| دُجـى في جوف البـغي |

•الفـصل الخامس•

#دُجى_في_جوف_البغي
#بقـلم_الراويه
#الفصل_الخامس

بسـم الله ♥

صلوا على النـبي 🧡

.

دجى

طـول حياتي چـنت احـس بنقص
نقص بشكـلي
نـقص بعائلتي، نـقص بالاشياء الاحبها
نـقص بثقتي و بنـفسـي

عـشت اغلب حياتي و انـي اقـارن نفسي بالاخـرين
لذلك چان شعور النقص ملازمنـي

مـن چـنت اطلع للشـارع اجدي، چنت اقارن نفسي بالبـنات الي يشقن طريقهن للمدرسة
بـملابس المدرسة النظيفـات و الي تفيح منهن ريحـة النظافة
ملامحهن الحـلوه و النظرة، عـكسي بملابس باليـه
بنظرات عيوني تحس بالتيه، بشكـلي الشاحب

" بيوم چانت دنيا ليل
الكهرباء طافية، و على ضو الفانوس گاعـدين
مـيناس طفله كل عمرها سنة و نـص اخذت گلاص مي و ذبته على ماما
ماما ما تحملت و هي تعيط بـميناس و تدعي عليها بالهلاك، ما تحمـلت و گمت ابـچي بحرقة گـلب
و اني اريد اطـلعها من جوه ايدها و هي تضربها بـ قسوة، سحبتها مـنها و اني احتضنها و اترجـاها تتركها
دفعتنا اثنينه بعيـد عنها و هي تصيح بغضب

- الله ياخذچن و اخـلص منچن انـت بلوه و اجت على حياتي، الله ذبنـي بنص اهل گـوا....زوجونـي ابوكم الشايب و ابتليت بيكم
شلون يعني احرگم اذبحكم حتى ما اشوف وجه ابوكم بيكـم

سديت اذاني و اني اترك اختي، و دموعي تاخذ طريقها على وجنـاتي
على الصياح دلفت للبـيت جارتنا العجـوز، چانت مراة چـبيرة بالعمـر و ما عدها بـس ولد واحد
گعدت تسكت بيـها

گعدت والدتي على الارض و هي تجـهش بالبچي و هي تـگول

- تعبت خاله تعـبت، حملهم زاد والله

- صوچـچ يا بنتي صوچـچ
وحدة مثلچ و بعمرچ و بـرگبتها طفلتين تترك بيت رجلها و تشرد

- اي اشـرد، اشـرد من الظيم و القهر الشفـته
انـي تعبت منه و مـن حياتهم الاقرف منها، سواني مراة بس للخـلفة حتى يصير اله تركه ورا ما شاف نفسه شايب و رجليه بالگبر

- گلتيها شايـب، چان خفتي الله بي و ظليتي عنده الا ان ياخذ الله امانته
عاجـبچ وضعچ هذا؟؟

-اي عاجبنـي ما طول مو يم الشايب

حچـتها بعصبية و هي تكـفف دموعها
و اني بقيت اباوعلها..يمكن هاي اول مرة تحچـي عن ابوية گدامنا
ما اتذكر شلون وصلنا لهنا..مثل الحلم اتذكر استأجرنا هذا البيت و امي چانت حامل بمـيناس
و ورا فترة ولدتها على يد المراة ام كـرار

رفعت راسي للمـراة و هي تمسح دموعي و توگـفني على طولي و هي تگـلي

- امچ تعبانة لا تزعلـين منها بنيتي زين

هزيت راسي بـأي و نظراتي على امي الي ما تباوعلنا
اتذكـرها چـانت حلوة، عيونها عسليات
شعرها طويل و ملامحها كـلش نازكه و ناعمة

- ماما اني احبچ بس انتِ تظلين تصحين عليه

حچيتها بكـل براءه الاطفال، ما شفت ملامحها زين و شنو چانت ردة فعلـها
بس فجاة عاطت بـيه و قبل لا اتحرك من مكاني بسبب فزتـي حسيت بحرارة على ايدي و نـار تلتهم اكمـام ملابسي
و الفانوس تدحرج و وگع بالگاع و هو يلتـهب بناره

گمت ابچي و اعيـط و بس صوت المراة ام كرار تتحسب بوالـدتي قبل لا تركض ناحيتي و هي تريد اطفـي النار الي بكم ملابسـي
طفت بسرعة و على اثره صار حرق بيـدي
خلاني ابچـي بقوة و الوجع چان بگـلبي من فعلة امي مو مـن حريق النار

اخذتني ام كرار لبيتها و اخذت ميناس لأن خافت من امي عليها
ابنها چان اكبر مني بهواي
لـزم ايدي الثانية و هي سلخت الجلد و حطتـلي مرهم
لحد هسا اتذكر هذاك اليوم..خلتني اني و اختي نـام عدها
و الي چان يأذيـني انو والدتي ما سألت

الصبح انطتني علاج ام كرار و علمتني شلون اخليه
و رجعت للبيت و اني لازمه ايد مينـاس
رمقتنا والدتي بنظرة قاسية و مـا اردفـت وراها باي كلمة

ورا يومين چـانت دنيا ظهر، واگـفه بالباب مال غرفة ماما و اباوعلها و هي تغير لمـيناس ملابسها

- ماما ليش غيرتي لميناس ملابسها الصبح لبستهن

باوعتـلي و هي تگول بابتسامة

- ميناس راح يصيرون عدها اهل جديدين

- شنو يعني

- يعنـي اكو عائلة راح تاخذها
ما عدهم اطفال فـ راح يربونها، راح تعيش مدلله
بنص الفلـوس و ما راح تحتاج شي

بالاول عقلي الصغير ما استوعب شنـو الي گالته
رمشت بعيوني و گـلت

- يعنـي بعد ما تصير بنتچ

- اي راح تصيـر بنت غير مره
ميناس راح تشكرني هواي من تكبر لأن خليتها بنص الخير و عند ناس غرگانين بالفلوس

- بس ماما هي بنتچ

حچيتها و ما حسيت الا دموعي وگعت

- لأن هي بنتي اريد اعيشهـاا براحة و بخير

حچتها بقسوة، و قبل لا احچـي اي كلمة
اندگ الباب..فز گلبي و هي ابتسمت بسرعة شالت مينـاس و طلعت
لحگتها و اني اگول بتعلثم

- ماما بس ميصير هيچ، زين والله اني اغيرلها و ادير بالـي عليها
عفية ماما لا تنطـيها

بسرعة التفتت عليه، و بدون ما تحچـي شي ضربتني على وجهي
خلتنـي ارتد و اوگع بالگاع
گمت ابچي و اني انهض و اريد اخذها منها بس چـانت متمسكه بيها
فتحت الـباب و اني ابچي و اگوللها عوفيها ماما
چانوا رجال و مراة واگـفين، واضح عليهم الغنـى و الاناقة

- خالة لا تاخذينـها عفية هاي اختـي

حچيتها و اني اتمسك ببنطالها العريض
دفعتني عنها و هي تگول

- ميخالف ماما اخليچ تشوفيها بين فترة و فترة

- بس اني اريدها تبقى ويـاي
هاي اختي گوليلها ما اريدها

سحبتني امي من ايدي المحروگه خلتني اصيح بوجع
و هي تدفعـني لداخل البيت و هي تگول متجاهله امري

- ما اظن تحتـاجون ملابسها القديمة

- كلشي جهزنه الها

- الفلوس شوكت توصلني

رجعت سألت و رجع الرجال جاوبها

- راح يجي ابن اخوية يجـيبهن الچ

- خـوش انتظره و اذا ما وصلني بالوقت المحـدد
اقسم الكم بالله ما تحـسون الا نفسكم مرمين بالسجن بحجة الاختطـاف

حچتها امي و اني ما همني الحچته
كل الي همني چان ميناس، الي تباوعلنا بحيرة
تقدمت على المراة و گلت الها بنجيش

- بس خلي احضنها

زفرت و نزلتها من ايدها و اني شلتها..حضنتها و بچيت بكـل قوتي
بستها من خدها و گلتلها بوعد قطعته

- يجـي يوم و اخليچ ترجعيـلي

سحبتها منـي المراة، و كـلشي صار بلمح البصـر
اخذتها و صعدت بالسيارة الي انطلقت
اباوع لماما ارتچت على الباب و بعينها نظـرة حزن
بس ما اشفقت عليها، لأن هي الي انطتها الهم بيـديها محد جبرها "

فزيت مـن ذكرياتي الي تكون عبارة عن خنجر و ينبت بصدري
على صـوت جودي

- تحچين ويـاي

حچيتها بشك و هي ردت بسرعة

- صارلي ساعة احچـي وياچ
وين صافنة

- لا بس تذكرت شغلة

حچيتها و هـي استندت على الكاونتـر و اني داغسل بالصحون مالت الريـوگ

- باچـر عرس وحدة من اقاربنـا

- اي بيها الخير

- تعرفين فرحانه الها
صارلهم سبع سنين يحبون بعـض، و بصعوبة يلا گدروا يرتبطون اهلها و اهله چانوا رافـضين

- حب حقيقي مو حب يومين

- بالضـبط

حچتها و تعدلت بوگفتها و هي تردف

- اكيد راح الگـي بيت عمي عبد الرزاق
اريد اطلع بشكل يبين الهم اني ما مهتمه لوجودهم او للي صار

- اهل خطيبچ السابق

- اي هما..برايچ تفكيري صحيح لو لا

نشفت ايديه بالمنديل بعد ما كملت شغلي
و اني اگـول

- من جهه اي و من جهه لا، حلو تبينين الهم انچ ما مهتمه بالصار و انـو ابنهم چانت صفحة و انطـوت بحياتچ
بس ليش تريدين تبينين الهم؟ هلگد متأثره بالموضوع
بالعكس تصرفـي على طبيعتچ و لا تخلين السالفة تشغل بالچ
و انتِ من ما راح تهتمين بالموضوع تلقائياً راح يتأكدون انچ تخطـيتي الصار، بس اذا حاولتـي تبينين راح تبالغين بتصرفاتچ و راح يكشـفوچ

ضحكت ورا ثواني و هي تگول

- والله اقنعـتيني
راح اسوي هيچ

حچتها و اني ابتسمت الها..و بديت امسـح بميز الطعام اكمل اشغالـي

ثاني يـوم الظـهر
بدوا يتجـهزون للعرس، الحجـيه گالتلي اذا تحبين تجين گتلـها لا ما اعرفهم و احس مو لائق هالشـي انو اروح بدون عزيمة او احد يعرفنـي

حچيت هالشي فقط لاجـل مبتغاي
بالـ2 طلعوا لأن العرس بالقاعة و بعـيده شوية، بين ما يروحون للبيت حتى يروحون وي الزفة
طلعوا بس قبلها انتبهت للحجـية قفلت باب غرفتهـا
سويت نفسي ما منتبهه، اصلاً اني ما مهتمه لغرفتها او الي بيها

انسد الباب و طـلعوا و تاكدت من هالشي لمن اشتغلت السيارة
بقيت افتر بالبيت و اني اتأفف، بحثت بكل مكان عن تلفون او اي شي اگدر اتصل بيـها على جـوان
الي صارلي فترة اسبوعيـن متصلة بيهـا

الساعة صـارت بالاربعة و نص، گـمت من مكاني بالغرفة و طلعت للحديقة
مع ما طلعت من باب المطبخ طلع غيـاث من غرفتها
بس شافني رفع حاجـبه و اني ابتسمت بسخرية
مشى خطوتين باتجاه الباب الخارجي بس توقف و هو يگـول

- شبيچ توزعين ابتسامات ؟ بعدين شعجب ما رحتي للعرس لو بيت حجـي قاسم يستنكفون ياخذونچ

- اني ما ردت اروح

حچيتهـا و مشيـت ناحيته
وگفت گدامه و اني اتكتف، و هـو ضيق عيونه و گال

- بس لا تريدين تغرييني شتريدين

- اريد اعرف ليش تكره اهلك

- و انتِ شعليچ

- مجرد فضول
بس تدري اني وياك اقـدارنا تتشابه، انت انطردت من بيت ابوك
و اني انـطردت من بيت امي، نفس الشي

حچيتها و هو لانت ملامحـه
زفـرت و اني اكمل بنبرة حاولت تكون حزينة

- انقهرت عليك لمن حچـت الحجيه
شي صعب لأن عشت هالشي، بس انت قتلت كل ذرة شفقة بداخلهم ناحيتك بسبب تصرفاتك

دنگ ناحيتي و هو يگول بهمـس و بكلام ما توقعت يحچيه گـال

- عكسچ مو؟ انتِ خليتيهم يشفقون عليچ و يدخلونچ بيتهم

- لأن اني صدگ مظلومه

حچيتها و ابتعدت خطوة ليورا
و هو ضحك و بـخبث نطق

- الـعبي على الكل و اضحكـي عليهم
بس مو تجـين تضحكين على غيـاث

- هه ضحكتني هالگد واثق من نفسك

حچيتها و كملت بعصـبية

- اذا انت كارهني فـ اني كارهتك اكـثر
و لا حسبالـك انقهر عليك لأن عشت حياة مرة لأن اهلك انفصلوا بصغرك لاا عيني الي مثلك ما يستاهلون الشفقة على تصرفاتهم و حقـدهم على الغـير

- انتِ لوين تردين توصلين بهذا كـلامچ

سكـتني بكلامة، تنهدت و گـلت ورا لحظات

- اريد اوصل انـو تبـطل نظرات الشك ناحيتي و كـاني مجرمة لو جايه ابوگ بيت اهلك

گلب عيونه و بملل حچـه

- شعليه ان شاء الله حتى ابوية تبوگـي من مرته اني شعليه
بس الموضوع و ما فيه انـي گلبي ما ارتاح الچ

و بتمثيل حچـيت و اني اجـبر دموعي توگع

- هلگد شايفني رخيصة؟ يعنـي اذا اشتغلت شغالة بيت لازم اكون مو خوش

- ومـنو گال هالشي

- انت الي گـلته من خلال كلامك

صحت بيه و اني اريـد اضربه على كتفه
بس بسرعة لزم ايدي و لواها ورا ظهري
و بيـده  الثانية ضربني بـاصبعة السبابـه و الابهام بنص گـصتي
و هو يگـول

- ايدچ لا تمدينهـا لا اكـسرها

- كلش رجال و انت تـمد ايدك على مراه

حچيـت هيچ باستفزاز و ما حـسيت الي ايـده تعصر فكي
دفعني و اجيت اوگع لو ما تماسكـت بآخر لحظة و هو يحچـي

- وخري من گـدامي ترا مـالي خلگ سوالـفچ

حچـه هيچ و مشى من گدامي و هو يـفر بسويچ سيارته
مسـحت على حنچي بظهر كـفي و اني اهز راسي متوعـده
دخلت للبيـت، و فتحت باب الكاونتر
چـانت اكو نفاضـه گزاز ثگـيلة
اخذتـها و گعدت بغرفتـي، باوعت الها لثواني و انـي اتذكر لمـن چنت عند الجماعة يجبرونه نجرح نفسنا او نأذيـها حتى تبين علينه رضوض
بحـجة اهالينـا يكتلونه اذا ما طلعنا كذا مبـلغ

سحبت نـفس عميق و انـي اقوي نـفسي
غمضت عيوني بقوة و اني ارفع النـفاضة قبل لا الطمـها على وجهي بين خدي و شفتـي
تهاويت بالـم و اني اشـتم غياث و اشتم نفسي الي سـوت هيچ

گرمزت بالگاع و انـي احس بدوخة مو طبيعية و راسي عبالك انقسم بالنص
بسرعة باوعت بالمراية و اني اشوف المكان صار نيلي و حتى حلگي طلع دم
گلت ميخالف كلشي يهون في سبيـل هالغثة يطلع من البيت

رجعت مديت ايـدي و بنفس الحركه ضـرب معصمـي
عطت من الوجع بس تحاملت على نفسـي
فتحت شعري و اني انثره و ارجع المـه بشكل فوضوي
گعدت على الچرباية بعد ما رجعت النفاضة لمكانها
تلـفلفت بالبطانية و اني اتنهد بقوة

ان ما طلعتك من هذا البيت فـ لا اتسمى دجى و لا انحسب على النسوان
حسباله هين يحچي و يشك بيـه

بقيت متمدده بمكاني و بصراحة للحظات حـسيت بندم لأن الوجع الي بوجهي صار لا يطاق

تغطـيت زين و اني اسمع اصواتهم برا
اكثر من خمس دقايق مرت و شكلهم استفقـدوا وجودي

و كانت اول وحده تدخل للغرفة هي جودي
الي فتحت الباب و گالت بشقة

- الاميره النائمه احنـا اجينا

گوه مثلت صوت البحه و اني اگول

- هلا بيكم

فجاة تحول نبرة صوتها للقلق و هي تگول

- شبي صوتچ؟ و ليش مغطيه راسچ

حچتها تزامناً مع رفعتها للغطا مثلت عليها سحب الغطا بس هـي بسرعة وخرته

شهگـت و هي تضرب على صدرها و هي تگول

- عزا عزا عزا هذا منوو سوه هيچ بيچ

- ما بيه شي انضربت بالـباب

- انـضربتي بالباب شنوو شو گومي منو ضاربچ

حچتها و هي تلزمني من معصم ايدي اليسرى..صحت من الوجع لأن لزمت مكان الضربه
و هي بسرعة تركتني..رجعت بلطف و وخرت الكم مال دشداشتي و شافت الضربه

و بـجدية حچت

- مـنو هيچ سوه

وگعت دموعي و اني اگوللها بصوت ناصي

- بس امانة لا تحچين لأحد ما اريد مشاكل

- غياث

هزيت راسي بأي و هي شهگت و رجعت تحچي بـهمس

- لييش

- تخـاشنه بالحچي
و حچه عني انو اني مو راحه و گـلبه مو مرتاح مني، گتله لا تتهمني ما اسمحلك و ضربني
بس صوچـي اني استفزيته و گتله انت كلش رجال و تمد ايدك على مره

بـقت ساكته لان صوت الحجيه و هي تگول

- صدگ مو رجال و يمد ايده عليچ

حچتها و طلعت و هي تصيح للحجي

- راح تصير مشكلة من ورا راسي

حچيتها و نزلت دمعتي و بـحنيه مسحتها جودي و هي تگـول

- ما يصـير الا الي يستحقه غياث

حچـتها و دخل الحجي و وراه مجيد القاطـب حواجبه و هو يباوعلي
بسرعة سحبت الحجاب و خليته على راسي
و الحجي گـال و هو يطلع بوجهي يشـوف الضربه

- شنو صار و ليش ضربچ

- حجـي اني هماتين استفزيته بكلامي
كل ما في الموضوع انو طلعت برا و چان هو موجود
گتله ليش تسوي هيچ باهلك، مقهورين عليك بس تصرفاتك تخليهم يزيحون شفقتهم على صفحة حتى يتعاملون وياك
والله ما ردت شي الا احچي وياه حتى يبطل هيچ تصرفات
اعرف تدخل مني بس ما يهون عليه اشوفه يحچي عليكم و انتوا الي اعتبـرتوني بنتكم
و ما ترضى بنية حچي على اهلها

- و شصار وراها

چان المتسائل مجيـد
نزلت راسي و گلت

- گال اني ما ارتاحلچ گتله لأن شغالة تشوفنـي هيچ
ليش تظلمنـي و تشوفني رخيصة
و دفعته عني حتى افوت بس هـو ضربني

ختمـت كلامي و اني اجهش بالبچـي
بس فجاة ابتلعت بكائي لمـن گال مجيد

- ما اصدگ غياث يمد ايده على احد
فوگاها بنية

- يعني اني كذابه

- لا حاشاچ بس استغربت

حچاها و زفر الحجي تنهد و هز راسه بوعيـد
طلع تلفونه و طلع من الـغرفة
بقت الحجيه گاعـده يمي هي و جودي

و ربع ساعة ارتفع صـوت الحجي و صوت غيـاث بالصالة

طلعت اني و جودي
تقابلت عيوني بعيون غياث، الي انصدم من شافني
نزلت راسـي
لمن گـال الحجي

- ليش ضربتها

- حجي ما ضربتها كم مرة لازم احچيها الك

- لعد هذا الي بوجهها و ايدها شنو!!
غياث احچـي ضربتهـا لو لاا

غمض عيونه بقوة لمن گـالت الحجيه

- احلف انك ما ضربتها

هما فتح عيونه و باوعلي
و اني تحاشيت النظر اله، زفر و گـال

- اي ضربتها بس....

قطع كلامه ضربت الحجـي الي راشـدي
شهگت جودي و هي تخلي ايدها على شفتها، و قبل لا يحچي شي غياث و يـدافع عن نفسه
لزمه الحجي من ياخـة قميصة و هز يزجـر بي

- اطلع منا لاخر مرة احچيها الك
افهم انت انسان مو مرغوب بي هنا، ارجع لأمك و لبيتها و رگعة وجهك لا تشوفنياها

- هلگـد اهون عليك يابه

حچـاها بهدوء
و يمكن لأول مرة بحياتـي اشفق عليه، نظرات عيونه كلهن عتب
ذكرت نفسـي بـ يستاهل لأن وجوده خطر عليه

- اي تهـون عليه لمن ما تحترم اهل هذا البيـت
و تتجاوز عليهم..دجى مو مجرد شغاله انما صارت بمثابـة جودي

رجـع خطوات ليورا و هو يگـول

- بالعافية عليك بنتك الجديدة

حچـاها و طلع من البيت، همست الحجية

- حسبي الله و نعم الـوكيل بيك

ابتسمت نصف ابتسامة سرعان ما محيتها
دقايق و سمعت صوت سيارتـه طلعت

صار صمت فضيع على الاجواء
قبل لا اقطعة و اني اگـول

- اسفة، الصار كله بسببي

- ما عليچ انتِ
الصار كله بسبب تصرفات غياث الي مو موزونـه

- بـس حجـي هو ابنك..اكيد زعل و شال على خاطره

- جرة اذن بلكي يتعدل بسببها

حچاها الحـجي و محد اعقب على شي

بعد هذا اليوم..مر شهر
شهر عشته براحة بال لولا التفكيـر بالفلوس الي بحـوزة جوان الي اتصلت بيها من تلفون الحجيه و ما تلقيت منها اي رد

غياث من هذاك اليـوم بعد ما شفناه و لا وصل
عرفت منهم انو يشتغل بمستشفى اهـلي
الله يساعد المرضى الي جوه ايديـه

چانت دنيا عـصر
الجو شويـة بدت تكسر برودته، طلعنا للحديقة
و حظرنا الچـاي و الكعك
گمت شوية شوية اتاقلـم و اتعود على الاجواء
رغم هذا اذكر نفسي لا تنسخليـن من شخصيـتچ يا دجى و تنسين نفسچ
ابقي حـذره و لا تظهرين كل طيـبتچ

فجاة اندگ الباب استغربنا الطرقـات
نهض مجيد و هو يصيح اي اي، فتح الباب و دلـف غياث

فتحت عيوني متفـاجئه من حظوره
خفت لا ورا كل هاي المدة يحچي الحقيقة لو يحچـيلهم عن كلامي بحقه و سالفة الجگاير الي چانت بالغرفة

بس كلشي اجا عكس توقعاتي و هـو يلزم ايد بنية تطلع بالـ18 من عمرها
صغيرة و لابسه حجاب ذابته باهمال على راسها
الكل وگـف و من ظمنهم اني
تنهد غياث و هو يگـول بلهجة بـاردة

- گـلت ما اوصل لهذا البيت بعد
بس شسوي للزمن الاغبر الجبرني، حجـي انتِ طردتني بس ما اظن طردت اختي
اخـتي اريدها امانة عدكم بس هالاسبوع، ما اگـدر اخليها بالبيت مع امـي خوفاً عليها

- صـفد طول العمر بيتنا مفتوح الها

حچـتها الحجية، و اني تفاجئت من كلامها
عگدت حاجبي لمـن رد غياث

- مشكورة حجيه نائله

تنهد و التـفت على اخته و الي اخيراً عرفت هوية صفد
مسح على خدها و هو يگـوللها بحنيه استغربتها بنبرة صوته

- لا تخافين هنـا كلهم يحبونچ
اسبوع و اجـي اخذچ زين؟ التلفون يمچ و راسليني اذا احتاجـيتي شي

هزت راسها بأي و مـا حچت شي، تقدمت ناحيته و احتضنته و هي تلف ايدهـا على خصره
هو باسها من راسها و رجع گـال

- ديري بالچ على نفسچ زين؟

رجعت بس هزت راسها بـاي
ابتعد عنها
و رجع باوع للحجـي و هو يگـول

- هي ما تگـول اريد هالشي لو على قطع رگبتها
فـ يعني اذا تحسون بشفقة ناحيتها انما مو لخاطـري ديروا بالكم عليها

- ميخالف صفد مثل بنتنا

ابتسم غياث بسخرية
و رجع باوع لاخته..باسها من گصتها و انطاها الجنطه مالتها
و طلع بدون ما يـضيف كلمة اخرى، هي لحگـته و بقت واگـفه تباوعله و بعيونها دمـوع ابت تنـزل

تنهد مجيد لمن ابتعدت و سد الباب
راحت ناحـيتها جودي و هي تسـلم عليها و الثانية ما ترد
بس لا خـشم مثل اخوهـا و حقنه

فاتوا جوه..و بقت گـاعده يم الحجـيه بغرفة الگعدة
سوينا العشا و خلينا على السفرة و هي اجت گعدت ويانا
اكلت بكـل هدوء و لا اصدرت اي صـوت
باوعتلها حلـوه و نازكه كـلش
عيونها بنيات فاتحه و حواجبها خفاف مو ثخـان
و عدها نمش ناعم اعلى انـفها

بعك العشا بقـت ويانا بالمطبخ واگفة
انـدارت عليها جودي و هي تگوللها

- صدگ صفد اي كلية راح تدخلين؟؟

رفعت حاجـبي بصدمة لمـن گعدت تحرك ايديها بلغة الاشارة
فتحت حلگـي متعجبه و هسا يلا استوعبت ليش من اجت ما نطقت حرف طلعت خرسـة

- هاا علوم حاسوب

هزت راسها بأي و اني سألتها لـ جودي

- خرسة

- اي بس تسمـع

جاوبتني و التفـت لـ صفد الي ابتسمت الي
ما گدرت الا ابادلها الابتسامة، انقهرت عليها و بسرعة گلتلها

- مچنت اعرف اسفة

هزت راسها بلا و هي تأشر بأيدها عادي
ردت اتودد الها و اني اگـول

- تدرين اسمچ كـلش حلو..صفـد اول مرة اسمع بي
شنو معناتها

بقت ساكته تفكـر و جودي تباوعلنا بابتسـامة
رفعت ايديهـا اثتينهن و هي تلامس اصبع السبابه و الابهام لصنع دائره بكلتا ايديها
و بعدها فتحت احدى اصابع ايدها و داخلتها بالاصابع الثانية
رفعت حـواجبي اثنينهن من عرفت مـعناته لمن اشـارت لسلسلة

- سلسلة؟

هزت راسها بلا و هي تقرب ايديها لبعضهن اشارة لاقتربت من الجواب
و اني گـعدت افكر
ضحكت جودي و هي تگول

- انـي اعرف بس اريدچ من وحدچ تعرفين

- اممم زين شنو بله

خـليت طرف اظفري بين شفايفي و انـي افكر
قبل لا اگول بحماس بعد ما لگيت الجواب الصحيح

- قيـد؟؟ او قيود اصفـاد مو؟

هزت راسها بأي و هي تسويلي اوكـي
ضحكت و اني اگول

- المـفروض اعرف بسرعة لأن واضـح

بقينا بالمطبخ واگفات حتى بعد ما كملنا شغلنا
چـانت حبابه رغم اكثر شي بس تسـمع، بالـ10 و نص حچت وي جودي و أشـارت الها انها تريد تنام

فـ اخذتها جودي لغرفتهـا فوگ
من نزلت گعدنا نباوع لتلفزيون نفس كـل يوم و احنت نباوع فيـلم
صابني الفضول حولها و انـي اگول لـ جودي بتساؤل

- جودي سؤال
هي من اجت الدنيا ما تحچي؟

- لا چـانت تحچي و كلشي ما بيها، بس من صار عمرها 5 سنين خافت خوفه كـلش چبيرة خلت صوتها يروح

- خطية زين ليش

تقربت عليه و هي تگـول بصوت ناصـي

- الي عرفته انو امـها خوفتها
ام غياث و صفـد بيها شبه حالة نفسيـة، لذلك غياث ما يگدر يخلي اخته طـول الوقت عن امه
ما تشوفينـه يظل يروح و يرجع من چان هنا
بس شكلها هاي الفترة كلش تعبانة لهذا ما خلاها بالبيت وي امه

بقيت ساكته و ما حچـيت حرف واحد
كتفت ايديه و بقيت اباوع للتلفزيون بذهن شارد
يا ترى شنو الي شافوا هذولة الاخوه من امهم
لدرجة يخاف على اخته منها؟

.

السلام عليكم و رحمة الله و بركاته

شلونكم ان شاء الله الكل بخير

اتمنى البارت عجبكم ♥😶

ارائكم و توقعاتكم بخصوص كل الابطال

القفلة اليوم هادئه 😅🙊

بعد ما تطرقنا لشوية من حياة دجى بالطفوله
يا ترى بديتوا تحسون ناحيتها بالشفقة

و فعلتها بحق غياث 😶😶

و الاخيرة صفد شنو ارائكم عنها تتوقعون راح تكون شخصية مؤثرة بالقصة 🙆‍♀️

و هسا راح انزللكم اشباه الابطال
والله كلش كلش تعبت يلا لگيت اشباهم 🙄🙄

نبـدي بـ دجى
يمكن شكلها الي راسمينه بالكم تختلف عنها

متت يلا لگيت شبيها الها بالملامح
عيونها لونهن اسود طوخ كلش،  هاي الممثله عدها خدود كبار فـ هواي دورت الها صورة تكون ضعيفه او خدودها ما مبينه 😂😂

خدود كبار عيون عسلية شعر بني 😶 نفس مواصفات جـودي
كلش تنطيها لمحه عنها بالاخص حمار خدودها 🙊🙊

الي مرمرنا يلا لكينه شبيه اله 🙆‍♀️💔
والله اكثر شخص تعبنا يلا لكينه شبيهه، اكثر من صورة انرستلي بس حتى الكه و بصعوبة يلا لكيت
لحيته شوية اعلى من هيج بس نظراته اي هيج حادة 😶

غياث يا غياث 😶😶😶
هذا الثاني همين تعبت يلا لكيت شبيه اله
نفس عيونه همين دکم 😂😂😂 بس غياث لحيته اخف من هيج بسبب طبيعة عمله ميحب اللحيه العالية
شعره يخلي مرفوع مو هيج نازل

و الاخيره 🙊

صفد..ما تعبتني هواي لان تقريبا ملامحها ناعمة كلش فـ بسهولة لگيت الها شبيها
الفرق بهاي البنية عيونها سود
و صفد عيونها بنيات فاتحه

و هذولة الشخصيات المهمه 😶😅

و بس والله نلتقي على خير احبتي
و لهذاك الوقت استودعكم الله الذي لا تضيع ودائعة ♥