ဧကရာဇ်ဗျူဟာ [Di Wang Gong Lue]

အခန်း - ၈၁ (အဆက်)

"အရှင်မင်းမြတ်က ဘာအရိပ်အမြွက်မှလည်း ကြိုမပေးခဲ့ဘဲနဲ့ ချက်ချင်းကြီးကို တိုင်းရေးပြည်ရာကိစ္စတွေ အကုန်ချန်ထားခဲ့ပြီး နန်ယန်ကို စစ်ချီသွားတယ်တဲ့လေ။ ဒီလိုအဖြစ်မျိုးက -"

"ဒို့တတွေရဲ့အရှင်မင်းမြတ်က နန်းတက်စတုန်းကနဲ့ မတူတော့ဘူးလေကွယ်။  ရည်မှန်းချက်တွေကြီးလာပြီး ကိုးပြည်ထောင်နဲ့ သမုဒ္ဒရာလေးစင်းကို သိမ်းပိုက်ချင်လာတာလည်း ဆန်းလို့လား"

"ရည်မှန်းချက်ကြီးလာတာက ထားလိုက်ဦး။ ခုထက်ထိ ရှီးနန်ကိုတောင် အပိုင်ပြန်မရသေးတာ၊ မင်ချီမြစ်တောင်ပိုင်းတစ်ကြောလုံးက သွမ့်မျိုးနွယ်အပိုင်တွေချည်းပဲ။ အခုတော့ အရှင်မင်းမြတ်က ဒီအရေးကို စိတ်မပူရုံတင်မကဘဲ ရှီးနန်တပ်မတော်ကြီးကို ကိုယ်တိုင်ဦးဆောင်ပြီးတော့ကို တောင်ပိုင်းဘက်ဆင်းသွားတာတဲ့။ အဲ့တော့ မြစ်မြောက်ပိုင်းတစ်ခြမ်းလုံးက လွတ်မနေဘူးလား။ နန်ယန်နဲ့ ခုနေများ စစ်တိုက်လိုက်ရင် ရှီးနန်စံအိမ်တော်က တစ်ဖက်လှည့်နဲ့ တာ့ချူကို လာမသိမ်းနိုင်ဘူးလား။ အဲ့တော့မှ တာ့ချူက ဘေးကျပ်နံကျပ်နဲ့ နှစ်ဖက်စလုံးက ရန်သူတွေ ဝိုင်းတာ ခံရလိမ့်မယ်။ ဒီတိုင်းပြည်ကြီးသာ ကျွန်ုပ်တို့လက်ထက်မှာ ဆုံးရှုံးပျောက်ကွယ်သွားလို့ကတော့ကျွန်ုပ်ရော အသင်ရောပါ သားစဥ်မြေးဆက်တစ်လျှောက်လုံး ကဲ့ရဲ့ပြစ်တင်ခံကြရမှာ"

"အသင်တောင် ဒီလို စဥ်းစားမိသေးတာပဲ၊ အရှင်မင်းမြတ်ရော မစဥ်းစားတတ်ဘဲနေပါ့မလား"

လျိုတာ့ကျုံ့က ပြောပြောဆိုဆို ထောင်လျဲန်တာ၏ ခြေတစ်ဖက်ကို ဖြန်းခနဲ ရိုက်ပစ်လိုက်ကာ အေးအေးလူလူ ဆက်ဆို၏။

"အရှင်မင်းမြတ်သာ မစဥ်းစားမိလိုက်ဘူးထားဦး၊ စစ်သူကြီးရှန်တော့ ဒီကိစ္စကို တွေးမိမှာပါပဲ။ မင်းသား(၉)လည်း တွေးမိမှာပဲ။ သူတို့တောင်မှ ဘာမှဝင်မပြောသေးတာဆိုတော့ အရှင်မင်းမြတ်က နန်ယန်ကို စစ်ချီသွားတယ်ဆိုတာ တကယ်ကျူးကျော်သိမ်းပိုက်ဖို့မှန်းရော သေချာနေလို့လား"

ထောင်လျဲန်တာ မျက်နှာမဲ့သွား၏။

"အကျွန်ုပ်ရဲ့အကြံကို နားထောင်လှည့်စမ်းပါ။ မုန့်စားပြီး စိတ်အေးအေးထား ။ အရှင်မင်းမြတ်က စိတ်ကို အနားပေးဖို့ ၊ ရှုမျှော်ခင်းတွေ ရှုစားဖို့ ထွက်သွားတာလည်း ဖြစ်နိုင်တာပဲ။ ဒါမှမဟုတ် စုံစမ်းထောက်လှမ်းစရာ အမှုကိစ္စရှိလို့လည်း ဖြစ်နိုင်တာပဲ။ ဘာလို့ အရမ်းစိုးရိမ်နေတာလဲ"