| دُجـى في جوف البـغي |

•الفـصل السابع عشر•

#دُجى_في_جوف_البغي
#بقـلم_الراويه
#الفصل_السابع_عشر

بسـم الله ♥

صلوا على النـبي 🧡

.

جودي

انفتـح الباب على طوله و ظهر من خلفه رجال ببـداية الخمسين عرفته خالها لـ صفد
و هو يصيح بعصبية

- خـير خير شنو هذا الدگ

باوعت لـقبضة مجيد الي اشتدت و هو يگـول

- جايين ناخـذ صفد اذا ممكن صيحها

- هه لا والله بـصفتكم منو

مجيد گـوه سيطر على اعصابه و هو يرد

- بصفـتنا اخوان اخوهـا
خلي تجـي ويانا

- بنت اختـي ما تعتب باب البيت وي ناس غربى
يلاا شيلـوا نفسكم و روحوا منا

تقدمت دجى بعصبية حاولت الزم ايدها اردعها بس ما اهتمت و هي تگول

- و بنت اختك ترضاها تنـضرب من مرتك بس ما ترضاها تطلع وي اخوان اخوها
صيحلـها عيني ترا ما النا خلگ سوالف ما الها طعمه

- و انتِ منوو حضرتچ؟؟
ابـو ماجـد سد الباب هذولـة يريدون مشاكل بهالليل

چانت مرتـه المتكلمه

رفعت دجى تك حاجب و هي تگول

- اني مـنو هسا اگلچ اني منـو؟؟

مع ما ختمت كلامه دفعت الرجال عن طريقها و هجمت على ام مـاجد
طفرت عليها اريد الحگ بيهـا بس وگـعت المراة بين ايـدين دجى
لزمتها من شعرها و هي تجـر بيها و المراة تصـيح عوفينـي

حاول ابو ماجد يتـدخل بس لزمه مجيد و هو يگول

- عركة نسوان عيب احنا الزلم نتدخل
صيحلنـا صفد

دخلت بينـاتهن اريد افك العركة بس دجى ما تنطـي فكه
و التمـت فوگاها لمن اجن بناتهـا للمراة، و صار الـضرب بفلس
دجى ينقضـن عليها و تدفعهن تريد تكمل انتقامـها من المراة
عضتها من زندها خلت روحها تطلع و چانت لابسه دشداشة حليبيه خـلت الردن من زندها يتلون بالـدم

حصلتلي كفخة على راسـي لأن صرت حاجـز
الي يقهـرني مو من البنات انما من دجى حتى اوخر

طلعت صفد و هي تباوع بصـدمه و ضربت علـى رجليها و دموعها توگـع
ليلة صارت چنها غاره على بيت ابـو ماجد
التمت الجـوارين و النسوان فكـن دجى عن ام ماجد الي شعرها تـشعث و ايدها من العضه اطلع دم يمكن شالت لحمه منها

وجهها مخـرمش و دموعها تصب

تنفست دجى بصوت عالي و هي تلف شالها
و اني ادفعها للسيارة بعد ما طلب مني مجيد

- عوفيني جودي عوفيني يـا ضعيفة يا خايسـة
انهشي منها عـضه كفشيها صرتيلي حـاجوز تخافين على هاي الچـهره الزفره

- ولچ كافيي عيب عيب الجوارين التمت

حچيتها و دفعتها بالسيارة و سديت الباب اجت تنزل بس من جهاز التحكم قفل مجيد السيارة
و هي بقت تضرب بالجام تريـدني اطلعها

اخذت نفس و فتت للحديقة
گاعده ام ماجد بالگاع و يمها بنـاتها
و وحدة من الجوارين گالت

- شنو هاي الخبلة الي جايبيها

- اعذرونا شوية عقلها مـو تمام
هسا احنا نريد ناخذ صفد يا ابو ماجد، و اذا رفضت الخبر يوصـل لـ غياث و ما اظن هالشي يسره

حچاهـا مجيد و تهجمت ام ماجد و هي تصيح بعصبية

- جايبين خـبلة وياكم تضرب و تسب

- لكل فعل ردة فعل ام ماجد
و البنية انقهرت و ما گدرت تتحكم بنفسها من عرفـت بسالفتچ بخصوص صفد

حچاها و هو يرمق صفد الي غطـت نص وجهها الي احمر و حاجبها مطبور

ما ردت و هي تتحاشى تباوعله
رحت ناحية صفد و فوتتها جوه للبيت
دخلت للغرفة و اخذت جنطتها و اني اخذتها من عدها
ذبت حجابها على راسـها و لزمت ايدها نطـلع
صارت بوجـهنا وحدة من بنات خالها الي كزت على اسنـانها و هي تهمس بحقارة

- روحه بلا رجعه يا خرسة يا خـبلة

- لسانچ عن الغلط و احترمي نفسـچ
ما انزل لمستواچ الدنيء بس كلامچ بحقها لا تتوقعين رب العالمين يغفل عـنه

رمقتها بغضب و طلعنا من البيت
بالحديقة چـان مجـيد يحچي وي ابو ماجد
اشرلنـا ندخل للسيارة، ما ان وصلنا يمهـا فتح ابوابها و دخلت صفد و اني صعدت ليگـدام
التفتت لـ دجـى و هي تحچـي وي صفد

- ليش ضـربتچ بنت الـ....

قاطعـها مجيد بـ

- بدون فشـار دجـى

- هذا مو فشار انما هـاي مسبـه

حچتهـا و زفرت و هي تكتف ايديـها
باوعت لـ صفد و گتلها بحنيه و اني امد ايدي و الـزم ايدها

- ارتاحـي و لا تبچين نوصل للبيت و نسولف

هزت راسها بأي و دجـى قطبت حواجبها و ما اعقبـت على شي
وصلنا للبـيت و نزلنا تلگتنا امي و بس شافت صفد شهگـت و اخذتها لحـضنها

طبينا للبـيت و بالصالة لگينا ابوية گـاعد
تفاجـئ من شاف وجه صفد
حاجبها مطبور و مخليه عليه لزگـه جروح، و خدها ازرق محمـر
گعدت صفد يم امي و اني من جـهتها الثانية و بقت دجى واگفه قريب منا

- شنو الصار بنتـي

سألها ابوية و هي گامت تبچـي
حـضنتها امـي من اكتافها و هي تهدأ بيها
و بدت تحچـي بلغة الاشارة و لأن اني اكثر وحدة افهم عليها گعدت اترجم الهم

القصة مـا تستاهل هاي العصبية مـن مرت خالها
رافضه صفد تتعشى لأن چانت تقرا و بـالـ10 جوعانه و ماخذه صحن اكلها و فايته للغرفة
من شايفـتها مرت خالها متخبلة
ليـش تاكل بـغرف النوم، يلتم النـمل و محد يوگع بيها بس انـي
صفد گايله الها انـي انظف المكان و مو طفلة اوگع بالگاع و يلتم النمـل
من گالت هيچ صفد تخبلي مرت خالها و اضـربيها محاولة تفك نفسها و دافعتهـا بس ما گدرت الها و صار الي صـار

چانت تحچـي و تـشهگ بدموعها، كسرت گلبي و خلت دموع امـي توگع و هي تتحسب عليهـا
كملت كلامها و انتفضت دجى و هي تگول بعـصبية

- لو مخليني اگـص السانها لـ مرت خالها بس صرتـوا ضد العنف و حبستوني بالسـيارة
هيچ نماذج تسـتاهل كسر الراس مو بس الايـدين

عضيت على شفتي متفشلة من يمي لمن گاللها ابوية

- ضربـتي المرة

- اي عمي ضربتهـا

رفعت حاجبـي متعجبه لمن كملت بثقة

- لو مخلـيتني جودي چان كسرت الها اسنانها

عصب ابوية و زجر بيها

- و شلون تمـدين ايدچ عليهاا

خنست و انـي اباوع لـ دجى ما اهتزت بيها شعره و هي تگول بكل جدية

- لأن مدت ايدها على صفد اخذت حقها
مو العين بالعين؟؟ عمي تريدنـا ناخذها لصفد و كانو ماكو شي و الي ضربتها و تعدت عليها ما تاخـذ جزاتها
اني تربيـة الي يدوسلي على طرف اكله بـاسناني و الي يسمعني حچـايه تخصني لو تخص احد يعنـيلي ما ينام ليلة سالم

ختمت كلامها و استأذنت داخله لغرفـتها
صمت زلزل الـصالة، باوعت لـ مجيد الي صافن و من انتبه لنظـراتي عليـه رفع تك حاجب

تنهد والدي و گـال

- و انت مجيد ليش ما منعتها لـ دجى

- عركة نسوان شلون ادخل بينهـن
و بعدين حتى بناتها لأم ماجد تدخـلن

- اي يابه صحيح

حچيتـها و هو هز راسه معترض الفكرة

اخذتها لـ صفد و صعدت بيها لغرفتـي
غيرت ملابسها و گعدت على السرير
گعدت بصفها و لزمت ايدها و اني اگوللها

- نامـي و ارتاحي

اشرت بيديـها انو مرت خالها ما راح تسـكت و يمكن تسويلهم مشكلة
ابتسمت و اني اطمنهـا

- لا تخافين ابوية يدخل و يعرف يتصرف بوقتهـا
هسا انتِ لا تشيلين هم تـمام

هـزت راسها بأي و تركتها تمدد بمكانها
طلعـت من غرفتي و فـزيت لمن صار گدامـي مجيد
خليت ايدي على گلبي و اني اگـول بانزعاج

- شبيك فززتني

- نامت صفد

- تمددت راح تنـام
بس خطية والله مرت خالها ضاربتها هواي يعني ما خلت الله بين عيونها و گالت هاي يتيمه

- هي تنلام بيها دجى من ضربـتها

ابتسمت و انـي اكتف ايديه

- عرفتك ما تدخلت رغم تگـدر لأن انت چنت رايد هالـشي

- اي

حچاها و تعدل بوگفته
سحب ايدي و خلاني قريبة من غرفته
ضيق عيونه و همـس

- سمعتِ دجى شنو گالت باخر كلامها

- اي كلام

- اني تربيـة الي يدوسلي على طرف اكله بـاسناني و الي يسمعني حچـايه تخصني لو تخص احد يعنـيلي ما ينام ليلة سالم
شتقصد بحچيها ما حسيتي غريب شويـة؟ بالاخص انو اصدر من دجى لأن اني و انتِ نعرف انو ما گدرت تواجه امه و زوجها

زفرت و اني اگول بانزعاج

- رجعت تشك بيهاا

- ما اشك بيهـا لكن كلامها اثار استغرابي

- خلي يثير استغرابك ما اريده يثير استغرابي اني هماتين..رايحه انام تصبح على خير

و طلعت من الفكـرة و انـي منزعجة من مجيد و افكاره ناحية دجـى

.

دجى

الكل حول سفرة الريـوگ
اكل بكل هدوء و اني كل شوية اباوع للحجـي و احسه زعلان من تصرفـي، اعرف تصرفي چان مندفع كلش
لكن ما تحملت..ما احب اشوف احد ينضرب بالاخص اذا چان ضعيف و مغلوب على امره

خلصـنا الفطـور و مجيد طلع
و الحجـي گعد بالحديقة و هو شايل كـتاب يقرا بين ايديه

كملت غسل الصحـون و طلعت متردده
لكن استجمـعت قوتي و اني اسحب كرسي و اگعـد گدامه
رفع راسه عن الكتاب و اني ابتسمت ابتسامة صغيرة و گلت

- حـسيت حجي قاسـم زعلان مني
و اجيـت اخذ رضاه

- زعلان من تصرفچ مـو منچ

حچاها و سد الكتاب
و اني تنهدت و گلت

- ضجت كلش على صفد يتيـمه و فقيرة انكسر گلبي عليـها

- ليش اني ما انكسر گلبي لو انقهرت
الله شاهد زعلت عليها كلش، بس مو كلشي ينرد عليه بالصـياح و الضرب

- بس هي ضـربتهت لـ صفد و هذا اقل رد عليها

- مـيصير نرد الاساءه باساءه

زميت شفتي بعدم رضى و گلت

- الي يدوسلنا على طرف تريدنا يا حجـي نبوس راسه

- لا مـا نبوس راسـه، لكـن رد الاساءة بالاحسـان
الرسول صلى الله عليه و آله و سلم قـال ( ليس الشديد بالصرعة، إنما الشديد الذى يملك نفسه عند الغضب )

خليت ايدي على خدي و اني اسنـدها على يد الكرسي

- زين شنو نسوي من احد يسيء النا؟

- الشخص الي تمت الاساء اله عنده خيارات
يا اما أن يعفو ويصفح، وبذلك ينال أجر المتقين الصابرين وعون الله له او انو يمسك عن الـصفح و العفو و يتقـابل هو و الي اساءه اله بيوم القيامة

قطبت حاجبـي و گلت

- شلون يعني بيوم القيامة؟

- بيوم القيامة يتلاقـى المتخاصمين
هناك عند رب عـادل و كل شخص ياخذ حـقه من الاخر
اذا اصفحوا و عفوا عن بعضهم
بنت الهم قصر بالجنه..طـوبه من ذهب و طوبه من فـضه
فـ تلگين بعض الناس تصفح و تعفوا عن الي اساء الها اساءه قوية حتى ما تلاقـيه بيوم القيامة

- و الي اساء يعاقب

- عند رب العالمين كل شخص ياخذ جزاء ما فعله لسانه و يديه

هـزيت راسي بأي
و تعدلت بگعدتـي و اني اگول

- اعتبرني جاهله بهاي المواضيع تحكمت بيه عصبيتي
و ما تحملت

- مرة ثانية تحكمي بيها انتِ
لا تخلين عصبيتچ تسيطـر عليچ

- ان شاء الله عمـي
و اسفة اذا ضوجتـك

- ما ازعل لـو اضوج منچ بحسـاب جودي انتِ

دمعت عيوني و اني اهمس

- الله يحفظك النا عمـي

-و يحفظچ يا بنتـي

حسـيت هذا الدعاء مثل مـي بارد على گلبي
من زمان او بالحقيقة عمري ما سمعت هذا الدعاء من احد و هو يخاطـبني بكلمة بنتـي

لگيت مكالمة من غيـاث بس انشغلت و ما اتصلت بـي

اجتمعنا حـول سفرة الغـدا و صفد چانت گاعده بصفـي
كل ما ارفع راسـي الگه مجيد يباوع الها باستراق و كانه يخاف لا احد ينتبه و بالأخـص صفد

دخلت للغرفة و سديت الباب بعد ما انتـهينا من وجبة الغدا
رفعت تلفوني و اتصلت بي
لكن ما جاوبني..يمكن هسا نايم بسبب فرق التوقيـت

و فعلاً لليل يلا اتصل بيـه
من حچيت وياه و سألته عن حالته حسيته ضايج

- ليش صوتك هيچ
ضايج من شـي

- صحيح مـرت خالي ضاربه صفد

- گالتلك

- اي من خابرتها و ما قبلت تفتح كاميرا حسيت بيها شـي اصريت عليها و فتحت الكاميرا و شفت وجهها
هو اني شنو چنت اتوقع من خوالـي غير المصايب و لعبان النفس
بس صوچي انـي الي وافقت تبقى عدهم حسبالي صاروا خوش اوادم بس يبقون ذيل چلب ميتعـدل

چان يحچـي بعصبية
خلتني اسكت و اني اسمعه يفرغها

- اعرفهم ما يگدرون على نـسوانهم و يظلون خرخاشه بـديهن
ولچ اقسم بالله طول عمري ما ماد ايدي عليها لو صايح بوجهها تجي وحده مثل ام ماجد تمد ايدها عليها
والله ما انسى سالفتها خلي تحمد الله و تشكره اني مو هـنا چان صرت من صدگ مو خوش و امد ايدي على مره

- لا تخاف اخذت جزاءتها و زرگت وجهها

حچيتها و اني ابتسم
هو زفر و گال بنبرة تحولت للهدوء

- گالتلـي صفد
ما استبعدتها منچ اعرفچ سـبعة، بس گوليلي طبرتي حواجبها الي عبالك راسمتهن بقلم صبـورة

ما گـدرت اكتم ضحكتي على التشبيـه
و هو گام يضحك سكـتت قبل لا اگـول بفخر

- نتفت شعرهـا و عـضيتها طلعت من زندها دم
خفت اضربهـا على حلگها الي بس يسب بس خفت ينفجـر بوجهي من ورا الفليـر

- لا تگولين مسويـه فلير
يا يابه هسا طالعه چـنها حلگ مطي

- لا تحچي هيچ و تاخذ غيبتها
على العموم اخذت حقها و زايد

- عفية بضلعـي، يابه والله انـي حاب مره من صـدگ

- شعجب ما گلت رجال حوگ
مو انتوا الزلـم تحسسوني بس الزلم سباع و النسوان ضعـاف

- اني زلمه و اقر و اشهد انـتن النسوان اسـبع و اقوى منه
شايـفه الضيم الي عايشاتها و بعدچن بعقلچن والله احنـا الزلم ضربة ابره ما نتحمل
و انتن تخلفن و تربن و بعـدچن على حيـلچن

- تدري كلامك عجبني
رجعلي الأمل بعد اكو زلم تفتخر بالمـراة

حچيـتها بخفوت و هو رد ورا لحظه

- گتلـچ احب النساء القويـات و افتخر بكل الـنساء الي بحياتـي
اولهن امـي و انتِ

- خليـتني اني و امك بمكانه وحدة؟

صمت طويل مر على اخر جملة احچـيها
قبل لا يگول ورا لحظات بتنهـيده

- امي كلش تعنـيلي رغم الاذية الي لحقتها بـيه
بس احـبها، احبها كـلش و اتمنى لو ترجع لو ساعة اشم عطرها و ابوسهـا
و انتِ مادري شلون صرتي بمكانتها يمكن ما تصدگـين
بس محد سمعـني غيرچن
حتى اقرب اصدقائي ميـعرفون الي امر بي لو شلون حياتي

بللت شفتي و اني امسح على گـصتي
لمن كمل بنبرة حسيتهـا مخنوگه

- دجى اني هواي تأذيت، تأذيت من ابوية
من اخواني..من امـي هواي تأذيت و شفت قهر
كل الي يعنـولي تأذيت منهم، بس انتِ و صفد ما أذيتوني
فـ اتمنى من گلبي بيوم من الايام ما تجيني اذية منچـن
لأن انتن صرتن اغلى شي بحياتي..و حرفياً اذا صارلچن شي يعني انتهـي

كتمت غصتي و غصبـت دمعتي تبقى بين اصفـادي
و اني اگول بنبرة احاول تكون ثابته رغم رجـفة گلبي بسبب كلامه

- لا تخاف ، لا تتوقع مني اذيك

حچيـتها و اني اعرف داكـذب على نفسي قبل لا اكذب عليه
غمضت عيوني و وگعت دمعتي لمن گال و هو يضحك

- اعرف ضلعـي ما يأذي الي يحبـه

- غياث خلي نغير الموضوع
احچـيلي شنو سويت

- ما سويـت شي رحنا لمؤتمر و بصراحة مليت بسرعة
الدكتور المشرف على المؤتمر چـان فاهي و بارد كلش ما عنده روح الحماس الي احنا نتمناها

- صدگ انت دخلت هذا المجال لأن انت تحبه؟

- بالحقيقة لا..دخلته حتى اخلي ابوية يفتخر و يگـول ابني دكتور
بس ظنيت و ظنيت و خاب ظنـي

- اذا ما صرت دكتور شنو چنت تتمنى تكون

ضحك ضحكة قصيرة ختمها بـ

- اگلچ بس لا تضحكين

ابتسمت و اني ارد

- لا ما اضحك

- چنت اتمنى اكون عطـار
مو ابيع اعشاب و هيچ لا، اكون مختص بالعطـور و اصنعهن بيديه

- هـذا المجال حلو، زين تگدر تصنع العطور ؟ عندك علم بهذا المجال

- هوواي
من صغري احب العطور بشكل مو معقول..مو العطور العاديه الي نشتريها من المحلات و كلها ماركـات و بيها مواد كيميائية و صناعية
لا العطور الي تكون مستخلصة من الورود
من الاعشاب الطبيعية،من الحمضيات الي من تستنشقيها تحسين نفسچ بين الغابات
بين التـوليب و النرجس، عطور يزرع بگلبچ صفاء و هدوء
عكس العطور المصنعة بمعامـل و كلها غاز تخنگ الصدر

ابتسـمت و اني اگول بـاعجاب

- عجبنـي هالشـي
من ترجع للعراق اريدك تسويـلي عطر

- مـنو گالچ ما سويلتچ؟ يعني على الاقل بعدنـي داشتغل عليه
راح يكون عطر مميز، هيچ يجمع بين قوة اخشاب الصنوبر و نعومة الياسمين

و بحماس ما گدرت اسيطر عليه گلـت

- و شوكت يكمل

- اكو مستخلصات نفـذت من عندي فـ ما گدرت اكمله
راح اجيبهن وياي، بس فرصة صارتلي انو ما اكتمل حتى اتعرف على شخصيتچ اكـثر و على اساسه ابني العطر

عضيت على شفتي و انـي اگول باحراج

- سويت لأحد قبلي

- اي لـ صفد سويت و لأمـي
لنساء غالية عليه و انتِ من ظمنهن

زميت شفتي اكتم ضحكة طفلة فرحانه بملابس العيـد

- تـريدين احچيلچ بعد عن هذا المجال

و بلهفه گلت

- اي

- باعي كل انسان يتناسب اله عطـر يحچـي عنه و عن شخصيته

- امم سامعة هالحچـي اريد شي جديد

- اهاا راح اگلچ على موضوع يخص العطور و متأكد مئه بالمئه ما سامعة عنه

- گـول

- سامعة بالنوتـات العطرية

ضيقت عيوني و گلـت باستغراب

- لا

- النوتات العطـرية لازم تعرفيها لمن تريدين تختارين عطور و لمن تريدين تصنعينهن
النوتات العطرية هي مقسمه لـ 3 اقسام
مثلاً ترسمين مـثلث..او هرم
القاعدة الاولى او العليا هي الريحه الي توصل لحاسچ شمچ مباشرة

- الي ما ان افتح العطر او ارش منه

- بالـضبط
اول ريحة تستنشقيها تكون هي، و تكون خفيفة تقريباً و تختفي ببسرعة ورا ساعة او ساعتين و فجاة يختفي
هاي تكون مستخلصة من الحمضيات و الزهور الخفيفة

النوته الثانية و يسموها النوته الوسطى او قوام العطر
هاي ادوم تقريباً من اربع لخمس ساعات
شايفة من تشترين عطر و ترشين منه و تعجبچ ريحته
و فترة ترجعين تشتميه ما يعجبچ لان رائحته تغيرت؟

- تقريبا اي

- لأن هاي النوته تجي ورا النوته الاولى ورا ما تتبخر يلا تظهـر
ورا نص ساعة او 40 دقيقة..فـ لازم من تشترين عطر تنتظرين النوته الاولى تتبخر يلا يظهر العطر الاصلي

- اها

- و هاي تكون روائح زهـور ثقيلة
النوته الثالثة و هي النوتات الاساسية، هذا الجزء الاكثر جوهريه بالعطـر
ما يظهر عطره مباشرة لا ورا فترة تقريباً ساعة او ساعة و نص، و تكون قوية كلش و متروح تبقى من ستة ساعات لـ9
و هاي تتكون مـن المسك او خشب الصنـدل او الفانيـليا

و باعجاب حقيقي گلت

- اول مرة اسمع بهاي المعلومه
صدگ ابهـرتني، يعني عالم العطور مو مجـرد مستخلصات و تتعبى بـ قنينة

- لا عالم العطور واسع كلش
من تدخـلين اله راح تحبيه بشكل چبير، مو اي عطر يناسبـنا
تعرفين اكو بعض العطـور تبعث بالشخص الثقـة، من تكون من الدخان او التبـغ و الجلود

- زين انت وين تصنعهن

- عندي معداتهن و انابيت و قـناني بـالبيت مالتنا القديم
بيوم من الايام بعد ما ارجع للعراق اخذچ و اشوفچ المكان
ها رغم ما احب احد يدخل الـه

- بس اني غير مو؟

- انتِ ضـلعي مثل ما اقتحمـتي حياتي و گـلبي تقتحمين كل خصوصياتـي

كتمت ابتسامتي و اني اگول

- تعرف انت مو سليط السان
بالعكس كلامك كـلش حلو

- الي ما يعرفني يسميني هيچ
اني ما احب اظهر شخصيتي الحقيقية گدام اي شخـص، شخصيتي احب اظهرها فقط گدام الي يهمونـي لأن مو الكل يفهمـني

حديثنا طـول و انتهـى على طرقات باب غرفتـي
ودعته و ناديـت اتفضل، دخلت جودي للغرفة و تنهدت
رفعتلهـا حاجبي و گتلها

- شبيچ

- ابوية متصل بـ رسلان و عازمه هو و زوجته على العشا

- و ليش ضايجه؟

- مو ضايجه بس اكره الشغل

ضيقت عيوني ساخرة

- علينا جـودي

- جديات دجـى ما الي واهس اقابله و اشوفه
يعني ما ادري بس ما اريد اتذكر هو عنده مشاعر ناحيتي

- جودي اخذي نفس و ذبي
و اهـدأي و تصرفي طبيعي، لا تبقين متوتره و شايـله هم

حچيتها بجـدية و هي تنهدت و هزت راسها بأي

.

جودي

اجـبر نفسي ابتسم و اني اسلم عليهم و ابارك الهم زواجـهم
لولا الـعيب ما دخلت و سلمت

يحچي و يضحـك وي والدي و مجـيد و صدى ضحكاتهم توصلنـا للمطبخ حيث گاعـده ويانا زوجتـة
ليـان، حتى اسمها حلو
مثل ملامحهـا و طـبعها
و رقيقة مثل حديثـها

- اي جودي شنو تدرسـين

سألتنـي و اني تحمحمت و رديت عليها

- تخرجت من كلية القانون

تفاجئت و هي تگول بـابتسامة

- ابداً شكلچ ما يوحـي انچ متخرجه، يعني كل ظني بعدچ بالمرحلة الاولى شكلچ اصغر من عمـرچ

حسيت كلامها هيچ انعشنـي
و اني اگول بفرح

- صدگ والله فرحتـيني

- هي حتى تصرفاتـها اصغر من عمرها

حچتها دجى و اني رمقتها بغضب مصنطع و گامت تضحك
كتفت ايدي و اني اگول بثقة

- يمه يمه من الغيرة

گعدت ليان تضحك و اني ابتسمت الـها
باوعت لـ صفد ما شـاركتنا الحديث و منزويه وحده
من شافتني ليان اباوعلها حست اكـو شي
فـ تحمحت و هي تگول

- هاي الحلوه اني حـبيتها
بس ليش هيـچ گاعده وحدچ تعالي هنا خلي نتعرف عليچ

حبيت لطافتها و حديثها..باوعتلها صفد بخجـل
قبل لا تتقـدم و تگعد على الكرسي بصـف ليان
شكل رسلان حاچي الها عنها لأن گعدت تحچي وياها شنو تدرسين
و انتِ سبعة و حبيت اصرارچ و انو ماكو شي وگف بوجهچ حتى تحققين حلمچ

استندت على الكاونتر و اني اباوعلها شلون اندمجت بالحديـث وي صفد الي حچتلها عن سبب الخدوش الي بوجهها
و گعدت تنصح بيها ليـان انو متبـقى تكون ضعيفة و ادافـع عن نفسها

شخـصيتها رائعة
تأكدت انو صح رسلان خـسر حب لكن ربـح انسانة متفهمه و واعيه و مثقـفة

جـذبني حديثها و هي تگول موجهه كلامها لـ صفد

- اني عشت يتيـمه بدون ام و اب
اهلـي توفى بملجأ العامرية سنة الـ1991 بحرب الخـليج
بيومها مچنت وياهم..لأن عند بيبي بـ ديالى ما يتجـاوز عمري الـ4 سنين
ما اعرف شلون سارت الاحداث بأهلي و خلتهم بهذا الملجأ
لكن عرفت انو صرت بدون ام و اب او حتى اخـوان
عشت مع اعـمام يعتبرون المراة مكينة ولادة و شغل فقط، تمردت و انكسرت هواي بـسببهم
ورا وفاة جدتي الي چانت الوحيدة الي توگف بوجهم صرت لقمة سهله الهم..بطلوني من دراستي فترة بس چنت عنيدة و قويـة و رجعت
اشتغلت و أسست نفسي بنفسي، ما فكرت بالارتباط او الزواج لأن كل حلمـي چان فقط اريد اكون مهندسة معروفة
اسير على خطى زها حديد..اريد اصير نفسهـا
بس وگفوا بوجهي و منعـوني اطلع للخارج و اكمل تحقيق حلمي

فـ صفد لا تخلين مجرد كم ضربه و لكمه على وجهچ توگفچ بمكانچ
انتِ قوية بنفسچ و بأخوچ الي يبيع الدنيا لأجل عيونچ، نظرات الحزن الي بعيونچ مـحلوه
اضحكي و لا تهتـمين لـ شي، لا تهتمين للي يريد كسرچ
اعرف هواي عنچ لأن حچالي عنچ رسلان
و انعجبت بقوتچ لكن خاب ظني لمن داشوف هـذا الحزن بعيونچ

ابتسمت لمن ختمت كلامها و هي تمسـح على ايد صفد و تكمل

- فـ شوفيني الابتسامة الحلوه
و وعديني ما تروح من وجهـچ، تدرسيـن علوم حاسوب صح

هـزت راسها بأي و رجعت ليان تگول

- مجال كلش حلو ان شاء الله اسمع عنچ اخبار كلش حلوه بخصوصه

و اخيراً ابتسمـت صفد و هي تأشر ان شاء الله
خلصنـا العشا و اجتمع الكـل حول السفـرة
دجى رفضت تگعد حاولت اخليها تگعد ويانا لكنها رفضت انها جمعة عائلـيه
و تحججت انها مو جوعانـة
خليتها على راحتهـا

و اثناء مـا ناكـل چنت اتجنب اي حـديث او حتى اباوع لـ رسلان و كانه مو موجود
لكـن كلامه خلاني ارفـع راسي و اباوعـله باستغراب و تفاجئ
و هو يجاوب على كلام والدتـي بخصوص الشقة الي استأجرها

- تركتها بالحقيقـة

- ليش راح تبقون وي اهلـك گاعدين

ترك ملعقـته و گـال بهدوء

- لا عمه..بعد شهـر و نص تقريباً نطلع للخارج

- هاي شبيكم انت و ابن عمك شو هواكم ذابينه على الخارج

حـچاها مجيد بضحكة و هو جاوبه بذات النبرة

- على الاقل هناك عندك فرصـة مو مثل هنا يخنگوها هي و بالمهد
و اصحاب المـناصي و الواسطـات هما الي يربحون
راح ادرس بكالوريوس

- بأي جامعـة

- جامعة ولاية كنتاكـي بـامريكا

- مـا طول هذا حلمـك فـ الله وياك ابني اهم شي تحقق الي تحبه

ابتسم على اثر كلام والـدي
باوع لـ ليان و گال

- مو فقط حلمي حلـم ليان كذلك
بصراحة هي الي زرعـت الفكرة بالي

ضحكت ليان و هي ترد عليه

- زرعتها بـس انت من الاصل مقتنع بيها

- بصراحـة اي

حچاها و ضحك و اني بقيت اباوعـلهم للحظات
قبل لا ابتسم و شعور بالراحة سكنـي، على الاقل واضح عليهم متـفاهمين و طموحاتـهم متشابهه

.

دجى

دخـلت لغرفـتي و اخذت التلفون
ابتسمت لمن لگـيت مكالمة فـائته من غياث

عاودت الاتصال و هو بسرعة رد

- چنت تتنـظر المكالمة

حچيـتها و گال بضحكة

- على مدار شهـرين تعلمت كل ما اتصل الگاچ مشغولة بـشي فـ اعرف راح تخابرين فـ انتظر

ابتسمت ابتسامـة واسعة و اني اگول

- اليوم رسلان و زوجته سافروا
يعني معقولة تگـدرون تتقابلون

- نگـدر بس الطريق بين ولاية كنتاكي و ميشيغان بعيد كلـش
نتخابر  نشوف بلكي نگـدر

همهـمت
و اني اتربع على الچرباية و بتردد گلت

- غياث اسألك سؤال
من حچه وياك رسلان بخصوص جودي انت شنو چان رائيك

- تمنيتـها لو موافقه متلگه احسن من رسـلان
بس تحججت بموضوع خطوبتها السابقة مـن رامي و حچي الناس

- اني حچيت وياها و گتلها لا تهتمـين الهم
بس بقت مصره على رائييها

- كلها صوچها ليش وافقت عـلى رامي و هي تعرف اخلاقه شلونها

قطبت حاجبي و گلت بتشكيك

- انت چنت تدري بـ رسلان يحبها لـ جودي

- ما عرفت هالشي الا ورا ما رجع و هي مخطوبة من رامي و منتهي السالفة

- ليش ما حاولت تتدخل و تمنعها توافق

گام يضحك و هو يگول باستهزاء

- شنو تحچين انتِ
ما دريت الا من بيت عمي عبد الرزاق انو باچر خطوبة رامي و جودي، هسا الواحد من يجي شخص يطلب ايد اخته مـو المفروض يعرف و ينطي رأيه بالرجال؟
اني محد اتصل بيه و لا طلبوا رأيي حالي حال الغريب عرفـت

انقهرت عليه فـ گلت بنبرة مرحه اغـير الموضوع

- شي مضى و انتهـى
گلي شوكت تجـي زيارة

خابت آمـالي لمن گال

- لا ما الي واهـس روحة و رجعة

و بـقهر همست و اني الي فرحت لمن قبل يومين گال افكر انزل زيارة كم يوم و ارجع

- بس انت گـلتلي اجي

- مرت شهرين و بقـن 3
مو هواي

سكتت و ما رديت عليه، حسيت دمعتي بطـارف عيني

- زعلتِ؟

- لا

حچيتها بخنگه و اردفت

- صدگني مـو زعلانه

- لا تكـذبين اعرف صوتچ من تكونين فرحانه و متلهفه
نبرة صوتچ تكون ترجف، و من زعـلانه لو ضايجة تصير خاوية و ما تاخـذين نفس من تحچين بيها

التزمت الصمـت كاتمه دمعتي
الي احسها صارت رخيصة كـلش، والله مچنت هيچ ليش صرت اتأثر من كلامه و احس نفسي ضعيفة گدامه كلش

- دجـى

همـهمت و هو اخذ نفس و گال

- لا تـزعلين تمام؟
اليوم رحت لمحل يبيع مستخلصات مال عطور
و اشتريـت منه حتى من ارجع اسوي العطـر

- تمام

- لا تحچين وياي هيچ دجى و تخلينـي اضـوج

غمضت عيوني و گلت

- لا تضـوج بس شوية انقهرت لأن انت گلتلي اجي و اني گـعدت انتظر و فجاة تگول مـا اجي

- شسوي يا ضلـعي والله تعب

- حقك والله

شوية حچيـنا و ودعنـا بعض
غلقت التلفون و طلـعت للصالة
گاعده صفد و جـودي يباوعن على التلفزيون، گعدت بصفهن و جودي تفصفص حـب باوعتلي بطـرف عينها و گالت

- چنتِ تحچين وي غياث

- اي راح يتغدى

حچيتها و هي تركت صحن الحب و گعدت بصفي
ابتسمت و هي تگول

- بـربچ هماتين يـتغزل بيچ
ما اتـوقع غياث انسان عاطفي

كتفت ايديه و گلت

- متعرفين غياث انتِ، اخوچ اكثر انسان عاطفي شفته بحياتـي

- يعني يتغزل بيچ

گلبت عيوني و گـلت بضحكة

- اكو فرق بين الرجـل العاطفي و الرجل الي يحب يتغزل
الي يحب يتغزل يسمعچ عمري و حياتي و حبـيبتي و من هذا الكلام باوقات معينه
امـا العاطفي فـ لا..تلگينه بكل وقـت يسمعچ كلمات تنعشچ و يحبـبچ بنفسچ
مو شرط غزل..لا مـدح بذاتچ
بحنانچ و حبچ اله بقوتچ و بكلشي يخصچ

رفعت جودي ايديها و هي تگول

- لعـد الله يعطف الرجال الكبار منهم و الصغار
يا رب دعاء وحدة كاتلها الجفاف

ملت عليها و همـست

- مو اجاج عاطفي بس دفرتـي

- هذا موضوع اخـر

حچتها و هي تضحك
سديت الموضوع و كملنا الفيـلم، نزل مجيد من فوگ
و گعد ويانا و هو يحط رجل على رجل
صفـد وگفت حتى تروح بس هـو و لأول مرة يوجه الها حديث

- اگعـدي صفد ليش گمتي

اخذت حب و اني اباوع الها شلون انگلب وجهها احمر
و گبل گعدت حتى ما گالت سبب وگفتهـا
ابتسمـت جودي و هي تهمس عنـد اذني

- الاخ مسيطر من هسا

سويتلها اشش و هي گوه كتمت ضحكتها
انقهرت على صفد حتى ما مدت ايدها و اكلت من المكسرات بقت تباوع للتلفـزيون و مجيد يباوع الهـا و كل شوية يبتسم و سرعان ما تختفي ابتسامتـه يكابر على نفسه و يريد ينساها
بس ميگـدر..شگد ما يحاول يطلعهـا من گلبه ما راح تطلع

ثاني يوم العصر اتصلت بـ غياث بس التلفون مغلـق
بقيت قلقـانه سألت جودي و گالت ما ادري
و طول اليوم چنت متوتره..مختفي لا على الواتساب و لا على الخط موجود
دزيت اله مسجات هواي و بس ما يوصلن اله

دگيت الباب على جودي بالـ1 و نص
طلعتلي و هي عيونها گوه مفتحتهن، سحبتها للممر حتى ما تسمعـنا صفد

- شبيچ دجى شو ما نايمه

- غياث مختفي
ليش تلفونه مغلق و نت ما عنده

- يمكن خلص اشتراكه او اي شي

- لا متأكده صاير شي

- زين شنسوي هسا

- نسأل مجيد بلكي يعرف

مسحت على وجهها تبعد اثار النوم
دگت الباب و صاح الها مجيد فوتي
اني بقيت واگفه بالباب، و هي سألته بدون مقدمات

- غياث ماكو مختفي اليوم

- حچه وياي العصر على الماسنجر خطه متوقـف

- حتى على الواتساب

حچيتها و هو بـاوعلي مستغرب
تحمحت و ابتعدت عن الباب و اني اعض شفـتي من داخل شلون اندفعت بالكلام

- هو خطه متوقف فـ اكيد ما عنده انترنـيت
حچه وياي من لابتوب الشغل

- ها خوش سمعتـي دجى؟

- سمعت

حچيتها و گلت بسرعة

- تصبحون على خير

و نزلت لغـرفتي
و شوية بالي ارتاح و گدرت انام
ثاني يوم كـذلك هماتين ما حچيت وياه
حسيت بفراغ كلش چـبير، و عرفت نفسي شگد تعودت على وجوده بيومـي
من اخلص شغلي اگعد احچـي وياه بـ اوقات فراغة

گعدت على صوت موبايلي بسرعة سويته صامت و اني اباوع للساعة بالـ4 ونص الصبح
ما انتبهت للرقم و بسرعة فتحت خط
چنت منعسـه كلش بس گلت آلـو

بس كلشي تحفز بيه و فزيت من مكـاني لمن وصلني صوته و هو يگول بمرح

- يگولون اكو نيزك راح يمر من فوگ الارض
اطلعي للحـديقة و شوفي

- ورا يومين من الغياب تتصل بيه علمود نيـزك

- اي علمود نيـزك
يلا اطلـعي

- غياث منعسة كلش والله
شسوي اذا مر او لا

- هـسا اطلعي يفوتچ المنظر

تأففت و بعدت الغطا عـني
و بهدوء و علـى اطرافي اصابعي طلعت و التلفون بعده على اذنـي

طلعت للحديقة و رفعـت راسي للسما و گلت

- اصلاً مغيمه كلش شلون راح اشوفه

- باوعي گـدامچ و تشوفيـنه

مع ما حچاها اخذت ثواني يلا استوعبت
بسرعة نزلت عيني و باوعت ناحية غرفـته
چان مستند على حايطها بـصف الشباك، فرت ضحكه من بين شفايفي
ضحكه سعـادة و لهفه انطيت لاقدامي الحريـة و هنّ يركـضن باتجاهه
وگـفت گدامه متردده
اريد احضـنه بس اخاف..مسحت على راسي و هو ضحك على ضحكتي
مد اصبعة الصغير و اني شبكت اصبـعي الصغير وياه

- صدگـت راح يمر نيزك

- بس جيتي احلى من مرت النيـزك

- جـيتك رجعتلي روحي

حچيتها و صدگ انتبهت لنبرة صوتي چانت ترجف من سعادتي

- الحمد الله على سلامتك

- الله يسلمچ
ردت اول شخص اشوفه هـو انتِ

غورقت عيوني و اني اهمس

- يومين عيشتني بقلق
ليش ما گلتلي راح ارجع

- حتى اسويها الچ مفاجئ، مجيد يعرف راح اجي خفت لا يگولكم بس شكله گـدر يضم السالفة

ضحكت و اني ارجع امسح على راسي
و هو تنهـد تنهيده عميقة قبل لا يگول

- مشتـاگ لشوفتك ضلعـي

- ماكو حـب بدون فراق
الفراق يقوي الحب و يخلي صاحبه يتأكد من مشاعرة

- و انـي متأكد من مشاعري من يوم الي حسيتچ انزرعـتي بگلبـي

دنگـت و اني اشبك ايديه قبل لا اگول و خطواتي ترجع ليورا

- روح نـام انت جاي من سفر و هسا تعبان

- چنت تعبان بس من شفـتچ انفض تعبي كله

بقيت ملتزمه الصمت
لأن بحظرته..كل كلامي يضيع، مهما حاولت ابين صلابتي الگه نـفسي هشه گدامه

- ميخالف و لازم افوت جوه لحد ينتبه

- روحي لعـد

حچاها و ابتسم ابتسامة صغيرة
مشـيت ناحية الباب لكن توقفت لمن گـال الي

- ضلعـي احبك

- و اني احبك

حچيتها و مشيت بخطوات سريعة
مـا اعرف هربانه من نفسي لأن لأول مرة احچيها اله
او هربانه منه و مـن الاحمرار الي طغى على ملامحي

دخلت للغـرفة و ضحكت بفرح حطيت ايدي على گـلبي اهدأ نبضاتـه السريعة

رجعت تمددت بمكاني و اغصب نفسي انام لكن ما گدرت شوفته بعدها مأثره عليه

الصبـح و اني داحظـر ريوگ دگ الباب على اهله و بس اسمع هلا بـيك و فرحتهم بجيته
ابتسمت ابتسامة چبيره لمن دخل للمطبخ و هو يسلم عليه و اني تحمدت اله بالسلامة
جبرت امحيـها حتى محد ينتبه

گعدنا كلنا حول السفرة و هو يحچيلنا عن سفرته
و انو مجيد يعرف بالموضوع بس حب يسويها مفـاجئ

صفد فرحتها تضاهي فرحتـي و هي متعلقة بيده
و ضحكتها تزيـن محياها

العـصر طلعـت للحديقة و شفت الحجي و غياث گاعديـن
اجيت افوت لكن وقفني الحجي و هو يناديني بأسمي

تقدمت و وگفت يمه و گلت

- ها حجي طلبتني

- اگعدي بنتي نحچي بموضوع

باوعـت لـ غياث چان ساكت و ما حچه شي

اخذت كرسي و گعدت و هو تنهد و بين ايديه مسبحته

- خلي نحچي بالموضوع بدون مقدمات
عرفت انو اكو بينچ و بين غياث مشاعر و واحد يحب الاخر

كلامه چان صدمه الي و خلاني اباوع لـ غياث بعتب لأن حچه
الحجي من شافني باوعت لغيـاث اردف

- مو غيـاث الي حچه الي
الفجر شفتكم واگفين بس ما ردت الموضوع يكبر، و هسا من سألته ما نكـر بالعكس
گـالي احبها و رايدها على سنة الله و رسولة، بس الي ما عجبني يا ولدي انتوا ظميتوا عليه هالشـي

- حجي گتلك چنه ما متأكدين من مشاعـرنا و تواصلنا المستمر اكدلنا حقيـقتها

حچاها غياث بشبه عصبية و اني ما فهمت سبب غضب الحجـي
لأن ميعرف بالموضوع او لأن نتواصـل

- و اني الي زعجني هو تواصلكم
انـي خفت عليكم لـو لا توگعون بالحـرام بسبب هالشي!

- و احنا مو صغار حتى ما نعرف الحرام من الحلال
ما حچينا شي يغضب الله و لا تعدينا حدودنا
و انت ادري بيك ما تصدگ مني كلمه بس اسألها گوللها اذا غياث تعدى حدوده وياچ

دنگت راسي محرجه من الحجي
حسيت كاني اقترفت ذنب و خايفه اواجه بي احـد
بلعت ريگي بصعوبة و اني اگول

- ابداً، عمره ما تجاوز حدوده وياي

رفعت راسي و كملت و عيني دمعت

- و حتى الفجـر ما لزم بس اصبعي
الله شاهد ما تقرب مني و لا حاول، حجي هذا ابنك و انت اكثر شخص المفروض تعرفه

سكتوا اثنينهم و اني اباوعلهم و غصة بداخلي بس لا ترجع علاقتهم مثل قبل كلها توتر

- الدنيا تغيـرت محد يأمن
و اني خايف عليچ يا بنتي و خايف عليه

- حجـي الله يخليك شنو هذا الحجـي
ترا انـي الي ما ارضاه على اختي ما ارضاه على بنات الناس

حچاها غياث و الحجي بعصبية رد عليه

- بس قبل رضيـتها و ماضيك يشهد

- گلتها بعظمه السانك ماضـي
بس شترجى منك ادافع لو تثق بيه

دفع الكرسي و گام على حـيله و الحجي رد هو الاخر بذات النبرة الغـاضبة

- موضوع المشاعر ما بيها اثق بيك لو بيها
بس الي يحز بگـلبي انك طلعت و فتت للبيت مو لأجلنا انما لأجلها..و اني الي چنت استغرب حبك المفاجىء النا

ضحك غياث بسخرية و هو يخلي ايده على خصره
ضغطت على فكـي اجـبر نفسي ما احچي كلمة اخرى تأجج الوضع
لكن كلام غياث چـان فتيل بالنسبه النا و اشعله

- لعد ما يحز بگلبي لمن اعرف اخوية ابـن ابوية و الي اثق بيه ثقة عمية مخلي عينه على اختـي؟

باوعتله بتفاجئ و اني احط ايدي على ثغري
و الحجي فتح عيونه بصـدمه
ما اكتفـى غياث من هذا الكـلام فقط انما ضحك باستهـزاء و هو يگول

- و ازيدك مـن الشعر بيت
ابنك الي تفتخـر بي و مفضله عليه ، جاب رسلان ابن اخوك لهنا و لبيتك يحچي وي جودي حتى يقنعها توافق عليه
و طبعاً انت و مرتك يا غافلين الكم الله
فـ اذا اني مـاضيي چان وصخ، فـ ماضي ابنك و حاضره اوصـخ منه

.

السلام عليكم و رحمة الله و بركاته

شلونكم حبايبي ان شاء الله الكل بخير

اسفة على التاخير و اتمنى البارت عجبكم

ارائكم  و توقعاتكم 😄

تصرف دجى بشأن ام ماجد

و علاقتها هي و غياث الي زي العسل🥲

و اخيرا القفلة 🙈

و بس والله نلتقي على خير احبتي
و لهذاك الوقت استودعكم الله الذي لا تضيع ودائعه