اريـد الوقت يمـضي، خايفة لا تصير مشكلة بين رند و دجـى
بس الـي يطمني انو الاخيرة دترد عليها بكل بـرود و ما مهتمه الها اطلاقاً

.

دجى

كمـلنا البنات من تصفيف شعر و مكياج
چـانت صفد رغم نزاكتـها بس جمالها طاغي، كلشي على اتم وجه
من مكياج و تسريحة شعرها نهايةٍ بفستانها الي زادها جمـال

بستها و اني ابارك الها، اجـا مجيد و طلعنا و اخر وحدة طلعت هي رنـد الي باوعتلي بنظرة اخيرة و مـشت

گعدت ارتب بميز تصفيف الشعـر و وگفت يمي داليا و هي تگول

- هـاي رند شبيها؟؟ احسها تريد تاكلچ

- غير تحبه لغياث و ما منطيها مجال

- هو ينلام، اخلاقها دميمـه و رافعة خشمها
يعع لعبت نفسي منها و من كلامها

- خلي تولـي هاي علاجها التجاهـل

هنا تدخلت نهى و هي تگول

- صدگ راح تروحين للحفلة

- اكيد لا

رديت و غلقت حقيبة السشوار و داليا اعترضت بغضـب

- و ليش عيني ما تروحين

- عدنا شغل و ما اريد افوت لهذاك البيت مرة ثانية

- لا عيني مو بكيفچ، تروحين و رجلچ فوگ راسچ

حچتها داليا و اني التفتت الها و بسخط رديت

- لا گـلبي ما اروح

- تريديـن حظرة المحامـية ترگص بچفيه لأن ما تجين
تروح تحوم چنها حية رقطـه حول غياث، ولچ روحـي و اثبتي وجودچ
شفتي نظراتها عليچ من فتي لو لا؟؟ واضح الغيره كاتلتها كتل

گالت نهى مؤيده كلام داليا

- بلي والله اني امكيج بيها و هي بس تباوعلـچ
يعني هي مو قاصره شايلة جمال و اناقـة و فوگاها محامية يعني لازم عقلها اكبر من هيچ، بس واضح غايـره منچ

ضحكت و اني اغم بنفسي و اگول

- غايره منـي على طيحان الحظ لو اكل التبـن

- طبعاً تغار ماكو واحد ما يغار، بس حب غياث الچ يموتهـا
روحـي و فوتي بعينها لا تخلينـها تفرح من تشوفچ ماكو

مچـنت مقتنعة فـ تجاهلت كلامها لـ داليا
و من شافتني ما مهتمه خـلت ايدها على كتفي و خلتني التفت عليها و هي تحچـي بعصبـيه

- تروحين و غصب عنچ
تريدين تتغاضين عن اهانتها بحقچ والله خطيبها دكتور و هي تشتغل بصالون؟ تأنقي و روحـي و موتيها من غيرتها و اوگفي يم غياث مو لسواد عيونه بس رد اعتبار لنفسچ

و حتى اقتنع اكثر گالت نهى بحماس

- كلام دلـو صحيح، هسا نرتبچ و نلبسچ احلى فستان و روحي فوتي بعين كل واحد يكره وجودچ
مو بعظمـة السانها گالتلچ الكل يحچي عن اختفاءچ بيوم العـرس؟؟

رجعت داليا تگول

- روحتچ تگطع كل شك بگلبهم و الاهم تـخرس السنتهم عنچ

هـزيت راسي بأي و ما حچيت، رغم اقتنعت شوية بس اكو تـردد بداخلـي

باوعت الساعة راح تصير بالاربعة و الحفلة بالـخمسة
عرفت الي يدور بالـي داليا و بسرعة گالت

- بعد وكت هـسا امكيجچ على السريع و انتِ شعر ماكو صايرتلي بـوي الاخت

- و الفستان

صاحت نهـى و رجـعت تگول بتوتـر خلته يوصلني

- عزاا و الحـذاء

صـاحت داليا بيها

- تنحـل عدنا فساتين و الحذاء مو مهم بگد الفستان

- اي هم صح

حچتها نهى و اني زفرت بتوتـر
خلال دقايق گـدرت نهى اطلعلـي فستان من الي معروضات للايجار بعده بالچـيس
اسـود و لجوه الركبة..قماشـة ذاب نفسه بس بي نفـشه و من عند الخـصر يكون ضيق
قصـة الرقبة مثلثه و شوية واسعة و اكمامـه منفوشة فوگ الكوع بشوية

كملت مكياجـي و بس مشطت شعري خليته ليورا
دخلت للبيت بدلت و لبست الحذاء و طلعت من الغرفة، و هنا چانن بالمـمر ينتظرني
بس شافتني داليا گعدت تصلي على النبي و تفتر حواليه
و نهى گالت و هي تـضيق نظراتها

- بربچ لو اني زلمـة چانت تزوجـتچ، طرگاعة والله

- كافي ترا مو لهاي الدرجة

حچـيتها و اني اباوع لنفسي بالمراية الي بالمـمر و اني اتجاهل مدح داليا و نهـى الي

گلتلها شلون اروح گالت داليا اني و كرار نـوصلچ
فـ هي اتصلت بي و اني لفيت حجـابي و لبست عبايتـي
دقايق و اجـا
الساعة صارت بالـخمسة و ربع، وگفنا گدام الباب و گـال بالرجعة بس اتصلي احنا نجي ناخـذچ

لزمت گلبي من نزلت و هما راحوا
البيت هوسة و هواي اطفال گدام الباب، و صوت الـدي جي مشتغـل
حطيت ايدي على گلبي و انـي ادعـي انو ما اشـوفه لـ غياث
الباب چان مفتوح فـ دخلت
كل ما اخطي خطوة بكعب حذائي اصوات الموسيقى ترتفـع

دخلت للـصالة و چانت مكتضـه بالنسوان و البنات من مختلف الاعمار
و صفد گاعدة على كرسي و گـدامها الميز و ابتسامة على ملامحـها

- دجـى؟

التـفت على صوت جودي الي ابتسمت الها
چانت لابسة فستان زيتـوني منسدل على جسـدها

لزمت ايدي و هي تگول بأبتسامة

- كلش راح تفرح صفد لأن ضاجت من گلتي ما تجي

- اريد اسلم عليها بس هوسة يمها

- تعالي وياي، الحمد الله اجيتي من وكت لأن فد شوية و يلبسون الحلقات

- تمام بس انزع عبـايتي

حچـيتها و خلعت العباية و گالت جودي و هي تبتسم

- ما شاء الله طالعة حلوة

- عيونچ الحلوة

حچـيتها و هي اخذت العباية و الجنطة مني و صعـدتهم لغرفتهـا
نزعت حجـابي الشيفون الاسود و خليته بيدي و دخلت بين الجمـوع و بس شافتني صفد وگفت على حيلها
و هي تبتسم فرحانه..حضنتهـا و اني احس بنظرات رند القريبة منها عليه بس طنشـتها

الحجـيه ما چانت منتبه الي، بس جودي راحت گالتلها لأن چانت گاعده يم نسوان چبيرات بالعمر
من شافتني انفرجت اسـاريرها و تقدمت عليه
دنگت و احتضتنـها و هي ترحب بيه بحرارة

مشاعري القديمة ناحيتهم رجعت، و اني الي گـلت معزتهم بگلبي اختلفت
بس لگيت نفسـي بعدهم بنفس المكانه

شوية و گـالت جودي راح يدخل مجيد يلبس الحلقة، خليت حجـابي على راسي، و اني واگفة على جهة اليميـن
هو دخل متأنق و يبتسم..فرحان كلش و الله يديم فرحته

من شافني رفع حاجبه و كبرت ابتسامته هز راسه بتحيه و اني سـويت نفس حركته

چانت لحظات حلـوة..لمن لبسها الحلقة و ارتفعت الاهازيچ و الهلاهـل
لبست الحجيه صفد گلاده ذهـب و اساور و مجيد التراچـي، اخذتلهم صورة وحدة بعد ما شديت انتباهم الـي
ردت احتفظ بهذا اليـوم الحلوه

طلع مجيد و بدت الاغاني تـرتفع
و البنات دخلن بحلبة مصارعة مو رقـص، كل وحدة بيهم تبين امكانيتـها

چنت واگفه قريب لصفـد لمن نغزتنـي بكتفي باوعتلها و هي اشرتلي اروح
ضحكت و اني اگول بمرارة

- ما احب الرگـص هيچ احسن

سكتت و بينت بملامحها الحزن و يمكن فهمت شنـو ارمي اله
من بين البنات چـانت رند
الي تباوعلي و تبتسم باستفزاز لأن چـانت امهر وحدة بيهـن
حركاتها و تغنجها خـلى النساء تباوعلها و تصفـگ

گلبت عيوني بمـلل من كل حركة تسويهـا و تباوع عليه كانـي مهتمه الهـا
چـانت طاشة اغنية " جبنالك خـوش بنية " شغـلوها و كل البنات تفاعلن عليـها
چنت فرحانه و اني اباوع لسعادة صفـد من گامت بعد ما جودي خلتها توگف وياهـن

رغم  فرحـتي بس چانت رند منغصتها عليه
استفزتنـي بحركتها و هي تباوعلـي و تضحك لمن اخذت بيد صفـد و بيدها الثانية فركـت الابهام على السبابـه حتى تغيظنـي

هنا گـلت كافي، تحملتها بما فيه الكـفاية
و مثل ما يگـولون حارب عدوك بسـلاحة، اتجهت للديجـي و گلت للبنية الي واگفه تختار الاغاني و ما چانت الا سمـا اختها لـ رند
طلبت منها التلفـون حتى اغير الاغنـية و چانت الطـف من رند بهواي
مـچنت اريد ارگـص لأن قطعت وعد على نفسـي ما اكرر هالشـي
بس استفزاز رند هو الي خلاني
طلعت معـزوفة چانت بهذا الوكـت مشهورة، بس شغلتها كـل البنات صاحـن عـوفيها حـلوة

و مثل ايامـي بالمـلهى حسـيت روح دجى الحماسية رجـعت دخـلت بينهن و گـمت ارگص وياهن، چـان وقـت حلـو
حسيت التوتر راح عنـي خوفاً من مقابلته لـ غياث

ابتعدت رنـد لمن صرت اني و بنية ترقـص بشكل جيد
محطة انظـار الكـل

خلصت المـعزوفة و اني ابتعـدت و البنية گعدت تطلب مني تكمل بس تعـذرت

باوعت لـ جودي الي تبتسم الي و كانها عرفت سبب رگـصي رغم چنت رافضة
وگفت يمها و گالت و هي تميل ناحيتـي

- شفتيها لاسماء؟

- بنت عمچ

هزت راسها و أشـرت لبنية گاعدة و مخلية رجل على رجل
تباوع بـتكبر و هي اطگ بعلكـها
ملامحـها حلوة و ناعمه بس عيونها حادة و بيهن غرور مو طبيعي

التفت لـجودي و گلتلها اريد اصعد لغرفتچ اعدل مكياجـي
عند الدرج چـانت واگـفه رند مكتفه ايديهـا و تباوعلـي بتحـقير
ابتسمت و مـلت عليها و انـي اگول

- للمـرة الثانية اگولها الچ
لا تـدخلين حرب محد خسران بيها غيـرچ

و صعدت عتبات الدرج متجـاهلتها
دخلت لغرفة جـودي و اخذت جنطـتي و گعدت اعدل بمكياجي
الباب چـان شوية مفتـوح..طوخت الحمـره و عـدلت خصلات شعري بأطـراف اصابـعي
فجاة تصنمت بمكـاني لمن انفتح الباب اكثر و صوت غياث يگـول

- ها جودي خلصت الحفلة

التفتت بحدة و هو بقى بمكانه واگف و ايده على مقبض الباب
نهضت من مكانـي و اني ابتلع ريقي
رمـش بعيونه قبل لا يستـوعب وجـودي، و غلق الباب
اني گبل اتجهت للباب اريد اطلع بس هو وگف گدامـي و گال

- ما شفتي احد غـريب ترا انتِ مرتي

- مو مرتك رسمي وخر عني

حچيتها و اني اريد ابعده عن الباب و ادفعـة من كتفه
احمر وجهي و هو يهمس بغمزة عين

- عادي هسا تصيرين مرتي رسمي

- مليق

همـست بيها بغضب اواري تـوتري
و هو گام يضحـك، لزمني من كتفي و خلانـي بمكانه و ضهري على الباب
ضيقت عيوني بـ حنق لمن گـال

- متوقعت تجـين بصراحة

سكت و دنگ راسه لمستـوى وجهي و همس مما خلاني ابتلع ريقي بـ احراج

- بس اجـيتي و سحگـتي گلب سحگ

مال برگبته و كمـل

- بعدين عيونچ من الله مكحلة ليش مخليه كحلة الهن

- هيچ تبذير عاجبنـي

حچيتها و حاولت ادفعـة بس هو صخرة و گـدامي
تنفست بـملل و اني انزل ايديه و هو بقى واگف بمكانه
لحظات من الصمت قطعها لمن گـال

- صفد چانت ضايجة قبل الحفلة..حسبالها ما راح تجـين

- اجيت لخاطـرها و لخاكر كسر عين رنـد

رفع حاجبه و گال بتنهيده

- گالتلي جـودي، طنشيها

- مليقـه و ما اگدر اتحملها

حچيتها و هو ضحك، و اني حـبست نفسي بصدري لمن صار وجهه قريب كـلش لوجـهي
غمضت عيوني لمن طبع قبلـه رقيقة على شفتي
ابتعد شوية و ايـده صارت ورا راسي و اصبعة گامت تبعـث بـين خصلات شعري
فتحت عيوني و باوعتله لمن همس بصوت خافت

- الـشعر الگـصير حلو عليچ

- اعرف

رديـت ببرود و اني انـدار اريد افتح الباب بس امتدت ايده على غفلة و هو يسحـب المفتاح من مكانه و يشمره من جوه الباب و گـال

- نكمل حچي و نطلع

- انت تدري بنفسك شسويت شمـرت المفتاح

صحت بي و اني ادفعة و هو وگف و حسيته هسا يلا استوعب فعلته بس گال بشكل اعتيادي

- تجي جـودي و تفتح الباب

- مليـق مليق والله

حچيتها بعصبية و ابتعدت عنه و اني ارتاچ على ميز المرايـة
و هو كتـف ايدي و گـال بشبه ابتسامة

- شبيچ ترا ما اسـويلچ شي بس نحچـي

- تجرأ و حاول تسوي والله تشوف شي مني مو صاير

هددته و هو ضيق عيونه و تقدم و اني لزگت بالمراية و هو گـال بـ تشكيك

- شنو گلتي

- الي سمعته

- لسانچ حيل طويل تدرين؟

- شي مو جديـد، هـاا نسيت شغلة انـت مو تحب النساء القويـات لو الوضع تغير

حچيتها بمكر و اني ارفع حاجبـي و هو گال

- لا ما تغـير

حچاها و اخذ نفس و ابتعد و اني تعدلـت بوگفتي
و بتساؤل گال

- بعدچ تشتغلـين وي كرار

و حتى اثير استفزازه وعصبيته گلت

- اي..و هو الي جابني هنا

رفع حاجبه بحده..و قبل لا احچي شي يزيد غضبة
تقدم و لزم معصم ايدي و گال بحنـق

- و شلون تجـين وي رجال غريب؟؟ بهالمكيـاج و العطور

- عادي كرار يعتبرني اخته

- اخته گلـتيلي، انتِ منتبه على نفسچ علاقتچ بكرار كلش صايرة ماصخه

و بنفس النبرة المستفزه گلت

- ميخالـف، انسان محترم و....

قاطعني لمن حط ايده على شفتي و گـال بصوت ناصـي

- لا تخلـين احرم عليچ وگفتچ وياه بالصيـدلية، كارها اي بس ما اريد امنعچ من شي تحبيه
حتى شغـلچ بالصالون مو متقبله بس ساكت لأن انتِ تريدين هالشي

هدأت و هو وخر ايده عن شفتي
مسحت بيدي جانب گصتي و بدون ما اباوعله گلت

- هو خطيب داليـا، و اجت ويـانا
و لا تخاف كرار واثقة بـي، مو هلگد غبية احچي وي اي شخص گدامي

- ليش من البداية ما گلتي

- ردت اعصبـك

- كـذابه، تريدين تشوفيني اغار عليچ لو لا

التفتت براسي عنه و هـو كمل

- اغار عليچ بس واثق بيچ، اعرف ما تسوين الغلط بس ما حـاب علاقتچ بـ كرار

- واضح كلش واثق بيه

حچيتها بسخرية و هو حاوط وجهـي و خلاني اباوع عليه لمن گال بجـدية

- لو ما واثق بيچ چـان ما انتِ هنا هسا
چان ما رحت و اجـيت بس حتى اشوفچ

نزلت راسي بغصـة و حسيت بأيديـه احتضتني و سند حنچه على راسي و گـال بصوت خافت

- گلتيلي داليا مخطوبة..يعني اليوم باچر تروح لبيت زوجها و انتِ؟ راح تبقين وحدچ

- طـول عمري وحدي مو شي جديد

فاجئني لمن گـال بعد ما رديت بصوت مخنوگ

- هذيچ الصفحـة نطويها و نتزوج

مثل الصعقة الكهربائية سرت على طول جسمي
خلتني ابتعد عنه و اني اگول بدهشـة

- ورا كل الي صار تطلب مني هيچ طلب بكل بسـاطة

- اي اطلب، الي بينا چان سوء تفاهـم

ضحكت بعدم تصديق و اني اگول

- سوء تفاهم گلتلي، الله يخليك غياث سد هذا الموضوع لأن اذا حچـيت راح اجرحك بالكلام

حچيتها و گمت اگلب بالجنطه مالتي ادور التلفون
لگيته و دگيت على رقم جودي تحت انظاره
غمض عيونه لمن ردت جودي و بسرعة گلتلها

- تعالي افتحي الباب انقفل عليه

غـلقت الخط و هو گال

- بعدچ على قرارچ

- و ما راح يتغيـر

- شنو تريدين اقـدملچ اكثر من هيچ
مـتشوفين انو هواي تنازلت علمودچ، نسيت كـذبچ عليه و نسيـت ماضـيچ لأن احـبچ و رايدچ
و هسا مرة ثانية داگـلچ و اطلب منچ نكمل حياتنا، بأي مكان تريدينـه
حتى اذا تريديـن نطلع و نستقر بالخارج او بالشمال اي مكان يعجبـچ

بصعوبة كتمت دمعتـي
و اني التفـت عنه و گلت بصوت گوه طلع مسمـوع

- و اني ما اريد اظلم نفسي و لا اظلمـك
بعيدين عن بعضنا احسن بهواي غياث

- اذا هيچ قرارچ لعـد بطلي تطلعين گدامي

حچاها ببرود و اني التفتت عليه و هو كمل

- اي؟ ما طول رافضة نرجع مثل قبل فـ لا تقتربين من هذا البيت بعد
و علاقتچ بالبنات اقطعيها..لأن داشوف وي الكل رجعتـي طبيعية الا وياي..رغم كلنا اجت ردة فعلنا متشابهه

- نفس ردة فعلكـم بس منك اجت تختلف غياث
چـان عندي واحد بالمئة امل تتقبلنـي، بس انتَ اول واحد نبذتنـي

سكتت للحـظات و رفعت راسي اله و اني اكمل

- كـلهن اجن بالريش بس ضربتك بالعظـم

انداريـت عنه لمن سمعت جودي تگول المفتاح وين
گلتلها يم بالممر بس نزلي راسچ
لحظات و لگتها
من فتحت الباب تفاجـئت لمن شافت غياث موجود وياي، مسحت دمعتي الي وگـعت و لبست عبايتي و اخذت الجنطة و اني اگـول

- اني لازم اروح

- بس الحفلة ما خـلصت

حچتها و اني جاوبتها

- والله ما اگدر اتأخر..داليا تحتاجني بالصالـون

طلعت من الغرفة و غياث طلع وراية
و عند الدرج لزم ايدي ما چانت عندي طاقه احچـي فـ تركته يسوي الي يـريده

تركتها بنهاية الدرج و هو طلع سلمت على صفد و الحجـيه و اخذت حجابي و طلعت
لگيت غياث واگف بالحديقة من شافني طلعت تلفوني حتى اتصل بـ داليا هو گال بهدوء

- اني اوصلـچ

ما حچيـت و صعدت وياه
الطريق كله چنه بحالـة صمت، محد بينا حچـه شي
چـنت اباوع للطـريق من الشباك و اني سانده راسي عليـه و اباوعله بطـرف عيني لمن وصل جهازه براديو السيارة
غمضت عيوني لمن بدا صـوت يصدر من الراديو يصدر موسيقى قبـل لا يصدح صوتها لـ فايا يونان مطـربته المفضلة لأغنية مـا عمر سمعتها

بيناتنا في بحر، يبقى البحر بيناتنا
وبيناتنا موج البحر يجمع لنا حكاياتنا
وبيناتنا مواعيد ضاعت لانه ضعنا
وفجر كل يوم جديد على الأرض يرجعنا
بيناتنا بحر وسما، خلو مواجهن ترميلي
موسيقى، موسيقى
عم ناديك اسمعني، عم حاكيك افهمني
اذا مش قادر تفهمني، بلكي منحكي موسيقى
انا عم مدلّك ايدي سعيدة
بلكي منكتب سوا القصيدة
مش مهم الكلام، لا الوزن ولا القوافي
جمعتنا الأحلام والإيقاع اللي غافي
عم ناديك اسمعني، عم حاكيك افهمني
اذا مش قادر تفهمني، بلكي منحكي موسيقى
نحنا قدرنا نعيش تحت سما زرقا
قبال البحر، تحت الجبل، حد السهل نبقى
نحنا قدرنا نكون متل صبي مجنون
عاشق لون الطبيعة وعاشق سحر هالكون..

مديت ايدي و طفيت الراديو و اني اكتم دمعـاتي
الي تنبـئ بالسقوط بسبب كلمات الاغنية الي كانها بكل حرف تقصد قصتنا

باوعلي و اني گلت بخنگه

- دنـيا مغرب و الأذان راح يقيم

ما رد كل الي سواه باوعلي للحظات قبل لا يكمل طريقـة
و عند باب بيت داليا طبگ السيارة
فتحت باب سيارته و اجيت انزل لكن استـوقفني و هو يگـول

- اعتبريني اناني اعتبرينـي بلا كرامة
بس طلاگ ما اطـلگ

ما رديت عليه
نزلت و سديت الباب و دخلت للبيت، سمعت صوت سيارته مشت
و لگـيت نفسي گاعده بالگاع و دموعي تشـارك قلبي تأنيب الضمير بحـق رفضي لـكل فرصة يقدمها الي غياث

.

السلام عليكم و رحمة الله و بركاته

شلونكم ان شاء الله الكل بخيـر

اتمنى البارت عجبكم

ارائكم و توقعاتكم 🥺؟

اسفة على التأخير بس صارلي ضرف 😁💔
الحمد الله عدى سلامات

المهم اليوم حفلتين 😂😂💔 و اخيرا دلو وافقت على كرار

و خطوبة صفد و مجيد برائيكم راح تغير شي من علاقة غياث و دجـى 🤔🤔

و كلام دجى و طلب غياث

و بس والله
نلتقي على خير احبتي
و استودعكم الله الذي لا تضيع ودائعه ♥