سهام الانتقام

الفصل الرابع عشر

كان وائل يجلس ويفكر في أمرٍ ما وقطع شروده صوت عبد الرحمن الذي هتف بتساؤل:

-"إيه يا ابني مالك سرحان في إيه؟"

وضع وائل سبابته أسفل ذقنه وهو يهتف بحيرة:

-"هو أنت عمرك شوفت حد من غير ماضي ، أصل أنا شوفت واحدة ملهاش ماضي؟!"

رفع عبد الرحمن حاجبيه وهتف باستنكار وهو يضع ساقه اليمنى فوق اليسرى:

-"وده حصل إزاي إن شاء الله!! وتطلع مين مجهولة الهوية دي بقى؟!"

-"سهام عزام".

-"أنا مش فاهم أنت شاغل نفسك بموضوع سهام ليه؟! هو مش أنت اتأكدت أنها ملهاش في سكة تجارة البنات والكلام ده؟!"

هز وائل رأسه وقال:

-"سهام عزام دي عبارة عن لغز غامض ، أنا لما عملت تحريات عنها ودورت وراها اكتشفت حاجة غريبة أوي".

تحدث عبد الرحمن بنبرة شبه ساخرة:

-"وإيه الاكتشاف ده بقى يا أستاذ مستكشف؟!"

تجاهل وائل سخرية صديقه وتابع:

-"أنها ملهاش أي ماضي وكأنها مكنش ليها وجود أصلا قبل جوازها من عرفان الحسيني ، أنا مقدرتش أوصل لأي حاجة عن أصلها وأهلها أو حتى طفولتها وده شيء محيرني أوي".

هتف عبد الرحمن بجدية بعدما استوعب ما يرمي إليه صديقه:

-"أنت عايز تقولي أنها ملهاش تاريخ أساسا قبل ما تتجوز من عرفان؟! دي فعلا حاجة غريبة أوي وأكيد هي اللي مش عايزة حد يعرف حاجة عن ماضيها وعشان كده خفت كل حاجة عن حياتها القديمة وده السبب في أنك مقدرتش توصل لحاجة".

تمتم وائل بشرود:

-"يا ترى إيه حكايتك يا سهام وليه مخبية ماضيكِ؟!"

▪▪▪▪▪▪▪▪

كان عاطف يجلس ويتساءل كيف عرفت الشرطة بأمر الشحنة؟ أخذ يتوعد بأنه سيقتل من كان السبب في خسارته لسمعته ولكثير من أمواله.

قاطع تفكيره صوت طرقات على الباب ودخول سكرتيرته "نهى" التي قالت:

-"العميل الأجنبي وصل يا فندم".

-"تمام دخليه".

دخل العميل الأجنبي ومعه المترجم وأخذ يتحدث مع عاطف عن مشروع سكني ضخم وأعجب عاطف بالفكرة فهي ستعوض عليه ما فقده من أموال ، غادر العميل ودخلت بعده نهى وقالت:

-"أنا كلمت الشيخ اللي حضرتك طلبت مني أني أتصل بيه وقال أنه هيجي بكرة في المعاد".

هتف عاطف في نفسه بحنق:

-"أوف ، هي كانت ناقصة ذكرى وفاة شريف كمان!!"

▪▪▪▪▪▪▪▪▪