ဧကရာဇ်ဗျူဟာ [Di Wang Gong Lue]

အခန်း - ၉၅ (ဘယ်လိုဆင်ခြေမျိုးပဲပေးပေး မရဘူး )

သွမ့်ပိုင်ယွဲ့က ချူယွမ်အနောက်ဘက်မှ သိုင်းဖက်ချုပ်နှောင်လိုက်ရင်း တဖွဖွ ချော့ပြောလာသည်။

သို့သော် ချူယွမ်က ချက်ချင်းဆိုသလို သူ့အား တိုက်ခိုက်လာ၏။

သွမ့်ပိုင်ယွဲ့လည်း အတော်ပင် လန့်သွားကာ အသာရှောင်တိမ်းလိုက်၏။ သို့သော် ထိခိုက်မိသွားသောနေရာမှာ အတော်လေး နာကျင်ကိုက်ခဲသွားပေသည်။

"တကယ် စိတ်ဆိုးနေတာပဲ"

သွမ့်ပိုင်ယွဲ့ ရေရွတ်လိုက်သည်။

ချူယွမ်ကတော့ ဘာမှပြန်မပြော။ သို့သော် တိုက်ခိုက်လာသော ထိုးနှက်ချက်များကမူ ပို၍ပြင်းထန် ကြမ်းတမ်းလာ၏။

သွမ့်ပိုင်ယွဲ့အတွက်တော့ ဘယ်သောအခါမှ ချူယွမ်အား တန်ပြန်တိုက်ခိုက်ရက်မည်မဟုတ်ပေ ။ ထို့ကြောင့် ချူယွမ် တိုက်ခိုက်လာသမျှကိုသာ ရှောင်တိမ်းနေလိုက်သည်။ ထပ်ပြီး နောက်ဆုတ်လို့မရတော့မှ ချူယွမ်၏လက်ကောက်၀တ်ကို လှမ်းဖမ်းလိုက်ကာ ဘေးဘက်သို့ အသာလွှဲပစ်လိုက်၏။

ချူယွမ်က လက်မလျှော့သေးဘဲ သွမ့်ပိုင်ယွဲ့ရှေ့တည့်တည့်အား လက်ဖဝါးစောင်းဖြင့် ခုတ်ချလာသည်၊ သွမ့်ပိုင်ယွဲ့လည်း ဆက်ရှောင်နေလိုက်၏။ သို့သော် ဒီတစ်ခေါက် တိုက်ကွက်မှာ ဟန်ပြမျှသာဖြစ်ကြောင်း သွမ့်ပိုင်ယွဲ့မထင်မိ ၊ သို့နှင့် မျက်စိတစ်မှိတ်အတွင်းမှာပင် သွမ့်ပိုင်ယွဲ့ခါးထက်က လက်စွဲတော်ဓားမှာ ချူယွမ်လက်ထဲ ပါသွားပြီဖြစ်သည်။

"ရှင်းပြချင်သပဆိုလည်း ငါ့ကို အရင်အနိုင်ယူလေ "

လေထဲ ခုန်တက်သွားရင်း ချူယွမ် အော်ပြောလာသည်။

သွမ့်ပိုင်ယွဲ့က သူ့အား ပြန်လည်ခုခံနေရင်း လှမ်းဆွဲလိုက်ကာ ရင်ခွင်ထဲ ချုပ်နှောင်ထားလိုက်၏။ ထို့နောက် နားရွက်နားကပ်ကာ ခပ်တိုးတိုးပြောလိုက်သည်။

"မင်း အရင် စပြောတာနော်"

ချူယွမ် အံကိုကြိတ်ကာ ဓားဦးကိုလှည့်ပြီး သွမ့်ပိုင်ယွဲ့ဆီ ထိုးချလိုက်၏။ သွမ့်ပိုင်ယွဲ့က လည်း ရှောင်လိုက်၏၊ မျက်၀န်းထဲတွင်တော့ ပြုံးရိပ်သမ်းလို့။