🍃⚘🍃قصة عيون النار🍃⚘🍃
⚘الحلقة -٢٥-⚘
⚘"الكاتبة: فاطمة علي"⚘
..🍃رأيكم🍃..
شوكت نلتقي ؟
هواي بنفسي شعور هالبيت
" العيون استراحن هودن بالشوف "
"والگلوب التقن وبشوگنه احترگن"
#لــ سمير صبيح💜✨
.................................
علي : شفتها كدام عيني نزلت من السيارة ، وبيدها جلب ، والحرس داير مدايرها ، ردت اروح عليها لزمني عادل ...
عادل : لتتسرع ، متشوف الجيش الداير مدايرها
...
علي : لازم ندخل ، لازم أأدبها عادل عوفني خل اروحلها
...
عادل : ندخل سوى ، بس انتظر شوية
...
علي : مااتحمل راح ادخل ، نترت ايده وتقدمت بخطوات ، وكفت قريب باب الملهى ، اخذت نفس ، عدلت ملابسي ، ودخلنا اني و عادل ....
.... صوت الديجي عالي ، حجزنه طاولة وكعدنه ، اباوع بالوجوه بس اريد اشوف سكينة ...
عادل : اباوع على علي عاگد حواجبه وعيونه تفتر على المكان ، مثل الاسد المنتظر فريسته تطلع ،
طلعن بنات ساعه يركصن بدلوهن دخلت غير مجموعه ....
.... عيني على علي ، شفته باوع على وحده وابتسم بمكر ، علي شبيك ، اشر بحواجبه اباوع على البنات ، هذا مو علي ابد ، باوعت ...
علي : اول وحده راح اندمها ...
عادل : ياهي منهن ...
علي : البنية الابسه الفستان الاسود ام شعر الطويل ، سجى ....
عادل : باوعت عليها ، منو هاي ...
علي : سجى ، اخ الله اذا مااخليها تتمنى الموت ، هاي اليوم لازم نشيلها ...
عادل : شلون راح ناخذها ، نزل راسه وباوع عليه بأبتسامه ، غمزتله شتقصد بهاي حركتك ....
علي : اني مااكدر اطلبها ، بس انت تكدر ...
عادل : استغفر الله اطلبها؟! شلون ، والله اذا عرفت امل ...
علي : منين تعرف ، عادل ترى اني مورث منك ، وحق هو العباس ابو راس الحار اذا مارحت طلبتها ارجعك دفرت من اربيل لبغداد والساني ميطخ على لسانك ...
عادل : بس لتزعل ، انت بس على كيفك ، وتذكر جرحك لا تروح زايد ....
علي : لازم اعرف مكان سكينة اليوم قبل باجر ، اني راح اطلع انتظرك بالسيارة ...
عادل : يمعود السيارة اجرناهه خاف يشوفونه خطفنه البنية ...
علي : لك ياخطف ، راح تطلبها تطلع وياك للفندق ، لتتغابه العباس عليك شغل عقلك ...
عادل : ها ماشي ، يله روح ، باوعت راح علي ، صحت الكارسون ، اجه ، اريد اطلب هذيج البنية ، الليله ...
... ( الطلب يم الادارة ) ...
عادل : بيش تطلع ...
.... ( 100$ ، واذا دفعت اكثر يدزون وياهه صاحبتها )....
...لا اني اريدها بس هي ، كمت ودخلت للادارة الولد دلاني ، واحد كاعد ، طلبتها منه ، ودفعت بيها 150$ , الخانم بالكوه اقتنعت تطلع ....
سجى : ممبين عليك مريش ...
عادل : امشي وراح اشوفج الريش بذات نفسه....
سجى : ههههههييييي ، يله عاجبني اشوف ....
عادل : سافله ، طلعت وهي وراي ، وكفت باب الملهى اجه علي بلسيارة فتحت الها الباب ، تفضلي ...
سجى : خوش سيارة ....
عادل : اعجبج ، هي منتبهت على علي ابد ، وصلنا للفندق ، اخذتها وصعدت فوك للغرفة ، اول مادخلنا فاتت للحمام ....
.... فتحت الباب العلي دخل للغرفة ، كعد على الكرسي ينتظرها ، طلعت هي لافه الخاولي على جسمها ....
سجى : شلون حمام واحد بس يعجبه يكعد بي ...
علي : لو تغسلين الف مرة تبقين وصخه ...
سجى : عــــــلـــــي ....
...لا ملك الموت ، ركضت للباب لزمها عادل ورجعها ، اللبسي هدومج ، الخاولي لا يخرط ، لبست ثوب گصير وكعدت تبجي ...
.... اهووو ترى اكره البجي تدرين بيه من زمان تلعب نفسي من مرة تبجي بالاخص اذا جانت انتي ...
سجى : اني معليه ومسويت شي ...
علي : هههههه ، قالو للحرامي احلف قاللهم يسيدي ،
انتي دليتيهم على بيتي وخليتيهم يخطفون سكينة ،
وكدام عينج خليتو سكينه تضربني طلقه ، وكدامج ا
اجت اريج وكفت فوك راسي وضربتني طلقه بنص قلبي ، وكل هذا صار كدامج ....
سجى : معليه كله صوج اريج ...
علي : اريج جايها الدور ، كوليلي هسه سكينه وين ...
سجى : مادري ...
علي : هاي راح تعبنه هواي ، جريتها من شعرها وركعتها راجدي ، ســـكـــيــــنـــه ويــــــن ....
سجى : والله ماادري مـــــادري ...
علي : ليش انتـــي وامثـــالج اتعرفـــون الله ، لتحلفين جذب كوليلي ، وين مكانها ، ضلت تبجي ، سحبت الحزام وطبكتها وين اليوجعها كتلتها كتله بحيث تبعت وقلبي كام يأذيني ، كعدت على الكرسي وهي تون بالكاع ....
عادل : اشرب الدوه مالتك ، لك لتنجلط ...
علي : لو ميت ولا هل مصايب هاي ، اليوم مااعوفج الا تكولين سكينة وين ، هاي كاعدلج للصبح ، كامت وراحت للحمام ، غسلت ورجعت كعدت بالكاع ....
سجى : جانت بشقى لوحدة اسمها نادية ، رحت مرتين او تلاثه شفتها ، جانت بحالة عصبية ، اي واحد يتقرب منها تاكله اكل ، حتى لحد يتقرب منها هي والي بطنها ....
عادل : هنا اني شلون نعمى على عيني مادري ، شلون مارحت ساعدتها ، باوعت العلي ، كام يتنفس على السريع وعيونه صارن حمر ....
علي : كملي ليش سكتي وبعد و الطفل ....
سجى : اريج خلتها غصباً عليها تجيب ، انطتها ابر ثنين تسهل الولادة بس هذني الابر خطرات بداية الشهر لازم من يخلص الشهر التاسع ينطو للمرة يساعدها تجيب ...
.... بعيني هاي شفت سكينة وصلت للموت ، دمها صار بطولها ، بحيث انتهت اغمى عليها يومين هي نايمه ، اريج بوقتها اخذت الطفل بس والله مااعرف وين اخذته ، مرة وحده جابته السكينة شافته ورجعت اخذته ....
علي : لهذا خليتوها تركص على المسرح وتشرب وتروح سهرات ليلية ، يعني هددتوها بأبنها ...
سجى : لالا ، صح اريج هددتها بالطفل ، بس سكينة مهتمت الها ، بس اكو شي ثاني خلاها تسوي هيج ....
علي : شنو ، شنو هو ، سجى اني بحياتي ماماد ايدي على مرة ، لتخليني بعد أأذيج ، احجي مثل الاوادم ....
سجى : الي صار ، خلوها تشرب مخـ..ـدرات غصباً عليها ، وحتى ابر ضربوها ،
حتى بدون وعي تطلع وتروح سهرات ليلية ، مرة واحد كتل روحه عليها ، وسكينة رفضت تروح ....
.... لزموها ، وخلوها تشرب حبتين مخـ..ـدرات ، بحيث هي يوم كامل سوت مثل ميردون ، من رجعت الصبح ، لزمت وكتلت نادية دمتها دمي وخرمشتها
....
علي : دقيقة منين رجعت ، باوعت عليه ، لتباعين هيج ، منين رجعت ليش هي وين جانت ...
سجى : بيت الي رادها ، اني جنت موجوده بهاي السهرة ، اخذها وصعد فوك هي جانت سكرانه ، وصار كولشي بينهم ...
علي. : كافي ...
سجى : ها متكدر تسمع مو ، بليلتها لعب بيها لعب ...
علي : كــــــــافـــــــي ...
سجى : تخيل وياي طلعت حامل لعد كول شكد متونسه ...
علي : كمت عليها وضربتها على وجهه ،كتلج كـــــــــافـــــــي ماريــــــد اسمع ، لزمت قلبي وكعت اريد اتنفس مااكدر ،اختنكت حيل ، كمت اتشاهك ...
عادل : على كيفك خوية كتلك لا تضغط على روحك، اسم الله على قلبك ، اخذ هاي الحباية ....
علي : عادل ، عيوني انعمن ، غمضت عيني ، اخذت نفس تمددت على الجرباية ، اريد قلبي يهدء ،
وجع صار براسي مو طبيعي ، صارت كدامي سكينة ، للحظه نزلت دمعتي لااراديا ، اني سويت بيج هيج كله ذنبي اني وبس ....
عادل : صلي على محمد خوية ، لاتبجي ، والله هل ايام نلكاهه ، اباوع عليه شلون متمدد ومخلي ايده على وجهه ويبجي ، كله مني ماساعدتها بذاك الوكت بس اااخ ....
سجى : بعد وبعد جنه كل ماوحده تجي تكلك احبك ، تصيح مومس ، جنتي بحضن فلان وفلان هسه مرتك التعشقها صارت اضرب من عدنا ،مخـ..ـدراتـ..ـ
وشرب ، وزلم وملاهي ....
عادل : لج انتي ليش ماتسكتين ، رجعت عليها وجريتها من شعرها ، والله اذا اسمع صوتج اخلي طلقه براسج اسكــتــــــي ، جريت قميص من الجنطه شكيته وسديت حلكها وايدها ....
علي : ياالله ما أذيت احد ليش هيج اذيتني ، والله مادنت روحي للحرام ، حتى الفلوس جنت اوزعهن مااصرف منهن ربع ، اخ ياسكينة وينج يلحبيبة ....
سكينة : فتحت عيني راسي حيل ثكيل ، عيوني مغوشات ، وجسمي كله يأذيني ،
رفعت ايدي اباوعلها ، بالكوه اشوف بيها ، لزمت راسي لافينه ....
.... رفعت راسي بالكوه حيل دايخه ، وكفت واني اتسند على الحايط ، افرك بعيوني بدت ترجع الروية العيني ، وكفت كدام المراية مضمدين راسي ، الغرفة نظيفه ....
.... ردت اوكع من طولي وكعت الغراض ، فاتت نفس البنية ، باوعتلها ، اني شصار وياي ...
... كولي شنو لمصار وياج ، اكعدي هنا ...
سكينة : انتي منيين ...
... اني بلسم دكتورة ، جنت بغداد ادرس ، واهلي هنا ، بس بسنة ٢٠١٤ رجعت لهنا ، دخل دا١عش واول شي سوو اهلي باعوني الدا١عش ....
سكينة : نفس حالتي بس اني وحده تكرهني باعتني
، الله يخليج ساعديني اشرد منا اني مااتحمل هذا العذاب ...
بلسم : والله لو اعرف طريق ميوصلني البغداد جان شردت قبل سنه ...
سكينة : هذا الهنا شيصير منج ...
بلسم : رجلي الله يچرم ....
سكينة : راسي يأذيني ...
بلسم : صوجج انتي ، شلون تكوليله لا ، طيعي واسكتي ، لان اذا مانفذتي الي يريده منج راح تموتين ....
سكينة : اموت ولا انطي شي برضاتي ، هل وصخ ابو ريحه الخايسه ، اني عندي زوج وطفل ، بس گتلو زوجي ، وخطفو ابني ، وبليلة ويوم اني تهدمت حياتي كلها ....
بلسم : عجل راح يضل يأذيج....
سكينة : اتحمل الضرب ، ولا يسوي شي برضاتي ، سمعت صوته بالبيت كامت ركض طلعت من الغرفة ، اني رجعت تمددت وسويت روحي نايمه ...
... انفتح الباب ، خايفه لا هو متحركت ابد ، بس الرجفه بكل جسمي ، الخوف متملكني ، لحظات من الرعب مو طبيعية ،انسد الباب گبل اخذت نفس ،
الحمدلله ياربي ، ساعدني ماعندي غيرك سند ....
عادل : كوم وجهك صار اصفر خل اخذك للمستشفى لا يصير بيك شي ...
علي : ميصير شي ، وكعت طلقة بنص قلبي ومصار شي هسه من خفقان يصير شي ، عادل رحمه الاهل عوفني ....
عادل : زين وهاي شنسويلها ...
علي : اتصل على بغداد ، وخل يجون ياخذوها ، كمت على حيلي كمبصت كدامها ، تعرفين شغله ، انت اعرف تاريخجن اسود ، بس سكينة اعرفها شنو ....
.... سكينة لو تصير الالف رجال ، ابقى احبها ، وهذا قلبي ابد مايتغير عليها ، مالها ذنب بكل الصار وياهه ، والذنب ذنبي اني وبس ، وهي وكعت بي ....
.... راح ارجعها واندمجن على الساعه الفكرتن بيها تأذني ، وتأذن عائلتي ، عادل اني هسه راح اطلع ارجع الكاهه بغداد ...
عادل : وين رايح ...
علي : رايح اجيب اريج ...
عادل : انت شفت الجيش الي داير مدايرها مو ...
علي : اي ، وشنو جيشها يخوفني ...
عادل : مو شغله خوف ، بس لازم نخطط نجيبها بدون متتأذه ....
علي : اكثر من هيج اذيه ، سوي الكتلك عليه ، شلت سلاحي خليته بحزامي عدلت هدومي لبست الشفقه وطلعت ....
.... ماخايف لا من موت ولا من اي شي ، المهم اجيبها لو اضل منتظر سنين المهم اريج اجيبها ،
ضليت اراقب المكان والاوقات الي هي تجي بيهن
للمكان ....
.... سجى نقلناهه البغداد ، كمت اخطط شلون اخطف اريج ، بت الجل*** جايبه جيش وياهه ، عبالك تعرف راح ارجع ....
سكينة : سبوع اني حابسه روحي بالغرفه حدي اروح حمام وارجع ، وهذاك اصلا بعد مشفته ، بلسم تجي تعالجني وتروح ، تجيبلي الاكل للغرفه ، راسي صار زين بس المكان ضل يأذيني ....
... بلسم جابتلي ملابس وخاولي ، سبحت اباوع الايدي ورجلي كلها اثار ضرب ، شكد كرهت روحي ....
.... اصعب ايامي تمر هنا ، لو عايشه بالملهى وساكته ولا هذا المكان ، بليل اسمع صوت بجي وعياط ، اضل اسد بأذاني وابجي ....
.... بليل اسمع واحد باب يسولف ، اي هذا صوته ،
لفيت روحي بالغطه ، وغمضت عيني ، انفتح باب الغرفة ، هلكد جنت خايفه جسمي كله يرجف ، سحب الغطه ....
.... رفعت راسي ، والله اذا تسويلي شي هل مرة اكتلك واكتل روحي ...
ابو مصعب : انتي شكد عنيدة ، وراسج يابس ....
سكينة : اني مـــاريدك ، افتهم انت حيـــوان ، اهم شي غريــــزتـــك ...
.... كمزت من الفراش ، اباوع للباب مفتوح على النص ، رجعت باوعت عليه ، تقدم عليه ، لزمني دفعته حيل ، ركضت جرني من شعري ، نداريت عليه بكل قوة صميت ايدي وضربته على وجهه ....
...وعطت بي ، وخـــــر منــــــي ، لزم وجهه ورجع ليورى ، فتحت الباب وركضت ، بوجهي لباب الشارع اركض حافية و وشعري مفتوح ، ماادري شلون باوعت اني بنص الشارع ...
.... وين اروح ومنين ، كمت اركض بالافرع ، منين اطلع ، المكان مااندل بي ابد ، اسمع صوت سيارات ، كمت اتختل بالبيوت المهدمه ....
ابو مصعب : هسع تلكونها والا بالله اقيم عليكم الحد ...
سكينة : حيل قريبين عليه ، اللهي ساعدني ، ساده حلكي واسمعهم يدورون عليه ، البيت الانب بي ضلمه يخوف ، بس مو بكد خوفي من هذولة البرا ....
.... حسيت بيهم راحو ، بقيت بمكاني من الخوف رجلي متعيني واكوم اركض لو اروح الغير مكان ، غفيت بمكاني ، فزيت بارده حيل ....
.... كمت ارجف بمكاني ، كمت بالكوه جسمي متكسر من الكعده والبرد ، طلعت من البيت اباوع محد ماكو بهاي المنطقه البيوت مهجورة ، دخلت البيت ادور على شي اللبسه فتت ، فتت الوحده من الغرف فتحت الكنتور طلعت ملابس ....
.... لبستهن ، ولميت شعري ، باوعت بوجهي بالمراية ، حلگي متفطر وطالع دم منه والدم يابس ، وداير عيوني صاير جوزي ، وجهي اصفر كل عافيتي رايحه ....
.... لفيت غترة على راسي ، طلعت من البيت على كيفي ، وماادري وين رايحه ، من اشوف ناس اخاف اسئلهم اني وين ،
النسوان كلهن مبوشات والزلم كلهم مسلحين ، عايشيين حياتهم عادي بس مستنفرين للحرب ....
.... وصلت المكان بي سيارات ، باوعت منتشرين بكل مكان ، ويفتشون بالناس ، غطيت وجهي ومشيت بين العالم ، واخاف لحد يشوفني ....
.... طلعت من هذا المكان ، دخلت منطقة مهجورة ، المكان بس صوت بزازين وجلاب ، عبالك داخله بفلم مال زومبي رعب ، ساعات واني امشي ومااعرف وين رايحه ، تعبت وجعت ، بس ماعندي فلوس اشتري اكل ....
.... وصلت المكان بي سيطرة ، تراجعت وضليت كاعده اراقبهم بلكي يرحون بس مراحو ، ختلت بيت محد بي ، طلعت بليل بكت صمونه ورجعت اكل بيها جنت حيل جوعانه ، الصبرني المي وبس ...
.... بقيت بهذا البيت جبت بطانية ، تلفلفت بيها ونمت ، ما احس الا احد فوك راسي يكعد بيه ، فتحت عيني ، واحد لابس هدوم دوا١عش ، وبسلاحه يدغ بيه ، فزيت مفزوعه ، انت منو ...
....( انتي من ، مبينه شارده ) ....
سكينة : مشارده من احد ، ذبيت البطانية ، وردت اكلع لزمني من ايدي ....
....( وقفي ، انتي يبحثون عنج بكل مكان ، صورج تارسه الديرة ) ...
سكينة : باوعت عليه ، صوري ، هجم عليه ويريد ياخذني ، انتبهت شايل سجينه ، سحبت السجينه وخليته بنص ركبته ، وعطت ، كــــافي عــــوفوني بـــحــالــــي ....
.... جاي اطلع جان يدخلون تلاثه باوعو الصديقهم ينازع، واني بيدي السجينه وايدي وجهي كلهن دم ،
هجمو عليه وجرجروني شالوني وخلوني بالسيارة ....
.... بهل لحظات جنت مصدومه اني شلون كتلك بني ادم ، ايدي امسح بيها بهدومي ، اني شسويت ، شلون روح طلعت بيدي ، ماحسيت الا ينزلوني من السيارة ، واجه ابو مصعب عليه جرني من ايدي ....
ابو مصعب : ستكون ايامك جحيم ...
سكينة : باوعت عليه ، اريد افسر الكاعد يصير وياي حلم لو حقيقة ، دخلني للغرفة ، وقفل الباب ....
.... ضربني راجدي يمكن بحياتي ماانسى ، جرني من شعري ورجع ضربني بوكسي على وجهي وكعت بالكاع ودفرني على بطني حسيت بطني انمردت مرد
....
.... عافني وطلع ضليت ابجي بمكاني ، اني صرت مجرمه ، وصرت موزينه ، اني اشرب مخـ..ـدرات ، شكو شي مو زين صار وياي ، ليش بس اريد اعرف ليش ....
.... مر يومين ، اني محبوسه بالغرفة ، انفتح الباب دخل للغرفة ، ودخلو الاكل ، خلا وكعد ياكل ،
تمددت ونمت ، كعدني ، بيده شربت ، مهتميت وعفته كبل عاط بيه ....
ابو مصعب : اشربي ...
سكينة : لزمت وشربته كله صكيت عليه ،
كل يومين تلاثه يدزولي شربت شكل ، رجعتلي هاي الحالة اذا ما اخذ حباية راسي يكوم يأذيني ، ليش هيج ديصير وياي ، اني صار هواي تاركه هذني الشغلات ...
.... كمت اتخبل ، اريد هسه حباية بس منين اطلبها ، افتر بالغرفة مثل المخبلة ، ايدي تنمل وجسمي يبرد ويعرگ ، دخل للغرفة ، كعد يباوع عليه ، انت شسويت بيه ، انتو دتخلولي شي بالاكل ....
ابو مصعب : عرفت بيج تتعاطين ، وبس ساعدتج ...
سكينة : اكمت افتر بالغرفه مثل المخبله ، الله لينطيكم ، الله ليوفقكم ، الله لينطيكم ، لزمني من ايدي ...
ابو مصعب : تردين هذا ...
سكينة : بيده شريط ، قلبي كام يرجف ، تراجعت ليورى ، لا لالا لالا ماريد ماااريد ، طلع حباية وخلاها على الجرباية اني كمت احوس عليها ....
.... لا سكينة ، لتسوين هيج ، لتضعفين ،
تعرفين اذا اخذتيها راح تسوين شغلات بدون وعي
، رحت كعدت بالزاوية وخليت راسي بين رجلية وابجي من كل قلبي ....
.... سمعت الباب انفتح وانسد ، رفعت راسي محد بالغرفة ، اخذت نفس ، باوعت الحباية بعدها بمكانه ،
شكد حاولت اسيطر على نفسي ماكدرت ، كمت وشربتها ، رحت تلفلفت بالبطانية ونمت ....
.... كعدت ثاني يوم مرتاحه ، اخذت نفس ، كام كل يوم يسوي هيج بيه يجي للغرفة يخلي حباية ويروح ، منا لمن كام بين يوم ويوم ...
.... وبعد صار كل تلث ايام كمت اتخبل اذا مااخذها اضل اتوسل بي يله ينطيني ، ابوس ايدك لتسوي هيج بيه ...
ابو مصعب : هذا عقاب كل شخص لا ينفذ اوامرنا ،
نفذي اوامري وسأعطيكِ ماتريدين ...
سكينة : وشنو اوامرك اني حاظرة ، طلع حباية وخلاها بيده ، كمت ارجف عليها ، لزم وحاوطني بين ايده ، وباسني بخدي ، رجع باوع عليه وخلا الحباية بحلكي ......
............
علي : عرفت وين بيت اريج عدها بيت صغير مساحتة ١٠٠ متر ، بس تارسته حرس ، كل يوم خميس تسوي حفله بيتها ويجون مجموعة ناس وياهم كومه حرس ، اني كلت اتوغل بين الحرس ....
.... باجر خميس لازم ادخل بيوم هاي الحفله ، صار سبوعين اني اخطط ، وباجر لازم ادخل واخذها ، رحت اشتريت هدوم مال حرس ، قميص ابيض وبنطرون اسود وقبوط اسود ....
....عدلت لحيتي وشعري ، لبست هدومي ، باوعت لعادل ها شلوني خوش بدي كارد ...
عادل : هههههههههههه, تخبل ، باوع دير بالك على نفسك ومثل مكتلك اني راح انتظرك براس الشارع بس رمشلي تلكاني گبال البيت ....
علي : ماشي ، طلعنا ، نزلت براس الشارع ، وكفت قريب البيت اراقب بس يجي واحد اروح ادخل بين الحرس ....
.... اجه واحد ويا سيارتين ، نزل رحت اتمشى بخطوات سريعه وصرت بينهم ، محد حس بيه ، لان حرس اريج عبالهم اني واحد من حرس هذا ، وهذوله عبالهم اني واحد من حرس اريج ....
.... دخلت للبيت ، ذبيت القبوط البيت حار مو مثل برا ثلج ، باوعت الحرس يفترون بالبيت ، وهي الكعده مسويتها فوك ....
.... صعدت فوك ، شفت رين طلعت من الغرفه درت وجهي واتجهت للقاعه الهذولة كاعدين بيها ....
.... شفتها نزلت ، باوعت كاعدين يلعبون قمار
ونسوان وشرب ، والوضع زبالـ..ـه ، تمشيت على كيف ، وصلت الباب الغرفه ، فتحت الباب ودخلت ....
.... باوعت بالغرفة محد ماكو ، سمعت صوت وحده تصيح ...
اريج : رين ، انطيني الشسوار من يمج تأخرت بسرعه ....
علي : باوعت الشسوار على الجرباية ، جريته ودخلت انطيته الها هي ملتهيه تمكيج وتعدل بروحها ....
اريج : هاي شبيج هيج واكفه وراي ....
علي : اندارت عليه ، فتحت عيونها بكل قوتهن ، وجهه صار اصفر ...
اريج : عـــــلــــي ....
علي : اي علي ، جريتها من شعرها وخليت السلاح براسها ، اي صوت اسمعه منج والله يااريج مااهتم للجيش الي مخليته وراج ، ولا اهتم الروحي ، واكتلج خلاص ....
اريج : بس افهمك ...
علي : امشي وياي بكل هدوء ، اني واحد بايع ومخلص ، وروحي مااهتم الها قيد شعره ، يعني انتي راح تخسرين حياتج وهذا العز العايشه بي ....
.... سحبتها ، ونزلنا جوه ...
... الحارس ( ست ايرج محتاجه شي ) ...
اريج : لا ، بس عندي شغل اكمله وارجع ، خلي عينك على البنات اليوم ...
... الحارس ( تأمريني ست اريج ) ....
علي : رمشت على عادل ، طلعنه للشارع ، اجه عادل طاير بالسيارة فتحت الباب ودفعتها بالسيارة وصعدت ...
بكل سهولة طلعنه .........)))))
سكينه تكول :
روحي تكسّرت فد نوب
لملمّها بحرف منكَ
.
.
.
.
رأيكم بالبارت
توقعاتكم للقادم 💥
الكاتبة : فاطمة علي ❤️