#دُجى_في_جوف_البغي
#بقـلم_الراويه
#الفصل_الأول
و مـا يؤذيـني حقاً
انـني لـم اكن على سجـيتي يوماً
دائمـاً ما كنتُ ارتدي الاقنعة الرخيصـة البالية
صلوا على النـبي ♥
.
بخطـوات متسارعـة مـشيت للمكـان المنشود
دقـايق و وگـفت و اني ابـاوع لاسم المحـل الي قصده الرجال
كتفت ايدي و تنـفست الصعداء و انـي ابتسم و لسـان حالي يقـول
" يمكن لگـيتي ظالتچ يـا دُجـى "
تعدلت بوقفتـي لمن انتبهت للـسيارة و نـزلت الجامـه مالتها
أشـرلي اصعد و بـدون تردد فتحت الباب و صعـدت
رسـمت على ملامحـي الحزن بشطـارة
و هو شغل السيارة و بهدوء گـال
- المكان هنـاك مكتض ما حبيت اخليچ بموقف محرج
سكـتت و ما حچـيت شي
رجعت اباوعله لمن اردف بتسـاؤل
- زيـن بنتـي شنو قصتـچ؟ گتلچ اعتبريني مثل ابوچ
تنهدت و اني امسح على بـاطن كف ايدي
وگـعت دمعة من عيني و اني اگـول بصوت حاولت يكون مخنـوگ
- انطردت مـن البيت مالنا
- ليش؟
- انـي يتيمه..ابوية توفى لمن كـنت بعمر الـ15 سنة
و ورا سنتين امـي تزوجت رجال اصغر منها بعشر سنين
رفعت راسـي و اني امسح دموعي و بذات النبرة كملـت
- و صارلي سـت سنين عايشة وياهم
عمامـي تخلوا عني لان والدتي تزوجت، يوميه چـنت اشبع ذل و مهانة من الرجال و من امـي
بدا يتحرش بيـه و يحاول يستغلني و چـنت اعارضـه و احچي لوالدتي بس ما تصدگـني
- و خوالچ؟ محد بيهم تدخل
- لا خوالي علاقتهم بامي مو قوية
ما عدها بس اخوان اثنين و اجدادي متوفين
- الله يرحمهم..كملي بنتي
حچاها و هـو يتجه بالطـريق و ياخذ الشارع الـعام
- قبل يـومين چنت نايمه
الساعة بالـ5 الفجر، فزيت من مكاني و اني اشوف زوج امي بغرفتي يريد يعتدي عليه
صرخـة و دافعت عن نفسي و على صوتي امـي اجت
گعدت احلف انو هو اجا..بس ما صدگتني كالعادة و صدگت زوجها الي گال هي طلبت مني هالشي
گوه اخذت حجابي و العباة و طلعتني من البيت
و هي تتوعد اذا ارجع تموتنـي
خـتمت كلامي و اني اجهـش بالبچي و هو وگـف السيارة
و التـأثر واضح على ملامحة..بالحقيقة انقهرت عليه شلون يباوعـلي و انـي احچـي على مـسامعة قصة درامية مـبتذلة
- عمـي والله بريئه..ما عندي احد بهذا الدنيا
صـرت اشوف الشارع اهون الف مرة من بقائي وي امـي و زوجها تحت سقف واحد
وگـفت عند مسطبة العمالة بلكي الگـي شغل يعيشني
غطـيت مـلامحي و صـرت ابچـي و هو يستغفر الله
قبل لا ينزل من السيارة و هو يگـول انتظريني
دخل للمحـل و اني بعدت ايدي عن وجـهي و گـلبت عيوني بملل
التفتت و باوعت للمحـفظة الي مخليها و تلفونه
اجيت اخذها..بس تراجعت
يمكن تركـها حتى يشوف مدى صدق كلامـي و حتى يتاكد انـي شنو
بديت امسح وجهـي بطرف حجابي و هو صعد بالسيارة
انطانـي بطل مي و تشكرته بصوت مـبحوح
تنهد و گـال بحنية
- حـوبتچ تطلع بي بنتـي مو اليوم بعد سنـين
امسحي دموعچ و وكـلي امرچ لرب العالمين
هزيت راسـي بأي و شربت شـوية من المي
وسديت الغطا و اني اگـول باحراج
- ما اعرف شلون اشكرك عمي
چـنت مخنوگة و اريد احچي لأي احد القهر البـداخلي
ازعجتك بقـصتي، و هسا انـي استاذن
حچـيت و نزلت من السيارة بدون ما اضـيف اي كلمة اخرى
على اثر صوته و هـو يناديني ببنـتي اوگـفي توقفت
ابتسمت بمكـر سرعان ما محيت ابتسامتـي
و التفتت عليه
نزل من السيارة و صار گـدامي
و بنبرة هادئه حچـه
- شوفي بنتـي اني شفتـچ بمثابة بنتي
و ما يهون عليه اشوفچ و انتي بهاي الحالة و ما اساعدچ، انـتِ بحاجة سكـن و مصرف
فـ اقترح عليچ تجـين تشتغلين بيـتي
- شنو اشتغل؟
سالته و اني امثل الغباء و هو كمل
- ابني و بنتي يدرسون و ملتهيـن بدراستهم
و بالأخص بنتـي تتعب بدراستها كلش، و الحجـيه تتعب من الشغل بالبيت
فـ تشتغلين وياها بالبيت يعني تنظيف طبخ و تكون الچ غرفة خاصة و راتب يكـفي احتياجاتچ و اكثـر
شبكت اصابعي لبعضـهن و اني انزل راسي
و بلهجـة خجل حچيت
- يمكن الحجية ما تريد
- الحجـيه من تسمع قصتچ صدگيني راح توافق بدون تردد
ها شنو گـلتي
- زين و اذا امي دورتلي
- بهذاك الوقت لكل حـادثاً حديث
المهم ما تبقين بهذا الوضع و بالشارع و ولد الحرام هواي
- تمام عمـي
همست بيها و هو ابتسم ابتسامة صادقة و گـال
- والله من شفتچ عرفتچ انسانة مـظلومة
و اني رايد الاجـر من رب العالمين و رايد راحتچ
اصعدي بالسيارة خـلي نروح
توجهت للسيارة بدون ما انطق كلمة
شغلها و طول الطريق گعد يحچـيلي عن اولاده
بنته و ابنـه..ابنـه يدرس ماجستير علوم سياسة
و بنته تدرس محاماة
و عن زوجته الحجـيه، صدع راسي شگد ما حچـه عنهم و واضح بنبرة صوته شگد يحس بالفـخر اتجاهم
وصلنا لبيتهم و الي ما تفاجئت منـه..منزل راقـي بمنطقة من ارقى مناطق بغداد
تـرجلت من السيارة بعد ما نزل منها هو
فتح الباب الـخارجي و تبعته بخطوات ثابته
انفتح باب شكلة بـاب مطبخ و ظهرت من وراه امراة يتراوح عمرها بـبداية الخمسين
انـطبعت على ملامحها علامات الاستغراب
ضحك الرجال و هو يگـول
- هاا حجيه طلعتي تستقبليـني هاي ما صايره لازم اسجلها بالتاريخ
- ليش حجي اني شوكت ما استقبلتلك
هلا بيك و بخطـارك
ابتسمت الها ابتسامة صغيرة و كملنا خطـواتنا
دخـلنا للمطبخ و چـان الريوگ محطوط على طاولة
المطبخ چـبير و نظيف و كـل الاجهزة بعدها جديدة
- خلي خطارنا يگعد يتـريگ
- تفضلي بنتي تفضلي
حچـتها الحجيه و گعدت على الكرسي
و هي تبتسم بس ابتسامتها تتسم بالحيرة
أشرلها تجي وراه و طلعوا من المطـبخ
باوعت للسفرة و حـسيت نفسي صارلي ايام ما ماكـله
اخذت گلاص و صبيت چـاي و گعدت اكل بشراها
و انـي اباوع للمطـبخ و بداخلي اتسـائل اذا المطبخ هيچ لعد باقي البيت شـلون؟
ربع ساعة و رجعوا فاتوا..المراة وجهها عليه علامات الراحة عكس قبل دقايق
مسحت ايدي و ابتـعدت عن الاكل و الرجال گـال بسرعة
- كملي اكلچ بنتـي لا تستحين
- تسلم عمي شبعت
حچـيتها مع ما سحبت المراة الكرسي و گعدت بصفي
و هي تگـول
- يا هلا بيچ..ما گلتيلي شنو اسمچ
- يا حجيه مو گتلچ اسمها دجـى
ابتسمت و انـي اگول
- اسمي دجى
- من گالها عمچ عبالك متعارك، بس هسا من حچـيتي اسمچ يا عيني شگد حلو
نزلت راسي و ما نطقت حرف
و هي رجعت تردف
- حچالي الحجي عنچ و الصارلچ بنتي كلنا نمر بـضروف صعبة بس تمر و تصير مجرد ايام
و الله يحنن گـلب امچ عليچ و تعرف انچ مظلومه و ينلم شملكم
- ان شاء الله
حچـيتها بتنهيده چانت صادقة
باوعت للـرجال الي گـال
- اني هسا راجع للعمال لأن اتفقت وياهم
حجية خلي دجى بعيونچ ترا اليوم خطار عدنا
- لا توصـي حجي
حچتها و هو سلم و طلع
و هي طلعت وراه..دقيقة و رجعت فاتت و هي تگـول
- تعبانـة شكلچ خلي احـظرلچ ملابس و فوتي تغسلي حتى التعب ينزاح عنچ
- شكراً خاله كلش محتاجة اسبح
حچيتها و طلعت وراها گالتلي انتظري هنا بالممـر
و هي دخلت لوحدة من الغرف، رفعت عيوني لثريـا تزين السـقف و الاثاث الي ينم على فخامة البيـت
ابتسمت بسخرية و انـي اقارن هذا المكان و المكان الي چنت اسكن بب
عدالة الرب غريبة، البعـض يسكن قصور تضيع بيـها و الاخرين بمـزابل
طلعت من الغرفة و هي شايلة ملابس بيدها
و بـحنية و ابتسامة ناعمة على وجهها حچت
- هاي ملابس بنتـي بعدهن جديدات
ما عندي غيرهن هسا
- لا عادي حجيه
حچيتها و اشرتـلي على باب الحمام
دخلت و غلقت الباب وراية..استندت على المغسلة و اني اباوع بالمراية
ابتسامة انرسمت على وجهي و اني افتح شعري بعد ما بعدت الحجاب عن راسي
اغـتسلت و اني طول بقائي بالحمام و الماء ينساب على جسدي چـان التفكير ينهش عقلي
العائلة يمكن اشفقت على حالي و الاب قرر يخليني اشتغل عدهم
نشفت جسمي و لبست ملابسي و بقيت واگفـة ثواني
ضحكت و اني اباوع بالمـراية
هذولة العائلة يا اما غبية يا اما صدگ طـيبين
و بالحـالتين اقرف مـن هاي الصفات
طلعت من الحمام و المـراة اخذتني لغرفتها
انطتني مشـط و حجـاب و هي تسأل اذا محتاجة شـي و تشكرتها
گعدت بصفي بعد ما طلعنا و گعدنا بغرفة الگعدة
- هسا احنـا وحدنا خلينا نتعرف على بعض شگد عمرچ دارسه لو لا؟
تحمـحمت و اني اگول
- عمري 24
و خلصت السادس ابتدائي و بطلت حالتنـا المادية چانت صعبة فـ ما گدرت اكملها
- عندچ اخوان اخوات؟
بقيت اباوعـلها و طـيف مر گـدامي من اثار طفولتي سرعان ما حذفتها من بـالي و اني انطق
- لا ما عندي
امـي ما چانت تحب الاطفال الى جانب حالتنا ما تساعد لطـفل اخر
بانت على ملامحها الحزن و هي تگـول
- الحمد الله على كل حال
هزيت راسي بأي
و هي غيرت الموضوع و گـالت بابتسامة
- اني عندي اولاد 2، روحي من الدنيا رب العالمين ما رزقني بس هذولة
و تمرضت و اضطريت اشيل الرحم
صح مرات اگول لو عندي بعد بس چنت اگول الحمدلله اكو ناس تتمنى طفل واحد و الله رزقني اثنين
ما رديت عليها..و بگـلبي گلت
شنو اسويـلچ..مادري شلون گدرت اكتم هالكلمة بگلبي و ما احچيها بوجههـا
- زين عمه الحجي وين راح
يعني لا تعتبريه حشرية مجرد فضول..شفتچ انـتِ بالبيت وحدچ و ماكو احد
- الحجـي عنده بناء و راح يروح للعمـال
و اولادي راحوا سفرة لشمال بعد تعب الدراسة بعد باچـر يرجعون
- اها
زين الحجي شنو يشتغل
- الحجـي عند اسواق جملة و محـلات مأجرها
چان يگعد بيـها بس كبر بالعمـر و تعب فـ خلى ناس بيهن، يقـضي يومه بينهن و بين الجامع
- الجامع؟
- اي هو أمـام جامع
اذا شفتي الجامع الي على الطريق من هاي الجهه هو امام بي
حچتها و هي تأشر على الجهه اليسار
هزيت راسي و ما حچـيت شي، و بداخلي اگـول اكيد حاله حال بقية الزلم المتغطين برداء الدين
الصبح قال الله و قال الرسـول
و بالليل يكـيت على النسوان
جمعت شعري بـماسكه انطـتها الي الحجية
و طلعنا للمطـبخ اقترحت اساعدها رغم اعتراضها
غسلت الـها الصحون و هي تحچـيلي عن اجواء عائلتـهم
و اني بس اهـز راسي بأي، چنت مـضطره اسمع و اسايرها
على الاقل هالكم يـوم، بيـن ما ينسون الجـماعة سالفتي
يعني اذا گـدروا ينسوها
بدت تحـظر بالغدا و هي تحچـيلي الحجي يحـب البامـية
و اني واگـفه يمها
شفت تلفونها دگ چان على المـيز، تحركت و هي تگول بضحكة
- هذا اكـيد مجـيد
قطبت حاجـبي و هي فتحت الخط و گعدت تحچـي
من خلال كلامها عرفت انو المتحدث ابنهـا
دقايق و سدت الخـط و كملت شغلها
- عمـه ابنچ متزوج؟
- لا يمه ما متزوج..يريد يكمل الماجستير يلا يتزوج
- بس انتِ گلتـيلها بنتك شلونها؟
يعني حسبالي متزوج
گـامت تضحك و هي تخلي ايدها على شفتها
رجعت خلت ايد على ايد و گـالت ببهجـه
- عنده بـزونه صغيره يسميها بنتي
اخذها وياه فـ اسال عليها
ضحكت بتصنع و بگـلبي همست تافـهين
كملت تحـضير الغدا و اجت اطلع قنينة برا المطبخ چانت فارغة
گتلها اني اطلعهـا و خليتها بالطـرمه
طلعت من جيبها محفظـة نسائيه صغيرة و خلتها بالكاونتر فوگ و هي تگول
- بلكي يجي ابو الغـاز حتى اغيرها
همهمت و هي باوعت للساعة چانت تشير للـ11
رفعت اكمام دشداشتهـا و هي تردف
- اني هيچ وقت ما يبقى عنـدي شغل
فـ اگعد اقرا قرأن اعتبري البيت بيتچ
طلعت من المطبخ و هي متجهه للحمامات تتوضى
وراها اخذت قرأن و گعدت تقرا بغرفة الگعدة المفتوحة على البيت
گعدت على الكرسي بالمطبخ و تأففت و عيني تروح و ترجع على المحفظة النسـائية
شكل بيها فلوس هـواي، فكرت للحظات اخذها و اشـرد
لأن اذا ما لزموني الجمـاعة و يقتلونـي..فـ راح انجلط بسبب هاي المراة و سوالفها عن عائلتها و اولادهـا
بعدت فكرة اخذي للمحفظة..و اني اذكر نفسي
دجـى انتِ مو بحالة سرقة، ابقي هنا أمن الـچ
برا يمكن بأي طريق راح تلگـين الجـماعة و بوقتها تروحين بخبر كـان
بالـ12 و نص اجا الحجـي
خلت الغدا الحجـيه و ساعدتها و تغديت وياهم..
ما فاتني اي شي من حديثهـم و الي كان اغلبة يدور عن الشغل و اولادهـم
مضى اليوم بصعوبة بخضم اجواء جديدة چانت بالنسبة الي مثيرة للاشمئزاز
بالاخص بعد ما اتصلوا اولادهم عليهم و حچـوا صوت و صورة
چنت امثل الابتسامة و اني اشوف هاي الاجواء العائلية
هبط الظلام و قاربت الساعة على الـ10
فتحت الحجيه غرفة بنتهـا و هي تحچيلي انو باچر تجهزلي غرفة ثانية
مددت بالفراش بعد ما غلقت الباب..و ما ان حسيت البيت دخـل بحالة صمت
نهضت من مكانـي، بديت استكشف الغرفة البناتيه بحـت
لكن ما اثار استغرابـي هو عدم وجود اي مواد تجميل او مكياج على التسريـحة
اجيت افتح باب الكنتور لكن مقـفل، لويت شفتي بـانزعاج
و بديت ابحث بالادراج
اغلبها كـتب و ملازم ما افهم بيها..تأففت و رجعت للچـرباية
هزيت رجلي و اني اهمس بتفكير
- يا ترى جوان سوت الي گتلها علي؟
تمددت و اني اخلي ايديـه جوه راسي و اني اباوع للسقف
تنهدت و تذكرت الـصار بالليلة الماضية
اتمنـى يكون توقعي صح و فارق وائل الحياة
لأن اذا ما مات راح يكـون عقابي مضاعف
لگيت نفسي شوية شوية اغفى الى ان نمت و اني بعدني افكـر بالصار
فتحت عيوني بفزع على اثار صوت برا..ضحكات و صريخ بنية بسعادة
رمشـت عيوني ما ان انفتح الباب و ظهرت من ورا بنية يطلع عمرها من عمري
بحجاب خمـري و عيون بنيه واسعـة وابتسامة مميزة على ثغرها
ما ان شافتني حتى تبددت الابتسامة و هي تگـول باستغراب
- حجـيه نائله عدنا خطار و ما تگـولينا؟؟
.
السلام عليكم
اتمنى الكل بخير
ارائكم و توقعاتكم؟
رائيكم بالشخصيات لحد هسا؟
الحجية نائله
و الحجي
و اخرهم دجى 😁
منشن لصديقاتكم ♥
لا تنسون التصويت و ترك تعليق♥
وبس استودعكم الله الذي لا تضيع ودائعه 🧡