سهام الانتقام

الفصل الثاني عشر

في منزل عبد الرحمن ، كانت تقام خاتمة على روح المقدم ناصر وزوجته هيام فقد كانت هذه هي ذكرى وفاتهما.

-"ربنا يرحمهم يا ابني ، كل سنة بشوفك وأنت واقف الوقفة دي قدام الصور وعينك مليانة قهر وحسرة".

قالتها فاطمة وهي تنظر إلى عبد الرحمن الذي يتأمل صور والدية وشعور الحسرة يتغلغل في أعماقه ، التفت لها عبد الرحمن وهتف بمرارة:

-"كل سنة بفكر نفسي أني لازم أنتقم من اللي عمل كدا في أهلي ، أنا لحد دلوقتي صورة أمي وهي بتموت قدام عينيا مش مفارقة خيالي ، فات سنين كتيرة أوي وعمري ما نسيت أني خسرت أهلي الاتنين في يوم واحد".

عاد عبد الرحمن بذاكرته إلى ذلك اليوم الذي خسر به والديه ، كان يجلس بجوار والدته التي تبكي في المستشفى بعدما أخبرها الطبيب بوفاة ناصر.

هتف عبد الرحمن بحزن وهو ينظر إلى دموع والدته:

-"خلاص يا ماما ، بابا أكيد في الجنة وأنا مش هسيب حقه متقلقيش".

هتفت فاطمة بنبرة باكية وقد تدحرجت دموع الحسرة من مقلتيها:

-"عيط يا قلبي ، متقفش كدا أنت لسه صغير على الجمود ده".

هز عبد الرحمن رأسه قائلا بحزم وكأنه رجل في الثلاثين من عمره وليس طفل في السابعة من عمره:

-"أنا مش صغير وبكرة هبقى ظابط وهجيب حق بابا".

أخذت والدته تبكي بشدة وصرخت في وجهه بانفعال:

-"إياك أسمعك تقول أنك هتبقى ظابط فاهم ، أنا مش مستعدة أخسرك أنت كمان ، كفاية عليا خسارة أبوك".

اقتربت منها فاطمة وحاولت احتواء الموقف:

-"اهدي يا هيام متعمليش في نفسك كده ، ده قضاء ربنا".

شعرت هيام أنها غير قادرة على التنفس واحمر وجهها بالكامل ليهتف عبد الرحمن بفزع:

-"ماما مالك فيكِ إيه؟"

صرخت فاطمة بصوت مرتفع:

-"الحقونا يا جماعة هاتوا أي دكتور بسرعة".

حضر مجموعة من الأطباء والممرضات وأخذوا هيام بسرعة إلى إحدى الغرف ووضعوها على أجهزة التنفس ، هتف الطبيب بجدية:

-"جهزوا أوضة العمليات حالا".

نظر إلى فاطمة وسألها:

-"أنتِ عارفة أنها عندها مشكلة في القلب؟"

أومأت فاطمة قائلة:

-"أيوة عارفة بس هي بتاخد أدوية وماشية عليها بانتظام ، هو إيه اللي حصلها يا دكتور؟"

أجابها الطبيب بأسف:

-"واضح أن موت جوزها أصر على قلبها ومفيش حل دلوقتي غير أنها تدخل العمليات ومش هكدب عليكِ حالتها صعبة ونسبة النجاح قليلة وأنا محتاج حضرتك تمضي على الإقرار ده".