#دُجى_في_جوف_البغي
#بقـلم_الراويه
#الفصل_الثالث_عشر
بسـم الله ♥
صلوا على النـبي 🧡
.
دجى
دائمـاً چنت اسمع بمـصطلح " گـلبي انكسـر "
و چـنت استغرب شـلون الگـلب ينكسر و هو عـضلة ؟
ما چـنت افهم شعور القـائل بوقتها
لكـن اليوم حسيت بـي، و كـانه بقوة كسر الـ206 عظمـة بـجسمي
حسيت بنـفسي بمصطح مائي و اطـوف على سطحه
اباوع لابتسامـته بعدها تزين ثغره
شعور سيء چان يعترينـي، و كـاني مشيت طريق طويل كلش و بالنهـاية الگاه خط البدايـة
تبخـرت ابتسامـته تدريجياً و اكتسحت عيونه نظرة غريبة
يمكن تأنيـب ضميـر ما ان نطقت بنبرة ضعيـفة
- ميمهنـي ان گتله او لا..نظرته عني هي هي
بس ليش سويت بيه هيچ ؟
مـلت براسي و كملـت برجفة ما گدرت اسيطر عليها مثل ما گاعد ما اسيطـر على ضعفـي بهاي اللحظة
- ليش خليت روحـي تخضر ورا كـل هاي السنين
و جيت بمنجـلك حصدتها؟
هلگـد يهون عليك كسر الخواطـر
ابتعدت خطوة ليـورا قبل لا تفر ضحكة ساخرة منـي و اني اباوعلـه
و هنا استوعبت، انـو اني چنت طايره باحـلامي و توقعت راح يتحققن و ما كانن بالاخـير الا اضغاث احـلام
- بس تدري زيـن ما سويت
حتى تأكـدلي انتـوا الزلم كلكم نفس الشي محد بيـكم مستـثنى و اني الظنـيتك مختـلف
و تركت المطبخ بدون ما اعقـب على شي
دخلت للغـرفة و سديت الباب بهدوء عكس الثـوران الي بـداخلي
رجعت ضحكة ساخرة ترنسم على وجهـي و اني اهمس لنـفسي
- غبيـة ثـوله، مـن كل عقلچ صدگ حبـچ؟
گعدت على الچـرباية و اني اسمعهم يحچـون و بين لحظة و اختها ترتفع ضحكاتـهم
دنگت راسـي و گلت بـنبرة هادئه
- ليش شـايله هم اذا مجيد عـرف؟
اكيد ما راح يگـول لابوه انـي متأكده و اذا قرر يحچي اله اني اعرف شلون اسكته
حچيتها و ختمتـها بضحكة قصيرة و فكرة تنبت بـعقلي
سرعان ما اخـتفت ضحكتي و حل محلها العبـوس
ما ان ترجع انقـباضة گـلبي
احـس اريد ابچي، اريد اصـرخ اطلع كـل قهري بس ما اگـدر
احس ايدين ملتفه حول رقبتـي تمنعني
و اعرف هاي الايـدين شنو..كبريائـي الي ميقبل انحنـي لحزني
ساعة و طلعوا من البيت و اني طلعت من غرفتي بكـل برود كملت شغـلي
شفت مجيد يباوعلي و كـانه منتظر الوقت المناسب للحديث وياي
قابلته بنظرة و انـي انتظر كلامـك
و فـعلاً بالليل قـرابة الساعة الـ10 و نـص الكل دخل لغرفة نومهم
طلعت من غرفتـي و قابلته على القنفة گاعـد
تعدل بـگعدته و بهدوء گال
- لازم نحچـي
- تمام
رديت بـذات اللهجة
و هو طلع من الصالة للحـديقة و اني تبـعته
وگف بالطـرمه و وگـفت مقابل الـه
كتفت ايـدية لصدري و هو گـال بدون مـقدمات
- غياث حچـالي الي سويتي
تدرين چنت حـاس بالموضوع، لأن ادري بـ غياث مـو همجـي و يـضرب و بالاخص النسـوان
- و بعـد ما عرفت راح تحچـي لعمـي قاسم
حچيتها و انـي اضيق نظراتـي
حك ارنفة انفـه و ببرود همس
- شنو راح يكون موقفچ اذا عرف
نزل ايده و اردف بجديـة
- بالحقيـقة اني شكي ناحـيتچ تبخر لأن صارلچ اشهـر عدنا و ما شـفت منچ شي مو زين
بس مو معناتـها اثق بيچ تمام الـثقة، فـ هسا نترك هالموضوع على جهه و احچـيلي ليس سويتي هيچ بحق غيـاث
- لأن بكـل بساطة شافني مو زينة
وجهـلي كلام محلو و ما چانت عندي طريقة انتقم بيها غيره
- ورا هـذا الوجه البريئ اكو شيطان يومياً تخـرسينه مو؟
ضحكت ضحكة قصـيرة و گلت
- يمكـن، بس ما گـلتلي راح تحچـي لحجـي قاسم
لأن اذا عندك نيه لـتفضح امري انـي كـذلك عندي نيـه احچـي لـ غياث حبك لاخته
رفع حاجبه و گـال
- تهـدديني
- لا استغفر الله
بـس كل واحد بينا عنده اسرار مو هيچ؟؟ انت بعظمة السـانك گلت چانـت عندي شكوك ناحيتچ بس هسا لا
فـ ليش تفتح موضـوع قديم و تزلزل راحة العائلة
بالمقابل تخلينـي احچـي لاخوك عن حبك لاخته و ترجع علاقتكم تتـوتر و انتوا يـا دوب تصلحـت
سكتت ثواني و هو يباوعـلي بنظرة غـضب
- فـ تبادل مصالح انت تسكت و انـي اسكت
لأن اعرف اذا غيـاث عرف بموضوع مشاعرك ناحيـة صفد ما راح يعجبـه
- هذا وجهـچ الحقيقي؟
انسانه تهدد و تركض ورا مصالحها
حچاها بعصـبية و اني تنهدت و همـست بصدق
- وجـهي الحقيقي ما عرفته الا داخـل هذا البيت
باوعـلي للحظات قبل لا يـحشر ايديه بجـيوب بنطاله و گـال
- من الاخـير فعلتچ ما راح انساهـا، ترا مهما الي بيني و بين غياث يبقى اخوية و حز بگـلبي لمن طرده ابوية
- لعد ليش بوقتها ما حچـيت و اعترضت اذا صدگ تعـتبره اخوك
حچيتها بـحنق و هو رد بتلقائيا.
- لأن ما چان عنـدي دليل و بالاخص گال اي ضربتها
و هو چان يقصد بكلامه دفعته الچ مو ؟
هزيـت راسـي بأي
و التزمنـا الصـمت لثواني معدوده قبل لا يگـول
- الي استغربـه غياث يرد الصاع صـاعين
ليش لحد هسا ما حچـه و لا رد حقه؟
ضحكت و اني اگـول بسخرية
- لا تخاف رده الصاع، اخوك ثعلب ماكـر
خلانـي اعيش ايام و كل ظني هـو شايلي مشاعر
- يحبچ
حچاها بصدمة و اني رديت بسرعـة
- ركز على كلمة كل ظنـي
ما شايل ناحيتي شي مجـرد چان يريدني اتعـلق بي بأي شكل من الاشكال ، و فعلاً گدر يثبت جدراته انه يرد الصاع صاعين و طلع كل الي چان يـلمحلي بي مجرد كذبة
بقـى ساكت و نظراته كلها تشتت و حيرة
يمكن ما يصدگ بفعلة اخوه و حقـه
فكيت تكتيف ايديه و انـي اگول بجدية
- ما نطلع عن موضـوعنا الاساسي، ما احب اكون حقيرة بس اذا حچـيت لعمي قاسم اعذرني اعرف شلون احرگ بينك و بين اخوك و احچـيله عن حبك لصفـد
- ما عندچ الجراءه
- منو گال؟ صح ما يهون عليه و انـي اعرفك شگد تحـبها و يمكن بـفعلتي تخسـر شوفتها الي ما طول ساعات بين فترة و فترة
تقربت خطوة و انـي اكمل بهمـس
- و فوگ كـل هذا تخيل اذا گتله انت هددت ولـد اسمه حامد و گتله وراها ناس
يمكن هسا الولد حسابله انت بعلاقة وياها مو؟؟ و تخيل انو يطلع هذا الولد واحد مو زين و يبدي يشوه سمعتها بالجامعة والله صفد بعلاقة مع ولد
ما تحب تتخلى بهذا الموقف مو؟؟
صمـت ران على المكان للـثواني
قبل لا يرفع اصبعه الـسبابه ناحيتي و هو يهمس بحـدة
- هاي المرة راح اسكت بس اقسم بالله اي كلمة او فعل منچ راح يوصل كـلشي لابوية
و حتى لو گلتـي لـ غياث عن مشاعري ناحية صـفد
- خـوش لعد
حچيتها بشبه ابتسامة و فتت جوه
زفرت و مسحت على گـصتي و اني اهمس بگـلبي چنت بواحد صـرت بأثنين
و على طاري اول واحد اني اعـرف شلون اخليك تنـدم على الساعة الي فكرت تأذينـي بمـشاعري يا غياث
اجـت ايام و راحت ايـام
بروتين واحـد و مكرر، اجـا رمضان و چـان شي غريب عليه
الاجواء الي بدت تطغي على البـيت كلها غرابة بالنسبة الي
عمري ما اتذكـر صمـت رمضان او احـييت احد شعـائره
گعدتنا الحجـيه على السحور و تسحرنا
و انـي اباوع بالفراغ و اريد اعرف شلون راح اتحمـل الجوع و العطـش چنت اگول بگـلبي يلا امثل نفس كل مرة مثلت بيها بهذا البـيت
الظـهر گال حجي قاسم اول يوم رمضان و اريد اجمع اولادي كلهم حولـي فـ انطانا خـبر انـو خابر صفد و غياث اريدهم ويانا باول يـوم
الحجـيه أيدته الرأي هي و البقيـة
صح ما صمـت لأن شربت مي الـصبح قبل لا احد يگـعد
و بعدها ما اجتني الفرصة اكل او اشرب، بديـت احس بخمـول و ارهاق مو طبيعـي
بالـخمسة اجوا صفد و غياث، و تعمدت ما اطـلع و لا اشوفهـم
واگفه اسوي بالزلاطه و الاذان اقتـرب، حسيت الـدنيا بردت و بدت تظلـم بعيني
سندت ايدي على السنـگ، مـا گدرت اسيطر على نفسي
صوت جودي و الحجيه و هنّ يحچن وي صفد بـدا يختـفي
مـا اعرف شنو صار بس اخر شي حسـيت بي هي انو هـويت و استقبلتنـي الارض بظلام دامس
فتحت عيونـي بألم يستفحل راسي
بسرعة مديت ايدي و انـي اتلمسه، حسـيت بشاش يلف مقدمة راسي
رفعت عيني و باوعـت لگـيت صفد و جودي گاعدات و اني على القنفة
تعدلت بگعدتي و اني اهمس باستغراب
- شنو صار
انتبهـن لوجـودي و بسرعة گـالت جودي بقلق
- وگفـتي گلبنا عليچ، الحمد الله على الـسلامة
- شبيه؟
ضحكت و هي تگول
- بس لا فقدتي الذاكرة
شكلك تعبتِ كلش من الصيام و وگعتي بعد ما فـقدتي الوعي
و راسچ انشگ
تمتمت بانزعاج
- حوبة رامـي العار
طگتها ضحكه و شاركتها صفد
قبل لا تطـلع الحجيه من المطبخ و بس شافتني گالت
- ها يمه گعدتي خوفتينا عليچ
- تسلمين عمه، اسفة بس والله مادري شلون وگعت
- هسا گولـيلي خوما تحسين بوجع براسچ
رجعت اتلمـسه و اني اگول
- لا مو كلش خوما الجرح چـبير
ردت عليه جودي و هي تمد ايدها تساعدني حتى انهض
- لا مـو چـبير گال غياث لأن اني بصراحة ما گدرت اباوع للجـرح اخاف
باوعتله و همست بعدم تصديـق
- غـياث الي لف الي الشاش
- اي هو ليش؟؟
سكتت اعـشار الثانية قبل لا تردف بصوت عالي
- اذا علمود شافچ بدون حجاب فـ لا تهتمين هو مارس شغلة وياچ كـ طبيب يعني ما باوعلچ
و هسا گـومي اكلي لگـمه
نهضت و دخلت للمطبخ
چان فارغ و حتى الصحون غاسلاتهـا يعني هلگد نمت و مادري بنفسي
خلتلي صفد العشا و اكلت شـوية
و بقت الحجيه تصر عـليه اكل
حسـيت الگمه وگفت لمن فاتوا الحجي و اولاده جاييـن من الصلاة
اول شخص نطـق هو حجي قاسم و هو يتحمـدلي بالسلامة
- خوما بعدچ دايخه بنتي
- لا عمـي احسن بهواي، تعبتكم وياي
- يمه ما سوينا شـي
الجـرح يأذيچ؟ اذا بعده يوجعچ اخذچ للمستشفى
تدخل غياث و هو يگـول
- حجـي ماكو داعي مستشفى الجرح مو چـبير نـهارين بالهواي و يـلتئم
لو يحتاج خيـاط چان بنفسي خيطته
ما حچيت و لا خليت عيـني بعيـنه و هو يگـول
- ها صفد نروح
فزت جودي من مكانها و هي تگول
- خليها تنام يمنه اليوم
- لا بعديـن
- عفية غياث خليها، هسا ترجع للشقـة وحدها و تضوج
- اي غياث خليها تتونس وي البنات
حچتها الحجيه و هو تنهد
و باوع لـصفد و گاللها
- ها تبقين
أشرتله و هو اردف
- مـو بكيفي اذا تحبين ابقي
هـزت راسها بأي و هو ابتسم الها و گاللها
- تمـام و باچر اجـي اخذچ
سـلم علينا و طلع من و وراه مجـيد
و اني كملت اكـلي و اسمع جودي و هي تحچـي بحماس علمود السهـرة الي راح نقضيهـا
تحججت اريد ارتاح حتى انزوي بـغرفتي
بس جودي وگفـتلي بالمرصاد و خلتني اصعد وياهن فـوگ
جاب مجيد حلويات و عصائـر و انطاهن الها للسـهرة
طلعت فيـلم و بدينا نباوع
هواي فـتحن مواضيع من الدراسة بالكلية مروراً بـ اشخاص اول مرة ينذكر اسمهم
هنا جودي گالت و هي تفتح چيس جبس و تخلي بالصحن
- صـدگ صفد شلون وضعكم بالشقـة ؟
ما تضوجين وحدكـم
جاوبتها صفـد و هي تأشرلها شوية بالاخص من يطلع غياث للمستشفى
هنا گـالت جودي باستغراب
- صفد ليش ما تفتحين وياه موضوع الـزواج ؟
هو مو صغيـر يعني لمتى يبقى هيچ ؟
رفعت اكتافها بعـدم معرفة
و اني بقيت ساكته ابـاوع التلفزيون بذهن شارد، و لأول مرة افكر جدياً انو ليش هو بهذا العمر و ما متزوج
جـليت حنجرتي و اني اوجه سؤالي لـ جودي
- صدگ هـو ليش لحد هسا اعزب و ما متزوج و ما شاء الله مو صغـير
- مرة خطـب وحدة من بنات خالاته
يمكن لمحتيها بعزا امـه بس فسخوا الخطوبة
قطبت حـاجبي و انعصر گلبي بدون سبب
و بنبرة خافته سألتها
- ليش؟
شربت جودي من العصير الي بيـدها و هي ترد عليه بجوابها
- لأن البنية ما محترمه امه
يعني مقـلله احترام وياها و هـو من عرف تخبل فـ فسخـوا الخطوبة
أشرت صفد بيديها و انـي ما فهمت قصدها
باوعت لـ جودي بتساؤل و هي ترجمتلي كلامهـا
- البنيـه من الاول ما عاجبتـه بس شگد ما خاله مصر عليه و انو بنت خالتك و مو غريبة فـ خطبها
همـهمت و غيرت جودي الموضـوع
بقينا ساهرات لورا السحور، توضت جودي و صفد و اني وياهن
رغم چنت متردده بس ما ردت افـشل نفسي
ما حافظه اي سورة او ايه..دايماً چنت اصلي وي جودي بس شكلياً
عمري ما حسيت بـروحانية الصلاة فـ چنت اشوفها مجـرد حركات معينة و ينتهي الموضوع
الصـبح گعدت مـن وكت
الكل نايم بس الحجيـه و الحجي گـاعدين
حجي قاسم راح للاسواق مالاتـه و الحجيه گعدت بغرفتها تقرا قـرأن
بالـ11 دخلت للحمـام تسبح
نظفت المطـبخ و مسحت اثاث غرفة الگـعده
و وصلني صوت الباب الخارجي يندگ
ذبيت حجابـي على راسي و طلعت
چان عندي احساس انو هـذا غياث و صدق احساسـي
ما ان انفتح الباب صار گـدامي
باوعتله بنظرة واثقة، و اني اگـول
- تفضل
فسحت اله المجال و هو گال
- نادي صفد حتى نـروح
- صفد نايمه هسا اگـعدها
حچيتـها و اني التـفتت و خطيت كم خطوة قبل لا يوقفني بكلامه
- انتـظري
ابتسمت بـ تهكـم و اني التفتت عليه و گلت
- نـعم
تقدم خطوة و گال
- شلون صار الجـرح
ازادات ابتسامـتي و تغلبت على صوتي نبرة القهر
- تقصـد جرح راسـي لو جرح گلبي
لانت نظراته و اني كملت
- مـا اعرف بأي عين تباوعلي و تحچي وياي
- ما املتچ بشي انـي
- و شلون اتجـاوزچ هذا مو امل؟
حچيـتها و ضعفت نبرة صوتي
كرهت نفسي بهاي اللحظة و اني اردف بـقهر
- يمكن فهمت مقصدك خطـا، بس اي شخص بمكاني راح يفهمه بذات الطريقة
انتَ سويت كل هذا بس لأن تريد تنتقم مـني، و صدگ انتقمت
حچيتها و تركته لكن وگـفني ما ان لزمني من معصمي
بسرعة سحـبت ايدي و انـي اگول
- لا تلزمنـي
- اي ردت انتقم منچ بـس مو اكسر گـلبچ و خـاطرچ
و حچـيي لـ مجيد عن الصار ما عليه بـ مشاعري ناحيتچ
اي منجذب الچ بس مو معناتها معجب بيچ
گمت اضحك و اني اگول
- لا والله ضحكـتني، و شنو الفرق
مـع انو بالحالتين انت كذبت عليه و خليتني اعيش لحظات ظنـيت بيها بعد هاي السنين لگيت انسان يحبني كـ دجى
حچيت اخر كلامي و سكـتت صمت مطول
بقى يباوعلي للحـظات قبل لا يگـول
- معجـب بيچ يعني عجبني شكـلچ يمكن
كلامچ..او تصرفاتچ بس اني ما معجب بأي شي من هذني
الانجذاب شي غريب..تحسـين نفسچ منجـذبه للمقابل بدون سبب
لا شكله و لا تصرفاته و اسلوبه عجبنچ مع هذا انجذبـتي اله
و اني هيچ وياچ فهمتي يا لسان الـدلاله ؟
مـثل نـار مشتـعله ذات السنة لهـب عالية
اجا غـيث و طفى هاي النار چـان هيچ كـلامه، سكن كل غضبـي اتجـاهه
رمشت بعيـوني و هو زفر و رجع خطوة ليـورا حيث مكانه و كمل بـجدية
- مع هذا ما اريد اخطي خطوة و انـي ما اعرفچ حق المعرفة..ما اجازف على حـساب گلبي
- شنو تقصـد
حچيـتها بخفوت رغم اعرف معنى كلامه
- واضح كلامـي، اني ما اعرف عنچ شـي غير انـو اسمـچ دجـى
و بصراحة هذا احلى اسم يمر على مـسامعي
- لا تلون وجهك بهذا الشكل، شفت حقيقـتك بيوم العـزيمة
مـو غبية حتى اوگع بالفخ مرتين
ختمت كلامـي و دلفت للداخل
و رغم كلماته الي هزت داخـلي و خلت الامـل يرجع يزهر بداخـلي لكن تناسيته و اني اذكر نفسي بكلامه قـبل چان اعمق من هيـچ و هزني اكثر و بالاخير انطاني الخيـبة لا اكثر
صعدت فوگ و گعـدت صفد
نزلت و تركتها تتحـظر، و ورا دقايق طلعـت و رافقتها الحجـيه الي طلعت من الحمام
مرت ايـام رمضان الى ان وصلنا لأخـر اربعة ايام
كل هاي الايـام ما شفت غياث..رغم كم مرة يجـي و يجيب وياه صفد ورا الفطور
و مرتين نامت عدنا
بس تعمدت ما اطلع..ردت ارجع گلب دجـى القاسي الي صعب يلـين الي ما تتأثر بكلمة مـن المقابل
طلعت من غرفتي و قابلنـي حجي قاسم و هو گاعد يقرا قـران
و هو يرتل
" شهر رمضان الذي انزل فيه القران هدى للناس و بينات من الهدى و الفرقان فمن شهد منكم الشهر فليصمه و من كان مريضاً او على سفر فعدة من ايام اخر يريد الله بكم اليسر و لا يريد بكم العسر و لتكملوا العدة و لتكبروا الله على ما هداكم و لعلكم تشكرون "
غلق المصحف و قبله 3 مرات متتاليه و هو يخليه على جبينه و باوعلي و ابتسم
تقـدمت عليه و گعدت مقابل اله على الارض حيث يجلس على السجادة
- شو گـاعده
- ما اجانـي نوم..و جودي نامت و تركتني و حسيت بالملل بالغرفة
- ليش ما تستـغلين هذا الوقت و تقـرين قرأن
بدل الملل
حچاها بابتسامة
و اني بقيت ملتزمه الصمت..يمكن لو قبل چان استهزت و انتفضت لطلبه
لكـن هسا ما اعرف ليش بقيت ساكته، و هو كمل بتساؤل
- شبيچ احس اكو كلام بداخلچ
هـزيت راسي بأي و همـست بصوت محرج
- عـادي اگلك شي
- گولي بنتـي
كتفت ايديه و گـلت بما كان يعتمرني لايام قليلة
- عمي انـي بأول رمضان چنت اكذب عليكم
اگول الكم صايمة بس انـي اشرب بالختله
و صار اسبوع اصـوم صحيح و والله ما اشرب و لا اكل، حسيت نفسي مخنوگه بسبب الي داسـوي و ردت احد يفهمني
امي عمرها ما گـالتلي صومي لو صلي..اصلاً ما چانت لا تصوم و لا تصلي لا هي و لا رجلها
حچيتها و هو تنهد و نزل نظراته على المسبحه الي بيده قبل لا يگـول
- زين بنتي انـتِ مستحيه منا لو من رب العالمين
الجم لسانـي و ما عرفت شنو ارد
و هو اردف ورا ما شـاف صمـتي
- اذا مستحيه مـنا فـ احنا مجرد ناس حالنا حالچ
و ما راح نحاسبچ لأن هالشي بينچ و بين ربچ
رفع راسه و كمل
- بس اذا مستحيه من رب العالمين تگدرين تصلحين هذا الغلط مو؟
- عمـي اني احس نفسي غلطانه و بـس
ما اعرف ناحية من منو خجلانه؟
و بهدوء و ابتسامة صغيرة گال
- زين دجى احنا ليش نصوم
- يمكن حتى نحـس بالفقراء؟ و نعطف عليهم
حچيتها لأن اول شي خطر بالـي
رد بذات الابتسامة
- اكيد حتى نحس بالفقراء بس ليش نصوم بالاساس؟
اذا احنا نحس بيهم فـ گاعد نساعدهم و نعرف ضروفهم مو شرط نعيش مثل الي ديعيشوا
قطبت حواجبي و هو اردف
- تعرفين انـو اول شخص هو ابونا ادم
صام بعد ما تاب و تقبل الله توبته بعد نزوله من الجنه هو و امنا حواء
صام 3 ايام متـتاليه وتسمـت بالايام البيض سامعة عنهن؟؟
هـزيت راسـي بـلا و هو كمل بتفهـم
- هاي الايام هي 3 ايام من الاشهر القمرية
- ليش تسمت بيـض؟
- لأن بوقت هاي الأيام يكون الگـمر بدر و نوره قوي كلش فـ تتسمى الايام البيض
همهمت و هو اردف
- بعدها النبي نوح صام كذلك
بعد ما نجاه سبحانه و تعالى من الطوفان
سكت و سألنـي
- زين شنو الربط بين صيام ابونا ادم و صيام النبي نوح
فكرت لثواني قبل لا اگـول
- اثنينهم صـاموا شكر لله
ادم لأن تقبل توبته و النبي نوح من الطـوفان
- صح و احنا نصوم كذلك شكر لله و تقرباً اليه
و مو بس ابونا ادم و النبي نوح الي صاموا..صام ابراهيم عليه السلام و كان صيامه بين يوم و يوم
و بعدها موسـى و مريم العذراء الصيام عن الكلام
و كذلك النـبي عيسى كان يصوم هو و حـوارييه اربعين يـوم
و اخرهم النبي محمد عليه افضل الصلاة و السلام
و احنا نقتـدي بالانبياء و الرسـل فـ نخطي خطاهم
و الـصوم بي منافع كثيره للشخص
مو بس شكر لله و تقرب اليـه و الاحساس بالغـير
لا انمـا حتى لتكفير الذنـوب
انتفض گلبي على اخـر جملة و اني اگول بتسأل
- شلون يعني عمي؟؟
-قال النبي صلى الله عليه و اله و سـلم " الصلوات الخمس، والجمعة إلى الجمعة، ورمضان إلى رمضان مكفرات لما بينهن اذا اجتنبت الكبائر "
يعنـي الـصلاوات الخمس يكفر مـا بينهن من ذنوب الـصغائر الي هي السب و الشتـم و النميمه
الحقد و الحـسد و الغيرة من الاخرين
و من الجمعة الى الجمعة كـذلك يعني تكفير للذنوب من جمعة اليوم الى الجمعة الاسبوع القـادم
فـ تخيـلي سنة كامله من رمضان هاي الى السنة المقبلة تتكفر بينـهن ذنوبچ
طبعاً ما عدا الذنوب من الكبائر الي ما تكفرها الا الـتوبه
فـ شفتـي شگد احنا كـ بشر نـذنب نحتاج لهذا الشهر؟؟
الي مثـل السد الحصين بينا و بين الشيطان و وسوسته و ذنوبنـا الي يمكن ما تحـصى و لا تعد
بقيت ساكته
كل كلمة نطقها حسيتهـا دخـلت لاعماقي و چـان بمثابـة منـبه ينـبهني و يؤقظنـي من غفلتي
ابتلعـت ريقي و اني اهمس
- و الـذنوب الكبائر؟
بـاوعلي للحظات حسيت بيها يريد يقرا معنى سؤالي و ليش سألت
لكن رجعت ابتسامته تزـين محياه و هو يرد
- بالطـبع تحتاج توبة صادقة خالصة لله
- شلون يعني؟
- موضوعها طويل رغم بساطته
نحچـي بي بعديـن تمام؟ هـسا اريدچ تسويلنا سحـور انتِ و تنبل النوم مالتنا الفوگ
ضحكت على لقـب جودي الجديد الي التسق بيها بأيام رمضان
مرت اخـر اربعة ايام بسرعة، لأول مرة من بـداية هذا الشهر حسيت نفسي صدگ من كل گلبي صايمه
ردت اتـقرب لله..شفت راحة تسكن وجوه اصحاب هذا البيت بعد كل صلاة يصلوها
بعد كـل صفحة قرأن يقروها..او تمـره يفطرون عليها بعد يوم صيـام متعب
ردت احس بهذا الشعور، ردت السكون و الـراحة الي عايشيها اعيشـها اني كذلك
صباح العيد
گعدت من وكت..حظرت الفطور و جاب مجيد القيمر و الكاهي
چانت اجواء غريبة عليه..متوتره و احس بقلبي ينقبض كل ما اسمع تهنئ احد افراد العائلة لغيره
التفتت على جودي الي تـقدمت باتجاهي
- كل عام و انتِ بخير، احب اگلچ انتِ بالنسبة اليه العيد
شكراً لان خليتـيني احس بشعور تكون عندچ اخت
تحزن لحزنچ و تفرح لفرحـچ هواي وگفـتي وياي، وگفتـي وگفة عمري ما راح انساها
حچتها و هي تحـتضني
و اني متصنمه اباوع للفـراغ..حچيها نبرة صوتها عناقها الي
جبرت دموعي توگـع بثقل على خدي
شديت على حضنها و هـمست بصدق
- كل عام و انتِ اطيب گلب ششفـته
حچيتها بنبرة مخنوگه و هي ضحكت و قرصتني من خدي و گالـت
- تحظري ورانا دگ شغل
ضحكت على اثر ضحكاتها
و فعـلاً..چان يوم متعب
هواي نـاس اجت و عايـدت بيت حجي قاسم
ناس ما اعرفهم..البيت الي اغلب الوقت هادئ صار عبارة عن اصوات عاليـة و ناس رايحه و ناس طالعة
التفتت لـ جودي الي گـالت بتزفيره
بوقـت الظهيرة و احنا نصب بالغدا بعد ما بقوا كم شخص
- كلها اجت بـس غياث
شنوو يحتاج عزيمـة حتى يعايدنا؟؟
ما رديت عليها لأن چنت مستغربة ليش ما اجـا
و اني الي چنت اعتقد علاقتهم تـصلحت
للعـصر قرر الحجـي انو نطـلع فـ گال دخلت اغير ملابسي
باوعت للخزانه و ما عرفت شنـو البس
كل ملابسي بسيطه و مو مالت طلعة و فـشلة اگول لـ جودي انطيني
انفتح الباب على طاريها و هي تگول
- ها هلاو
- هلاوات
دخـلت و هي شايلة كيس بيـدها
قطبت حاجبي لمن گالت
- من طلعنا للسوگ علمود العيـد
اشتريت الچ هدية بسيطة، يعني هـو صح ابوية دفع الفلوس بـس تعتبر مني
ابتسمت و همست
- ما چان اكو داعي تكلفين نفسچ
- ما سويـت شي بعدين ما بينا هـاي السوالف
يلا غيري ملابسچ
طلعت و رجعت فتحت الباب و هي تگول بـضحكة
- هاا صدگ غياث خابر راح يطلعون ويانا هـو و صفد
و بسرعة طلعت و اني بقيت اباوع للمكان الي چانت واگفه بي
معناتها راح نتقابل و اني الي بقيت شهر اتهرب منه
تنـهدت و سحبت الكيس
چان بي فستان احمر باكمـام طويلة للمحجبات
بقيت اباوعـله
و لونه الناري ذكرتني بتلك الليـلة
غمـضت عيوني و اني اطردها من بالي
و اذكر نفسي..عيشي هذا اليوم دجى
عيشي مثل الناس الطبيعين..عيـشي بفرحته و بهجته الحقيقية بين اهل و احباب ضحكات صادقة من القلب
مـو بملهى و بين اشباه الرجال و ارخص النـساء، مو تشوفينه اليوم زخم و تعب لأن الشغل هواي و راح يكون اكو ضيوف مهمين
لان شوفيه بفرحته الحقيقيـة
لبست الفستان و الحجاب الي وياه بلون الذهـبي متماشي مـع التطريز الذهبي الناعم الـي على اكمامه
طلعنا بسيـارة مجيـد لأن اكبـر
وصلنا للـحديقة و چان وكت الغروب
لگينا غياث و صفد ينتظرونا
رحبوا ببعضهم و تبادلوا التبريكات
الا ان ما عاديـته، گعدنا على البساطة الي محضرته صفد قبل حظرونا
طـلع مجيد عدة الـشواء و بدينا اني و جـودي نطلع الحافظات الي بيها اللحوم الي راح نشـويها
باوعت لـ صفد الي حچت وي جودي و هي تگوللها تريد تروح للحمام
بس جودي چانت مشغولة وي مجيد
فـ تكفلت و گتلها اني اروح وياچ
وصلنا للحمامـات و هي دخلت و انـي بقيت انتظرها برا
مكتفه ايديه و اباوع للگـاع و على الحجرات الصغيرة المتناثره
رفعت راسـي على صوت رجال على مقربة منـي و هو يهمس
- اول مرة اشوف العيـد لابس احمر
رمـقته بنظرة و اني اگول مبتعده عنه بنفور
- احترم نفسك و ولي مـنا ما ناقصة چـهرتك الزفرة
- لا تتجاوزين لا اشگ حلگچ
حچاها و اجا يسحـب ايدي
دفعته و گتله بذات النبرة
- انت وخر منـا لا اخليك عـبره لمن يعتبـر
- و شلون بله تخلينـي
و قبل لا احچـي كلمة ما حسيت الا غياث يصيح بي
و ما اشوف الا الترابه ورا الرجال
فتحت عيوني على وسعهن لمن وصل عـندي و هو يحـچي بعصـبية
- خوما حاچاچ و بعدين شبيچ ما تحچين واگفه مصنمه لو عاجبچ الوضع
- احترم نفسك انت الاخر
و بعدين اوگف هنا انتظر اختك اني موليه منا
مشيت بخطوات غاضبة لكن توقفت لـمن گـال
- يعني انتِ ما تلگين الا هذا الون؟
متعرفين انو الاحمر فتنه على البيضة
- للعلـم غزلك قديم من زمن البستوكه
ضحكه رنـانه صدرت منه
كتمها ما ان اطلعت صفـد الي باوعتلنا باسـتغراب
رجعنا الهم و گعدت اسـوي بالزلاطه
و غياث و مجيد يشوون
مـادري شلون سهـيت و اني اباوعله و لأول مرة اشوف ضحكه صادقة تـصدر منه اتجاه اخوه
فـزيت من حسيت السچينه نبتت بأيدي
صدرت مني اخ و الـدم بدا يقطـر مني
انتفضت صفد الي قريبة مني بگعدتها چانت و هي تريد تشوف الجرح
بسرعة گال غياث و هو يباوع للجرح من بعيد
- عنـدي عدة طبابه بالسيارة انتظري اجيبها
و طلع لسيارته و جودي دنگت يمي و هي تگول
- غير تنتـبهين يا عيني
عيونچ وين چانن؟؟
رفعت تك حاجب معترضة لأن هي و صفد اثنينهن ضحكن بالتزامن
جـاب غياث العـده و اني مديت ايدي
الجرح چـان بصفحة ايدي عند ابهامـي و السچينه كلش شاطـره شالت مـن الجلد و الالم عبالك بگلبي مو بيدي
رش تعقيم و اني غمضت عيوني بألم و هو نشف الباقي بـ قطنه و بهمس گـال
- هي وحدة من الاثنين
لو انتِ تتعمدين تجرحين نفسچ حتى اداويچ كل ما اكون قريب منچ، لو تشغلين بالچ و تبقين تفكـرين بيه
گلبت عيوني بملل و اني اعرف مقصدة و هو يشير لوگعتي
- او يمكن انت گـصتك فگر و كل ما اشوفك لازم انجرح
بس يلا متعوده اني
ابتسم بهدوء و گـال
- سلامـتچ من الـجرح الـبروح و بالجسـد
رفع عينه عليه و كمل بصوت ناصـي يا دوب وصلني
مـا چنت ادري وصـل لجودي الي ذبت وحدة من اذاناتها يمنـا
- او يمكن طلعت عينـي حارة و شگد ما باوعتلچ حسدچ ؟؟
.
السلام عليكم و رحمة الله و بركاته
شلونكم حبايب گلبي
ان شاء الله الكل بخير
اتمنى البارت عجبكم ❤
ارائكم و توقعاتكم 🥲
القفلة اليوم ما تجلط
و اذا اجت وحده و گالت تجلط ادچها بسجينة دجى 🙈❤
تتوقعون علاقة دجى و غياث تبقى هيچ بين مد و جزر لو اكو امل 😄
و مادري شنو بعد 😂😂
بس شكرا لتفاعلكم الحلو 🫂🫂
و اريد اسمع ارائكم بالقصة ككل
اذا اكو اشياء عجبتكم بيها او العكس 😄
احب اسمع ارائكم و انتقاداتكم حتى استفاد منها 🥺
وبس والله نلتقي على خير احبتي
و لهذاك الوقت استودعكم الله الذي لا تضيع ودائعه 🥺❤