تكملة ٢ ألحلقة الأخيرة ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----//////-------/////---------
الذاكرة مثل العاصفة أو الجنون .......
عندما تستيقظ لا أحد يستطيع إيقافها ......
تجرف كل شيء فى طريقها بلا رحمة .
×××××××××××××××××××××××××××××
حياة نور وعايلتها أليوم...
نور هي أمي وأختي وصديقتي....
نور أحلى واطيب واجمل مراه صادفت حياتي .
أعجز اوصفها بكلمات...بعد هي أمي وشمعة حياتي
شحجي عنها أكون مقصره بحقها...
الف الحمد لله حياتها حلوة ويه حسيون
تموت عليه...وهو يموت عليها...
راحوا لبيت الله وصاروا حجاج....
سبحان الله هي نور قدمت للحج على مؤسسة الشهداء
وطلع أسمها...وحسيون راح وياها هو رجلها محرم وياها.
الحمد لله جهالها الله موفقهم
نبأ...صارت من قسمه عون والف الحمد لله مرتاحه.
إبراهيم...خلص معهد بس ما حصل وظيفه
يشتغل بالورشه ويه علاوي...
والحمد لله تزوج ومرته هسه حبله على باب ولادة
محمد...بعده يدرس...ماعنده حظ بالدراسة
جم مره يسقط بالبكه لوري...
جعيفر..خلص ثالث متوسط ودخل مفوضيه مال شرطه
تف وبره جعيفر وصار شرطي...لا هاي هيه سقط البلد
واحد عقدة...وجهه مطبك...ولا يضحك...
بس الحمد لله ملتزم ماعنده شرب ونسوان بس يدخن .
فردوس...هاي زينه بيت نور...بنيه حديثه أموت عليها أحبها أكثر من نبأ...أتمني تصير من نصيب غيث بس هي أكبر من عمره...وبعدها طالبه تدرس بالمدرسه.
بهذا الوكت كدروا ال هاشم يحصلون حجي جليل
عم نور وكميلة وأنتصار...حجي جليل عمهن النذل العافهن ضاعن بالدنيا وطفر من هذاك ألوكت للكويت...
بعده عايش بالكويت هو وحده من خواته...
أمه وأخته الثانيه متوفيات ...
بس لا نور ولا كميلة يعترفن بي..
وأصلا ولا اهتمن من عرفن تالي عمهن وهو بعده عايش
وأنتصار دازتله خبر وكايلتله//تبقى مشكول الذمه ليوم الدين...ودم ألمرحومات يبقى بركبتك...واوكفك للحك
بديوان الله.
نور زرعت خير من هي شابه وحافظت على نفسها وشرفها بظروف قاسيه...
يمكن لو غير وحده من ألبنات وتمر بنفس ظروفها يمكن جان أستسلمت وباعت روحها...
بس هي صبرت وجاهدت وحمت نفسها...
واليوم هي الحجيه ام أبراهيم
الف الحمد لله منين ما تلتفت الخير يدور حواليها...
زرعت خير بالدنيا والآخرة من لكتني وربتني يمها
حصدت هذا الخير بالدنيا بساعه الخافت عليه
وشردت بيه...ورحمة الله غيرت مسيرة حياتها...
وان شاء الله تحصد خير الآخره وتكون من نساء الجنة
على تعبها وشكاها بالدنيا...
وعمر حوبة المظلوم ما تطفى ...
وتبقى تسحك وتلحك وتاخذ ثلثين الحك...
أحمد النذل أنقتل........
أني ونور ما شمتنه بي عبن الموت حك على الجميع
بس حمدنه الله وشكرناه اخذلنه حكنه منه بالدنيا وبعدالة الله نأخذ حكنه من عيونه بيوم القيامه.
وبشير ألجان رجل ألمرحومة اقبال او صديقها
حقت عليه العداله السماويه وأخذ جزائة بالدنيا
طلع مقتول بدوله خارج العراق بوكت الطائفيه.
محمد أكثر واحد تأثر وطك من البجي
بوكت العرفنه بخبر قتل أحمد النذل
وقتل بشير الحقير بخارج العراق
كال//بشر القاتل بالقتل ولو بعد حين.....
أنا بشير سكطني وعدم صحتي وشبابي...
وكتل ناهض ،، وجمال بتهمه باطله...
وأحنه ألحك ويانه بناتنه وطلعن عن ألطريق
وأنوب فاتحات بيتهن للفجور كتلناهن وطمينه عارنه
وهو أستفحل علينه بسبب سلطته ومكانه
كتل ألولد...وعيش باقي أهلنا بخوف ورعب
حسبي الله ونعم الوكيل بيهم دنيا وآخره.
والحمد لله تحققت عداله السماء بالنذل احمد
وبشير الحقير ...بعد اكثر من ٢٥ سنه ...
واخذوا جزائهم بالدنيا ...
وهناك بيوم القيامه جزائهم أشد وأصعب.
#########################
حياة بيت عمي ساجت الله يرحمه اليوم
ام جمال بعدها عايشه لهذا يومنه...
بعدها شايله روحها وعايشه هي بالبيت الجوة...
وبناتها سهى وأزهيران يمرن عليها...
ألمرحوم جمال مشى الدار حكه بهذيج السنه وراح شهيد وانغدر بقضيه باطله...الله يرحمه ويرحم جميع شهداء العالم.
مرته ما تزوجت وراه بقت كاعده وساكته
وربت جهالها...وكعدت بيت وحدها يم بيت أهلها
سهى هي ورجلها ابراهيم بيتهم وحدهم
والعام زوجت أبنها...ألحمد لله حياتهم عاديه
رجلها ابراهيم خوش رجال الله يستره من شر ألطريق
عنده تريله يوصل بيها حموله خارج العراق
ويشتغل ويه قايد .
أزهيران عايشه هي وشريجتها بنفس ألبيت
بس قايد صاكرهن صكر...لليوم يقفل عليهن ألباب
من يطلع...
قايد خوش رجل سبع واخو خيتة
بس واحد ينخاه ينطي قميصه اللابسه.
ازهيران زوجت بتها وانطتها لإبن ندى الوسطاني.
عصامكو عايش ومستقر ويه سعده
فلش بيتهم ألاشتراه من أنتصار وبناه من جديد...
وبعده عسكري هسه يداوم بسامره
صلوات عنده ٢ بنات و٢ ولد من سعده
سعده سودنته شنو لبس...شنو مكياج
شنو صالون...شنو كشخه...شنو دك الحواجب
وهسه سوت وجهه حقن ((بوكس ))ماأعرف شسمه ونفخت شفايفها...
هي تضحك وتكول//يسميني جكساره عبن مليانه
وشكلها صاير كلش حلو ومرتب .
هبه لليوم هي باقيه بذمة عصامكو...بس ما تعترف بي
عايشه بيتها وحدها هي وأبنها عدنان ومرته بتول
وبكيفها تصرف بحياتها...لا يحكمها ولا يشرط عليها
تكول//الف الحمد لله مرتاحه وراحتي لو تمتد من السماء للكاع أكولن قليل...شو بنتي وزوجتها...
وابني الحمد لله،،،الله موفقه وشغله ماشي
ومريته بحظنه وحبله على باب ولادة
وراح أصيرن جدة...
ألحمد لله من خلصت من حكم ألرجال
وكسبت راحت بالي.......
وصلوات على النبي صدك هي مرتاحه
حياتها بكيفها على مزاجها تمشيها
وين ما يعجبها الزياره تروح....لو تسير خطار
لو تروح لو ترجع لو تبات يم الكرابه
حياتها تمشي بكفيها محد يحكمها
على كولتها// لا عندي رجل أليحجي
ولا ولد أليبجي....
سلامكو وكمالكو الف الحمد لله عايشين بهاي ألدنيا
حالهم حال كل ألعراقيين...الله يسترهم من كل شر.
#############################
حياة بيت عمي عزام وعايلته أليوم
عمي عزام ما صارله بالاربع أشهر من توفى
الله يرحمه ويغمد روحه الجنه...
هو رجال جبير...ولكفته الكرونه نفضته نفض
اسم الله عليكم بساع بساع غمضت عيونه
زوجته ام ناهض هم توفت ومشت الدار حكها
الله يرحمها ويغفر ألها...ويغمد روحها الجنه.
ناهض مشى الدار حكه بهذيج السنه وراح شهيد
الله يرحمه ويرحم جميع شهداء العالم .
ندى تزوجت حماها باسم غصبن عليها وعليه
وبوكتها صارت قسمتهم بالغصب ...
ولد ناهض هم ٣
صوفي ألجبير مواليد ٨٩...لهسه ما متزوج
ما يقبل يتزوج...جان يحب بنيه وياه بالكليه
وما صارت القسمه...وهو أتسودن وترك فكره الزواح.
موظف بالكهرباء جان بعقد...وهسه أثبت
وعنده سياره خاصه بي .
والثاني فراس مواليد ٩٠ ...أخذ بت أزهيران
الصدك أخذها عن علاقه حب...هو حلو وملكن
والصدك هو شرطي ويشرب
وطيح ألبت بدواليبه واخذها...
والثالث كنووش مواليد ٩١ ...الصارت عركته هو وعلاء
ومن وره سالفتهم أجت نرجس هديه السجاد
هم تزوج...ويشتغل بالورشه ويه علاوي
وعنده تكسي هم يشتغل ويطكطك بيها.
وبعدهم لا فراس ولا كنوش عدهم خلفه
ندى تدعي وتندعي كون الله يرزقهم.
باسم الله يرزقه بالصحه والعافيه
ما مقصر لا بحك ندى ولا بحق ولد أخوة
ولا بحك مرته بسمه وجهالهم...
صلوات هم فلش وبنه بيتهم من جديد
وعرس لولد اخوه ناهض كاعدين وياه بالطابق الثاني
وعرس لبنته أخذها أبن تك أنعال....
وبعده موظف ويه محمد...
وجاسم ابو رعيده سامعين الزلمة اليوكف بالكلفه
هذا هو...بس واحد ينخاه يمد روحه ابساط آله
يركض للغريب وللكريب...وهلكد ما طيب
عنده معارف بكد رحمة الله ...
بس مرته نسره...تف وبره شدت ويه جنتها مرت رعد
تغار منها...عود هي جابتها وهي اختارتها لابنها
ما بقت اقل ألسنه وشردتها....
وصارت هوسه ومشاكل واطلكت ألبنيه.
هسه رعد هو الرايد ومختار نسمه بت باقر
بس بعد محد موافق...أبويه ومحمد
كالوله//اذا تعزل بيها عن اهلك
لو تطلع بيت وحدك كبعها وأخذها
بس اذا تكول مااكدر وتبقى كاعد ويه اهلك
تعذرنه باجر ترد علينه مطلكه...
وبعد يوميه يا رايح جاسم ...يا راد رعد .
وبعد هاي قسمه ونصيب بس الله اليعلم بيها
حياة الله يرحمها مشت الدار حكها هذيج ألسنه
الله يرحمها ويغمد روحها الجنه
ويجعل أبنها طير من طيور الجنة كون يشفعلها
ويشفع لمحمد...
لليوم محمد يذكرها...بس ما يغثني
هو يشتري حلويات وعصاير
ومرات أكل جاهز ويوزع ثواب على روحها
ودوم يكول //الله يجعلها من سكان الجنه
استغفر الله لو وليدي منها باقي جان اليوم هو عمره ٣٠ سنه...ألحمد لله من الله رزقني بغيث وباقي إخوانه.
بس من دور سنه ابوي هلال وأمي هنديه
واخوي عطأ الف رحمة ونور تنزل عليهم
نذكرهم ونسويلهم ذكر وثواب.
وتغريد ماشاء الله هذيج هي تصول وتجول
ورثت كلشي يخص أمها...من لبس من ذهب
ومن غراض...واهم شي لكفت عرج السواحل
وختمته بأسمها...وصارت خاتون تلصم احلوك الاسباع
رياجيل ال هاشم واحدهم نجم يضوي
بس نسوانهم نصهن موش كلهن حيايه
الله يكفيني ويكفيجن شر كل نفس خبيثه.
################################
حياة أنتصار وعايلتها اليوم
أنتصار صلوات على النبي اليوم هي مراه جبيرة
بس شايله نفسها...بعد بيها حيل وتعين نفسها .
وصلوات على النبي ما عدها مرض مزمن ...
صحتها زينه...الله يرزقها الصحة والعافية.
صلوات على النبي زوجت كل ولدها وبناتها
وكلهم عدهم خلفه...
بس عدهم سوالف الجناين ومشاكلهن بالبيت
وهاي زعلت...وهذيج رضت ...
ومرات هي تعوفهن متكافشات وتجي تبقى يمنه
يومين ثلاثه وترجع البيتها...ما تكدر تفارك محيسن
زلمة كلش جبير...ما يسمع...وشوفه قليل.
ادعيلها بالصحه والعافيه...وعساها تحصد خير الدنيا والآخرة...هي من اول ما شافتني من جنت صغيره
بيت نور بغداد حبتني...ولليوم من تفكد نهله وسعده
تفكدني وياهن...ما تعدني بس مرت محمد
لا عادتني بت نور وكميلة خواتها.
############################
حياة سهاد وأهلها اليوم
سهاد لليوم هي أختي وصديقتي
كل ما تجي لأهلها تجي تشوفني
الحمد لله كاعده بيت وحدها هي ورجلها وفروخها
رجلها يستلم راتب التقاعد...وهم فتحله محل غذائيه
بسوك الولايه خطيه أحسن من ما كاعد ....
وهي بقت مفتحه صالونها...ألحمد لله رزقهم زين.
اختها سعاد لليوم ما تزوجت...
سبحان الله ما اجتها قسمه ...
وامها بطلت تخيط...خطيه عيونها تعبت من كد الخياط.
أبوها يشتغل سايق تكسي...
واخوها سعد صار عسكري...وتزوج هاي ألبنيه الحلوة
جيران بيت نور النبأ غلطت وهدت عليها هذيج ألسنه
من مسولفات بطاري عون...أمانة الله ألبنيه كلش
خوش بنيه وحبابه...وصار عدها ٢ ولد ...
ولليوم سعد ومرته ساكنين بيت أهله.
×××××××××××××××××××××××××
وحياتي أني اليوم
الف الحمد لله...والشكر لله
أني متربعه وكاعده بنص النعيم والخيرات والبركات
بقوة ألله ورحمته اليوم عندي بدل أمي شهلاء الله يرحمها ... ٢ أمهات كميلة ونور الله يحفظهن اليه.
وبدل أبويه شامل الله يرحمه
عندي ٢ أباء ...أبوية فاضل ربي يبارك بعمره
وحسيون الله يخلي خيمه على رأس نور وجهاله.
بدل ما جنت وحيدة وبنات عمتي سودنني ويصيحن
عليه المريضه لو المسلوله...أني اليوم عندي عزوة
من الأخوة والاخوات ...أخواني بيت أبويه فاضل
واخواني بيت امي نور .
أني ألجنت وحيدة ومقهوره وضايعه
ولكتني نور بالشارع وربتني أحسن تربيه
اليوم أني مرت ألسيد محمد الهلال أبو غيث
وام ال ٥ اولاد من بزرة ألسادة .
غيث //هذا فرحة عمري هسه نجح للرابع إعدادي
صلوات صاير اطول مني...أسمر سماره خفيف
وعيونه طلعت عليه عسليه فاتح...بالصور تطلع ملونه.
بس هتلي ما يحب الدراسة...ملتهي بالبلي والالعاب
بس محمد وأخواني صاكرينه...يردونه يكمل دراسه.
يموت على سوالف الحلاقه والزيان ...
محمد دخله دورات وهسه صلوات شاطر
أبويه فاضل هو مشجعه الأول دوم يزينه ويرتب شعره ولحيته...محمد مرات يكله// تعال رتب لحيتي.
بس هو شاطر ياولد صغير يشوفه يجلب بي
يقنعه ويزينه بلاش ويسويله فيكات...يدرب عليهم.
ليث //هذا شالع كلبي عنووودي...نجح للثالث متوسط
الشغله البراسه يسويها لو موش محمد يمنعه
لو يكطعه هو لزوم يسويها...
صلوات ياكل آكثر من عدنه كلنه...يموت على نعمة الله
بي خشونه جسم وعظم...
وهسه مستفحل بس يصيح ويعيط يعرض قوة صوته علينه ...بس هلكد حنين وكلبه طيب...
من أختنك وصدري يتنك يكابلني ويكعد
ومن اتمرض ما يعوفني...يتوسد طولي وينام
ومره تمرضت باقر شدلي كانونه...هو اسودن
يبوس بيدي ويمسح على مكان الكانونه.
ومن اتعارك اني ومحمد ويبقى يرزل ويصيح عليه
هو يبقى يفور من الأعصاب ...
وكلساع يروح ويرجع عليه
يشوفني وين كاعده مثلآ بالمطبخ لو بالغرفه
وكلساع يكول//أتمنيته غريب ومو أبوي
وحك علي أمرد رأسه...
لو يكول //عليش تسكتين عليه اتعاركي وياه وأني اهد وياج عليه...
لو يكول//ما تكليلي أنتي عليش فقيره وتسكتين عن حكج ...
لو يكول//يمه كومي أزعلي وروحي لبيت جدتي نوريه
وأني اوصلج...وممنوع تردين حتى ينقهر وبعد ما يصيح عليج.
كبل فتره هم تلاغيت اني ومحمد
واني أحجي ألصدك اتعارك وياه من وره المهجوم التلفون الأكشر...
صلوات على النبي موش صار مدير عام
عنده مدير مكتب ينظم شغله....وسكرتيره
هاي سكرتيرة مراه جبيرة ومتزوجه
بس اني أتسودن من تتصل عليه...وتبقى تحجي وياه
وهو هذيج الكلمات الحلوة المرتبه...والضحكة الناعمه
يرد عليها...وكله يكللها//اي حجيه...هاي هي نمشي وراج
أنتي التشوفي مناسب رتبي...
اني أبقى ادغ بخاصرته من يسولف وياها
لو أبقى اكرص بي ...وهو يبقى يدفع بيه
بين ما يخلص التلفون...اني فايره من الغيره
هو هنا يصيح ويكول//الف مره كايلج موش أنا الاخون
لو غيرج تدخل الكلبي...
أنا موش صغير وأدور بسوالف المزعطه
أنا من البدايه صريح وياج وكايلج أتسودن واستحقر
ألزلمة اليثني على مريته وهي ما ناقصها شي...
ليش تخلقيلج مشكله من جوة ألكاع
افتهمي عليه كل النسوان وألبنات الويايه بالدوام
عادهن خواتي وعرضي...وماكو غيرج تدخل مزاجي
هو تلفونه حديث مابي لا رمز ولا قفل
وعادي يبقى بيدي اكلب بالبرامج العنده
هو لمس بس احرك اصبعي يركض ركض
مابي دكم تشلع كلبي...أبقى اكلب بالصور
وبس الجح بصوره مرأه واكفه وياه هو وجماعته
أهجم عليه...ولازم أعرف واستفسر هاي منو
هو عادي يجاوبني ويعرفني هاي منو .
أني واثقة منه...وأعرف هو ما عنده غيري
بس أني أحجي ألصدك....ما أخاف من عنده
أخاف من بنات هذا ألوكت الله يسترنه
لا تطلعي وحده ما تخاف الله وتأخذه من عندي
وأحنه بعد نسوان ونعرف بكيد ألنسوان شنو
الله يكفيني ويكفيجن شر كيد النسوان.
تلاغيت وياه علمود وحده معلقه على صورته
هو جان طالع إيفاد وكاشخ هذيج الكشخه التخبل
كشخه عريس...كاتبتله//هنيال الصاحت جواك أاااه
هو ما راد عليها...وبعدين حذف تعليقها
بس جماعته مصورين التعليق ويخابروه يضحكون وياه.
اني تسودنت كتله//منهو هاي الكح....التكتب الك هيج
كلمات تخجل منها ملائكة الله وعبادة.
حلف مية يمين ما يعرفها...
هي طالبه منه طلب صداقة وهو موافق
تكله //عرفتك من صورتك الشخصيه
ماشاء الله كل ما تكبر تحلى...
وهو بس راد يعرفها منو ما تقبل تعرف عن روحها
من صارتلنه مشكله هو حذفها ما اعرف حضرها
بعد لا يشوفها ولا تشوفه.
اني زعلت...ومتت من القهر
وشبعت بجي بهذاك اليوم ...
حتى أبويه فاضل كعد وحجه وياه...
ويسولف وياه خاف وحده بت حرام تغري وتخربه علينه.
أجاني ليث عصبي...لكاني بالمطبخ اسويلهم غده
كالي//عوفي كلشي على البنات وأمشي اخذج
لبيت جدتي نور...عليش تقهرين بروحج
هو يصيح عليج وانتي واكفه وتعبانه تسويله اكل
هنا اجاه محمد كاله//اي يالحيد وين تريد تمشي بيها
هو ما خاف وكال لأبوه//أمي تمشي لبيت جدتي نوريه
وأرجوك بعد لا تصيح عليها...ترى لا اني ولا خوالي نرضى تقهرها.
محمد كفخه راشدي خفيف وكاله بضحك//أنت وخوالك وأمك أدفنكم بالحياة لا تسترجل براسي يالسبع.
هو كاله//اني ليث محمد الهلال تعلمت المراجل
من اني بطن أمي...
عاين هذا دمي بي عرج من دم ألعباس ابو فاضل
المايرضى بالذله على نسوانه...
ارجوك بعد لا تصيح على أمي.
هو محمد صفن عليه وكاله//لك انت بيك مجال
تصير فريضه...لا صاح بي ولا ضربه
باسه على راسه وكاله//من اليوم انا وانت أصدقاء
وبلكت تتوسطلي يم امك وتكلها تكبر عكلها.
هو شلون الخجل...ماأعرف شصار بي
من محمد لفه بحظنه واخذه يمشي وياه
ومن يومها محمد ميزة عن جهالي الباقين
وين ما يروح ياخذه وياه...حتى مواعده يعلمه سياقه هو وغيث.
اني ما ارضى لمحمد من يفرق بين جهالنا
بس هو كالي//هذا عصبي وعكله صغير
بسرعه اطك حوصلته...اذا ما حويته هسه وبهذا عمره
يستقوي ويطلع عن شوري .
ملاك هي بشه//هاي بت فطم موش بنتي
من هي بت أنفاس ربت بحظن فطم
بس حبابه وفقيره طبع ...
وبسرعه تتقشمر ولا تكولون أمتحنت سادس ابتدائي
كبل جم يوم وخلصت من بكه لوري...
عكلها عكل جاهل عمره شهور بسرعه تزعل وتبجي
وتموت على الحلاوة الدهينه...شكثر تاكل منها
ولا تشبع...عايشه يمي وبيت باقر .
مراد هو علولي//هذا حبيب كميلة
لابد بحظنها ٢٤ ساعه....وتمسح على رأسه جنه عتوي
ابيض وأحد بجهالي...بس جامد ما ينحب
وعنده رصعه بخده اليمنه من يضحك تبين...
نجح للرابع إبتدائي...بس كسول شالع كلبي بالدراسه
ومن هسه مبين خشمه يابس ما يسخر
ونحس يريد الحاجه بس أله....
رهف هي بكوشه//هاي صديقتي ليل نهار لابده بحظني
سودة عليه هم أجت برشه نفس حالي
بس أني ما أخليها من هي بنت أنفاس أصبغ شعرها
مااريدها تتعذب وتنقهر نفسي من جنت صغيره
نجحت للثالث ابتدائي...زينه شايله نفسها
والله العام وهاي سنه أني اقريها واكتبها
ما داومت بالمدرسه شي قليل ...
بس شاطره بشغل ألبيت...على كلشي علمتها هي وبشه
صلوات على النبي عجينها يخبل اتسوي علج
اني يوميه أخبز...واخليها تعجن كد اليوم
صح تطول وتبقى ساعه تملج بالعجين
بس ميخالف تتعلم من ألصغر وتصير نادره.
والصدك بودي وأمنيتي هسه أحبل وأجيب
بس محمد متعاند وياي ما يرضى
هو عودين يخاف عليه ويكلي//موش زين عليج
الحبالة والجيابه بهذا عمرج...
اني اتعارك وياه اريد بعد اخلف
وشمالني داشه بالعمرين وموش زين أحبل
هستوني دخلت بعمر ٤١ سنه...
ألحمد لله بعدني بحيلي ....
بس هو أحميد كلبي عطل موش بحيل الأول
الحمد لله من سوداينه موجودة نعمه بحياتي.
اكو شغله بعايلتي حلوة...
أبويه كلمته تمشي على محمد وعلى كل أخواني...
محمد مسيطر على كل ألبيت...ماكو واحد من اخواني
يطلع عن شوره وشور أبوية...
أخواني كلهم يخافون وحريصين على جهالنه
ماعدنه سالفه هذوله جهالك...وهذوله جهالي
مثلا علاوي يعيط الكل ولد وبنات تخلس...
سجادكو يكول//كلمن يمشي لبيت أبوه...
بعد مانشوف واحد موجود...
باقر يشتري ملابس لبناته يفكد بنات علاوي وياه...
عون يشتري شغله لجهاله يفكد جهال حمودي وياه سجادكو يكرم وأحد وبالأخص الينجح يشجعهم
يكرم الكل وياه...
علاوي صاح//منو ضايج يكوم يبدل نفتر شويه لو نطلع للزياره اليعجبه يركض يبدل...
محمد ابد ما يكتل جاهل...اذا جان ولد لو بنيه
لا جهالي ولا جهال أخواني...
بس من يشوف وأحد سوه غلط
صاح على منو كاعد يمه مثلا عون//هااا شو ساكتله
ما تكوم تأدبه...
لو مثلا كاعد علاوي وحمودي وبت عون سوت غلط
علاوي صاح//ما تكوم حمودي عليش ساكتلها.
وهيح تعلموا جهالنه يخافون ويحترمون الكل
وبالأخص ألولد...شحدة الما يسمع كلام
لو ينتر على أمة...لو نسمع صوته عالي
شوف منو موجود من أخواني هو يأدبه.
بس الكل جهالي وجهال أخواني يحبون محمد
ابد ما يكتلهم...بس يرزل ويصيح.
بس يسودنون من سجادكو اذا سلك وأحد براشدي
يبوله بمكانه...واذا ما ضربه بس كاله//أسبوع لا تراويني خلقتك...الجاهل يحير وين يضم روحه.
أهلي المسيح أختفوا من حياتي
بس بقوا معلكين بذاكرتي...
محمد وأخواني مرتين وثلاثه وأكثر من ينزلون البغداد
يمشون المنطقه أهلي وينشدون بلكت عمي كامل
راجع للعراق بس ما يحصلون أي خبر عليه...
وحتى ألجيران موش هم الاوليين...الي شايل
والي متوفي...
محمد وأخواني بهاي برامج ألفيس والطراكيع الباقيه
نشروا صورتي من جنت صغيره
واسمي واسم أبوي شامل الله يرحمه
ونسخه من جريده الوطن السياده النقيب النشرني بيها من ضعت من عماتي وتاريخ فقداني...
وذكروا اسماء أهلي المسيح وعنوانهم ...
وهاي صار جم سنه محد عرفهم ...
ولا واحد نشد عني .
والف الحمد لله من ضعت من عماتي الحقيرات
وربيت بحظن نور وكميلة وفاضل
واحميد كلبي...
لو باقيه وياهن الله وأعلم شنو صار بحالي .
الف الحمد لله أني عايشه بخير وبركه
امي كميلة وأبويه فاضل
زرعوا بيه الطيب والخير بالصغر
وان شاء الله أوافيهم بحصادهم واداريهم واشيلهم
بعيوني بكبرتهم...والف الحمد لله ما مقصره بحقهم
ولدهم،،،وبتهم الصحيح موش يمهم كلمن ملتهي بدنياه
بس أني وياهم بقت ارواحنا معكودة سويه .
وان شاء الله يكونون من سكان الجنه بيوم الحق والميزان...عبنهم كفلوني
وربوني أحسن تربيه...وعدوني بتهم من صدك
حبهم اليه صافي بدون دغش...
والحمد لله هذا حبهم أمتد لجهالي...
وحبي وحب جهالي يدور حواليهم.......
-
-
-
الى هنا ونودع عائله ألسيد فاضل بخير وعافيه
ونقول لهم //دمتم برعاية الله وحفظه....
فأذهبوا وعند الله أجركم قائم*في الدنيا ويوم حصاد
فراقد تقول عن قصه هديل//أنها حكاية تدعوا الجميع الى ألرحمة وتقول//ازرعوا الرحمة وروداً في طريق الغير لتحصدوا عبق الذكرى بعد رحيلكم.
وتأكدت من خلال حكاية هديل أن ألرحمة هي نصف العدالة....وبالصبر...والحكمة...والحب
سنصل إلى نهاية كل شي...وتكون تلك النهايه أكثر جمالاً ورحمة.
والحمد لله ألذي علمني بألقلم...
فالقلم هو رسالة،القلم رسول، ورحمة، وهداية،وعطاء.
فأحسنوا كرم أقلامكم ......
تقبلوا مني كل الحب والاحترام والتقدير
أختكم فراقد حسن علي..