| دُجـى في جوف البـغي |

•الفـصل السادس عشر•

#دُجى_في_جوف_البغي
#بقـلم_الراويه
#الفصل_السادس_عشر

بسـم الله ♥

صلوا على النـبي 🧡

.

دجى

صمـت فقط محيط بالغـرفة
اكو احساس بألم بگـلبي يشبه احساسـي بيوم الي حچـه غياث بيوم العـزيمة
شعور مثل شعور الخـذلان..الخيبة المـريره

- ها سكـتي؟ اكيد تحسين بالصدمة
انكسر گلبي عليچ

نـبرة صوته الساخرة افاقتنـي من شـرودي
ضحكت باستهـزاء و اني اگـول

- ما خايفة منك و لا من عشرة من امثالك
و شتريد تسوي سـوي

- يعني ما خايفـة

- تؤ

رديت و ابتسمت و اني اگول بثقـة رغم مرارة الوضع

- متعرف وين انـي فقط اسم المنطقة
و يمكـن اصلاً اني اكـذب على جوان؟ و اني مو بهاي المنطقة

خفـضت صوتي و اني اگول بذات النبرة

- يـمكن بصف البيت الي هي بي
محد يعرف مكاني غير الله

- ايـا سافله يا حقيرة يـا......

غـلقت الخط و سحبت نفس عميق و اني امسح على وجهـي
اكبر غلط سويـته لمن گتلها على اسم المنطقة، المـفروض ما احچـي

بالليل ورا العـشا وگفت بصفـي جودي
و هي تگـول بصوت ناصي

- غياث اتصل بيه..يريد رقمچ
گلت ما انطي الا استأذن منچ

- انطـي اله

ابتسمت هي ابتسامة واسعة و گـالت

- تمـام

و طلعت تلفونها و بدت تكتب رسالة لـ غياث تحتوي على رقمـي و دزتها اله

و فعلاً بالـ10 اتـصل بيه رقم غريب
ترددت اجاوبها..خفت لا يكـون صاحب الرقـم ابو وائل

لكن فتحت الخط و خليته على اذنـي
و گلت

- آلو

- آلـو دجى اني غيـاث

گـعدت على السرير و انـي اسند ضهري على تاج السرير

- اهلاً بيك

- و بيـچ، مبروك التلفون الجديـد

- الله يبارك بيك تسلم

حچيتها و هو رد

- اكره السوالف الرسميـة
اي شلونچ اخبارچ

- زينه اظن اول البارحة شفتني

- على الاقـل گولي و انت شلونك

جبرنـي كلامه اضحك و اني اگول

- اها و انت شلونك

- اني زيـن يعني على الاقل هسا

كـتفت ايدي اليمنى و اليسرى تسـند التلفون على اذنـي
و گـلت بتسـاؤل

- ليش على الاقل هسا؟
ليش مو زين و بس

- لأن مو كل وقـت نكون بي زينيـن

- غياث احچـيلي عن امك

ضحك و گـال بـاستغراب

- ليش؟ يعني اقصد ليش تذكرتـيها

- ما اعرف بس سألتك لأن اعرف نص المعاناة الي انت بيها چانت بسبب مرض امك

- حجـيه نائله ما قصرت و حچتلچ كلشي

ابتسمت و اني ارد عليه

- انـي سألتها و هي حچتلي

- لعد ليش تريد تسـمعين مني

- لأن اريد اسمع منك

ارتفعت ضحكاته على اثرهن ابتسمت
سكت و اخذ نفس و هو يگـول

- والله انتِ داهيه، يلا احچـيلچ
امـي چانت مريضة نفسية و هالشي ما استحي منه بالعكس..افتخر بيها لأن وي مرضها گدرت تربينا و تعوضني عن ابوية الي تركني و لصفد عن ابوها المات
چـانت طبيعية كلشي ما بيها، الى ان توفت جدتـي و چانت متعلقه بأمها كلش
هي اجهـضت و توفت جدتي و بعد اقـل السنة توفى زوجها ابو صفد
كلها التمـت عليها

سكت لحظات و كمل بصوت منخفض

- چنت احس نفسي مربطه ايديه و اني اشوفها بهاي الحالة
ما خليت طبيب يعتب عليه..راجعت بيها الا ان هلكـت نفسي و روحي
ردت بس ترجع مثـل قبل، چانت مرات تفقد وعيها ما تصحى الا ورا ساعة ساعتين
مرات تطـردنا من البيت انـي و صفد

ضحك بأخر الجملة
لكن ضحكته چـانت كلها قهر و حزن

- تخلينا بالساعات برا گاعدين و بحضني صفد گاعده
تفتح الباب فجاة، تگعد گدامنا و تبچي و هي تحضن و تبوس بينا و تدعي على نفسها لأن طردتنا
و مرات ما تخلينا نعتب باب البيت، و لازم نكون گدامها و ما نغفل عن عينها

تخاف علينا لدرجة تمنعـنا من دخول المطبخ
تخيلي عمري 22 لو 23 سنة و تمنعني ادخل المطبخ لا احترگ بالطباخ لو انجـرح بسچينه

- شلون چنت تتعامل وياها من تسوي هيچ

- ما چنت اتعامل الا باطاعتها..ما اگدر ارفض
من ارفض تأذي نفسها و تأذينا تگعد تكسر بالاغراض و تصيح و تبچـي

حسـيت بالخنگه و اني اسمعه، و اني اتخـيل تصرفاتها رغم ما شايفتها الا بالصور بجهاز صفـد

- مرة گالتلـي جودي انو صفد خافت و راح صوتها

- اي خافـت من امي
بس هذا بسببي

- ليش؟

- بوقتها چان عمرها 5 سنوات، و اني ادرس بالجامعة و عمري تقريباً 23
اصدقائي سوو عزيمة و اصروا عليه احظرها
و رحت على العشـا الي سوو، من رجعت للبيت
لگيته مگلـوب فوگ جوه
الاغراض متكسره، كلشي مو بمكانه الصحيح، عرفت امي اجتها الحالة
ما خفت عليها بگد ما خـفت على صفد لأن وحدها وياها

امي بالصالة گاعده و بكل برود تباوع للتلفزيون، ما حاسه على نـفسها
دورت لصفد و لگيتها بغرفتي خاتلة جوه طاولة المكتب
حـاضنه نفسهـا و تبچي، احچي وياها ما ترد
و مـنا بدت معاناة اخرى، و طريق اخر سلكته ناحيته الاطباء

هواي اطباء اخذتها عليهم..و كلهم نفس الحچي
عـدم قدرتها على الكـلام سبب نفسي، لأن هي چانت تحچي و كلشي ما بيها

مسحت دمعتي من حـسيت صوته اختنگ و هو يردف ويـلوم نفسه

- كله بـسببي الصار الهـا
لو بهذاك اليوم ما رحت للعزيمة و ضحكت و تونست ما چان امي خـوفتها لـ صفد و ما چان فقدت صوتها
بس هذا سبب تقصيري

- انت ما عليك، مو بسببك غياث
هالشـي مكتوب الها، و انت بشر هماتين تريد ترتاح و تريد تـشوف حياتك
مو معناتها رحت و رفـهت عن نفسك صرت مقصر

- بس اني چنت اعرفها مريضة و طلعت و خليت صفد وحدها وياها

- بس مچنت تعرف راح تجـيها الحالة
لو تعرف ما چنت رحت

حچيتهـا و هو زفر
و همس ورا لحظات

- هذا الموضوع يتعبنـي كلش، كل ما اتـذكرة احسه ينعـاد گدامي
خلي نـسده

- ما تنـسى الاشياء الي توجعك الا اذا حچيتها و طلعتـها من گلبك

صـار صمت طويل
لدرجة ظنيت غلق الخـط، لكن قبل لا اتأكـد
هو رد بـنبرة خافته

- اذا حچـيتها او لا ما راح يتغير شـي
الاشياء الي تأذينا مو بس بگـلبنا انمـا عايشه ويانا بكل لحظة، الله يخليـچ دجى سدي الموضوع
احچـي عن روتينچ بغسل الصحون و لا تگعدين تفتحين مواضيع مثل هاي

تقبلت كـلامه و عرفت هالشي يأذي
فـ گلت بعدم اهتمام

- ما عندي روتين معيـن، اهم شي تخرج اطباق نظيفه من الحـوض
احسن نوع زاهـي هو فيري، رغم ريحته القوية بـس زين

رجع يضحك و اني ابتسمت و رجعت راسـي ليورا سنـدته على التاج و هو رد ورا لحظات

- دجـى لهذا احبچ

حسيـت گلبي قفـز من مكان عالي على اثر كلامه الـي ما توقعته
من شاف صمتـي اردف

- لأن بوقت الجد جدية و بوقت الضحك ضحـوكه
تمنيت لو عـارفچ من زمان

- ما چـان راح تعجب بيه

حچـيتها و هو التزم الصمت مثلـي

- شمدريچ ؟ ما طول هالشي ما صار فـ محد يعرف شنو چان يصير بوقتها
هسا انـي اسألچ ضلعـي، حياتچ وي امچ و زوجها چانت صعبة

- مـأساويه، و متعـبه

نطقتها بهمس و اني اغمض عيوني
اتذكر ايامـي السابقة و لگيت نفسي احچيها عنها

- چنت اكره نفسي لأن انـي بيهـا
چنت اريد اهرب لكن ما چان بيدي شي

- دجى عندچ عمام اخوال

- عمام لا، و خـوال اثنين و علاقتهم بأمي منقطعة
حاولت اتواصل وي بنت خالي لكـن ما ترد

حچيتها و اني اتعدل بگعدتـي
تعمدت احچي عن بنت الخـال الخيالية حتى ما يصير اكـو اي شك

- اريد اگـلچ على موضوع لحد هسا ما حچيته لأحد

- اي موضوع؟

قطبت حواجبي و اني اسأله
و هو تنهد و گال

- راح اسافـر

- وين تسافر و ليش؟

حچيتها و انزعجت من الموضوع قبل لا افهم سبب سفره

- بعثة اني و كم دكتـور وياي
نبقى خمسة اشهر

غصـب عني ارتفع صوتي و اني اگول بقـهر

- خمسة اشهر؟؟ و صفد شلون راح تبقى وحدها

- متعرفين هاي البعثه شگد مهمه بمسـيرتي
و صفد لحد هسا ما گتلها، ما اعرف شلون افـاتحها بالموضوع

- شوكت تـروح

- الاسبوع الجاي

- من هذا اصريـت يكون عندي خط حتى اتواصل وياك
لأن عرفت نفسك راح تسافر

حچيـتها و اختـنقت بباقي كلماتي

- مقهورة

- اكيد لاا، بس مقهورة على اخـتك

- ليش تكـابرين
گوليها مثل ما گلـتها، انو مـا تريديني اروح

- اذا گتلك لا تروح او روح نفس شي
هاي البعثه مهمه الك و مستحيل اوگف بطريقك

- منتبه لنفسچ ما جاوبتـيني على كلامي ؟

غمضت عيوني و زفرت
ابداً ما مستعده اعترف حتى لنفسي، احسها صعبة كلش
صعبة اگـول هاي الكلمة او حـتى اعترف بحقيقة مشاعري ناحيته

- ليش سكتـي؟؟

- افكر ليش ما گـلت لـصفد مو المفروض تعرف
و بعدين هي وين راح تبقى لمن تسافر

- تعرفين تهربـين من الموضوع
متردد اگول الها اخاف ما تتفهم الوضع و تنقهـر، و وين تبقى حسب هي وين تريد
عمامها مستحيل اخليها عدهم يا امـا خوالي لو عدكم

- خـلي تجي عدنا

- اسألها و نشوف

رجع الصمت سيد الموقـف
قبل لا يقطعه و هو يگـول

- ليش تتهربـين

- ما متهربه

- ضـلعي لا تنكرين
انتِ تعرفين اني شنـو بحياتچ، بس انتِ خايفة
خايفة تعتـرفين بمشاعرچ

- اذا تعرف ليش تسألنـي

- شگد لسانچ وقح

رفعت حاجبي و اني ارد باستـفزاز

- مو على اساس تحب المراة القوية
و تحـب لساني السليط و كيـدي و مكري

- و بعدني احـبهن

الجمني و اخرس لسانـي
ضحك ضحكة قصيرة امتـدت ببساط سحري لگـلبي
غمضت عيوني و اني ارسم خيالة گدام عيني
ليش هـسا يلا بديت انتبه شگد اني حافظه تفاصيله بمخيلتي؟

- يمكن الوقت تأخر
باچـر عندي دوام

و بمكـر گلت و اني ازم شفتي

- اسألك سؤال و ترد عليه بكل صراحة

- اسألي اسمعچ

- هماتـين بمراهقتـك حچيت بالتلفون وي بنية
لا تنكر حچتلي الحجـيه عن اصدقاء السوء الي رافقتهم

- گلتيها مراهقتك و اغلبنا من نمر بهاي المرحلـة
نسوي اشـياء نندم عليها، اي اتصلت و صادقت بس كلها بحدود المعقـول
حتى بفترة دخولي للكلية..تعرفت على بنات بس انتهى بينا الموضوع انو نتفارق

ما عجبني جوابه، او بالاحرى حسيت بخيبة ظن

- يلا باي

- اوگـفي اوگفي، ادري بيچ ضجتي
گتلچ اي تعرفت و صاحبة، بس ما تعديت حدودي وي اي بنية لا على التلفون و لا بالواقع
كلام عادي مثل الي دار بينا

- ما ضجـت، لأن كل واحد بينا عنده ماضـي

حچيتها بخفوت و هو جاوبني بجدية

- و احنا ولد الـيوم، ماضـينا ما احب افتحه
لا اسألچ و لا تسأليني عن علاقاتي او اذا حبيـت
لأن حالي حال هواي شباب حبيت اجرب الحـب لكن فشلت بي

- و بعدك فاشل بي؟

- لا نجحت ورا ما طلع شيب براسـي

ضحكت و همسـت

- يلا روح نـامي، و فاتح صفد بالموضوع

- تمام..باچر احچي وياها و احچـي للحجي و مجـيد

- تمام

- يلا تصبحين على خير

- و انت من اهله

غلقت الخط و نزلت التلفون من عند اذني
بقيـت اباوع للفـراغ، رفعت راسي اصارع دموعـي قبل لا اعض على شفتي اتمالك نفسي مذكرتهـا انو الموضوع مو بهاي الصعوبة
بس اعرف سبب دموعي و حـزني، چات خوفي
خوفي اذا سافر ينـساني
ينسى البنية الي شـافته كـ منقذ الها من ماضيها

فزيت و اني امسح دموعي بسرعة بسبب طرقات على الباب و دخول جودي
الي سدت الباب و هي تگول بنبرة ضايجه

- عندچ مجال احچي وياچ

- شبيچ؟ ليش ضايجه ؟

.

جودي

گعدت عـلى التخت
و گـلت بدون مقدمات و اني اجاهد حتى يطـلع صوتي ثابت

- رسلان راح يتزوج

رفعت حواجبها متفاجئه

- شوكت

- هسا حچـه ابوية، الاسبوع الجاي راح يكون زواجه

- بهاي السرعة

هـزيت راسي بأي
و دجـى مدت ايدها و هي تلزم ايدي

- و انتِ؟ شنو تحسين

- احس بقهر لأن اعرفه يحبنـي
بس الي يقهرني اكثر هو زواجه

- انتِ رفضتي جودي ! انتِ ضيعتـي من ايدچ
بحجة كلام الناس و ما اگـدر اكون الك و انت اخو خطيبي السابق

حچتها بعصبية و اني انتفضت و رديت بـ جزع

- لو انتِ بمكاني تسوين نفسي

- لا گلبي ما اسوي نفسچ، چـان وافقت لأن اعرف ما راح الگه انسان يحبني بگده
چان طبيت بعين الناس لأن ما يهموني اهم شـي راحة بالي عند انسان يحبني و يصونـي

- عرفـت الموضوع الي اجا بي غياث قبل يوميـن
رسلان حاچي اله و گـال اله اخر فرصة
حچـالي مجيد و اني بسرعة گتله ارفض حتى بدون ما افكر بشنو معنى اخر فرصة

- غبية

- موو بيدي دجى مـو بيدي
و حچي اقـاربنا و تساؤلاتهم

گامت على حيلها و وگفت گدامي
رفعت راسي الها و عيوني مغورقة

- اذا بقينا نهتم بحچي الناس ما نعيـش صدگـيني
اتخذتـي قرارچ و انتهى الموضوع، راح يتزوج و تشوفينه گدامچ يزف عروسته بيده، و انتِ عضي اصابعچ ندم
علمود منو؟ والله حچي الناس و الله اخوه
طز بالناس و طز باخوه

نهضت بغضب و اني اسمع كلامها الي بي حقيقـة ما انكرها
فعلاً اذا بقينا نسمع حچيهم ما نعيش و نبقى طول عمرنا نتحسـر على اشياء نـتمناها

- خوش ما اهتميت بحچي الناس و تناسيت موضوع اخوه
برائيچ اهله لو اهـلي يوافقون؟؟

- ما طول يحبچ صدگ ما راح يوگفون بوجهه
الي يحب وحدة ياخـذها من حلگ السبـع و يكـسر العادات والتقاليد لأجلها و لأجل تصـير حلالـه

دنگت راسي و كتمت دمعتي و اني اشد بقبضة ايدي
انحنت و گعدت على الگاع گدامي و لزمت ايديه و بـحنيه طغت على نبرة صوتها گالت

- اذا تريدين تبچين ابچـي، خسارة گلب يحبچ من صدگ بهذا الزمن خسارة فادحه

سندت راسي على كتفها و بچـيت
بچيت لان حچيها چان حقيقي مئه بالمئه
لفت ايديها حول ضهري و هي تزفر

- ابچي و فرغـي همومچ
بيوم العرس لا تبيـنين قهرچ، على الاقل حتى ما يبنـي احلام و آمال محد ضحيتها غير زوجته

هـزيت راسي بأي و هي طبطبت على ضهري

مدة الاسبوع چان قصيرة كلش
مرت بسرعة فائقة و كانـها منتظرة هاي الاحداث من زمان
زواج رسلان يصادف يوم الخميس و سفـر غياث الجمعة
خبر سفرة چان غير متوقع..صح سافر هواي لكن ما چانت هيچ علاقتنـا
الى جانب اخته الي راح تغـدوا وحيدة

بيوم العرس رحت لـصالون قريب منا، تـحضرت و چنت اتصرف طبيعي رغم اكو قهر بگلبي

دجى رفضت تحضـر الزواج و تحججـت بألم بطنهـا
و ما تحب المناسبات..فـ ما ضغطنا عليها
رغم چنت اتمنى حضورها حتى تكون وياي

القاعة چانت فخمة و الضيوف هـواي
ما تقربنا للكوشة اتخـذت اني و امي مكان بعيد عن الانظار
شاركتنا بعد فترة الگعده صفد الي واضح بعيونها الحزن لأن باچر موعد سفــره لـ غياث

امي گعدت تحچي وياها و انو هذا لمستقبله و سألتـها وين راح تبقين و گالت الها عند خوالي
ضجت لأن تمنيـتها لو تبقى يمنا بس بالاخير هذا قـرارها

دخل العريـس و اني انقبض گـلبي
يبتسم و يضحك وي البقية و اني احترگ بالزاوية
اقنع نفسي هذا احسن شي..من راح تشوفينه صار لغيرچ راح يبطل تأنيب الضمير عندچ

زعلانه مو لأن اكو مشاعر ناحيته حتلو كانت اعجاب بسيط
بس زعلانه لأن خسرت گلب يحبني، و مثل ما گـالت دجى تعتبر خسارة فادحه

تفاجئت من انتبهت للعـروس
حلوه كلش و ناعمه، تشـتغل وياه بمجال الهندسة
و عمرها 27 سنة اصغر منه لكن ابداً ما مبين عليها انها بهذا العمر
الي يشوفها يقدر عمرهـا بالـ20

امي راحت تبارك الهم و اني گتلـها ما اريد راح ابقى وي صفد
راحت سلمت و رجعت و امي تصلي على محمد و هي تگول البنية چنها لعابـة والله رسلان صام و صام و الله رزقه بزوجه جمـال و حسن

الكلام رغم يضوجني من داخلي لكن دعيت الله يتمم الهم على خير و الاهـم ما يكسر گلبها لهاي الفاتنـه

- يا هاي ام زياد ما توقعتها تجـي

انتبهـت لـ امي و هي تأشر على زوجة خالي
برفقتها رنـد و بناتهـا
أشرت الها ماما و اجن گعدن ويانا على نفس الطاولة بعد ما اخذنا طاولة اكبر

رند گعدت بصفي على جهـتي اليمنى و صفد على اليسرى
و هنا بدت تحـيك رند الخيوط حول صـفد و هي تحچي وياها بميانة
و هاي المسكينة ما متعوده

نزلوا العشا و اني بخضم اكلـي حسيت الگمه وگفت بحلگي لمن مـر رسلان و هو يباوعلي بنظرة خـلتني اغص
نظرته لو نار چان حرقـتني بمكاني
طلع من القاعة و رند طلعتني من شرودي

- غياث اجـا للعرس مو ما طول اخته هنا

- اي برا عند الـزلم
تعرفين هو صديق رسلان شلون ما يوگف وياه بهذا اليوم

- صدگ بـاچر راح يسافر

ارتشفت من العصير و اني ارد بعملية

- ان شاء الله اذا الله سهل

تنهدت مقهورة و بعيونها شفـت الحزن
فجاة كانها تذكرت شغلـة و هي تسأل بتعجب

- لعد المساعدة مالتكم ما اجت

شددت على كلمة مساعدة و اني تجاهلت نبرتها اثناء الحديث

- على اساس تجي بس شوية ما الها خلگ

- احسن ترا محلو تجيبون شغالتكم للمناسبات

التفتت عليها و بحدة خافته گلت

- عندچ مشكلة شخصية وي دجى ما تعني الچ الحق انو تقللين منها او تهيـنيها بغيابها او بحضورها

- اي عندي مشكلة شخصية وياها
انتِ مسمعتي كلامها بهذاك اليوم، تگلي لا تدخلين حرب محد خسران بيها غيرچ
كلامها اكدلي انـو اكو شي بينها و بين غياث

- گلتيها بينها و بينه، يعني ما الچ الحق او الي او لأي احد كان يتدخل بينهم

كزت على اسنـانها و بـغيض ردت

- فضل الشغالة على محامـية اخوچ لو اعمى لو سحرته

غمضت عيوني و اصريت على اسناني محاولة اتمالك نفسي و ما انفجـر بيها و ارفع صوتي و يسمعون حديثنا البقية

- محد احسن من احد كلنا سواسـيه
بعدين هو حبها لأن تشبه عاشت ضروف نفس ضروفـه
غياث ما يدور مثاليات و لا يدور حسب و نسب و محامية لو دكتورة، غياث يدور گلب يفهمـه

ما ان ختمت كلامي حتى نهضت من مكانها بعصبية
و اتجهت ناحية الحمـامات
زفـرت و التفتت لـ صفد الي باوعتلي و رفعت اكتافها
عرفتها سمعت حديثنا
طبطبت على ايدها و گلت

- موضوع ما يستحق انو ينفـتح

هزت راسها بأي و كملت اكلها

خلـص الحفل و رجعنا للبيت
دخلت لغرفتي و باوعت لنفسي بالمراية و اني اهمـس

- احلى مني بهواي، اكيد راح ينـساني
ان شاء الله ينسـاني يا رب يا حبـيبي طلعنـي من گلبه و ارزق زوجته حبه

نزعت حجابي و ذبيته على المراية

الصـبح بالـ8 اجـا غياث و هو يودعنا
كلنا بالحديقة واگفين الا دجى بعيد عنه
شفت بعيونها نظرات حزن و ضيـق، چنت اكثر وحدة مركزة بيهم
چان كل شوية يخطف نظراته عليها كانه يريد يطـبع مظهرها بعقله

سلم و طلع و هي دخلت للبيت
لحگتها بحجة اسوي ريوگ
لگيتها توي فايته لغرفتها ما ان سديت الباب حتى گالت

- حتى ما گال مع السلامة، انتظرت منه كلمة

- اكيد راح يخابرچ ليش تضوجينـي
هو ما يريد يبين شي گدام ابوية و امي

قطبت حواجبها و فجاة رفعت ايدها و ضربت نفسها راشدي
فتحت عيوني على وسعهن بسبب حركتها، تراجعت للخلف و هي وگـفت على حيلها و بنبرة حاولت تكون واثقة رغم وجود الرجفه بيها گالت

- بكـلشي قوية بس من يوصـل الأمر اله اكون ضعيفة مثيرة للشفقة
صـحصحي دجى صحـصحي

حچتها و طلعت و اني بقيت واگـفه بمكاني
رفعت اكتافـي بـحيرة و طلعت من الغرفة

.

دجـى

يومين مرت على سفر غياث
اتصـل بـ مجيد و انطاه خبر، انتظرت و انتظرت اتصال او حتى رسالة منه لكـن ماكو

ايقنت اخيراً انو شكـي بمحلة ما ان يعبر الحـدود حتى اطلع من باله

چنت گاعده اني و جودي بالصالـة و الحجـي گاعد يتصفج بتلفونه نباوع على التلفزيون
طالع مسلسل و جودي ما عـاجبها و بس تعلق يا على التمثيل او قصة المسلسل

ذبت گـشر الحب و هي تگول و تأشر على التلفزيون

- هاي الممثلة ابداً ما احبها
هيچ احسها مو راحة

- تؤ تؤ ميصـير تطعـنين بيها

حچاها الحجي و اني التفتت اله لمن رجعت گالت جودي

- يابه اني مـا طعنت بيها گلت مو راحه
يعني دشوفها كل لقـائتها مثيرة للجدل من طريقة ملابسها و حچيها

- قال رسول الله صلى الله عليه و اله و سـلم  (وهل يكب الناس في النار على وجوههم، أو على مناخرهم، إلا حصائد ألسنتهم) يعني حچـيچ هذا غلط و ممكن انو تحصلين اثم عليه

و باحراج گالت جودي

- يابه اني گلـت هيچ لأن بكل مواقع التواصل هيچ يگولون عنها اني ما حچيت من جيبي

- هذا مو مجرد حچي يا بنتي، هذا طعن بالاعراض
فقط لأن لبسها او حچيها ما عجبكم
اذا ما تحبونها ليش تباوعون الها و تهتمون بكل خبر الها صغير قبل لا يكون چـبير

هنا تدخلت و اني اگـول باستفسار

- طـعن بالاعراض؟
يعني اذا احد طعن بعرض شخص و گال هذا هيچ و هيچ شنو عقابـه

- جودي انتِ قاريه القران ما قريـتي ( ويل لكل همزة لمزة )

هزت راسها بأي و هي ترد

- اي يابه و هي من درجات الطعن

التفتت عليه و گال

- الـويل يا بنتي وادي بجـهنم للي يطـعن باعراض الناس
و الهمز انتقاص الناس بالفعل
و اللمز انتقاص الناس بالـلسان

ترك الجهاز و كمل و اني اصغي اله بكل جوارحـي

- و الطعن بالاعراض يعتبر من اشد انواع الربـا
بقول الرسول عليه افضل الصلاة و السلام

سكت و ردت وراه جودي عليه افضل الصلاة و السلام
لگـيت نفسي تلقائياً ارد وراهم

- ( الربا اثنان و سبعون بابًا أدناها مثلُ اتيان الرجل امة، و ان اربى الربا استطاله الرجل في عرض اخيه )

بما معناة انـو اهون و ادنـى انواعه
ذنبه يكون مساوياً للي يوقع امه و يوطئها اي ينكحها
و اربا الربى اي اشد انواعه هـو عرض الرجل المـسلم
اي احتقاره و ذكره بالسوء و بالنميمه و الغيبة و الطعن فيه

و الطعن بالاعراض من كبائر الـذنوب و الخوض باعراض الناس دين يستـرد
يعنـي مثل ما خضت بعـرض احدهم..ان كان بماله او بعـياله او احد نساءه او حتى هو بذاته
فـ هذا دين و راح يسترد الـك

و بهدوء گالت جودي

- بالـضبط كما تدين تدان

- لعد من تعرفين هالشي يا جـودي ليش تحچين هيچ

- يابه شنسوي لسانـه ما نگدر عليه

- اگدري عليه من اليوم و رايح

حچاها و ابتسم و بـاوعلي
ابتسمت اله و گـلت

- و التوبة النصوحـه الخالصة لله وحده
راح تكفـر عن ذنـب الطعن مو عمي؟

- عفية عليـچ، لكل ذنـب اكو توبـه

- ذكرت انو الطعن من الربا
شنو الربـا بالضبط

سألته بفـضول و هو جاوبني

- اووه الربـا موضوع طويل
نحچـي بي بعدين

- تمام بس لا تنسى

ضحك و هو يگول

- لا ما انسـى

بعدها انتهى المسلسل و كل واحد راح لغرفته
دخلت لغرفتي و باوعت لتـلفوني الي رن برقم غريب، عگدت حاجـبي
و اني اباوع للرقم مو عراقي، فجاة فز گلبي ما ان عرفت صاحبه

فتحت الخـط
و گلت بلهفه ما سيطرت عليها

- غيـاث

- يا ضلع غياث ، يا عيونه
اعرف تأخـرت بس والله لليوم يلا حصلت شريحة و اتصلت على مجـيد على الماسنجـر
گوليلي شلونچ

ما گـدرت اكتم ابتسامتـي و اني انسى كل زعلي

- اني زينه كلش
انتَ شلونك

- ما طول سمعت صوتچ صرت بخير

- شلون وضعك هنا

- الحمد الله استقرينا و اجرنا بفندق
بس ظل شوية فرق التوقيت زاعجـنا

- الله يساعدكم دير بالك على نفسك

- ما اهتميت بنفسي مثل هاي الفترة طول عمري كلها علمودچ

تتفست بقوة بعد ما حسيـت انحبس نفسي من الـفرحة

- غيـاث ليش ما سلمت عليه من رحت

- عرفتچ زعلتـي
بس والله خفت لا اوگف گدامچ و اودعچ و غصب عني اخذچ لحـضني، ما ردت احد يعرف بعلاقتنا
لان كلشي يطلع للناس يخرب

گعدت على التخت بـعد ما حسيت رجليه من لهفتي ما تشيليـني
سمعت ضحكته و هو يگول

- ليش صوتچ هيچ يرجـف

- يمكن لأن سمعت صوتـك

- مو يمكن انما اكيـد

ضحكت بخجـل و اني امسح عرق جبينـي مادري هي صارت حاره فجاة لـو من خجلي

- دجـى اريد احچيـلچ شي

- اسمعك

- تدرين شگد سافرت و شگـد رحت بس مثل هاي السفرة عمري ما ارتاحـيت بيها

عقدت حـاجبي و گلت

- المكان زين

- تؤ..لأن اول مرة اسافر و انـي اسمع دعاء ابوية بالتوفيق و اروح و ارجع بالسلامة
لأن اول مرة اروح و انـي اعرف اكو گلب متلهف لشـوفتي غير گلب خواتي

سكت لحظات خلاني انصاب بغصة
نبرة صوته الي فرحانه و كانه يريد يحلق بالفضاء بس لأن ابوه دعى اله

- تتذكرين بأول لقاء النا
بوقتها چـنت جاي من السفر قبلها بكم ساعة، سلمت على امي و صفد الي چانوا يم خوالي

- اي؟

- بوقتها قبل لا اطلع للمطار اجيت اخذ كم شغلة من غرفتـي
تعاركت اني و ابوية، عركه كلش چـبيرة
تدرين بوقتها گـالي كلمة عمري ما راح انـساها گال " لا ترجـع ترا شيب راسي كله من وراك "
طول الرحلة و اني ايدي على گلبي، خفت لا تتحقق امنيته و ما ارجع

- لهذا گلتلي گولي لحجي قاسم ابنك رجع

همهم
و اني زفرت بـحزن، قبل لا اهمس بوجع يشبه وجع قلبي عليه بـهاي اللحظة

- غياث انتَ شگد متأذي من حجي قاسـم

- متأذي منهم كلهم..من الحجي لحـد جودي الي چانت تكره تباوع بوجهـي
بس گلبي گلب سمچـه، شگد اگول اتركهم يا غياث عوفهم مكتفين بنفسهم
بس ادور و ادور و الگه نفسي راجع الهم

- لأن هذولة اهلك

- اهلي الي عمرهم ما حسـسوني اني ابنهم
چني غـريب بنصهم

وگـعت دمعتي و اني اسمعه يكمل بـغصة

- اعترف چنت طايش بأول مراهقتـي
بعمـر الـ15 سنة شربت و اجيت ازنـي و اهز عرش ربي
بدال لا يگلي غلط ضربني و طردني الحجي لأمي
اعترف اي بگـت و مديت ايدي على ذهبهـا لحجـيه نائلة بس تدرين ليش؟

- ليش

- لأن واحد من اصدقائي امه مريضة بالـسرطان
بگت محبسها للحجيه و انطيته اله حتى ياخـذها للطبيب
ادري عذر اقبح من ذنب، بس چنت طايش و مراهق
اشـوف كل اهتمامهم لمجـيد
جيبوا لمجيد..اخذوا لمجيد، مجيد سوه
مجيد حچه..مجيد مجيد كلشي لمجيد و اني؟
اني الچـبير اني الي لازم ما اغار
الي لازم ما انقهر او اضوج و اتحمل كلشي، ما طلبت منهم لأن اعرف راح يگولون تريد تصرفهن على سوالفك التعبانه
فـ بگت..

غصيت بدموعـي و اني اسد سماعة التلفون
حتى ما توصله شـهگاتي، حسيت جيب گلبي انشگ
عبالك سچينه مثلمه و جرحوا بيها گلبي

رجعت خليت التلفون على اذني و سمعته و هو يگول

- لا تبچـين
لأن صاحب الشأن ما بچه

- ورا كل الـي صار بعدك تحـبهم
يمكن لو اني بمكانك كـرهتهم

- البـزون يحب خناگه، احبهم رغم كلشي صار بيـنا
بس هسا فرحان، على الاقل شوية اوضاعنا تصلحت
رغم اعـرف انو اي هبة ريح خفيفة تهدم كل الي بنيناه

- ان شاء الله تبقى هيچ
انت تتمالك اعصابك و هما كـذلك كلشي يصيـر احسن

- ان شاءالله
ضلعـي لازم اسد الخط هسا ديـصحولي حتى اتغدا
هسا عدكم بالـ11 روحي نامي و لا تفكريـن بالكلام الي حچيناه تمام

- تمام

غلق الخـط ورا ما ودعته
طلعت غسلت وجهي و استعاديت شوية نفسي
و فتت للغرفة، تمـددت حتى انام لكن رن تلفوني
ابتسمت كل ظـني انو غياث لكن چان رقـم جوان

بدون تردد فتحت الخط
و اول كلمة گلتها هي

- يا خاينه يا حقيرة

- والله هددوني والله
ولچ انـي جوان تتوقعين اطعن بيچ؟؟ والله حطوا المسدس براسي و الروح عزيزة دجى مو هيچ تگولـين انتِ؟

زفرت و غمضت عيوني و هدأت بسبب كلامها
سمعت صمتي لذلك كمـلت

- لا تخافين هما ما يعرفون بس اسم المنطقة
يعنـي هي الاعظمية خوما شارعين حتى يعرفون مكانچ، اطمئني و لا تخافيـن

- مو خـايفة على نفسي لأن تعرفينـي ما اخاف من هيچ نماذج
بس خايفة على اهل البيت الي سنـدوني و اعتبروني وحدة منهم و بيهم لا يوصل الهم ابو وائل لمن يوصلني

- لا تخافين ابو وائل غايته بس انتِ

بللت شفتي و گلت

- انتِ اسمعي
انطي كل فلوسي اله

- دجى !! من كل عقلچ

و بثقة رديت

- اي فلوسه حرام ما اريدهن

گامت تضحك و هي تگول بتعجب

- دجـى الله بالخير، شنو بدلوچ هذولة الناس و رجـعوچ على تحديث نـور؟؟

تعصبت من سخريتها و اني ارد

- مو وقت تفاهتچ
رجعي اله فلوسـه

-و اذا گتلچ ما ظل ربع دينار منهن

- شنو يعني

- يعني كل فلوسچ يمي خلصن بححح

ضحكت باستهـزاء و اني اگول

- حسيت من تهربچ كل مرة لمن اسألچ
عافية على گـلبچ

و غلقت الخط بوجهه مسـحت على وجهي
و اني اهدأ من نفسي بكلمة ميخالـف دجى اصلاً انتِ ما محتاجه الهن

التفتت للباب و اكو صوت برا بالصالة
طلعت و اني اگول

- خير شكو

- رايحين نجيـب صفد من خوالهـا
راسلتني توي

حچتها جودي و هي تلف بحجابها على راسها و مجيد طلع يستعجل بـ جودي و الحجي شكله معصب

- ليش خوما بيها شي؟؟

- صايرة عركه بينها و بين مرت خالها و ضاربتها
شوفتني الصور وجهه كله دم

هي حچت هيچ و اني طفرت للغرفة اخذت حـجابي و لبسته و جريت صايه خفيفة فوگ ملابسي
و طلعت و اني اگـول

- اجي وياكم

و طلعت قبل جودي بخطوات سريعة
سمعت الحجي صاحلي بس ما اهتميت
صعدت بالسيارة ليورا و مجيد باوعلي باستغراب و هو الثاني طافره روحه
صعدت جودي و هي تگول و تنفسها عالي

- ابوية يگول لا تسوون مشاكل

حرك السيارة مجيد بسرعة لدرجة انـضربت جودي بالباب و هي تصيح

- اييي شبيك على كيفك
انت و دجى قنابل راح تنفجرون بالسيـارة

الطريق سواه 40 دقيقة و هو بالاصل ساعة و ربع قبل لا يطبگ باب بيتهم
نزلت اول وحدة و جودي تگلي

- هدي و صلي على النبي

شلت حجرة و ضربت بيها الباب بقوة و بـقهر و اني اصـيح و ما اهتميت لأمر احد
و بالاخص جودي الي شكلها معارضة عكـس مجيد الي گعد يدگ بالباب بقوة و دفـره

- بنت الكـلب تستضعف يتيمه والله و الي اسمه الله و ما اتسمى مرة اذا اليوم ما انومها بالمستشفى

.

السلام عليكم و رحمة الله و بركاته

شلونكم حبايبي ان شاء الله الكل بخير

اسفة على التأخير اعذروني

المهم ارائكم و توقعاتكم 🥲😂

قفلة اليوم ما بيها جلطه 🥰😂😂
تحضروا للاكشن بالبارت الجاي

و ها رائيكم بتصرف رسلان🤡

و جودي و تصرفاتها
بالحقيقة عجبتني قوتها
و للعلم هي ما حبته فقط مجرد اعجاب طفيف 😮‍💨

و دجى و غياث و كلامهم 🥺🥺
غياث فتح گلبه لـ دجى  يا ترى دجى كذلك؟؟

وبس والله
نلتقي على خير احبتي و لهذاك الوقت استودعكم الله الذي لا تضيع ودائعه ❤❤❤