سهام الانتقام

الفصل السادس عشر

-"يعني أنا السبب في أنك عايز تتجوز عشان مبخلفش؟! أنت واحد كداب لأن لو فارق معاك موضوع الخلفة كنت اتجوزت من الأول ، واضح كده أن في حاجة بينك وبين البنت دي".

دفعها بعيدا عنه باشمئزاز وكأنها خرقة بالية وقبض على ذراعها بقسوة جاذباً إياها نحوه وصاح بانفعال:

-"أنتِ كلامك مظبوط ، أنا فعلا بحب هند وهتجوزها ، بابا كان عنده حب من الأول لما رفض جوازي منك بس أنا اللي غبي وأصريت على موقفي وفي الأخر ادبست فيكِ ، واحدة متخلفة وغبية وكمان مبتخلفيش ومش مهتمية بنفسك ، إيه اللي يخليني أكمل حياتي معاكِ؟!"

أبعدته عنها وكفكفت دموعها وهتفت بصوت جاهدت حتى يبدو ثابتا غير متأثرا بالإهانات التي ألقاها في وجهها قبل قليل:

-"طيب بما أنك قرفان منِّي أوي كده طلقني ورح اتجوز ست الحسن والجمال بتاعتك".

-"أنتِ طالق".

وهكذا أتاها الجواب الذي لم تتوقعه أبدا وكأنه كان يريدها أن تطلب منه هذا الطلب حتى يتخلص منها.

خرج أمير من الغرفة وتركها تبكي بمرارة فهي كانت تتوقع منه أن يعترض على طلبها ويتشبث بها ولكنه ابتعد عنها وتخلص منها وكأنها وباء قاتل سيقضي عليه إذا ظل بجواره.

نظرت إلى السكين الذي يوجد في طبق الفاكهة الموضوع على الكومود ثم اقتربت منه وانتشلته ، وغرسته في معدتها.

شعرت بألم شديد وهي تتطلع إلى الدماء الغزيرة التي تخرج من بطنها ولكنها لم تكترث فكل ما كانت تريده في تلك اللحظة هو أن تتخلص من حياتها.

استفاقت رنا من أوهامها على صوت أمير الحاني وهو يسألها بلطف:

-"قوليلي بس إيه اللي مزعلك وأنا أوعدك أني هتصرف وهحل الموضوع".

نظرت رنا إلى نفسها بدهشة وأمسكت بقميصها تتفحصه ولم تجد عليه أي آثار للدماء لتدرك حينها أن كل ما حدث قبل قليل لم يكن سوى هاجس من تخيلاتها وكوابيسها.

-"لو عايز تتجوزها أنا مش همنعك بس طلقني الأول".

ألقت رنا تلك الكلمات بسذاجة جعلت أمير يهتف بغضب:

-"هي مين دي اللي هتجوزها بالظبط؟! ما تقولي يا رنا فيكِ إيه؟!"

لم يحصل أمير على إجابة من رنا فخرج من الغرفة وهبط الدرج ووقف أمام والده هاتفا بانفعال:

-"أنت عملت ليه كده مع رنا يا بابا ، ليه قولتلها الكلام ده؟!"

انتفض عاطف ناهضا من فوق الأريكة هاتفا بحدة:

-"لأنها لازم تفوق من الوهم اللي هي فيه ، لازم تفهم أنك هتتجوز وهتجيب أولاد ومش هتفضل قاعد جنبها تندب حظك عشان هي مبتخلفش".

اشتعل الغضب بداخل أمير فور سماعه كلمات والده:

-"يعني ده هو كل اللي حصل وأنا مش موجود هنا؟! أنت ضحكت على رنا وفهمتها أني هتجوز عليها!!"