| دُجـى في جوف البـغي |

•الفـصل السابع•

#دُجى_في_جوف_البغي
#بقـلم_الراويه
#الفصل_السابع

بسـم الله ♥

صلوا على النـبي 🧡

.

دجى

على مـدار السنين چـنت اتصرف ببـجاحه
البـعض يفضلها مـعللين حبهم الها انـي صاحبة شخصية قوية راح اكـون لقمة غير سهلـه للبقية

و البقيـة چـانوا يشوفوهـا خطـر و لازم يتم تأديـبي
و اكباتها بداخلـي، لأن انـي امراة
لازم تكـون شخـصيتي ارقة مـن هيچ حتى انـال رضـاهم

و هذه البجـاحه تبخرت ما ان سـقطت نظـرات ابو وائل الشـهوانية عليه
ما چـنت بهذاك الغباء حتى ما افـهم الي يدور حـولي
و بسـرعتي البـديهيه حاولت افتـح الباب لكـن ايده الي امتدت على خـصري من الخلف و هي تشـدني الـه و اقدامي بطلت تلامس الارض عـرفت انـو اجلي اقتـرب

ضربت على كتفـه بقوة براسي و اني ادنگ على ايـده و من معصـمه عضيته و اني اسـمعه يسب بي و يشتمنـي بالفاظ تعودت عليها

گـمت اصرخ بأسـم جوان او سارة لكـن ماكو مجـيب
رغم چـنت فتاة ذو بنية ضعيفـة لكن حاربت كـاني على اراضي مـعركة

سـرقت..كذبت
چـنت اسوء مما يظنـون..لأن كـلشي چان حولي رخـيص و بالثمن البخـس لكـن نفسي چـانت عزيزة و غالية
ما ردتهـا تتشوه تحت ايادي انسـان بـغيض، سرق حـلمي و احلام هواي امثـالي

ما امـتثلت لأمـره و هو يطلب مني الصمـت او يضربنـي
فضلـت تسحق عـضامي تحت قبضة ايديـة و ما ينتهـك روحـي

لكـن كـ حال جميع امنـياتي مـا تحـققت
كـ حال حلمي بدخولي للمدرسة..بشرائط بيضـة تنتهي باطـراف ضفيـرتي..بـ رداء نيلـي تفيح منه عطـر النظافة الي چـنت استنشقة مع مرور الطالبات مـن گـدامي

ضغط عـلى حلگي بأيده و هو يهمس بفحـيح

- اشش لحظة و ينتهي كـلشـي

هزيت راسـي و اني اريد اتمـلص منه
لكـن كـلشي هدأ مـا ان حسيت بنغزة ابره بـرگبتي، حسيت نفسي اطفو على السـطح
قـبل لا اغمض عيوني

اصـوات بعيدة من حولي، اسمع همسات تتـردد باسمـي
ما اريد افتح عيوني و اگـعد
اريد ابقى نايمة..حـالمه بعائـله و بصـديقات دراسـة

- دجـى شبيچ؟؟ افتحي عيونچ تسمعيني

مـيزت صاحبة الصوت و چـانت جوان
الي زفرت براحة و هي تگـول

- الساعة بالـ10 و نص الصبح ليش نايـمه لهذا الوقت

قطـبت حواجبي بألـم و اني احـس بوجع اسفل بطـني
بعدت الغطا عنـي و الي اثار استغرابـي هو تواجـدي بالغرفة و على فراشـي

ما ان نهضت حتـى فلتت شهگـه من جوان و هي تگـول

- شنو هذا الدم

باوعت لفراشي و بقيت للحـظات طويلة اباوعله
غمضت عيوني و هي نهضت بسرعة و لفت الدوشگ و هي تـدارك الوضع

- ميخالف تصير، فوتي غـيري ملابسچ

مشيت خطوتـين و حسـيت بالوجـع
گعـدت بالغرفة، و بنوبة بكاء دخـلت
و اني اعـرف الصار، و اعرف مصدر هذا الـدم
غطيـت وجهـي و اني اشهگ..جوان تريد تفهم شنو بيـه و هي تواسيني لا تـستحين ميخالف

چنت خجلانه مـن نفسي، خجلانه و خـايفة لا صدگ اصير نسـخة مكرره مثل البـقيات
كرهت نفـسي فجاة، كرهتها بعد ما چـانت اغلى شي املكـه
دفعـة جوان عني و اني اهمـس بوعد قطعته على نفسـي

- اقسم بالله موته على ايـدي

حچيتها و جوان تباوعلي بعدم فهـم
اخذت ملابس و دخلت للحمام
ما اعرف شگـد بقيت گاعدة جوه المـي، چنت احس بالكره لنفسي و للكـل
كرهت امي..و كرهت والدي الچان السبب بـتواجدي لهذا العالـم

لميت رجلية على صدري و اني اسند راسي على ركـبتي
شعوري چـان كاني خرجت مـن مكان و دخلت لثاني
فجاة كلشي تغير بداخلي..نظرتـي للحياة زادت سوء
كـانه زرع بداخـلي الحقد و الخـبث الي چان متواري بالظلام داخـلي

مـسحت دموعي بقوة، و اني اقطـع على نفسي وعد ما اكون امثالهن
و ما اتـركه لـ ابو وائل يتهـنه..اذا هو قتلني بفـعلته مرة
فـ اني راح اقتلة الـف مرة

ارتديت ملابسي و باوعت لنفسي بالمـراية
ضـحكت على نفسي بسخرية، كـاني طرت باحلامي هواي
اعرف نفسي مـا اگدر اواجهه
بعد ما كـسر بيه شي عمره ما راح يرجع

لميت شعري و طلعت من الحمـام، اصوات الاطفال اثارت بنفسي الاستفـزاز

طلعت وحدة من النساء المتواجدات و الي چان اسمـها منـال
شافتني و تنهدت لمن همست الها

- ويـن هنـاء

- شتسوين بيها

- وينها

- يعني وينها بالمطبخ تسويلكم زقنـبوت

حچتها و اني اتجهت للمطـبخ
چانت واگفة على الطباخ، وگفت بصفها و هي من شافتني فزت
ميلت الها راسي و گلت

- شنو سويتي غـدا

- فـاصوليا تسممكم ان شاء الله

- ان شاء الله

همست بيها و ابتسمت الها و طلعت

ما ان صرت برا المطبخ حتى نزل ابو وائل من فوگ
ابتسم و اني تجمدت بمكاني، رغم ثـباتي الظاهري الا اني خفت
ارتديت خطوة ليورا لمن وصـل يمي و دنگ عليه
لمس خدي بأطراف اصابعة و هو يهـمس

- شگد چنتِ شهيه، متصورت هلگد طـعم القاصرات طيب

رجفت شـفايفي و دمعتي وگعـت غصب عني
و كل ثباتي اهـتز و تساقطت حصوني، لمـن كمل كلامه و ابتعد
عنـي

خوف لازمني، خوف من اعادة الكـره مرة ثانية
مشيت للـغرفة و بدون ما انطق كلمه لتساؤلات سارة
مددت بفراش و تغطيت زيـنة
لميت نفسي و هـدأت من روعي

3 ايـام چنت طريحة الفراش، من اسمع صوت ابو وائل يجي يصـيبني الخوف
لدرجة اقفل باب الغرفة و لهل السبب تبدي مشاجرة من خلف الباب اني و هنـاء محتواها افتحـي الباب لا اكسره

باليـوم الرابع، اجتنـي منال و هي تصيح عليه، جرتني من فـراشي عنوه و هي تسب بيه
و چنت على غير العادة التزم الصمـت و ما رديت اسـاءتها بكلمة

بهذا اليـوم شفت طفلة بعمـر الـ12 سنة تنـباع على صاحب ملهى، شفتها فرحانه وكل ظنها خلصت من هذا البيت و راح تتحـرر
چنت گاعدة على الدرج و اني سانده راسي على الحايط
صارت الدنيا ليل تقريباً بالـسبعة و صاحتـني منال لغرفتها
چانت رافعة بجامتها و مطلعة رجليها و هي تطلب مني اشيل الها بالشيـرة
گعدت گدامها و گمت اشيل الها و هي ادخن بالنـرگيله قبل لا تگول

- دجى انتِ بنت حرام ؟ لو ابو وائل خطفچ

و بدون ما ارفع راسي الها و اني مستمره بشغلي گلـت

- امي صغيرة بالعمر و متزوجه والدي و هو شايب
خلفتني اني و اختي و شـردت بينا، باعت اختي لناس و اني ذبتنـي الشارع

- اذا ما رادت ابوچ و ما رادتكم و هيچ سوت بيكم
ليش ما خلتكم عند ابوكم و هي شردت

- دايماً اسأل نفسي هذا السؤال، ما لگيت جواب

- چان هسا انتي عند ابوچ بدل هذا الظيم الي عايشته

ضحكت و اني اگول بسخرية

- ليش تـشفقين عليه؟

زفرت و هي تگول

- بالحقيقة اي اشـفق عليچ و على كل الموجودين هنا
كلكم مو بيدكم وصلتوا لهذا المكان..يا اما الاهل او الزمن خلاكم بهذا المكان الي ما تستحقونه

تركت شغلي و اني اسألها بفضـول

- و انتِ؟ چان بيدچ تكونين هنا لو مثلـنا

- ااه چان مو بيدي، ابوية العار زوجنـي لرجال و طلـع هالرجال يشتغل بعصابة خطف للاطفال
صارت مقايضات بينه و بين ابو وائل و باعنـي و اني كل عمري 20 سنة

- ما حاولتي تـشردين

- حاولت اشرد من ابو وائل، بس الحال انتهى انو لزمنـي و باع كليتي

- نفس هواي اشخاص

- بالضبط، اقرب طريقة للانتقام من الي يعصي اوامره هي بيع كليته

- اذا حاولت اشرد يبيع كليتي؟

هزت راسها بأي و اردفت

- يلا كملـي لا تلتهين

حچتها و اني رجعت اشيل الها
كملت و رجعت للغرفة، باوعـت لجوان تغير ملابس طفل عمره ما يتجاوز الشهرين
گلبت عيوني و اني اتمـدد بمكاني
حطيت ايديه جوه راسي و اني اباوع للسـگف
بحالة هدوء دخلت و سكينة غريبة، قبل لا يصدح صوت ابو وائل العصبي و هو ينزل من فوگ بخطوات ادك الارض بصحبة هناء

طلعت و بقيت واگفة بالباب و هو طلع من البيت بقت هناء بالممـر واگفة
و بتساؤل گالتلـها منال

- شكـو؟ شبي ابو وائل

- وصلـتله اخبار انو جمارة لزمتها الشرطة

- عزاا و الاطفال الي عدها

- اكيد اخذوهم الشرطة

سكتت منال للحظات قبل لا تگـول

- هسـا تحچي الاول و التالـي
و نروح كلنا بيها

نبرة صوتها چـانت يعتمرها الخـوف
دعيت بگـلبي صدگ تحچـي و تخبر عن ابـو وائـل
و نتحـرر من هذا المكـان القـذر

لكن نفس كـل مرة احلامـي چانت بعيدة المـنال
ورا ساعة بالضـبط دلف للبـيت و هو يصيح و يلـهث باستعجال

- هنـاء منال يللاا حظروا الي تگدرن عليه الـساقطه حچت كلشيي

بسرعة فهمت الي يقصـده، و اني اباوع لـ جوان بنـظرات كلها امـل
البيـت انگلب راساً على عقب و فقط صوت ابو وائـل يعج بي مع اصوات بكاء الاطفال
ما شال غـير جنطة چبيره
و اخذت منال و هنـاء اطفال اثنين لأن حسب الي عرفته هذولة راح ينـباعون

دخـل للغرفة و توجه عليه و سحبني بسـرعة من ايدي و هو يصيح

- تجين ويـانا

- عوفنـي ماا اروح وياك

صحت بي و ما حسيـت الا المسدس براسي و هو يخلي ظهـري على بطنه و كمل بتهديد

- جـوان اخذي واحد من الاطفال لا كتـل صديقتچ على ايـدي

- جوان لا تسمعين كلامه

حچيتها و هو ضغط بفوهة المسدس اكثر على صدغـي
و جوان بچت و هي تهـمس

- لا تكتلهاا عفية

- ما اكتـلها اذا سويتي على الگلته الچ
و انتِ سارة سوي نفسها

هزن روسهم باضعـان و اني اترجـاهن بنظراتي ما يسون هيچ

خلال ثواني معدودة طلعنا من البيت تاركين ورانا اطفال باعمار متفـواته..اغبطهم على بقائـهم لأن هذا معناته راح يتحـررون

صعدنـا بالسيارة و هو يدفع بيه، باوعتله و همست بحقد

- آخـرتك لو ميت لو بالسجـن فـ لا تفرح انك شردت هسا

اسكـتني بصفعة على حلگـي خلتني ابتلع الدم و هو يصـر على اسنانه و ايده على فكـي تخترق جـلدي

- حچـايه وحـدة اموتچ و ما يرفلي جفـن

سكتت لمن لزمت ايدي جوان و هي تترجاني اسكت

مشينا بالسـيارة لمسافة طويلة، الطريق صـار شبه صحـراوي
السيارة چانت حـمل و مخنوگين بيـها و كلش متـضايقين
الطريق ظلام و يخـوف
چنت الوحيدة الي ما بيدي طفل..فجاة حسيت بثقل بين ايدية و اباوع الطفل الي چان بيد سارة و الي عمره 3 سنـوات
و قبل لا اعترض على فعلتها..فتحت باب السيارة و ذبت نفسها مـن عدها
بسرعة وگـف ابو وائـل السيارة و لحگها و هي يصيح عليها
تواروا بالظلام و لمحتها تركض مبتعـده عنه
قبل لا يرتفع صوت عيـار ناري و تبعه بثلاثة طلقات اخرى، خلاني افز بمكاني و اني اجحظ بنظراتي

- كتلها

همستها جـوان و هي تـرجف
باوعتلي و اني نظرت الها بعيون خاويـة
لحظات و صعد ابو وائل بالسيارة و هنا منال همست بتردد

- كتلتهاا

- هـذا مصير الي تريد تشرد

حچاها و هو يركـز بنظراته عليه
التزمت الصمت، و اني احتضن الطـفل لصدري، مهما كـنت متمرده فالروح عزيـزة
مستحيل اجازف بهاي الخطوة

حرك السيارة و اني اباوع من الشباك و ما حسيت بدموعـي الوگعت على خدي
اقشعر جسـدي و اني ارسم بالي افكار حول شكلها هسا
ليش قتلها هنا..روحها ارتاحت من هذا العذاب الي يتسمـى حياة، بس جسدها بقى و يمكن راح يكون عشـاء للحيوانات الي تسكن هاي الصـحراء

سندت راسي على الجام و اني اكتم دموعـي
غمضت عيوني اتـرجى ربي انو ينزع روحي من هذا الجسـد قبل لا نوصل مكان يكـون اسوء بهواي من الاماكن الي عشت بـيهن

مشينا بمـسافة هواي طويلة
اخـذ منا التعب ما اخذ، و ما چان يوقـف ابو وائل علامات الغضب مرسومه على وجهه و كـل شوية يرفع التلفون يحچـي وي ناس

اخر مكالمة انطـى بيها خبر انـو اقترب من الوصـول

لكن هذا الاقتراب چان بعيـد..باوعت للساعة السيارة چـانت تشير للـ1 بعد منتصف الليل
يعني اكثر من خمس ساعات احنا بالسيارة و بسرعة تعتبر سريعـة رغم طلعنا عن الطـريق و مشينا بمسار ترابـي وعـر

سندت راسي على كـتف جوان و ما حسيت الا النوم يسحـبني لاحضانه
و كعادة احلامي كـلها تتمحـور حول عائلة جديدة، و حياة سعيـدة ما بيها اي حزن لو تعـب

فتحت عيوني و اصوات عصافيـر ترن بأذني
اصوات چانت غريبة عليه، بيها نوعاً من السعادة
تعـدلت بگعدتي و باوعت من جـام السيارة
سهول خـضراء..طبيعة خلابه
انذهلت من المنـظر و اني اباوع لجوان الي شكلها توي گعدت مـثل حالي

- ويـن احنا؟

همست بيـها و على اثرها التـفتت عليه منال الي گاعـده ليگدام و بيدها بـطل مي

- بـالشمال

- شنـو؟؟

- بين حدود الموصل و اربـيل

فتحت حلگي متفاجـئه و اني اقلب نظراتي بين المتواجدين بالسـيارة بظل غـياب ابو وائل

الي لحظات و دلـف للسيارة و هو يحچي بسخرية

- ساعة و احنا بنـص اربيل
ما شايفات الشمال انتن؟

- لا ما شايفته قبل

حچتها هناء و هو رد و صوفر

- جنة الله على الارض
نـيال اهلها بيها

- شوكت نرجع لبغداد

حچيتها و هو التفت عليه و گال

- و منو گال نرجع؟

- خوما نبقى هنا ابو وائل؟

سألته هناء و هو جاوبها و ايده تمـتد لتشغيل السـيارة

- فترة و احنا نرجع بس هذني مستحيل اخليهن وياي
ابيعهن لأي ملهى و اخلص من حملهن

- عوفنا هنا..اذا هلگد حملنا ثگيل عوفنا و احنا نـدبر امرنا

صحت بي و هو باوعلي بنظرة حـادة
و بـغضب گال

- و اني هلگد زوج حتى اعوفچن بدون ما اربح منچـن شي؟؟ سنين اعبي ببطنچ و بالاخير اطلع فاضي الايـدين

و كمل و هو يرفع ايده اتجاهنا بنبرة تهـديد

- كلمة اخرى مصيرچن مصـير سارة

هزت جوان راسها و هـو سكت و اني بقيت اباوعله بنفس نظراته
حرك السيارة و مشينا مسافة چانـت مو طويلة
تقريباً ساعة و نص

وگفها و نزل و فتح الباب الي ورا و هو يگول

- انزلن و اتركن الاطفال

تركت الطفل و نـزلت
و بداخلي اگول كلشي يهون ما طـول ابو وائل مو هز المسؤول عني
نزلت اني و جوان و گال امـشن وياي، مشينا مسافة عشر دقـايق
قبل ندخل لبيت صغير
چان بي رجال..لزمت ايـد جوان تلـقائياً استمد منها القوى و هي كذلك

حچه ابو وائل وي الرجال و هو يگول صغار و بسرعة يتعلمـن
باوعت لأيد ابو وائل الي لزمت ضـرف بي فـلوس و هـو يبتـسم ابتسامة نصر

تسالموا هو و الرجـال و من اجا يطلع مر من گدامنا و بـضحكة گال

- بالتوفيق بناتـي الحلوات

- قبل لا تروح لا تنسـى شخص اسمه دجى
لأن حتى باحلامك راح الحكگ

حچيتهاو تقربت عليه خطوة و كملت بـحقد

- السـويته بيه عمري ما راح انـساه

ضحك بسخرية و مـا جاوبني
التفتت لـ لرجال و هو يحچي ويانا بجـدية

- انـي هوشـيار صاحب ملـهى
البنـات هناك 3 نوعيات، النـوعية الاولى فقط مختصة بالـرقص على الخشبة
و اي شخص يتحرش بيها او يجبرها على شي هي تكون صاحبة الحـق و يتم التعامل وياه
النوعية الثانيه هي فقط الي تضيف الـشخص و تگعد تحچـي وياه بدون اي اقتراب من بعض فقط حديث يضيع وقت الـضيف
و النوعية الثالثة و هي بائعات الهـوى و الي تستأجر لليلة..و بالمهـلى مالتي كل وحـدة تعرف شغلها
ما تتدخل بالبقيـة باي شكل من الاشكال

سكت و اشـر علينا و كمـل

- و انتن هسا حُرات انفسچن الا ان تختارن المجال الي تدخلن بي
و من خبرتـي فـ انتن صغار بعـدچن على الخوض بحديث او علاقة مع رجل فـ اقترح تكونن من ضمن الراقصـات

- ليش ما تخلينا حرات انفسنا دوم
ليش ما تعتقنا..عندك بنية

سـألته و هو زفر و گال

- لأن ببساطة اشتريـتچن
و على سؤالچ اي عندي بنية و تدرس بالخارج

ابتسمت باستهزاء و اني اگـول

- زين اعتبرنا وحدة من بناتك و اعتقنا خلينا نعـيش حياتنا

- اسف ما اعتبر بنت حرام بنـتي

حچـاها ببرود و انـي همست و عيني بعينه النرجسيـة

- بس اني مو بنت حرام
چانت عندي ام و اخت و اب رغم ما اتـذكره، بس بـ ليله و ضحاها فقدت كلشي

- و اذا اعتقچ ما راح يتغير شي
ترقصين بالمهلى بدون محد يتعرض الچ او تكونين فريسة لاشباه ابو وائل او تسكـنين الشوارع و انتِ بيـدچ راح تسلمين نفسچ الهم

- كلامه صحيح

همست بيها جوان و هي تكمل بعد ما خلتني اباوعلها

- كلامه مقنع..نرگـص گدام ناس بس ما تلمسنا اشرف من انو يوميه بحضن شخص
تتذكرين بيـت ريا؟؟ تتذكرين شگد چنتِ كارهه نفسچ لأنچ متواجدة بي، على الاقل الملهى هواي ناس محـد يگدر يلمسنا او يأذينا و انتِ سمعتِ كلامه

- نفس الشي

حچيتها و كملت بعصـبية ما سيطرت عليها

- نعرض نفسنا عبالك بـضاعة گدامهم

- اسف على التدخل بس يمكن تأخرنـا على الرجعة
و يمكن راح تغييرن نظرتچ ما ان توصلين هناك

حچاها و هو يختـم كلامه بابتسامة
حضنت جوان ايدي و هي تـترجاني امشي، و بدون ما انطق كلمة مشيت وياه

دخلنا لداخل المدينة، چـانت اربيل تختلف عن بغداد او اي مكان لامحته
بنايات عالية..شوارع نظيفة..كلشي مختلف حتى الهوا

وصلنا للملهى و دخلنا من باب خلفـي و هو يحچيلنا انو هذا الباب مخصص فقط للي يشـتغلون هـنا

المـلهى چان چـبير كلش، من خلال درج ننزل لدور بالاسفل عبارة عن غـرف نوم مخصصه للراقصات او لاي شخص يشتغل هنا و ما عنده مسكن
و مكان للـتدريب الراقصات الجـديدات

نادى باسـم نازك و تقربت علينه امراة بحدود الثلاثين من العمر او نهايته..عدها جسم ممـشوق و شعر اشقر ناعم، ملامحها عادية
رحبت بينا و گعد يحچـي وياها هوشيار باللغة الكرديـة

اخذتنا و تحولت لغتها للـغة العربية و هي تگول

- اول يوم الچن فقط للاستطلاع
و تشوفن طريقة الشغل..بعدچن صغـار، و انتن اصغر اثنين هنا، اسبوع كـامل راح اشرف على تدريبچن
رغم الي يجـون هنا ما يهمهم الرقص بگد الجـسد الي يهتز گدامهم

توقـفت عن المـشي و اني اگـول

- محد يتقرب منـا

- الا اذا انتِ عجـبچ هالشي

حچتها و فتحت باب و دخلنا اله
ذبت عليـنه قطعة قماش لكل وحدة منه بنـهايتها ليرات
و گالت

- اربطـنهن على وركچن

زفرت و ربطتها و سوت جوان نفس الشي
توجهت لمـسجل و شغلته و هي تحچي بضحكـة و حماس

- الرقص يطلع الطاقة السلبية بالجـسم
بعد ما ترقصن راح تحسن براحة نفسية راح تتجدد روحچن

و بدت تحرك بخـصرها بكل سلاسه و هي تكمل

- قلـدني يلاا

جوان چانت اسرع مني و هي تقلدها و تباوعلي و تضحك
غمضت عيوني و تذكرت كلامها انها تطرد الطاقة السلبية..فتحت عيوني و گمت اقلد حركاتها

اسبوع كامل احنا يوميه نتـدرب تحت ايدها
چانت شوية عصبية و تعصب اذا غلطـنا بحركه بعد ما اتقناها

چنه ننـام بالغرف المخصصـه، اني و جوان و بنات اثنيـن
بالليل بوقت الحفلات تخلينا نباوع من بعيـد على البنات الي يرقصن
بعضهن ببـدلات رقص لكـن مو فاضحة حسب قوانين المـلهى و البعض لا فساتين تبرز مفاتـن جسمهم

و بعد هذا الاسبوع چانت دنيا ليل و اقتربت الحفلة على الانطـلاق
طلعتلنـا بدلات نگدر نلبسها..ما فـضلت البس بدله فـ اختاريت فستان
چنت البس بي و اني احس بحالة جمود مو طبيعية
ما چنت خايفة بالعكس احس هالـمكان أمن من الاماكن الي قطـنت بيها
طلعت من المكان المخصص للتبديل بغرفة التبديل و الملابس
ضحكت نازك و هي تگلي باعجـاب

- صـدگ القالب غالب
بس يحتاج شي

حچتها و هي تتقرب مـني، فتحت شعري من المشبك و هي تنثره على اكتافب و هي تردف

- اي هـسا احلى

ابتسمت بمجامـلة و اني اباوع لـ جوان الي لبست فستان كذلك
كذلك نازك اثنت عليها و هي تفتح شـعرها

باوعت لميز عليه مـثل البراقع متكونه من سلاسل و ليرات تغطي الخشم و الشفه
تقربت على واحـد ثگيل و سحبته
و لبـسته گدام المراية..الي يشوفني من بعيد ما راح يعرفني

- عـجبچ؟

سألتنـي نازك و اني جاوبتها

- عجبني لأن ما يبين وجهي
و هذا الاريـده

ابتسمت و هي ترد عليه

- هواي بنات ما طلعن وجهن لهسا وشكلچ انتِ راح تكونين من ظمنهن
يلا بنات تعالن وياي

حچتها و طلعت و انـي و جوان لحگـناها
صعدت على خشبة المسرح و اني وجوان خلفها
غمضت عيوني و انـي احس نظرات الكل منصبة علينا، بنات اثنين صغار
يمكن تمنوا لـو كنا احدى البنات الي نسلم نفسنا الهم مو نرقص فقط

مع ارتفاع الموسيقى كل البنات تحركن و كل وحدة چـانت تبعث رسالة اللاخرى انها الافضل بـلا منازع

عند نغمة معينه تذكرت تدريبات نـازك و هي تگوللنا افتـرن بكل سلاسة و خلي المقابل ينتبه الـچن
و ما ما استـداريت حول نفسي
حتى مـرت 3 سنين من عمـري بهذا المكان

بين الموسيقى الصـاخبة..بين عشرات الحفلات
عشـت..عشت و كاني ما عـشت مثل قبل

بهذا الملهى صـرت من اشهر الراقصات الي تحـي الحفلات..مع مجموعة غير هينـه من البنات
چـان ابرز لقبي يلتسق بيه لدرجة نسيت اسمـي و هو ' صاحبة الـبرقع ' على مدار هاي السنين ما خلعته و اني متواجدة على خشبة الرقص
چـان خوف لا احد يشوفني و ابقى ملتسقـه ببـاله
خوف ما اعرف مـن اي زاوية بحـياتي انبـثق

بعد حفلة صاخبة انتهـت قرابة طلوع الشمس
دخلت لغرفتي و اني انـشف شعري الرطب بعد ما اخذت حمـام
لگيت نازك على چـربايتي گاعدة
رفعتلهـا حاجبي و اني اگول

- حسبالي رحتي نمـتي

- لا ردت احچـي وياچ بموضوع

- شنو هو

حچيتـها و اني اگعد گـدامها على التخت المـقابل لسريري

- اريدچ وياي بالتدريب

رفعت حاجبي متفاجـئه و هي كملت

- انتِ خلال 3 سنـوات اثبتِ وجودچ
سرعة تعلمچ خـلتچ تكونين من البنات المفضلات عندي، عنـدي طريقة خاصة بالرقص تخلي المقابل غصب عنه يصفـن بيچ

تجاهلت كل كلامها و اطرأها و اني اگـول

- بس مو بعدني صغيـرة للتدريب؟ توي 17

- لأن بعدچ صغيرة راح تكونين مقربة من الكل بشكل افضل مني
ها شنو گلتي؟ اعرفچ ما تحبين الرقص گدام احـد بس مجـبورة
اذا صرتي مدربة راح يقل تواجدچ على المسرح
و تكون الحفلات الي انتِ متواجدة بيها راح تكون حفلات vip  يعني مو اي شخص يدفع بيها كذا مبلغ
يقل وجودچ على الخشبة بس بذات الوقت تزيد فلوسـچ..فـ ها شنو گلتي

و بدون ما افكر مرتين و اني اسـمعها تگول هيچ
وافقت
و فعلاً خلال اسبوعين لزمـت تدريب فئة من البنات تحت اشراف نـازك الي اشـادت بدوري

خلال اشهر علمت هواي بنات..سمعت حكايات هواي بنات الي يرقـصن
قصص چانن ابشع من قصتي بـمراحل
لكن احدى القـصص اثارت التعجب انو بنية بنـت ناس و عدها اب و ام و عايشة مرتاحة و سعيدة
لكن تحب هاي المهنـة..و بسبب شغفها شردت من اهلها و هي كل عمرها 22 سنة
خلتني انصـدم من كلامها

حچيت وياها و اني اريد اثنيها عن رأييـها لكن چانت مصره على رأيها بحجة هاي هـوايتي و حلمي و اريد احققه

سنة بقيت ادرب بالبنات..مع القليل من حظوري بالحفلات و الي تكـون vip و مو كل مرة اكون موجودة
چنت عايشة لكـن بدون هدف..فقط اريد تمر حياتي
الا ان بيوم سمعت انو ابو وائل جاي للمـلهى
ما كنت متواجدة بالحفلة بوقتها..لكن حظوره خـلاني اعيد ذكرياتي و اني اقطع وعدي بأني انتقم منه

دخلت لـسن الـ18 و قربت ادخل للـ19
كل هذا و اني قليلة الظهور بالشوارع..اغلب يومي بالملهى
يا اما ادرب البـنات او احچـي مع جوان
الي صارت بينها و بـين احد الگورسانات علاقة حـب على اثرها طلبها للزواج و هي بدون تردد وافقت
و انخطبوا..الشاب چان يتيم الاهل..بعد ما عرف بقصتها تقبلها مثل ما هـي

فرحت الها..لأن الحظ ابتسم الها
راح تبني عائلة و تكون انسانه مستقـلة
و هذا الي صار..بـعد ما جمعت فلوسها الي جمعتها خلال سنوات الشغل بـ الملهى مع فلوس خطيبها و انطتهن لـ هوشيار و هي تگله هاي كل الفلوس الي ربحتهـن من مكانك اريد استقـيل
و لأن اكتشفت هوشيار عنده قلب طيب تقريباً بعيداً عن شغلة گاللهم اخذي فلوسچ و روحـي اسـسي عائلة و انت اشتغل و كان يقصد خطيبهـا

خلال شهرين تركت جوان الشغل و مـشت هي و زوجها و رجعت لبـغداد لـ يبدون حياة جديدة

رجعت وحيدة..و هالشي اثر عليه
لـكن اتـناسى الموضوع بين التدريبات و الحفلات
الى ان اجـا اليوم الي چنت انـتظرة

طلعت فلوسي و راتـبي الي چنت اقبضة من الملهى
و اتجهت لـ هوشيار..و على خطى جوان خطيت

خليت الفلوس گدامه و هو على المكتب
قطب حواجبه و اني گـلت بلهجة باردة چانت ترافقني لسنين

- اشتريـتني بمبلغ قبل سنين
و هذا المبلغ رجعته الك حتى اشتري نفسي بـي

حط رجل على رجل و هو يگول

- تريدين تأسسين عائلة

هـزيت راسـي بـ لا و اني اگول

- لا..لأن حتى ما اضطر بـيوم اترك اولادي
اريد ارجع لبغداد تصفية موضوع

- و الي هو

و بكذب رديت

- ادور لابوية و اخـتي

مسح على حنچـه و باوع للفلوس
تنهد و هو يرد

- طلعتچ منا و استقالتچ معناتها راح اخسر هواي زبائن بفضلچ صاروا رواد للملهى

- تگدر تعـوضهم و تزيدهم
مـيار اكثر انسانه تشبهنـي من كلشي، و شاطرة اذا انطيتها فرصة للظهور مثل ما انطـيتوني فـ اكدلك راح تنجح

چـان التردد واضح بعيونه
تأفف و رجع يسألني بشك

- شلون راح تلگين ابوچ و اختچ

- ادور الهم..الي يسأل ما يضيع
و هسا اتمنى تگلي قـرارك

سحب نصف المبلغ و دفع ناحيتي الباقي
و هو يگول

- فقط هذا..روحي كل التوفيق
و ان شاء الله بيوم من الايام اسمع عنچ اخبار تسر
مأسـسه عائلة..و لأگيه ابوچ و اختچ

ابتسمت اله بصـدق و اني اتشكـره
اخذت الفلوس و طلعت من المكتب مالته
و خلال يومين طلعت من الملهى متوجه لـبغداد
و بيدي ورقة قصاصة تحوي عنوان مكان ابو وائـل

.

السلام عليكم و رحمة الله و بركاته

شلونكم ان شاء الله الكل بخير

اتمنى البارت عجبكم

ارائكم و توقعاتكم ♥

ما زال امامنا بارت  واحد يخص ذكريات او مـاضي دجى
و نرجع للحـاظر حيث عائلة حجي قاسم 😅

هذا البارت و البارت السـابق چانن اكثر بارتين اعيش بيهن بكل حواسـي
اكتب بشغف والله فـ اتمنى ينالن اعجابكم 😩♥♥

و بس والله نلتقي على خير احبتي
و لهذاك الوقت استودعكم الله الذي لا تضيع ودائعه ♥