| دُجـى في جوف البـغي |

•الفـصل السادس و العشرون•

#دُجى_في_جوف_البغي
#بقـلم_الراويه
#الفصل_السادس_والعشرون

بسـم الله ♥

صلوا على النـبي 🧡

.

دجى

بعـد اربعة ايام من زيـارة نور خطيبتـه لـ ألياس
چـنت العـصر واگـفة بالكـوزمتـك

بعت لبنية المنتج الـي احتاجته و طلعت و فرغت الصيـدلية من الكل ما عـدا كرار و انـي

چان گاعد على كرسـي و ايده جـوه حنچـه
صافن و شكلـه يفكر حتى نـسى نفسة

اجيت اسأله بس ترددت، گـلت يمكن ميحب احد يدخل بخصوصيـاته

دگ تلفـوني و چانت دالـيا و هي تسألنـي اذا خلصـت شغلي گلتلها بعد
گالت اني راح اطلع للسوگ و نهى بالصالون وحدها اذا احتاجتچ روحي الها
غلـقت الخط و حسيت بنظرات كـرار انصبت ناحيـتي
قررت شكله يكسر الصمت و هو يـتسأل

- هاي داليـا

- اي هي انطتني خبر رايحه للسوگ

- و لـيش ما اجت لهنا و گالتلچ

ابتسمت باحراج و اني اگول اله

- انت تعرف شلون الوضع

تـنهد و هو يگول

- اي اعرف ما تريد تشوفـني

هنا تجرأت و اني اسحب الكرسي و اقربه لناحـية خانة الصيدلية

- يعني لا تعتبره فضول رغم هو هيـچ
بس انت من شوكت تحبهـا

ضحك و تعدل بگعدته و گـال

- من اربع سنين..ورا وفاة زوجتي

- اسفـة على الكلمة بس بسرعة حبيتها لداليـا ورا وفاة مرتك

- زوجتي توفت قبل ست سنـين و اني ما انعجبت بداليـا الا ورا سنتين
و لا تتوقعين ناسي زوجتي لو مـاحي ذكراها من بالي..بالعكـس لحد هسا اكن الها مشاعر خـاصة

همهمت و اني ارجع اسأله

- شلون توفـت گالتلي داليا چان عدكم طفل

- بحادث سيارة..چان ثاني يوم بعيد الاضحـى
متجهين للشمال هي و اهلها سفرة..و انگلبت بيهم السيارة ست نفرات و ابني السابـع كلهم توفوا

- لا اله الا الله، الله يرحمهم و يسكنهم الجنة
و ابنك طير من طيور الجنة ان شاء الله

- و يرحم امواتچ، آمين يا رب

همس بيها و صوته چان واضحه بي نـبرة الحزن
ورا لحظات مـن الصمت اردف بشبه ابتسامة

- بقيـت سنتين ما احب اطلع هملت حياتي و نفسي و حتى امـي، صعب تفقد اثنين اعزاز بلحظة وحـدة، و بيوم شفتهـا لـ داليا طالعه هي و امها
تدفعها بالكرسي المتـحرك، مادري شلون بقيت اباوعلها و هي انتبهت عليه
و انتِ تعرفيها لداليـا، ما حسيتها الا واگفه گدامي و ترزل بيه

ضحكت و اني اتخيل شكلهم قبل لا يردف هو باحراج

- والله امي ما مرزلتني هيچ رزالـة طول حياتي، سكتت ما عرفت شنو احچـي و هي عدها كلاكشنوف مـو لسان

- بس ماكو اطيب من گـلبها

- محد ينكر هالشي، قويـة و سبعة و معيشة نفسها و عمرها ما گالت لأحـد محتاجه شي
و بصراحة اني احب القويـات ما احب النساء الضعيفات

اختفت ابتسامتـي متذكرة ذات الجملة انگالت على مسـامعي قبل
رجف گـلبي بـشوق و اني الي صارلي شهرين اسكت صوته لـگلبي حتى ما يحن و لا يذكر طيفـه

- دجى عادي اسألچ سؤال بدون احراج

طلعت من شرودي على اثر صوته و تحمحت قائلـه

- اكيد تفضـل

- انتِ اقصد شنو تقربيلها لـ داليا

- قرايبها من بعيد امـها و ابوية اقارب

حچيت الكذبة الي تعودت عليها
الي كل مرة احد يسألنـي على صلـتي بـ داليا اگولـها
همهـم، و اني رجعت لمكـاني لمن اجا رجال و مراة للصيدلية حـتى يصرف الهم كرار عـلاج

بالـ6 كالعـادة رجعت للبيت لگيت داليا توي جايه من السوگ و متسوگه
رتبت المسـواگ بالكاونتر و بالرفوف و هي تحچي عن غـلئ الاسعار و تشكي منـهن

ثاني يـوم بالصالون الصبـح
دخلت مراة سـلمت و گعدت، ما چان اكو احد غيرها لأن قبل نص ساعة فتحنا و بعدنا دنحـظر الاغراض لأن اكو عروس راح تجـي

- شكلكم ما عرفتـوني

حچتها موجه كلامها الي و لـ نهى الي ضيقت نظراتها و هي تگول

- اوگفي اوگـفي انتِ الي شكيتي من اهمال زوجچ

هـزت راسها مبتسمه و اني ابتسمت و گلتلها

- يا هلا بيچ مرة الخ نورتي الصالون

- منـور بوجودكم، جايـة اليوم علمود عرس ابن حـماي
فـ اريد منكم تهتمون بيه

- بس بالاول گولـيلنا شلون زوجچ وياچ
مشيتي حسب كلامي لو غلستي

ضحكت و صوتها چان فرحان و هي تگول

- سويت مثل ما گلتي لبسـته و گمت اتجاهلـه
وداعتچ اسبوعين ظليت هيچ، گلت هذا ما يغير طبعة بس يوم عن يوم بدا يتغير و يلين
و واجهته و عاتبته و گلتله انت تشوفني اتجاهل قلة اهتمامك بيه لأن احبك بس لا تتوقع اگدر أتعايش هيچ
تگعد بيوم تلگاني بيت اهلي انتظر ورقة طلاقي منك..و من گلت هيچ گعد يتعذر و گال انـي مرات بسبب الشغل اعصب و من اجي للبيـت ما اريد احچي وياچ حتى ما اعصب عليچ

- چـذاب

حچتها نهى و هي ضحكت و گالت

- اعرف بس غلست لأن تعلمت اغلس
و هسا الحمد الله تغيرت تصرفاته و بدا يهتم..يگعد وياي و ياخذني لأهله
كله بسببچن خصوصاً انتِ، لأن والله چنت محتاجه احد يدلينـي على الطريق الصحيح

ابتسمت الها و اني امسح على كتفها

- الحمد الله المهم هسا انتوا متفـاهمين و ابنكم بينكم
بدون مشاكل و اهمال

حمدت الله
و بدت نهـى تشتغـل الها المكياج

دخلت داليـا للصالون و اجـت العروس و بدت تحـظر بيها، بخضم الشـغل اندگ باب الصالون
و اني تكفلت و رحت فتحته

تفاجئت من لگـيتها لـ نور
الي ابتسـمت و اني بادلتها الابتسامة دعيتها تدخل بس رفضت
شافت الصالون ازدحام
فـ طلبت مني اطلع برا وياها، خليت حجابي على راسي و طـلعت وياها

چانت سيارة ألياس طابگه و هو مـرتچي عليها سلمت عليه
و نور گالت

- اجيت علمود طـلبچ

همهمت و هي كملت

- حچيت ويا بابا و طلب يحچـي وياچ
لأن موضوع اصدار جنسيـة مجهول نسب صعبة، لازم اسأله و اجوبه هواي لازم تتقابلين وياه

كتفت ايدية و گـلت بهدوء

- تردين الصراحة، انـي مو مجهولة نسب
اني عنـدي اب و عندي ام، بس بصغري امي ذبتني و ما اعرف ابويـة و لا اي احد بيهم

مسحت على گصتها و گالت بقهر

- شگد عمرچ چـان

- تقريباً تسعة

- يعني المفروض عندچ جنسية، زين تتذكرين اسماء احد منهم

- ابوية لا..لأن اخذتني من عنده..بس امي چان اسمها جمالات

هـزت راسها و هي تزم شفايفيها باوعت لـ ألياس الي مركز وي كلامنا و شكله بدا يربط الخيـوط ببعضها اتجاه قصتـي

- زين تگدرين تروحين ويانا هسا و تقابلين والدي

- هو بالدائره

- اليوم لا..بس هو من عرف بيچ طلب يشوفچ

و بـدون وعي مني گلت

- بوجودكم ننقابل

و ببساطة رد ألياس

- اكيد..اذا ما عندچ شي نروح

- اغـير ملابسي و اجي

حچيتها و فتت للصالون
گلت لـ داليا طالعة و هي لحگتني و تحچي وياي انو عدنا شـغل
التفتت عليها و گلت بـجدية

- كملـي انتِ و نهـى رايحه انـي اريد اعرف شي عن اصلـي و هويتي

طبيـت للبيت بدون ما اسمع جوابهـا
غيرت ملابسي و لبست حجابي و طـلعت لألياس و نور
صعدت وياهم و انطلقنـا بالسيارة
و چان الصمت سيد الموقف، ساعة يلا وصلنا بيت اهل نور
نزلت وياهم و دخلنـا للبـيت، استقبـلنا ابوها و هو يحي بينا
و گعدنا بغرفة الخطـار
بس اني و هو و ألياس و نور

- ما عرفـتيني بأسمچ بنيتي

چان وجهه بشوش و مبتسم

- دجـى، لكن الحقيقـي نور

- اسم على مسمـى

اردف بهدوء و نبرة جادة

- گـالولي تريدين اصدار جنسية مجهول النسب صح

- صح..بس انـي مو مجهولة نسب

- شلون؟؟

و نفس الكلام الي گلته لنور حچـيته اله
عيونه اكتسـحهن الحزن و هو يگول

- فقط اسم امچ

- فقط..جمالات و اني اسمي نـور

شـبك اصابعه و گال بنـبرة عمليه

- اكيد عندچ جنسية لمن چنتي بهذا العمر
لهذا ميصيـر تكون عندچ جنسية مجهول النسب
لأن اسمچ بالنفوس

هنـا تدخل ألياس و هو يسأل

- زين عمـي ما طول عدها اسم بالنفوس، منـگدر نبحث عنه و من خلاله نلگه اسم ابوها اسم امها الثلاثي

التفـتت على ألياس متفاجئه و اني اگول بغبطه

- يعني يگـدرون يلگون اسم ابوية

ابتسم و گال بهدوء

- اي يگـدرون مو عمي

جاوبه ابو نور

- اي يگـدرون و حتى عنوان سكنه
بس الموضوع مو سهل، اكو بالـ35 مليون شخص مسجل بالنفوس ويـن نگدر نلگه سجل نفوسها

خـابت احلامي و حسيت الباب الي انفتح بوجهي للحظات انغلق
لكن ألياس رجع گال و هو يريد يبث الأمل بداخلي

- اذا تشكلت لجنة تلگـاها، اسمها نـور و امها جمالات يعني البحث انحصر على اسم نور فقط

باوعت لأبو نـور منتظرة كلمة منه
كلشي هسا متعـلق بي و بموافقته، ترجيته بنظراتي
بس هو چان ساكت و كلمة ما نطـق
وگعت دمعتي و همست برجـاء

- الله يخليك اعتبرنـي مثل نـور بنـتك
و شگد ما تريدون ادفع الكم فلوس

- بنتي استغفر الله مو قصة فلوس، بس الوضع مـو سهل

دنگت راسي و قطعت الأمل
نهـضت من مكاني و گلت

- مشكور تعبتـك وياي استأذن اني

نور گالتلي اوگفـي بس مشيت و طلعت من غرفة الخطار للخارج البيت
عمري ما دنگت راسي و ترجـيت احد..بس هنا جيت انزل على ركبتي و ابوس ايده حتى يـدور عن نفوسي
بس ما گـدرت مو هيچ تعلمت
وگفت بالباب الخارجي انتظر قدوم ألياس حتى ارجع للصالون
لحظات و طلعوا برفقـة ابو نور
الي تقـدم عليه و اني التفتت عليه بنظرات بـاردة

- راح ابدي اشكـل لجنة للبحث عن نفوسچ
و ألياس راح يكون حلقة وصل بينا تمام؟ بس انطيها الچ من البداية
الشـغلة ما تخلص بيوم او شهر، يمكن اربعة اشهـر خمسة

غمضت عيوني و هزيت راسـي متشكره منه
و امل بـصيص نبت بداخلي دعيت الله انو مـا يخيب املي نفس كل مرة

رجعنـي ألياس و نور للصالون
و بدون ما احچـي شي بديت اساعد البنات، و بـاستراحة الغدا گعدت تسألنـي داليا شنو سويت
و حچـيت الها كلشي بالتفصيل

.

جودي

خـلت صفد گلاص الچاي گدام بعد وجبة العشا الي تعشيتها عدهم
اخذته و انـي ارفع راسـي لـ غياث الي گال

- و انتِ شنو رائيچ

- اني ما الي رأي، الحجـي رفض بدون حتى لا اعرف بالسالفة

- مـو من حقه، انتِ صاحبة الرأي الاول و الاخيـر

- يگول صعبة شـلون تنخطبين اله بعد ما چنتي خطيبة اخوه

حچيتها و هن باغتنـي بسؤاله الي مچـنت اتوقعه

- زين انتِ شنو رأيچ بـ رسلان، لو بيدچ توافقين

استحيت منه و دنگت راسي محمرة الوجنتين
و هو ضحك ضحكـة قصيرة و گال

- عرفت الجواب

رجعت اباوعلـه باحراج و هو اردف

- اذا موافقة فـ ابوية ما اله حق يرفض

ابتسمت و گـلت

- ابوية؟ اول مرة تنادي الـحجي بهذا الاسم

معالم وجهه بينت عليها التفاجئ
شكله ما انتبه لكلامه، باوعـت لـ صفد الي ابتسمت ابتسامة صغيرة
و هو تحمحم و گال متجاهل كلامي

- ما گلتي انتِ شنو رائيچ

- مو مهم رأيي بعد الرفض، عفيـة غياث سد الموضوع لأن يوتـرني

ابتسم و رجـع سند ضهره على الـقنفة
دزلـي مجيد رسالة انو راح يجـي ياخذني، فـ بقيت انتظره
من اجا فات گعد ورا ما لـح عليه غياث

گعد و جابتله صفد چاي، گوه كتمت ضحكتي و اني اباوعله شلون توتر و صفد جـبل ميهزك ريح

- رسلان اجـا علينا اليوم

غـصيت و گمت اكح و اني ابعد گلاص المي عن شفتي بعـد ما سمعـت كلام مجيد
التفتت عليه و سأله غياث

- و شنو گال الحجي

زفر مجيد بغيض و گال

- يعني شنو گـال رفض گبل
و گعد يحچي عليه، اذا انت ناسي العادات و التقاليد احنا ما نسينـاهن و شلون تخطب الي چانت خطيبة اخوك
حچيت وياه يابه يصير لا عيب و لا حرام بس ابوية قافل

- الحجي مادري شلون يفكـر، يعني هي و رامي فسخـوا الخطوبة
حتلو چانت متزوجته و طلگها فـ تحل على رسلان 
لأن صارت من المحرمات لا بنـسب و لا مصاهره، اني الي ما افهم بالديـن غير صلاتي و صومي اعرف هالشي مو حـرام فـ الحجي ليش ما يقـتنع مو هو افهم مني

سكتت و ما حچـيت لو كلمة
منحرجه و تمنيت لو يسدون هاي السالفة بأسرع وقت
والحمد لله نقذنـي مجـيد و هو يگول حتى نروح الوقت تأخـر
طلعنا من الشقة و بالطريق التفتت عليه و گـلت اله

- و انـت شوكت تفتح موضوعك

- اي موضوع

- تعرف سالفـتك انت و صـفد
ليش متفكـر تتقدم الها مرة ال

عگد حاجبه و گال بدون ما يبـاوعلي

- هالفترة ما اگـدر، اريد اخليها تتأكد من حبي الها مو تعتبره مجرد كلمات

- و شلون راح تخليها تتأكـد

سألته و هو ابتسم و التفـت عليه و گال

- انتِ تخلينها تتأكد

رفعت تك حاجب و گلت

- و يمه انـي شعليه؟؟

- انتِ مو اختي فـ لازم تساعدينـي

كتفت ايدية و گـلت بـ تساؤل

- و شلون اساعدك اگوللها الصبح و بالليل اخوية يحـبچ

- لا تصيرين تافهه، بس شوفـي انـي راح ابطل اكتبلها على حـسابي
و هي اذا صدگ مهتمه للسالفة راح تسألچ..هنا شوية راح تصيرين نحيسة و تگعدين تكـذبين انو هو مل و تعـب و انتِ ما تنطي فرصة

گلبت عيوني و بمـلل حچيت

- و ليش الف و الدوران
احچي وياها و گوللها انـت عن مشاعرك، ما تگدر تگابلها و تحچي اكتبها دزلها فويـز ترا ما تحتاج لكل هاي الهوسة
شبيك مجيد شو بكلشي تلگفها و هي طايره بس من شي يخـص صـفد تصير مع احترامي الك اثـول

ضربني على راسي من ورا و هو يگول بعصبية

- يا ثولة شوية احترام اني اخوچ الچـبير

- لأن انت اخويـة انطيها الك بالگصه
مجيد باوع حسابها على الانستا موجود و بأسمها و تلگاه بصفحتي الشخصية ادخل الها و احچـي وياها و اني طلعنـي من الموضوع تمام

حچيتها و ختمت كلامي و هو زفر بانزعاج
و كملنا الطريق
من وصلنا للبيت فتت سلمت على ابوية و امي
اجيـت اصعد فوگ بس استـوقفني الحجي

رحت گعدت گدامه و گلبي يگلي بشنو الي يريد يحچي وياي

- اليوم رسلان هماتين اجا و حچه وياي بخصوصچ

- حچـالي مجيد

حچيتها بهدوء و هو رد ورا صمت للحظات

- بنتي اني ما عندي مشكلة وي رسلان
و لو بغير وضع چان ابد ما تردد و وافقت، بس يا بنتـي حچي الناس ما يرحم و والله اني علمودچ
اعرف لا عيـب و لا حرام
بس كل گرايبنا يعرفون انتِ الي فسختي الخطوبة، تروحين تصيرين علك بحلـوگهم و يا فسخت خطـوبتها من اخوه علموده

گال مجيد بـ اعتراض

- بس يابه احا شعلينا من الناس، الولد ما يعيبه شي
و ندري بي يريدها لـ جودي من زمان..شعليها العالم منا اذا هو موافق و ابوه

- هو و ابوه موافقين..بس امه و خواته لا و الاهم رامـي
و اني سمعت حچـي من امه من ايام خطوبتها برامي و ما اريد ارجع اذب بنتـي بنفس النار، ام رسلان ما تريد تخـلي جودي چنه بيتها
و اني مستحيل انطـي بنتي لنـاس ما تريدها

سكت ابوية و اني نهضت من مكاني
من بعد ما سمعت كلام ابوية ايقنت رفضه افضـل قرار
اعرفها لمرت عمي من زمان ما تحبنا..حتى من خطبني رامي هي چانت معارضة بس سكتـت
و اكثر من مرة يوصلنا كلام منها..يا طلبوا مهر غالـي
يا طلبات تجهيز الخطوبة هواي..و هي خلگ وحدة فاهيه و حتى متعرف تشتغل و يا ريت ماخذه فلانه و علانه لـ رامي بس هو يريدها
حچـي هواي و ما يخلص، و ابويـة صح كلامه ما مجـبورة ارجع لهاي النار و سوط كلماتها

- يابه الي تـشوفه صح اني راضيـه بي
طول عمرنا مرت عمي ما اطـيقنا و مثل ما گلت انـت مستحيل اقبل بناس ما تريدنـي

استأذنت و صعدت فوگ
غيرت ملابسي و اجيت اتمدد انام بس دگ تلفوني
عقدت حاجـبي باستغراب لمن ظهـر اسم اسماء على الشاشة
فتحت خط و قبل لا اگـول الو وصلني صوتـها الغاضب و هي تصـيح

- ولچ والله والله تحلمين تصـيرين لـ رسلان
دگـيتي رجلچ و فسختي خطوبتچ من رامي علموده مـوو، ظليتي تركـضين ورا و خليتي يطلگ الي تسواچ و تسوى اهلچ
بس والله ما اتسمى اسماء اذا خليتكم ترتبطون يا....

قاطعـتها لمن ارتفع صوتي و اني اگوللها

- اوگفـي اوگفي هو منو يركض ورا منو
بعدين فـسخت خطوبتي من رامي لأن واحد عار و ساقـط، لعبت نفسي منه و من اخلاقـه الزفره
و الا اني لا ميته لا علـيه و لا على رسلان

- ولچ تريدين تعلميني بيچ مو خابـزتچ و عاجنتچ
و ادري بيچ طول عمرچ تحبينه لـ رسلان بس تبيعين ثگل، و من تزوج صارت دودتچ متر و بس تريدينه يطلگ

- السانچ عن الغلط و احترمـي نفسچ اسماء
لو صدگ ميته على رسلان ما چان رفضته 3 مـرات

- ما شاء الله و تتباهين ورا ما خليـتي ينتبهلچ گعـدتي تبيعن ثگل عليه

غمضت عيوني و گمت استغفر ربـي
على تهمها و كلامها الباطل بحقي

- اسمعي اسماء اخوچ ما يهمنـي فـ وعيدچ انو ما تخلينا نرتبط هاي ما تفيد لأن اني رافضته و ما رايده هالشي تمـام؟؟

و بـوعيد گالت بنبرة كلها حقد

- تمام يا جودي ان ما خليته يكره شوفت وجهچ اني مو اسمي اسماء

و غلقت الخط بوجهي
انطيتها حظـر و اني اشمر التلفون على الطاولة بصفي و اكرر الاستغفار متذكـره كلامها

بهاي اللحظة تمـنيت لو دجى موجودة
چان محد نصحني و يوجهني للطريق الصحيح غيرها

.

دجى

بعـد مرور اسبوع چنت بالكـوزمتك
ارتـب بالرفوف و اخلي ملصقات الاسعار على العلـب
دخل كـرار برا و هو يحچي بالتلفون

قبل لا يطلع دگ تلفـونه و شكله صديق قديم اله لأن رحب بـي بقوة

گعد ورا الـخانة و اني شـلت شيشة مالت زيـت گزاز للشعـر اريد اخلي عليها الملصـق بس انزلـقت من بين ايـدية و تهشمت على الارض و تطـاير الزيت بكل مكان ما ان وصلنـي صوته لـ كرار و هو يگـول

- شسوي يا أيـهم امي تعبانه و چبيرة بالعمر
و من طلعنا من بيتنا بـ...... و انت تعرف شصار بجوارينه تعبت و ما ظل بيها حـيل، اخذتها و طلعنا منها و خلصنا من القـال و القيل

صمـت مدوي على المكان، حتى كرار سكت و هو يباوعلي بـقلق
حسيت رجليه بعد ما تشيلني
بصعوبة سحبت الكرسي و گعدت عليه، اباوع لأيدية ترجف
والله نفس اسم منطقتنـا..اني حافظته و عمري ما نسيتـه
ما اعرف شوكت سد كرار الخط و تقدم عليه و هو يسألني شبيچ

حـسيت دموعي تحرجت بعيوني رفعت راسـي اله و حتى شفايفي ترجف مو بس ايدية

عقد حاجبه و رجع سألنـي

- دجى شبيچ

اريد اگله انـي نور..نور الطفلة الي چنت تشتري الها من المحل القريب منكم
الي چانت تشرد من ضرب امهـا لحضن امك
بس ما گـدرت، لساني ارتبط و جسمي برد
و كلشـي گمت اتذكر..طفولتي المرة كالعلقم و ضربات امي الي لحد هسا احـس بوجعهن على ضلوعـي

الرؤيه بدت تتـغوش و عيوني ثگلت كلش
قبل لا افقد وعيي و بس صدى صوت كرار يرن بأذني يكرر بأسمي

فتحت عيوني اني بيـت داليا و هي واگفه يم راسي و هي تحچي

- ولچ شبيچ

غمضت عيوني بقوة لأن حسيت الضو اذاني
ما ان تذكرت الصار قبل لا افقد گعدت على حـيلي
و اني اگول بفزع

- وين كرار..داليا وينه

ما بقى بوجه داليا اي لون و هي تهمس

- شتريدين من كرار

- هياتنـي

سمعته يگول ينبهـني لمكانه
التفتت و چان يم باب الصالة الخارجي واگف
گبل تعدلت بگعدتي و ردت ما اضيع وقـت و اني اگـول بلهفه

- انت كرار والله كرار مـا غيره

- دجى شبيچ؟؟

حچاها باستغراب..و هنا داليا كانها فهمت الي ديصير
التفتت بسرعـة اله و رجعت باوعتلي و هي تهمس بعدم تصديق

- هو؟

هـزيت راسي بأي و دمعة فرح من عيني اليمنى وگعت
وگفت على حـيلي و گـلت بسرعة و اني ابتسم بسعادة

- انت كرار ابـن ام كرار چنتوا ساكنين بـ......
و امك الحجـية چانت تسوي طـب اعشـاب، انت ما تتذكرني موو
اني نور..بنت جمالات و اختي ميناس، امي چانت تضربنا و اني اشـرد يم امك
و مرة ضربتني بالفانـوس و حرگت ايـدي و بتت عدكم و عالجتنـي امك

چنت احچي بسرعة و لهفة و اني ارفع باكمام قميصـي مظهره الحرگ الي بعد اثره على زنـدي و جوه كوع ايدي
و هو بقـى يباوعلي و شارد و كانه يحاول يستعيد ذاكرته الي خانته هاي اللحظة
نزلت كم قميصـي و اني اردف بضحـكة فرت من بين شفايفـي غصب عني

- چنت تاخذني انـي و ميناس نشتري من ابو المحل الي بصفنا..تتذكر ميناس چانت تحب بسكت شمائـل
و انت چنت تحب تدرس كلش..مرة چنت يمكم و انت تقرا و وگع مني گلاص المي على كتبتك
و رزلتنـي
تتذكر مـوو؟؟

لزمتنـي داليا من كتفي و هي تگول بحنية

- دجى على كيفـچ بنفسچ

- مـو مو ما يذكرني بس اني والله اتذكره و اتذكر الحجيه

حچيتها و گبـل گمت ابچي
خايفة لا صدگ ما يتذكرني..او يطلع مو هو
احتضـتني داليا و هي تباوعـلها لـ كرار الي سكت
و سكوته چان كـ اشارة انو اني مرة الـخ ضيعت كلشي

- بلي تذكرتچ

التفتت بسرعة ناحيته ما ان نطق
تركت حضن داليا و هو كمل و كانه تذكر كلشي

- تذكـرتچ نـور، چانت امچ قاسية وياچ
انطت اختچ لـ ناس و انتِ ورا فترة ضعتـي، اجت المغرب تبچي و تگول بنتـي ضاعت گلتلها اوگفي يم باب المحل و طلعت و ما لگـيتها

صحت و اني ابچي

- چذابه ما ضعـت..هي خلتني بالشارع و راحت بقيت انتظرها هوواي و ما اجـت

رجعت رجليه تـرجف و اني اشهگ بقوة
سحبـتني داليا بلطف و هي تگعدني بالگاع
و بقى كرار مستند على الباب و ايدية على الحايط ورا ضهره
و عيونه بالگـاع

- انت تتذكر اسم المنطقة و عنوان البيت اخذني عليه الله يخليك..زين اوگف تعرف امي وين راحت

حچـيتها و هو نزل راسه و گـال بـخفوت

- امچ ماتت ورا شهرين من روحتچ
اختفت فجـاة..اسبوع هي ماكو
كسرنا الباب احنا و الجواريـن لگيناها ميته بالحمام واگعة على راسها بعد ما فاحت ريحتها لبيـتنا

شهگـت داليا و خلت ايدها على شفتها
اما انـي..ما اعرف بس ما انكسر گلبي و لا رف لكـلامه بخصوص شلون ماتت
عمـري ما حبتني..عمرها ما احتضتني و گالتلي بنتـي
طول سنين ما شفت منها الحنان
فقط ضرب..و شتم و حرمـان

بللت شفتي و گـلت بتساؤل

- زين و البيت

- البيت بقى مثل ما هـو..
ورا سنة طلعنا من بيتنا و اجينا هنا، البيت ريحتها ما طلعت منه و هواي اشياء صارت بي البعض گالوا مسكون
ما تحملت اني و امي نظل بصفه فـ انتقلنا لهنا

دنگت راسي معتصره اصابعـي
قبل لا ارفع راسي اله و اني اگول بطـلب

- اگدر اقابل الحجيه
اتذكرها چانت مقربه من امي، يمكن تعرف اسم ابوية او اي شي يخصـه

تعـدل بوگفته و گال

- اخذچ الها بس من هسا اگـلچ
الحجيه ذاكرتها مو مثل گبل، يمكن ما راح تتذكر كلشي

هنا تدخلت داليا و هي تگول

- تتذكر هـيچ سالفة ما تنسي
يلا گومي دجى نروح

.

السلام عليكم و رحمة الله و بركاته

شلونكم ان شاء الله الكل بخيـر

اتمنى البارت عجبكم

ارائكم و توقعاتكم 🙊🙊

لحد تكول قصير 🤫🤫 هذا عيدية الكم 🙊😂😂

المهم مادري شنو اكول بصراحة 😂😂 بس احس فرحانه لان دجى تذكرت احد من طفولتـها
و ان شاء الله الحجيه تتذكر 🥲🥲

و قبل لا اروح هذا حساب الانستا

اتشرف بالكل مرات انشر تغشوشات 😂😂 بس مو هواي يعني حسب
و انشر بي بوستات عن القصة تعجبكم ان شاء الله 🙊🙊

و بس والله
نلتقي على خير احبتي
و لهذاك الوقت استودعكم الله الذي لا تضيع ودائعه ❤